E Promesa di Un Mundu Sin Corupcion

CORUPCION a penetrá den tur nivel di sociedad. Sea e ta den gobiernu, ciencia, deporte, religion of comercio, corupcion ta parce di ta fuera di control.

Den un pais tras di otro, noticianan tristu di escándalonan di corupcion ta forma e titularnan di noticia. Hopi hende cu a haci un compromiso pa sirbi e interesnan dje pueblo ta ser desenmascará como sirbiendo nan propio interesnan ricibiendo soborno i comision ilegal. E asina yamá crímen di col blancu ta masha prevalente. Mas i mas hende di alto rango social of económico ta culpabel di violacionnan ético i criminal serio en coneccion cu nan ocupacionnan diario.

Tin un preocupacion creciente riba loke un revista europeo ta describí como “ ‘corupcion dje grandinan’—e práctica mediante cua funcionarionan haltu, ministernan i, masha frecuentemente, hefenan di estado ta rekerí pago promé cu nan aprobá cómpranan i proyectonan grandi.” Den un pais “dos aña di investigacion policial i arestonan casi tur dia te ainda no a detené esnan cu ta incoregiblemente corupto,” e revista británico The Economist ta declará.

Debí na tal corupcion extenso, awe hopi hende ta sinti cu no tin ningun hende cu nan por confia. Nan ta rezoná e sintimentu dje escritor di Bijbel David ora el a bisa: “Nan tur a desviá, tur ta igualmente corupto; no tin ningun cu ta haciendo loke ta bon, ni sikiera un.”—Salmo 14:3.

Con abo ta enfrentá e realidad di corupcion extenso? Awe mayoria hende simplemente ta ignor’é. Pero asta si bo ignorá corupcion, lo e perhudicá bo tog. Con?

Corupcion Ta Afectá Bo

Tantu corupcion di nivel haltu como na escala chikitu ta aumentá e costo di bida, ta reducí e calidad di productonan i ta resultá den ménos empleo i salario mas abou. Por ehempel, ta ser calculá cu crímennan manera fraude ta costa por lo ménos dies biaha mas tantu cu e costo combiná di ladronicia i robo. The New Encyclopædia Britannica (1992) ta declará cu “e costo di crímen di corporacion na Merca a ser calculá na US$ 200.000.000.000 pa aña—tres biaha e costo di crímen organisá.” E fuente aki ta splica cu aunke e efectonan kisas no ta ser detectá mesora, “crímennan asina tin un impacto enorme riba e siguridad dje trahadornan, consumidornan i e medio ambiente.”

E frutanan amargo di corupcion ta pone nos corda riba e palabranan di Rey Sálomon: “Mi mes a regresá pa mi mira tur e actonan di opresion cu ta ser hací bou di solo, i, mira! e lágrimanan di esnan cu tabata ser oprimí, pero nan no tabatin consolador; i di parti di nan opresornan tabatin poder, di manera cu nan no tabatin consolador.”—Eclesiástes 4:1.

Nos mester conformá nos mes anto cu corupcion? E ta algu inevitabel? Un mundu sin corupcion ta un soño imposibel? Felismente cu no! Bijbel ta siña nos cu inhusticia i maldad pronto lo ser eliminá.

Loke Bijbel Ta Bisa Nos

Bijbel ta bisa nos cu corupcion a cuminsá ora un angel poderoso a rebelá contra Dios i a instigá e promé pareha humano pa uni cuné. (Génesis 3:1-6) Nada bon a resultá for di nan curso pecaminoso. Mas bien, for dje dia cu Adam i Eva a peca contra Jehova Dios, nan a cuminsá sufri e mal consecuencianan di corupcion. Nan curpa a cuminsá e proceso lento di degeneracion, hibando na morto inevitabel. (Génesis 3:16-19) For dje tempu ei, historia ta abundá cu ehempelnan di soborno, engaño i fraude. Tog, mayoria violador di ley ta parce di ta scapa castigu.

Distinto for di criminalnan comun, ehecutivonan i políticonan corupto masha poco biaha ta bai prizon of ta haci restitucion pa nan ganashi adkerí ilegalmente. Debí n’e caracter clandestino di soborno, comision i pagonan ilegal, hopi biaha ta difícil pa desenmascará corupcion na nivel haltu. Pero esaki no ta nificá cu un mundu sin corupcion ta un soño imposibel.

