Obedencia Piadoso den un famia dividí pa motibu di religion

“E TA haci hopi mas dolor cu cualkier golpi físico. . . . Mi ta sinti como si fuera mi a ser heridá rond mi curpa, i tog ningun hende por mir’é.” “Tin biaha mi ta sintí mi asina frustrá cu mi kier stop di sigui lucha . . . of bandoná cas i nunca bolbe bek.” “Tin biaha ta difícil pa razoná cu sano huicio.”

E palabranan ei cargá cu emocion ta revelá sintimentunan di desesperacion i soledad. Nan ta bini for di víctimanan di abusu verbal—acusacion, menasa, uso di nombernan degradante, ser ignorá completamente cu menosprecio—i asta abusu físico for di partner i miembronan di famia. Pakico e hendenan aki ta ser tratá asina malu? Simplemente pa motibu di creencia religioso cu ta diferenciá for di otro. Bou dje circunstancianan aki, bibando den un famia dividí pa motibu di religion ta nificá un berdadero lucha pa adorá Jehova. Sin embargo, hopi cristian cu a bira víctima den e manera ei ta logra manifestá obedencia piadoso.

Ta bon cu tal angustia i tension no ta ser hañá den tur famia dividí pa motibu di religion. No obstante, e ta existí sí. Bo famia ta cuadra cu e descripcion aki? Si ta asina, por ta cu bo ta haña ta difícil pa mantené respet pa bo partner of pa bo mayornan. Si bo ta un esposa den e situacion ei of yu den un ambiente asina, con bo por logra mustra obedencia piadoso den un cas dividí pa motibu di religion? Ki sosten otronan por duna? I con exactamente Dios ta mira e asuntu?

Pakico Ta Asina Difícil pa Ser Obediente?

E mundu su egoismo i ingratitud huntu cu bo mes tendencianan imperfecto ta haci obedencia piadoso un lucha constante. Satanas sa esaki, i su propósito ta pa kibra bo determinacion di ser un cristian. Hopi biaha e ta usa miembronan di famia cu tin poco of ningun aprecio i respet pa normanan piadoso. Bo balornan spiritual i moral elevá hopi biaha ta basta diferente for di esnan di bo famia incrédulo. Esaki ta nificá opinionnan conflictivo riba conducta i actividad. (1 Pedro 4:4) E presion pa alehá bo for dje norma cristian por ta intenso, ya cu bo a obedecé e mandamentu: “Stop di participá cu nan den obranan infructífero cu ta pertenecé na scuridad.” (Efesionan 5:11) Den nan bista nada cu bo haci no ta bon mas. Tur esei ta debí na bo religion. Ora un mama tabatin e carga adicional pa cuida yu enfermo, el a pidi yudansa for di su esposo i a haña un contesta sarcástico, “Bo tin tempu pa bo religion; bo no mester di yudansa.” Comentarionan asina ta haci’é mas difícil pa ser obediente.

Tambe sa sosodé cu bo por tin desacuerdo riba asuntunan cu no ta un violacion directo dje Scritura. Sin embargo, bo ta realisá cu bo ta parti di un famia i cu te n’e grado ei bo tin cierto obligacionnan. “Mi ta bira masha perturbá ora mi pensa riba con mi tata ta trata nos pasobra mi sa cu e ta sinti su mes solitario,” Connie ta bisa. “Mi tin cu recordá mi mes hopi biaha pa no haña resentimentu p’e oposicion di mi tata. Mi mester bisa mi mes cu tin un motibu fuerte pakico e ta reaccioná negativamente of ta rechasá nos posicion. Satanas ta e gobernante dje sistema di cosnan aki.” Susan, kende ta casá cu un incrédulo, ta revelá: “Den cuminsamentu mi tabata sinti cu mi kier a separá for di mi casá—pero awor no mas. Mi tabata sa cu Satanas tabata usand’e pa poné mi na prueba.”

Satanas su esfuersonan pa hací bo sinti bo indigno casi por parce cu e lo no stop nunca mas. Dianan por pasa sin ningun comunicacion cu bo partner. Bida por bira masha solitario. Esaki ta caba cu confiansa i respet propio i ta pone bo obedencia piadoso na prueba. Yunan tambe ta sinti e agotamentu emocional i físico. Na un ocasion, maske nan mayornan a oponé, tres sirbidor hubenil di Dios a asistí fielmente na reunionnan cristian. Un di nan, awor un minister di tempu completo, a admití: “Nos tabata sinti nos zonzá i agotá; nos no tabata por a drumi; e tabata kibra nos curason.”

