Kico Ta Motiva Bo Pa Sirbi Dios?

“Bo mester stima Jehova bo Dios cu tur bo curason i cu tur bo alma i cu tur bo mente i cu tur bo forsa.”—MARCO 12:30.

1, 2. Ki cosnan emocionante ta ser lográ en coneccion cu e trabou di predicacion?

E BERDADERO balor di un auto no ta ser determiná solamente dor di su aparencia. Un capa di ferf por mehorá su aparencia exterior, i un diseño elegante por atraé un cumpradó potencial; pero di muchu mas importancia ta e cosnan cu no ta ser mirá mesora—e motor cu ta propulsá e vehículo, huntu cu tur e otro mecanismonan cu ta control’é.

² Ta mescos cu e sirbishi di un cristian na Dios. Testigonan di Jehova ta abundá den obranan piadoso. Tur aña, mas cu mil miyon ora ta ser dedicá den predicacion dje bon nobo dje Reino di Dios. Ademas, miyones di studio di Bijbel ta ser conducí, i cientos di miles di persona ta ser bautisá. Si bo ta un proclamador dje bon nobo, bo tabatin un participacion—maske e ta parce chikitu—den e estadísticanan emocionante aki. I bo por ta sigur cu “Dios no ta inhustu p’e lubidá boso trabou i e amor cu boso a mustra pa su nomber.”—Hebreonan 6:10.

3. Kico ademas di obranan mester ta di interes vital pa cristiannan, i pakico?

³ Sin embargo, e berdadero balor di nos sirbishi—sea colectivamente of individualmente—no ta ser midí solamente cu cifra. Manera Samuel a ser bisá, “e simpel hende ta mira loke ta parce na bista; pero en cuanto Jehova, e ta mira loke e curason ta.” (1 Samuel 16:7) Sí, ta loke nos ta di paden ta conta pa Dios. Ta cierto cu obranan ta esencial. Obranan di debocion piadoso ta dorna e siñansa di Jehova i ta atraé disipelnan potencial. (Mateo 5:14-16; Tito 2:10; 2 Pedro 3:11) Tog, nos obranan no ta revelá tur cos. Jesus resucitá tabatin motibu pa preocupacion relacioná cu e congregacion na Efeso—apesar di nan registro di bon obra. “Mi conocé bo obranan,” el a bisa nan. “No obstante, mi tin esaki contra bo, cu bo a bandoná e amor cu bo tabatin na principio.”—Revelacion 2:1-4.

4. (a) Den ki manera nos sirbishi na Dios por bira manera un custumber motivá pa un sentido di deber? (b) Pakico tin un necesidad pa examinacion propio?

⁴ Ta existí un peliger. Cu transcurso di tempu, nos sirbishi na Dios por bira un custumber motivá pa un sentido di deber. Un señora cristian a describié asina aki: “Mi tabata sali den sirbishi, bai reunion, studia, haci oracion—pero mi tabata haci nan tur automáticamente, sin sinti ningun emocion.” Naturalmente, mester encomendá sirbidornan di Dios ora nan haci esfuerso apesar cu nan ta sinti nan “tumbá” of “abatí.” (2 Corintionan 4:9; 7:6) No obstante, ora nos rutina cristian stanca, nos mester bai investigá paden dje motor, na moda di papia. Asta e mihó autonan mester di mantencion periódico; di igual manera, tur cristian mester haci examinacion propio regularmente. (2 Corintionan 13:5) Otronan por mira nos obranan, pero nan no por dicerní loke ta motivá nos accionnan. P’esei, nos cada un mester interesá den e pregunta: ‘Kico ta motivá mi pa sirbi Dios?

