Nos No Ta Stop di Traha!

“NOS NO TA STOP DI TRAHA” ta e mensahe cu bo ta haña ora bo bishitá un cas extraordinario na Tokio, Hapon. Un famia di 22 homber i muher, cu un promedio di 70 aña di edad, ta biba ei. Nan ta uní no pa medio di laso familiar sino pa medio di un interes comun—sirbishi di misionero. Nan a perseverá den e trabou di predicacion tempu completo pa un total di 1.026 aña! E tres miembronan mas bieu a nace na 1910. Siete di nan a cuminsá nan sirbishi di tempu completo miéntras nan tabata tiener. Nuebe di nan a mira e crecementu dje trabou di predicacion di Reino na Hapon desde su infancia despues di Guera Mundial II.—Isaías 60:22.

Sin embargo, e edificio di seis piso aki dje ex-sucursal di Watch Tower ta un lugá di animacion, specialmente pa motibu dje spiritu, e inclinacion dominante, dje misioneronan cu ta biba ei. Aunke mayoria di nan tin limitacionnan físico relacioná cu edad i kebranto di salú, ningun dje guereronan spiritual aki ta cla pa entregá. E Testigonan hapones a renobá e edificio completamente pa nan, percurando un Salon di Reino den e bodega i un lift.

Loke Ta Haci Nan Felis

Despues di a pasa asina tantu aña den nan asignacion, e misioneronan aki ta sinti cu esaki ta nan cas. “Ora mi a bai bek Australia p’e congreso di districto e último zomer aki,” un dje miembronan mas bieu dje famia a bisa, “mi tabata cla pa regresá cas despues di dos siman!” Nan ta stima e pueblo cu nan ta sirbiendo i a cultivá un cariño profundo pa nan. Tur e misioneronan ta apreciá cartanan i yamadanan di telefon cu ta recordá nan di actividadnan di pasado.

Esei ta e resultado di un ministerio diligente. Impulsá pa amor pa Jehova, e misioneronan a predicá e Palabra di Dios urgentemente bou di vários circunstancia. (Compará cu 2 Timoteo 4:2.) “Nos a entrená nos mes pa ta gososo netamente pasobra nos ta sirbiendo Jehova,” Vera MacKay, kende a sirbi na Hapon pa 37 aña, ta bisa. “Asta ora ningun hende bini na porta, nos tei pa duna testimonio tocante Jehova.”

Diesdos dje misioneronan aki nunca a casa, pero nan ta felis di por a sirbi e Señor sin distraicion. (1 Corintionan 7:35) Gladys Gregory, kende a sirbi como misionero pa 43 aña, ta un di nan. E ta bisa: ‘Afin di por tabatin mas libertad pa Jehova su sirbishi, mi a drenta e trabou di pionero, mas despues Galad [Scol Bíblico di Galad di Watchtower], i despues e trabou di misionero. Sin cu mi a haci ningun voto pa keda soltero, mi a permanecé soltero, i mescos cu un cantidad di otro Testigonan, esei no a duel mi nunca.”

Disponibilidad pa Ahustá Nan Mes

Aunke algun hende ta bira caprichoso segun cu nan ta bira bieu, e misioneronan tabata dispuesto pa ahustá nan mes. Lois Dyer, Molly Heron i Lena i Margrit Winteler tabata den un cas di misionero mas chikitu den un área residencial di Tokio. Nan a biba ei pa mas cu 20 aña i a bira cerá cu e hendenan den e localidad ei. Den nan teritorionan, e ruman muhernan Winteler tabatin 40 persona den nan rutanan di revista, i Molly i Lois tabatin 74 den di nan. Anto, e Sociedad a puntra nan pa muda bai n’e cas di misionero di seis piso den curason di Tokio. “Mi tabata desanimá i infelis na principio,” Lena ta admití. Sin embargo, manera semper, nan a ahustá nan mes na nan asignacion nobo. Con nan ta sinti nan awor? “Masha felis,” Lena ta contestá. “Awor tin dos ruman betelita aki pa cushiná pa nos i pa limpia e cas. Nan ta percurá bon pa nos.” Nan tur ta di acuerdo cu Lois, kende ta bisa: “E cuido amoroso cu e organisacion di Jehova ta duna ta yuda nos perseverá.”

