Mi Tabata Mi So Pero Nunca Desampara

MANERA ADA LEWIS A RELAT’E

Semper mi tabata incliná pa ta independiente. Tambe mi tin un determinacion fuerte—otronan tin biaha ta yama esei cabesura—den tur loke mi haci. Mi sa tambe, con fácil ta pa papia tur loke mi ta pensa, i e característica aki a causá mi problema atrabes di añanan.

SIN embargo, mi ta gradicidu cu Jehova Dios no a rechasá mi pa motibu dje defectonan den mi personalidad. Dor di un studio di su Palabra, tabata posibel pa mi cambia mi personalidad i sirbi asina su interesnan di Reino pa rond di 60 aña. Desde mi infancia, mi a stima cabai, i Dios su yudansa pa controlá mi característica un poco caprichoso, hopi bes a hací mi corda con por usa un frena pa controlá un cabai.

Mi a nace cerca di un bunita lago blou na Mount Gambier den Sur Australia na 1908. Mi mayornan tabatin un hacienda di cria di bestia pa producí lechi i traha productonan di lechi, i ami tabata e yu muher mayor di ocho yu. Nos tata a muri ora nos tur tabata hopi chikitu. Esei a laga hopi dje responsabilidad pa manehá e hacienda riba mi, ya cu mi dos ruman hombernan mayor mester a traha for di cas pa trece entrada p’e famia. Bida riba e hacienda a nificá trabou duru cu a rekerí hopi di bo.

E Promé Contacto cu Berdad Bíblico

Nos famia tabata asistí n’e Iglesia Presbiteriano, i nos tabata miembronan regular i activo. Mi a bira un maestra di zondagsschool i a tuma na serio e responsabilidad pa siña e muchanan loke ami a kere tabata spiritualmente i moralmente corecto.

Na 1931 mi welo a muri, i entre su pertenencianan tabatin vários buki skirbí dor di J. F. Rutherford, e presidente dje tempu ei dje Sociedad Watch Tower. Mi a cuminsá lesa The Harp of God i Creation, i mas mi a lesa, mas asombrá mi a keda di haña sa cu hopi cos cu mi tabata kere aden i tabata siña e muchanan no tabatin apoyo dje Bijbel.

Tabata un shok pa haña sa cu e alma humano no ta inmortal, cu mayoria hende lo no bai cielu ora nan muri, i cu no ta existí sufrimentu eterno den candela di fiernu p’e malbadonan. Mi a keda perturbá tambe pa haña sa cu tenementu dje sabat semanal riba diadomingo no ta un rekisito cristian. Pues, mi a ser confrontá cu un decision serio: pega n’e siñansanan tradicional di cristiandad of cuminsá siña berdad bíblico. No a tumá mi hopi tempu pa dicidí pa kibra tur mi asociacion cu e Iglesia Presbiteriano.

Awor Sí Berdaderamente Mi So

Mi famia, amigu i conocínan di misa di ántes no a keda nada contentu ora mi a anunciá mi intencion di bandoná e iglesia i stop di duna les n’e zondagsschool. I ora nan a haña sa cu mi a cuminsá ser enbolbí cu e asina yamá hendenan di Hues Rutherford, esei solamente a stimulá mas redu perhudicial. Nan no a realmente sacá mi for di nan asociacion, pero mayoria di mi famia i amigunan di ántes tabata tratá mi friu, locual ta poco bisá.

Mas mi a studia i a verificá e textonan mencioná den e bukinan cu mi tabata lesa, mas mi a cuminsá mira e necesidad pa predicá públicamente. Mi a haña sa cu Testigonan di Jehova tabata bai di cas pa cas como parti di nan ministerio público. Pero n’e tempu ei no tabatin Testigonan den nos districto. P’esei, ningun hende a animá mi of a mustrá mi con pa predicá e bon nobo dje Reino di Dios. (Mateo 24:14) Mi tabata sintí mi hopi mi so.

No obstante, e mandamentu bíblico pa predicá na otronan a sigui resoná den mi oreanan, i mi a dicidí cu mi mester cuminsá predicá di un manera of otro. Despues di hopi oracion, mi a dicidí di cuminsá bishitá e casnan di bisiña djis pa conta nan loke mi a siña for di mi studionan i pa trata na mustra nan e cosnan aki den nan mes Bijbel. Mi promé cas tabata esun di mi anterior superintendente dje zondagsschool. Su reaccion friu i comentarionan negativo en cuanto e echo cu mi a bandoná e iglesia siguramente no tabata un comienso animador. Pero ora mi a bai for di su cas, mi a sinti un sensacion di calor i un forsa interior cu nunca mi a yega di sinti i mi a sigui bishitá otro casnan.