Obstáculonan pa Motivacion Apropiado

5. Cua mandamentu Jesus a bisa tabata esun mas importante?

⁵ Ora el a ser puntrá cua dje leynan duná na Israel tabata esun mas importante, Jesus a citá un mandamentu cu a enfocá, no riba aparencia exterior, sino riba motivacion interno: “Bo mester stima Jehova bo Dios cu tur bo curason i cu tur bo alma i cu tur bo mente i cu tur bo forsa.” (Marco 12:28-30) Asina Jesus a identificá loke mester ta e forsa motivador tras di nos sirbishi na Dios—amor.

6, 7. (a) Den ki manera Satanas a atacá e círculo di famia astutamente, i pakico? (2 Corintionan 2:11) (b) Con e manera cu un persona a ser lantá por afectá su actitud pa cu autoridad divino?

⁶ Satanas kier impedí nos abilidad di cultivá e cualidad vital di amor. Pa logra esaki, un método cu el a usa ta di atacá e círculo di famia. Pakico? Pasobra esaki ta caminda nos promé impresionnan tocante amor i esnan mas duradero ta ser formá. Satanas conocé bon e principio bíblico cu loke un persona ser siñá den su infancia por ta di balor ora e ta adulto. (Proverbionan 22:6) Astutamente e ta purba troce nos concepto di amor na un edad yong. Como “dios dje sistema di cosnan aki,” Satanas ta mira cu e ta logra su propósito mihó ora hopi hende ta ser lantá den casnan cu no ta refugio di amor, sino campo di bataya di amargura, furia i insulto.—2 Corintionan 4:4; Efesionan 4:31, 32; 6:4, nota; Colosensenan 3:21.

⁷ E buki Logrando felicidad den bida di famía a comentá cu e manera cu un tata ta atendé na su papel como mayor “por tin un efecto duradero riba actitud di su yunan despues en cuanto autoridad, tantu humano como divino.”a Un homber cristian kende a ser lantá bou dje man pisá di un tata severo ta admití: “Pa mi, ta fácil pa obedecé Jehova; pa stim’é ta muchu mas difícil.” Naturalmente, obedencia ta vital, pasobra den bista di Dios “obedecé ta mihó cu un sacrificio.” (1 Samuel 15:22) Pero kico por yuda nos avansá mas ayá cu simpel obedencia i cultivá amor pa Jehova como e forsa motivador tras di nos adoracion?

“E Amor cu Cristo Tin Ta Obligá Nos”

8, 9. Con Jesus su sacrificio di rescate mester stimulá nos amor pa Jehova?

⁸ E estímulo di mas grandi pa cultivá amor di henter curason pa Jehova ta aprecio pa Jesucristo su sacrificio di rescate. “Den esaki e amor di Dios a ser manifestá den nos caso, pasobra Dios a manda su Yu unigénito den e mundu pa nos por gana bida mediante dje.” (1 Juan 4:9) Unabes nos comprendé i apreciá esaki, e acto aki di amor ta producí un reaccion di amor. “Nos ta stima, pasobra [Jehova] a stima nos promé.”—1 Juan 4:19.

⁹ Jesus a aceptá boluntariamente su asignacion pa sirbi como Salbador di hende. “Den esaki nos a yega di conocé amor, pasobra esun ei a entregá su alma pa nos.” (1 Juan 3:16; Juan 15:13) Jesus su amor di sacrificio propio mester lanta un reaccion apreciativo den nos. Pa ilustrá: Suponé cu bo a ser rescatá for di un hogamentu. Bo por djis bai cas, seca bo curpa i lubidá riba dje? Naturalmente cu no! Lo bo sinti cu bo debe algu n’e persona cu a rescatá bo. Al fin i al cabo, bo debe e persona ei bo bida. Nos debe Jehova Dios i Jesucristo ménos cu esei? Sin e rescate, nos cada un lo hoga, na moda di papia, den picá i morto. En bes di esei, debí n’e gran acto di amor aki, nos tin e prospecto di biba pa semper den un paradijs riba tera.—Romanonan 5:12, 18; 1 Pedro 2:24.