Norrine Thompson tambe a ahustá su mes na circunstancianan nobo. “Pa 15 aña,” e ta bisa, “mi tabatin e privilegio di compañá mi esposo [originalmente di Nueva Zelandia] den e trabou di districto ora henter Hapon tabata un solo districto.” Sin embargo, e salú di su esposo a deteriorá, i e tabatin cu vence e prueba di mas grandi di su bida—morto di su casá 18 aña pasá. “N’e tempu ei,” e ta bisa, “loke a yudá mi continuá den e trabou di misionero tabata e amor cu e rumannan di rond Hapon a demostrá, huntu cu oracion i kedamentu ocupá den sirbishi.”

Cobrando Animo Apesar di Problema di Salú

“Mayoria tin un of otro problema di salú, pero nan ta alegre, i nan deseo pa sirbi ta un cualidad sobresaliente,” Albert Pastor, e superintendente dje cas di misionero, ta bisa. Pa cuida e misioneronan, un dokter i su esposa, kende ta un enfermera, a ser asigná n’e cas.

Riba un dia, rond di tres aña pasá, Elsie Tanigawa, graduado dje di 11 klas di Scol di Galad, di ripiente a perde bista den su wowo robes. Cuater luna despues, su wowo drechi tambe a ser afectá. “Tin biaha mi ta bira un poco desanimá cu mi no ta capas pa sirbi manera mi tabata haci un tempu. Pero cu tur e provisionnan bondadoso dje Sociedad i e yudansa amoroso di mi partner i di otro rumannan, mi ta sigui haña goso den Jehova su sirbishi,” Elsie ta bisa.

Shinichi Tohara i su esposa Masako, kendenan tabata Elsie su compañénan di klas di Galad, a enfrentá hopi prueba relacioná cu nan salú durante e último par di aña. Pa Shinichi, un orador capas, e echo cu e no por mira su notanan debí na su bista deficiente ta un gran dificultad. Aunke el a pasa den operacionnan grandi i chikitu den añanan recien, su wowonan ta lombra ora e ta papia tocante un studiante di Bijbel di 90 aña di edad cu e ta yudando awor.

Apesar di tin “un sumpiña den carni,” e misioneronan aki ta considerá nan debilidadnan mescos cu apostel Pablo, kende a bisa: “Ora mi ta débil, e ora ei mi ta poderoso.” (2 Corintionan 12:7-10) I poderoso nan ta en berdad! Nan ta lanta siet’or pa adoracion di mainta tur dia. Despues di desayuno, esnan físicamente capas pa haci esei ta sali den e ministerio di mainta trempan.

Richard i Myrtle Shiroma ta entre esnan cu regularmente ta sali den sirbishi. Myrtle a haña atakenan celebral causá p’e cuminsamentu di arterioclerósis dje celebro na 1978, pero el a compañá su esposo den e trabou biahero te cu november 1987. Awor Richard, kende mes tin 70 aña di edad, ta yuda Myrtle haci tur cos. Richard ta lanta 5:00 a.m., e ta lanta Myrtle for di cama, bañ’é, bisti’é, e ta pone su makiahe p’e i ta dun’é cuminda na cuchara. Despues e ta sali cuné den su rolstoel pa sirbishi di veld tur mainta, bayendo di cas pa cas pa rond di un ora i despues ta duna testimonio na hende na parada di bus. Myrtle no por papia mas, pero e último palabranan cu el a expresá tabata Dendo, dendo, palabranan hapones pa “Predicacion, predicacion.”

Nan yu muher, Sandra Sumida, a muda p’e cas di misionero pa yuda nan. Recientemente Sandra a perde su kerido esposo di un atake di curason. E ta apreciá e areglo bondadoso di Watch Tower Society di asign’é bek na Hapon for di Guam, unda el a sirbi como misionero cu su esposo. “Semper mi a sinti cu mi no a yuda mi mayornan mashá pasobra mi tabata na Guam,” e ta bisa. “Mi ruman muher, Joanne, a cuida nan den e cas aki. Pues ora e oportunidad a presentá, mi a sintí mi bon. Sintiendo cu nan tin mester di mi aki tabata mi terapia desde e morto repentino di mi esposo.”