Realmente no tabatin ningun oposicion directo, pero mi a keda asombrá p’e indiferencia general dje asociadonan di misa di ántes ora mi tabata bishitá nan. Pa mi sorpresa i decepcion, mi a haña e oposicion di mas duru di mi ruman homber mayor, loke a recordá mi di e palabranan di Jesus: “Asta boso mayornan i rumannan i parientenan i amigunan lo entregá boso, . . . i boso lo ser obheto di odio di parti di tur hende pa causa di mi nomber.”—Lucas 21:16, 17.

For di un edad hopi yong mi a bira un coredor di cabai experenciá, pues mi a dicidí cu e manera mas lihé pa yega n’e casnan di hende lo ta riba cabai. Esaki a haci posibel pa mi bai mas leu den e teritorio rural cercano. Sin embargo, un atardi mi cabai a trompecá i a cai riba un caminda cu ta slip, i mi a sufri un fractura serio na mi cráneo. Pa un tempu, tabatin temor cu lo mi no sobrebibí. Despues dje caida ei, si caminda tabata muhá of tabata slip, mi tabata biaha den un garoshi di cabai, of ‘sulky,’ en bes di riba cabai.a

Contacto cu e Organisacion

Poco tempu despues di mi accidente, un grupo di predicadornan di tempu completo, yamá awor pioneronan, a bishitá e districto di Mount Gambier. Pues, pa promé biaha, mi por a papia cara-cara cu compañeronan creyente. Promé cu nan a bai, nan a animá mi pa skirbi e oficina di sucursal dje Sociedad Watch Tower i puntra con mi por a participá den e trabou público di predicá den un manera mas organisá.

Despues di skirbi e Sociedad, mi a ricibí bukinan, foyetonan i un karchi di testimonio imprimí pa usa ora di introducí mi mes na porta. Mi a sintí mi un tiki mas cerca di mi rumannan spiritual debí na e contacto via post cu e oficina di sucursal. Pero ora e grupo di pionero a bai i a sigui p’e próximo pueblo, mi a sintí mi mas mi so cu nunca.

Como resultado di mi ruta regular di testimonio tur dia—principalmente cu cabai i ‘sulky’—tur hende den e districto tabata conocé mi. N’e mes momento, mi tabata por a percurá pa mi tareanan riba e hacienda. P’e tempu ei ya mi famia a resigná cu e rutina aki i no a purba stroba. Pa cuater aña mi a sirbi dje manera aki como un proclamador isolá i no-bautisá dje bon nobo.

Congreso i, Por Fin, Bautismo

Na april 1938, Ruman Rutherford a bishitá Australia. E oposicion fuerte dje clero a hiba na cancelacion dje contract p’e Sydney Town Hall. Sin embargo, na último momento, nan a haña permiso pa usa e Sports Grounds. E cambio forsá di plannan en realidad a resultá beneficioso, siendo cu hopi miles di persona mas por a ser acomodá den e Sports Grounds mas grandi. Rond di 12.000 hende a bini, aparentemente siendo cu e interes di hopi a ser lantá pa motibu dje oposicion instigá p’e clero contra nos reunion.

En coneccion cu e bishita di Ruman Rutherford, a tene un congreso di vários dia tambe na un suburbio pegá cu Sydney. Tabata ei cu por fin mi a simbolisá mi dedicacion na Jehova Dios dor di bautismo bou di awa. Bo por imaginá bo e goso cu mi a experenciá cu por fin mi por a reuní cu cientos di rumannan for di tur parti dje inmenso continente australiano?

Regresando Bek pa Mount Gambier

Ora mi a regresá cas, mi a sintí mi teriblemente mi so, sin embargo mi tabata mas determiná cu nunca pa haci loke mi tabata por den e obra di Reino. Pronto mi a cera conocí cu e famia Agnew—Hugh, su esposa i nan cuater yunan. Nan tabata biba den e pueblo di Millicent, solamente 50 kilometer for di Mount Gambier, i mi tabata biaha 50 kilometer, ida i buelta, cu cabai i ‘sulky’ pa conducí un studio bíblico regular cu nan. Ora nan a aceptá e berdad, mi soledad a ser aliviá.

Den poco tempu, nos a ser formá den un grupo pa duna testimonio organisá. Despues, felismente, mi mama a cuminsá mustra interes i a uni cu mi riba e ruta di 100 kilometer ida i buelta n’e studio cu e grupo recien formá. Desde e tempu ei, Mama semper tabata duna animacion i yudansa, aunke a dura algun aña promé cu el a bautisá. Awor mi no tabata solitario mas!

Nos grupo chikitu a producí cuater pionero, e tres mucha muhernan Agnew—Crystal, Estelle i Betty—i ami. Mas despues, den cuminsamentu di añanan ’50, tur e tres mucha muhernan a asistí n’e Scol Bíblico di Galad di Watchtower. Nan a ser asigná como misionero na India i Sri Lanka, unda nan ta sirbi fielmente ainda.