10. (a) Con nos por haci un aplicacion personal dje rescate? (b) Con e amor cu Cristo tin ta obligá nos?

¹⁰ Meditá riba e rescate. Haci un aplicacion personal dje rescate, manera Pablo a haci: “En berdad, e bida cu mi ta biba awor den carni, mi ta biba mediante e fe cu ta pa cu e Yu di Dios, kende a stimá mi i a entregá su mes pa mi.” (Galationan 2:20) Tal meditacion lo producí motivacion di curason, pasobra Pablo a skirbi n’e corintionan: “E amor cu Cristo tin ta obligá nos, pasobra . . . el a muri pa tur esnan cu ta biba por biba no mas pa nan mes, sino pa esun cu a muri pa nan i a ser lantá.” (2 Corintionan 5:14, 15) The Jerusalem Bible ta bisa cu e amor di Cristo ta “conmové nos profundamente.” Ora nos ta contemplá e amor di Cristo, nos ta ser obligá, asta conmoví profundamente. E ta toca nos curason i ta motivá nos na accion. Manera e traduccion di J. B. Phillips ta parafraseá e texto, “e fuente principal mes di nos accionnan ta e amor di Cristo.” Cualkier otro tipo di motivacion lo no producí fruta duradero den nos, manera e ehempel dje fariseonan ta mustra.

“Warda Boso dje Zuurdeeg dje Fariseonan”

11. Describí e actitud dje fariseonan pa cu obranan religioso.

¹¹ E fariseonan a pone adoracion na Dios perde tur su balor. En bes di enfatisá amor pa Dios, nan a enfatisá obranan como e norma pa midi spiritualidad. Nan preocupacion cu un cantidad di regla a haci nan parce hustu di pafó, pero di paden nan tabata “yen di wesu di hende morto i di tur sorto di sushedad.”—Mateo 23:27.

12. Despues cu Jesus a cura un homber, con e fariseonan a mustra nan insensibilidad di curason?

¹² Na un ocasion Jesus cu compasion a cura un homber kende su man tabata secu. Ki contentu e homber aki mester tabata pa experenciá e sanacion instantáneo di un hendikep cu indudablemente a caus’é masha incomodidad físico i emocional! Tog, e fariseonan no a alegrá cuné. En bes di esei, nan a piki pieu riba un detaye técnico—cu Jesus a duna yudansa riba Sabat. Preocupá cu nan interpretacion técnico dje Ley, e fariseonan a hera e spiritu dje Ley completamente. Nada straño cu Jesus tabata “completamente afligí debí n’e insensibilidad di nan curason”! (Marco 3:1-5) Ademas, el a spierta su disipelnan: “Warda boso dje zuurdeeg dje fariseonan i saduceonan.” (Mateo 16:6) Nan accion i actitudnan ta ser revelá den Bijbel pa nos beneficio.

13. Ki les nos ta saca for dje ehempel dje fariseonan?

¹³ E ehempel dje fariseonan ta siña nos cu nos mester tin un punto di bista razonabel di obranan. Ta berdad cu obranan ta vital, pasobra “fe sin obra ta morto.” (Santiago 2:26) Sin embargo, hende imperfecto tin un tendencia di husga otronan pa loke nan ta haci en bes di pa loke nan ta. Tin biaha, nos por asta husga nos mes den e manera aki. Nos por bira obsesioná cu cumplimentu cu obra, como si fuera esaki ta e único criterio pa nos spiritualidad. Nos por lubidá e importancia di examiná nos motibunan. (Compará cu 2 Corintionan 5:12) Nos por bira personanan inflexibel cu ta pega excesivamente na ley i regla i cu “ta sefta e muskita pero ta guli e camel,” obedeciendo e letter dje ley miéntras nos ta pasa por haltu di su intencion.—Mateo 23:24.