Ketu Bai Activo

Aunke e misioneronan ta sinti e efectonan di behes, nan ta nenga di entregá nan spiritu di misionero. (Salmo 90:10; Romanonan 5:12) Jerry i Yoshi Toma, kendenan tabata entre e promé graduadonan di Galad cu a bini Hapon, ainda ta sali den e teritorio di negoshi den centro dje stad di Shibuya. “Ora nos a yega n’e edificio di dos piso cu tabata pará aki na 1949, nos tabata bai di un cas cobá bou di tera pa otro. Awor Tokio a cambia den un metrópoli. Nos ta bieu i no por traha mes tantu cu ántes. Pero ora nos bini bek for di predicacion, nos ta masha refrescá,” Yoshi ta bisa.

Lillian Samson ta misionero na Hapon pa 40 aña i ta disfrutá di su ministerio masha tantu. “Awor mi ta yudando un señora di 80 aña di edad kende a studia cu mi partner, Adeline Nako, kende ta bek na Hawai cuidando su mama enfermo. Recientemente e señora a bira un publicador di Reino despues cu el a vence e problema di adoracion di antepasado. El a bai n’e tempel i a bisa e casá dje pastor, ‘Mi a combertí na cristianismo!’ ” Cu tal goso den su bida, Lillian nunca a lamentá e dia ora, cu 19 aña, el a kita for di su trabou seglar i a cuminsá traha pionero.

Ruth Ulrich i Martha Hess, partnernan misionero pa mas cu 45 aña, a traha for dje cas di misionero aki pa 35 aña. Nan a establecé nan mes bon den e teritorio. Un biaha un superintendente di circuito a puntra Martha: “Mi por a fia bo cara pa bai di cas pa cas?” Hende tabata conocé Marta su cara i tabata saca man p’e revistanan, miéntras e superintendente di circuito tabatin basta dificultad pa cuminsá combersacionnan.

Ruth tin un señora den su ruta di revista kende no por lesa debí na problemanan di salú. Tog, e señora ta sigui ricibí e revistanan i asta a aceptá e buki kaft duru El hombre en busca de Dios. Ruth a puntra su mes si e mester a sigui entregá e revistanan ya cu a parce cu ningun hende tabata lesa e literatura. Anto riba un dia e esposo dje señora a acercá Rut cu e buki En busca, bisando: “Esaki ta un buki maraviyoso! Mi a les’é di kaft pa kaft dos biaha.” Ruth a cuminsá un studio di Bijbel cuné i su esposa.

E cas di misionero aki riba su mes ta atraé hende interesá. Riba un anochi, un homber hóben a bini n’e cas i a bisa: “Mi a comprendé cu si mi bini aki, mi por haña yudansa pa siña e Bijbel.” Un studio di Bijbel a ser cuminsá cuné. Como koki den un restorant chines, e tabata traha cu un señora soltera kende tabata expulsá pa hopi aña. Ora un publicador a bishitá e restorant, e revistanan cu el a laga a bai resultá den e cushina. E koki hóben a gusta nan i a cuminsá haci e ex-Testigo pregunta. Incapas pa contestá nan, el a bisa e koki pa bishitá e cas di misionero. Awor e ta sirbiendo como sirbidor ministerial i pionero. Cu tempu, e señora expulsá a ser restorá, i finalmente e tambe a bira pionero regular.

Tur e misioneronan den e cas tin aprecio pa loke Jehova a haci pa nan. Nan a bini di Australia, Cánada, Hawai, Suisa i Merca, i 11 tabata di e di 11 klas of klasnan mas promé dje scol di misionero di Galad. Nan a mira e progreso dje trabou di Reino na Hapon i ta compartí e sintimentunan di Rey David, kende a bisa: “Un homber hóben mi tabata, tambe mi a bira bieu, i tog nunca mi a mira un hende hustu henteramente bandoná, ni su yunan buscando pan.” (Salmo 37:25) Apreciando Dios su cuido amoroso, e misioneronan aki ta determiná pa no stop di traha sino pa sigui ketu bai sirbiendo Jehova.