Kico Dios Ta Spera di Bo?

Obedencia na Dios semper ta bini promé, i obedencia relativo n’e hefatura dje esposo mester ta semper manera Jehova ta manda. (Echonan 5:29) Esei por ta difícil, sin embargo e ta posibel. Sigui acudí na Dios pa yudansa. E kier pa bo “adorá cu spiritu i cu berdad” i pa bo scucha na dje i someté bo na su direccion. (Juan 4:24) Conocimentu for dje Palabra di Dios, segun cu e ta yena e clase corecto di curason, ta motivá na obedencia boluntario. Aunke bo circunstancianan personal por cambia, ni Jehova ni su Palabra no ta cambia. (Malakías 3:6; Santiago 1:17) Jehova a asigná hefatura n’e esposo. Esaki ta keda e caso sea e esposo ta aceptá Cristo su hefatura of no. (1 Corintionan 11:3) Aunke esaki por ta difícil pa biba cuné si constantemente bo ta topa cu abusu i humiyacion, disipel Santiago ta bisa: “E sabiduria djariba ta . . . cla pa obedecé.” (Santiago 3:17) Pa reconocé e hefatura aki inekibocablemente i pa acept’é ta rekerí e spiritu di Dios, particularmente su fruta di amor.—Galationan 5:22, 23.

Ora bo ta stima un persona, ta mas fácil pa mustra obedencia piadoso pa cu e autoridad cu el a ricibí divinamente. Efesionan 5:33 ta consehá: “Laga cada un di boso individualmente stima su esposa mescos cu su mes; en cambio, e esposa mester tene respet profundo pa su esposo.”

Considerá Jesus. Nan a abusá verbalmente i físicamente di dje, tog nunca e no a zundra ningun hende. El a mantené un fama intachabel. (1 Pedro 2:22, 23) Pa Jesus a sufri e gran insultonan ei, e tabatin mester di un tremendo curashi i amor firme pa su Tata, Jehova. Pero, amor “ta wanta tur cos.”—1 Corintionan 13:4-8.

Pablo a recordá su co-trahador Timoteo, i e ta recordá nos awe: “Dios a duna nos no un spiritu di cobardia, sino esun di poder i di amor i di sano huicio.” (2 Timoteo 1:7) Amor profundo pa Jehova i pa Jesucristo por motivá bo na obedencia piadoso ora e situacion ta parce imposibel pa wanta. Sano huicio lo yudá bo mantené un punto di bista balansá i keda enfocá riba bo relacion cu Jehova i Jesucristo.—Compará cu Filipensenan 3:8-11.

Casánan Cu Ta Logra Mustra Obedencia Piadoso

Tin biaha bo mester warda un tempu largu pa mira con Jehova lo resolvé bo problemanan. Sin embargo, su man nunca ta corticu. “Semper haci e cosnan cu Jehova ta duná bo e derecho i privilegio di haci—ador’é na reunion i asambleanan, studia, sali den sirbishi i haci oracion,” un persona cu ta logrando pa mustra obedencia piadoso ta consehá. Ta bo esfuersonan Jehova ta bendicioná, no meramente bo logronan. Na 2 Corintionan 4:17, apostel Pablo a bisa cu ‘e tribulacion ta momentáneo, pero e ta obra pa nos un gloria cu ta eterno.’ Meditá riba esaki. Lo e ta un factor stabilisador pa bo. Un esposa ta corda: “Mi bida di famia no ta birando mihó, i tin biaha mi ta puntra mi mes si Jehova ta contentu cu mi. Pero un cos cu mi ta considerá como su bendicion ta e echo cu mi ta sali for dje situacionnan difícil aki mihó cu mi esposo. Sabiendo cu nos accionnan ta agradá Jehova ta haci henter e lucha bale la pena.”