Liberacion for di corupcion lo bini for dje Creador di hende, Jehova Dios. Intervencion divino ta e único solucion. Pakico? Pasobra e enemigu invisibel di humanidad, Satanas e Diabel, ta sigui engañá humanidad. Manera nos ta lesa na 1 Juan 5:19, “henter e mundu ta drumí den poder dje malbado.” Kico otro lo por splica e aumento di corupcion—hopi di esei sin ser castigá?

Ningun esfuerso humano por dominá Satanas i su demoñonan. Solamente intervencion divino por garantisá humanidad obediente “e glorioso libertad dje yunan di Dios.” (Romanonan 8:21) Jehova ta primintí cu pronto Satanas lo ser restringuí di manera cu e no por gaña humanidad mas. (Revelacion 20:3) Miéntras tantu, si nos ta deseá di biba den Dios su mundu nobo liber di corupcion, nos mester rechasá e camindanan corupto dje mundu aki.

Hende Por Cambia

Den e dianan di Jesucristo, tabatin esnan cu a abusá di nan poder i a oprimí nan próhimo. Por ehempel, cobradornan di belasting tabata conocí pa nan prácticanan corupto. Esaki a existí apesar dje ley explícito di Dios: “Bo no mester aceptá un soborno, pasobra e soborno ta ciega hende di bista cla i por troce e palabranan di hende hustu.” (Exodo 23:8) Zakeo, un cobrador principal di belasting, a admití cu el a cometé extorsion dor di acusacion falsu. Pero en bes di promové reforma social extenso, Jesus cu empeño a animá individuonan pa repentí i bandoná nan camindanan corupto. Como resultado, e cobradornan di belasting supuestamente corupto manera Mateo i Zakeo a bandoná nan estilo di bida di ántes.—Mateo 4:17; 9:9-13; Lucas 19:1-10.

Esnan enbolbí den prácticanan desonesto awe di igual manera por rechasá corupcion bistiendo “e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:24) Kisas no ta fácil pa paga belasting onestamente of pa stop di participá den proyectonan cuestionabel. Tog, e beneficionan ta bal cualkier esfuerso.

Ya cu nan no ta ser influenciá mas dor dje mundu corupto aki, esnan cu ta interesá den e bienestar di otronan ta disfrutá di pas interno. Nan no tin e temor di ser gará den malecho. Mas bien, nan ta disfrutá di un bon concenshi. Nan ta imitá e ehempel bíblico di Daniel e profeta. E relato di Bijbel ta bisa cu funcionarionan haltu tabata buscando constantemente pa haña un of otro pretexto contra Daniel. “Pero no tabatin ningun pretexto ni ningun cos corupto cu nan por a haña, pasobra e tabata digno di confiansa i ningun negligencia ni ningun cos corupto a ser hañá den dje.”—Daniel 6:4.

Jehova Su Promesa

Jehova ta primintí cu “aunke un pecador por ta haciendo malu cien bes i ta continuá pa un tempu largu manera e ta gusta, sin embargo mi ta conciente tambe cu lo bai bon cu esnan cu ta teme e Dios berdadero, pasobra nan tabata den temor di dje. Pero di ningun manera lo bai bon cu e malbado, tampoco lo e prolongá su dianan cu ta manera un sombra, pasobra e no ta den temor di Dios.”—Eclesiástes 8:12, 13.

Ki un alivio ora corupcion no ta causa infelicidad mas! Ki un bendicion pa biba pa semper den un mundu sin corupcion! Esaki no ta imposibel. Bijbel ta papia dje “speransa di bida eterno cu Dios, kende no por gaña, a primintí promé cu tempu di duracion largu.” (Tito 1:2) Si bo ta odia corupcion i ta stima husticia, bo por wel mira e cumplimentu di Dios su promesa di un mundu sin corupcion.

[Plachi na página 4]

Corupcion ta comun i coriente den gobiernu i den círculo comercial

[Plachi na página 5]

Corupcion hopi biaha ta afectá trato cu funcionarionan público