Na januari 1941 e actividad di Testigonan di Jehova a ser prohibí na Australia, pues, nos a actua di biaha. Nos a pone tur loke nos tabata usa den e ministerio—literatura, tocadisco portátil, discursonan bíblico grabá, etcétera—den un bahul di aluminio grandi. Anto nos a pone e bahul den un mangasina i a trece garoshinan yen di yerba secu paden pa tapa e bahul.

Apesar dje prohibicion, nos a sigui cu nos predicacion di cas-pa-cas, pero cu cuidou, usando solamente e Bijbel ora di papia cu doñonan di cas. Mi tabata sconde revistanan i foyetonan bou dje siya di mi cabai i tabata saca nan solamente ora mi a haña interes genuino den e mensahe di Reino. Finalmente, na juni 1943, e prohibicion a ser kitá, i una bes mas nos tabata por a ofrecé nos literatura abiertamente.

Asignacionnan Nobo

Na 1943, mi a haci mi mes disponibel como un pionero, i e siguiente aña mi a bandoná Mount Gambier pa bai na un otro asignacion. Promé, mi a ser invitá pa sirbi pa un tempu corticu n’e oficina di sucursal dje Sociedad na Strathfield. Despues di esaki mi a ricibí asignacionnan, un tras di otro, pa sirbi den pueblonan chikitu den parti sur di New South Wales i parti west di Victoria. Sin embargo, un di mi asignacionnan spiritualmente mas recompensador tabata cu un congregacion grandi den e ciudad di Melbourne. Biniendo di un pueblo chikitu den cunucu, mi a siña masha hopi sirbiendo ei.

Den mi asignacion den e region mas abou di Gippsland den e districto di Victoria, ami i mi compañera pionero, Helen Crawford, a conducí hopi studio di Bijbel i, den poco tempu, nos a mira e formacion di un congregacion. E districto ei tabatin un teritorio rural grandi, i pa transportacion nos tabatin un auto bieu i inconfiabel. Tin biaha nos tabata cor’é, pero hopi biaha nos tabata push’é. Cuantu mi a anhelá pa tin un cabai! Tabatin biaha cu di berdad mi por a bisa: “Lo mi duna cualkier cos (cu excepcion dje Reino) pa un cabai!” Awe den mayoria pueblo dje districto ei, tin congregacionnan fuerte i Salonnan di Reino excelente.

Na 1969, mi a ricibí un asignacion pa bai Canberra, e capital di Australia. E asignacion aki a rekerí pa usa tur bo abilidadnan plenamente i a ofrecé un variedad di circunstancia pa duna testimonio, ya cu hopi bes nos a contra cu personal na e hopi embahadanan stranhero. Ainda mi ta sirbi aki, pero den añanan recien mi a concentrá mi testimonio riba e área industrial dje ciudad.

Na 1973, mi tabatin e privilegio di asistí na congresonan grandi na Merca. Un otro suceso culminante di mi bida tabata pa ser un delegado di congreso na 1979 i haci un recorido den Israel i Jordania. Bishitando e sitionan mes mencioná den e Bijbel i refleccionando riba e eventonan cu a sosodé ei tabata berdaderamente un experencia conmovedor. Mi a haña chens di experenciá con ta sinti pa drif riba Laman Morto, cu su awanan denso i salu, i durante nos bishita na Petra den Jordania, mi tabatin oportunidad una bes mas pa core un cabai. Esaki a hací mi corda e dianan ei den pasado ora cabai a haci’é posibel pa mi alcansá e áreanan rural i leu for di otro cu e mensahe dje Reino.

Siguiendo den e Sirbishi di Tempu Completo

Mi deseo di sigui den e sirbishi di tempu completo apesar cu mi ta birando bieu a ser tené na bida dor di provisionnan special manera e Scol di Sirbishi di Pionero i e reunionnan di pionero tené en conhunto cu asambleanan di circuito, como tambe e animacion continuo cu mi a ricibí dje superintendentenan biahero. Berdaderamente mi por bisa cu bondadosamente Jehova a dirigí asuntunan di tal manera cu mi dianan di ta mi so ta cos di pasado.

Awor mi tin 87 aña di edad, i despues di ta sirbiendo Jehova pa rond di 60 aña, mi tin un palabra di animacion pa otronan cu kisas tambe ta papia tur loke nan ta pensa i ta hopi independiente: Someté bo mes semper na Jehova su guia. Cu Jehova yuda nos controlá nos abla franco i recordá nos constantemente cu, aunke hopi bes nos por sinti nos so, lo e nunca desampará nos.

[Notanan]