Jehova ta primintí cu lo e no lagá bo pasa den situacionnan mas ayá di loke bo por wanta. Confia den dje. E sa mihó cu bo, i e conocé bo mihó cu bo conocé bo mes. (Romanonan 8:35-39; 11:33; 1 Corintionan 10:13) Haciendo oracion na Jehova den circunstancianan difícil ta yuda. Haci oracion pa su spiritu guiá bo, specialmente ora bo no sa ki caminda pa coge of con pa trata cu un situacion. (Proverbionan 3:5; 1 Pedro 3:12) Suplik’é constantemente pa pacenshi, dominio propio i humildad pa obedecé e autoridad den bo bida. E salmista a bisa: “Jehova ta mi baranca skerpi i mi fortalesa i e Proveedor di escape pa mi.” (Salmo 18:2) Cordando riba esaki ta un yudansa fortalecedor pa esnan den casnan dividí pa motibu di religion.

Riba tur cos, haci tur bo esfuerso pa haci bo matrimonio unu felis. Sí, Jesus a mira di antemano cu e bon nobo lo causa division. Sin embargo, haci oracion pa nunca ningun division ser causá dor di bo actitud of conducta. (Mateo 10:35, 36) Cu e obhetivo aki na mente, cooperacion ta minimisá problemanan matrimonial. Asta ora ta abo so ta manifestando e actitud apropiado aki, e por contribuí hopi pa prevení problema di yega te n’e punto di friccion i pleitu excesivo. Pacenshi i amor ta masha importante. “Sea amabel” i “frená bou di maldad.”—2 Timoteo 2:24.

Apostel Pablo a bira “tur cos pa hende di tur sorto.” (1 Corintionan 9:22) Di igual manera, aunke bo no ta comprometé debernan cristian, kisas tin biaha bo tin cu ahustá bo programa pa dedicá mas tempu cu bo partner i famia. Duna mas tantu tempu posibel na esun cu ken bo ta scoge pa compartí bo bida. Mustra consideracion cristian. Esaki ta un expresion di obedencia piadoso.

Un esposa temeroso di Dios i sumiso cu ta flexibel i compasivo ta haña ta mas fácil pa manifestá obedencia piadoso. (Efesionan 5:22, 23) Palabranan cu ta yen di gracia, “sazoná cu salu,” ta yuda minimisá e frecuencia di potencial confrontacionnan.—Colosensenan 4:6; Proverbionan 15:1.

Sabiduria piadoso ta spiertá bo pa resolvé desacuerdonan lihé i pa restorá pas cu bon palabra cu ta edificá, en bes di bai drumi den “un estado provocá.” (Efesionan 4:26, 29, 31) Esaki ta exigí humildad. Dependé completamente riba Jehova pa fortalesa. Un esposa cristian a admití humildemente: “Despues di oracion ferviente, mi a experenciá con Jehova su spiritu a fortalecé mi pa mi tin un actitud mas amoroso pa cu mi partner.” E Palabra di Dios ta consehá: “No paga malu cu malu na ningun hende. . . . Sigui vence e malu cu e bon.” (Romanonan 12:17-21) Esaki ta conseho sabí i e curso di obedencia piadoso.

Yunan cu Ta Mustra Obedencia Piadoso

Jehova su conseho na boso, yunan den famianan dividí pa motibu di religion ta: “Sea obediente na boso mayornan den tur cos, pasobra esaki ta masha agradabel den Señor.” (Colosensenan 3:20) Nota cu Señor Jesucristo ta ser mencioná pa consideracion. P’esei, obedencia na mayornan no ta absoluto. Den un sentido e conseho di Echonan 5:29, pa “obedecé Dios como gobernante mas bien cu hende,” ta toca hóbennan cristian tambe. Ocasionnan lo presentá ora lo bo tin cu dicidí kico pa haci riba base di loke bo sa ta corecto segun e Scritura. Esei por resultá den un of otro forma di castigu pa nenga di enbolbé bo mes den un acto di adoracion falsu. Aunke esaki ta un posibilidad desagradabel, bo por haña consuelo i bo por asta alegrá den e echo cu bo ta sufriendo pa hacimentu di loke ta corecto den bista di Dios.—1 Pedro 2:19, 20.

