Pregunta di Lector

Segun Galationan 6:8, “esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.” Na cua “spiritu” ta ser referí, i con nos por cosechá bida dje manera aki?

E palabranan hebreo i griego cu ta ser traducí como “spiritu” tin vários nificacion, manera: (1) e forsa activo di Dios, (2) e forsa di bida den hende of bestia, (3) un persona su forsa mental motivador i (4) un persona spiritual, of angel. Esun promé—e forsa activo di Dios—ta e nificacion cu nos ta haña na Galationan 6:8.

Como informacion relevante, tuma nota di Galationan 3:2, unda nos ta haña e promé uso di “spiritu” den e buki di Galationan. Pablo a puntra e cristiannan: “Boso a ricibí e spiritu debí na obranan di ley of debí na tendementu pa medio di fe?” Anto, na Galationan 3:5, el a conectá e “spiritu” ei cu hacimentu di obranan poderoso. Pues e “spiritu” na cua el a referí tabata spiritu santu, e forsa activo invisibel di Dios.

Despues, na Galationan 5:16, Pablo a haci un contraste entre spiritu i carni. Nos ta lesa: “Mi ta bisa, Sigui cana pa medio di spiritu i boso lo no cumpli cu ningun deseo carnal.” Cu “deseo carnal” e tabata kier men carni humano pecaminoso. Pues, na Galationan 5:19-23, el a mencioná “e obranan di carni” na contraste cu “e frutanan di spiritu.”

P’esei, na Galationan 6:8, e persona cu ta “sembra cu su carni na bista” mester ta unu cu ta laga su mes ser dirigí pa deseo humano pecaminoso, entregando su mes na “e obranan di carni.” E por experenciá e efectonan coruptivo di conducta asina, i si e no cambia, e siguramente lo no gana bida den of bou dje Reino di Dios.—1 Corintionan 6:9, 10.

Como cristiannan deboto nos mester deseá pa ‘sembra cu e spiritu di Dios na bista.’ Esei ta encerá biba den un manera cu ta permití e spiritu santu obra libremente den nos bida, yudando nos manifestá su fruta. Nos mester tene esei na mente ora nos ta dicidí kico pa lesa of cua programanan di television pa mira. Nos ta sembra cu e spiritu na bista segun cu nos ta presta atencion na reunionnan di congregacion i ta purba aplicá conseho dje ancianonan nombrá pa spiritu.—Echonan 20:28.

Interesantemente, Galationan 6:8 ta finalisá cu e siguransa cu segun cu nos ta sembra na armonia cu spiritu santu, nos lo ta den e posicion pa “cosechá bida eterno for dje spiritu.” Sí, basá riba e rescate di Cristo, Dios lo extendé bida sin fin mediante e obramentu di spiritu santu.—Mateo 19:29; 25:46; Juan 3:14-16; Romanonan 2:6, 7; Efesionan 1:7.