14. Con e fariseonan tabata manera un copi of skoter impuru?

¹⁴ Loke e fariseonan no a comprendé ta cu si un persona berdaderamente ta stima Jehova, obranan di debocion piadoso lo sigui como un consecuencia lógico. Spiritualidad ta flui for di parti paden pa pafó. Jesus a denunciá e fariseonan fuertemente pa nan pensamentu eróneo en cuanto esaki, bisando: “Ai di boso, escriba i fariseonan, hipócritanan! pasobra boso ta limpia e parti pafó dje copi i e skoter, pero di paden nan ta yen di plunder i golosidad. Fariseonan ciegu, limpia promé e parti paden dje copi i e skoter, pa e parti pafó tambe por bira limpi.”—Mateo 23:25, 26.

15. Cita ehempel cu ta mustra cu Jesus a mira mas aleu cu aparencia.

¹⁵ E aparencia exterior di un copi, skoter of asta un edificio no ta revelá tur cos. Jesus su disipelnan tabata impresioná cu e bunitesa dje tempel di Jerusalem, cu Jesus a yama “un cueba di ladron” debí na loke tabata pasando den dje. (Marco 11:17; 13:1) Loke tabata cierto dje tempel ta cierto di miyones di hende cu ta bisa cu nan ta cristian, manera e registro di cristiandad ta mustra. Jesus a bisa cu lo e husga algun hende cu a haci “obranan poderoso” den su nomber como “hacidornan di maldad.” (Mateo 7:22, 23) Na contraste skerpi, el a papia di un biuda cu a contribuí cu un montante di placa casi insignificante n’e tempel: “E biuda pober aki a tira mas cu tur esnan cu a tira placa den e caha di placa . . . E, di su necesidad a tira tur loke e tabatin, henter su medio di biba.” (Marco 12:41-44) Esaki ta husgamentu inconsistente? Di ningun manera. Den ámbos caso, Jesus a reflehá e punto di bista di Jehova. (Juan 8:16) El a mira e motibunan tras dje obranan i a husga segun esei.

“Cada Un Segun Su Propio Abilidad”

16. Pakico nos no tin nodi compará nos actividad semper cu esun di un otro cristian?

¹⁶ Si nos motibunan ta corecto, no tin nodi haci comparacion constantemente. Por ehempel, bo no ta logra mashá dor di competí cu un otro cristian i forsa pa dedicá e mésun cantidad di tempu den e ministerio of pa igualá e persona ei su logronan den predicacion. Jesus a bisa pa stima Jehova cu tur bo curason, mente, alma i forsa—no cu esun di un otro persona. Cada persona su abilidad, resistencia i circunstancianan ta varia. Si bo situacion ta permití, amor lo motivá bo pa dedicá hopi tempu den e ministerio—tal bes asta como un minister pionero di tempu completo. Sin embargo, si bo ta luchando cu un malesa, e tempu cu bo ta dedicá den e ministerio por ta ménos cu lo bo a deseá. No desanimá. Fieldad na Dios no ta ser midí cu ora. Teniendo motibunan puru, lo bo tin motibu pa goso. Pablo a skirbi: “Laga cada un duna prueba di loke su mes trabou ta, e ora ei lo e tin motibu pa hubilá en cuanto su mes so, i no den comparacion cu e otro persona.”—Galationan 6:4.

17. Den bo propio palabra, relatá brevemente e comparacion dje talentonan.

¹⁷ Considerá Jesus su comparacion dje talentonan, manera tin skirbí na Mateo 25:14-30. Un homber cu tabata cla pa biaha pa exterior a manda yama su esclabonan i a confia nan cu su pertenencianan. “Na un el a duna cincu talento, na un otro dos, na un otro mas [el a duna] unu, na cada un segun su propio abilidad.” Ora e doño a regresá pa regla cuenta cu su esclabonan, kico el a haña? E esclabo na kende cincu talento a ser duná a gana cincu talento mas. Di igual manera, e esclabo na kende dos talento a ser duná a gana dos talento mas. E esclabo na kende un talento a ser duná a der’é den tera i no a haci nada pa aumentá e rikesa di su doño. Kico tabata e doño su evaluacion dje situacion?