Siendo cu bo pensamentunan ta ser guiá dor di principionan bíblico, bo por diferenciá di opinion cu bo mayornan riba cierto asuntunan. Esaki no ta haci nan bo enemigunan. Asta si nan no ta sirbidornan dedicá di Jehova, nan ta merecé onor apropiado. (Efesionan 6:2) Sálomon a bisa: “Scucha na bo tata kende a causa bo nacimentu, i no despreciá bo mama.” (Proverbionan 23:22) Purba comprendé e dolor cu nan ta sinti dor cu bo ta sigui tras di un fe cu ta parce straño pa nan. Comunicá cu nan, i “laga bo razonabilidad bira conocí.” (Filipensenan 4:5) Compartí bo sintimentu i preocupacionnan. Sea firme den pegamentu na principionan piadoso, tog, “si ta posibel, tantu cu ta dependé di boso, sea pacífico cu tur hende.” (Romanonan 12:18) E echo cu bo ta obedecé e direccion di bo mayornan awor ta mustra Jehova cu bo ta deseá di sigui obediente como un súbdito dje Reino.

Loke Otronan Por Haci

Cristiannan cu ta biba den famianan cu ta dividí pa motibu di religion mester di sosten i comprension di nan compañé adoradornan. Esaki ta bisto for dje palabranan di unu cu a bisa: “Mi ta sintí mi absolutamente desesperá i desampará, ya cu no tin nada cu ningun hende por haci, ni no tin nada cu ami por haci pa cambi’é. Mi ta confia den Jehova p’e efectuá su boluntad den nos famia, sea cual sea cu esei por ta.”

Asociacion cu rumannan spiritual na reunionnan cristian ta un refugio. E mésun persona aki a describí su bida como algu “manera dos diferente mundu. Unu cu mi mester ta aden i unu cu mi tin gana di ta aden.” E amor dje hermandad ta loke ta haci posibel pa esnan afligí aki wanta i sirbi den tur circunstancia. Incluí nan den bo oracionnan. (Efesionan 1:16) Regularmente, na tur ocasion, papia palabranan animador, positivo i consolador cu nan. (1 Tesalonicensenan 5:14) Ora ta práctico i apropiado, incluí nan den bo actividadnan teocrático i social.

Bendicion i Beneficionan di Obedencia Piadoso

Meditá diariamente riba e bendicion i beneficionan di manifestá obedencia piadoso den un cas dividí pa motibu di religion. Haci esfuerso diligente pa ser obediente. “No cansa.” (Galationan 6:9) Soportá circunstancianan desfaborabel i inhusticianan “pa motibu di concenshi pa cu Dios . . . ta un cos agradabel” pa Dios. (1 Pedro 2:19, 20) Sea obediente te n’e grado cu Jehova su principio i leynan hustu no ta ser comprometé. Esaki ta demostrá lealtad na Jehova su areglo. Bo conducta piadoso por asta salba bida di bo partner, yu of mayornan.—1 Corintionan 7:16; 1 Pedro 3:1.

Segun cu bo ta lucha pa cumpli cu e exigencia i expectativanan di un famia dividí pa motibu di religion, corda e importancia di warda integridad na Jehova Dios i Jesucristo. Bo por cede riba hopi punto, pero cede integridad ta nificá cede tur cos, incluyendo bida mes. Apostel Pablo a bisa: “Dios . . . na fin dje dianan aki a papia cu nos pa medio di un Yu, cu el a nombra heredero di tur cos, i pa medio di ken el a traha e sistema di cosnan.” Reconociendo e ‘salbacion aki di tal grandesa’ lo fortificá bo pa bo ser obediente.—Hebreonan 1:1, 2; 2:3.

Bo obedencia sin compromiso i firmesa pa normanan moral i balornan hustu ta un proteccion saludabel pa bo i bo partner incrédulo. Fidelidad ta edificá lasonan fuerte di famia. Proverbionan 31:11 ta bisa di un esposa capas i leal: “Den dje e curason di su doño a cifra confiansa.” Bo conducta decente i respet profundo por habri wowo di bo esposo incrédulo. E por hib’é na aceptá e berdad di Dios.

Obedencia piadoso en berdad ta precioso i salbador di bida. Pidi p’e den oracion pa bo por tin’e den bo bida di famia. Lo e resultá den pas mental i lo trece alabansa na Jehova.