Hende Muher Rond Mundu

ORA e promé pareha humano a rebelá contra Dios, Jehova a profetisá consecuencianan desastroso cu lo a bini tantu riba nan como riba nan desendientenan. Jehova a bisa Eva: “Bo deseo fuerte lo ta pa bo esposo, i lo e dominá bo.” (Génesis 3:16) Consistentemente Bijbel ta animá respet profundo pa hende muher, i miyones di hende muher ta disfrutá di un bida mas felis i mas satisfaciente pasobra nan i nan famia ta aplicá principionan bíblico.

Sin embargo, segun un informe recien riba derechonan humano, hopi otro hende muher rond mundu ta ser humiyá, utilisá i degradá. Comentando riba e informe, International Herald Tribune ta declará: “Cu detaye cuidadoso, e informe di 193 pais . . . ta pinta un situacion tristu di discriminacion i abusu di hende muher dia den dia afó.”

Un par di ehempel: Na Africa central, mucha muhernan mester haci mayoria dje trabou pisá di cunucu, i e cantidad di nan cu ta bai scol ta un tercer parti dje cantidad di mucha homber cu ta bai scol. Na un pais ei, adulterio ta ilegal pa hende muher pero no pa hende homber. E ley di un otro pais africano ta dispensá e esposo cu mata su esposa si e descubrié ta cometiendo adulterio, pero e ley no ta dispensá un esposa cu mata su esposo den circunstancianan similar.

E informe ta bisa cu den cierto parti di Sur América, polis no ta mustra consideracion pa hende muher golpiá. I hende muher cu ta traha generalmente mester lora cu 30 pa 40 porciento ménos salario cu hende homber.

Den cierto partinan di Asia, hende muher ta víctimanan di sterilisacion i aborto forsá. Na un pais, tin e gran cantidad di 500.000 prostituta, di cua hopi a ser bendí den e negoshi aki dor di mayornan buscando placa pa yuda cumpra cas nobo pa nan mes. Den un otro pais, polis mester trata cu “morto di ‘bruidschat’ ”—un esposa cu ta ser matá dor di su esposo of famia dje esposo pasobra su bruidschat [aporte di placa i bien na su esposo] tabata ménos di loke a ser sperá.

Relacioná cu Jesucristo, Bijbel ta sigurá nos: “Lo e libra hende pober cu ta sclama pa yudansa, tambe esun afligí i ken cu no tin yudante. Lo e sinti duele di hende di condicion humilde i di hende pober, i e alma di hende pober lo e salba. For di opresion i for di violencia lo e rescatá nan alma, i nan sanger lo ta precioso den su bista.” (Salmo 72:12-14) Pues nos tin motibu pa optimismo; hende muher rond mundu por anticipá mihó condicionnan cu lo existí n’e tempu ei.