18, 19. (a) Pakico e doño no a compará e esclabo na kende dos talento a ser duná cu e esclabo na kende cincu talento a ser duná? (b) Kico e comparacion dje talentonan ta siña nos tocante encomendacion i comparacion? (c) Pakico e di tres esclabo a ser husgá desfaborablemente?

¹⁸ Promé, laga nos considerá e esclabonan na kende respectivamente cincu i dos talento a ser duná. Na cada un dje esclabonan, e doño a bisa: “Bon hací, esclabo bon i fiel!” Lo el a bisa esaki n’e esclabo cu cincu talento si el a gana solamente dos? Improbablemente! N’e otro banda, e no a bisa n’e esclabo cu a gana dos talento: ‘Pakico bo no a gana cincu? Wel, wak bo compañero esclabo i cuantu el a gana pa mi!’ No, e doño compasivo, kende a prefigurá Jesus, no a haci comparacion. El a asigná e talentonan “na cada un segun su propio abilidad,” i e no a spera nada mas en buelta cu loke cada un lo por a duna. Tur dos esclabo a haña e mésun encomendacion, pasobra tur dos a traha di henter nan alma pa nan doño. Nos tur por siña for di esaki.

¹⁹ Naturalmente, e di tres esclabo no a ser encomendá. En realidad, el a ser tirá den e scuridad pafó. Siendo cu el a ricibí solamente un talento, no a ser sperá di dje p’e producí mes tantu cu e esclabo cu cincu talento. Sin embargo, e no a ni purba! Su huicio desfaborabel finalmente tabata debí na su actitud di curason “malbado i floho,” locual a revelá un falta di amor p’e doño.

20. Con Jehova ta mira nos limitacionnan?

²⁰ Jehova ta spera di cada un di nos pa stim’é cu tur nos forsa, tog ta ki animador cu “e mes conocé bon nos formacion, cordando cu nos ta stof”! (Salmo 103:14) Proverbionan 21:2 ta bisa cu “Jehova ta evaluando curasonnan”—no estadísticanan. E ta comprendé cualkier limitacion riba cua nos no tin control, sea esei ta financiero, físico, emocional of di otro índole. (Isaías 63:9) Na mésun tempu, e ta spera pa nos haci uso optimal di tur e recursonan cu nos por tin. Jehova ta perfecto, pero ora e ta trata cu su adoradornan imperfecto, e no ta un perfeccionista. Tampoco e ta irazonabel den su tratonan ni irealista den loke e ta spera di nos.

21. Si nos sirbishi na Dios ta ser motivá pa amor, ki bon resultado lo sigui?

²¹ Stimando Jehova cu tur nos curason, alma, mente i forsa ta “bal muchu mas cu tur e ofrendanan kimá henteramente i sacrificionan.” (Marco 12:33) Si nos ta ser motivá pa amor, e ora ei nos lo haci tur loke ta na nos alcanse den e sirbishi di Dios. Pedro a skirbi cu si cualidadnan piadoso, incluyendo amor, “ta existí den boso i ta pasa over, nan lo prevení boso di bira sea inactivo of infructífero relacioná cu e conocimentu exacto di nos Señor Jesucristo.”—2 Pedro 1:8.

[Notanan]

Como Repaso

◻ Kico mester ta e forsa motivador tras di nos sirbishi na Dios?

◻ Con e amor di Cristo ta obligá nos pa sirbi Jehova?

◻ Ki preocupacion dje fariseonan nos mester evitá?

◻ Pakico ta imprudente pa keda compará nos sirbishi cu esun di un otro cristian?

[Plachi na página 16]

E abilidad, resistencia i circunstancianan di individuonan ta varia