Testigonan Contra e Diosnan Falsu

“‘Boso ta mi testigonan,’ ta e expresion di Jehova, ‘asta mi sirbidor kende mi a scoge.’”—ISAIAS 43:10.

1. Ken ta e Dios berdadero, i den ki aspecto e ta supremo riba e multitud di dios cu ta ser adorá awe?

KEN ta e Dios berdadero? Awe, henter humanidad ta enfrentá e cuestion di sumo importancia aki. Aunke hende ta adorá un multitud di dios, solamente Un por duna nos bida i ofrecé nos un futuro felis. Di solamente Un por ser bisá: “Pa medio di dje nos tin bida i ta move i ta existí.” (Echonan 17:28) En berdad, solamente un Dios tin e derecho di ser adorá. Manera e coro celestial den e buki di Revelacion ta bisa: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa motibu di bo boluntad nan a existí i a ser creá.”—Revelacion 4:11.

2, 3. (a) Con Satanas mentirosamente a desafiá Jehova su derecho di ser adorá? (b) Kico tabata e resultado di Eva su picá pa Eva i su yunan, i kico tabata e resultado pa Satanas?

² Den e hofi di Eden, cu mentira Satanas a desafiá Jehova su derecho di ser adorá. Usando un colebra, el a bisa Eva cu si e rebelá contra Jehova su ley i come for dje palu cu Jehova a prohibí, e mes lo ser manera Dios. Su palabranan tabata: “Dios sa cu riba e mésun dia cu boso come for di dje boso wowonan lo tin cu ser habrí i boso lo tin cu ser manera Dios, conociendo bon i malu.” (Génesis 3:5) Eva a kere e colebra i a come e fruta prohibí.

³ Naturalmente, Satanas a gaña. (Juan 8:44) E único manera cu Eva a bira “manera Dios” ora el a peca tabata cu el a asumí e responsabilidad pa dicidí loke tabata bon i loke tabata malu, algu cu e mester a laga pa Jehova dicidí. I apesar di Satanas su mentira, cu tempu Eva a muri. Pues e único berdadero beneficiario di Eva su picá tabata Satanas. En berdad, Satanas su meta tras di persuadí Eva pa peca tabata pa e mes bira un dios. Ora Eva a peca, el a bira su promé siguidor humano, i pronto Adam a uni cuné. Mayoria di nan yunan no solamente a nace “den picá” sino tambe a cai bou dje influencia di Satanas, i den un tempu corticu, a yega di existí henter un mundu cu tabata alehá for dje Dios berdadero.—Génesis 6:5; Salmo 51:5.

4. (a) Ken ta e dios dje mundu aki? (b) Di kico tin un necesidad urgente?

⁴ E mundu ei a ser destruí den e Diluvio. (2 Pedro 3:6) Despues dje Diluvio un otro mundu alehá for di Jehova a desaroyá, i ainda e ta existí. Di dje Bijbel ta bisa: “Henter e mundu ta drumí den e poder dje malbado.” (1 Juan 5:19) Dor di su obramentu contra e spiritu i e sentido di Jehova su ley, e mundu aki ta sirbi Satanas su metanan. E ta su dios. (2 Corintionan 4:4) Sin embargo, Satanas ta básicamente un dios impotente. E no por haci hende felis of duna nan bida; solamente Jehova por haci esei. P’esei, hende cu kier un bida significativo i un mihó mundu mester siña promé cu Jehova ta e Dios berdadero i despues siña pa haci su boluntad. (Salmo 37:18, 27, 28; Eclesiástes 12:13) Tin anto un motibu urgente pa homber i muhernan di fe duna testimonio, of proclamá e berdad, tocante Jehova.

5. Ki “nubia di testigonan” Pablo a mencioná? Mencioná algun hende cu e ta incluí den e lista.

⁵ For di cuminsamentu di historia humano, tal fiel individuonan a aparecé riba e esena dje mundu. Den Hebreonan capítulo 11, apostel Pablo ta duna un lista largu di nan i ta yama nan “un nubia asina grandi di testigonan.” (Hebreonan 12:1) E di dos yu homber di Adam i Eva, Abel, tabata e promé riba Pablo su lista. Enoc i Noe tambe ta ser mencioná for dje tempu promé cu e Diluvio. (Hebreonan 11:4, 5, 7) Prominente ta Abraham, e antepasado dje rasa hudiu. Abraham, kende ta ser yamá “amigu di Jehova,” a bira e antepasado di Jesus, “e testigo fiel i berdadero.”—Santiago 2:23; Revelacion 3:14.

Testimonio di Abraham pa e Berdad

6, 7. Den ki maneranan Abraham su bida i su accionnan tabata un testimonio cu Jehova ta e Dios berdadero?

⁶ Con Abraham a sirbi como un testigo? Pa medio di su fe fuerte den i obedencia leal na Jehova. Ora el a ser ordená pa bandoná e stad di Ur i pa biba e resto di su bida den un tera leu, Abraham a obedecé. (Génesis 15:7; Echonan 7:2-4) Hendenan di tribu cu ta dualu rond hopi biaha lo bandoná nan bida nomádico i opta pa e bida mas sigur di stad. P’esei, ora Abraham a bandoná e stad pa bai biba den tent, el a duna evidencia firme di su confiansa den Jehova Dios. Su obedencia tabata un testimonio pa esnan cu a observá su conducta. Jehova a bendicioná Abraham ricamente pa su fe. Aunke Abraham tabata biba den tent, el a prosperá materialmente. Ora Lot i su famia a ser hibá prezu, Jehova a duna Abraham éxito den su empeño, di manera cu e por tabata capas pa rescatá nan. E esposa di Abraham a duna lus na un yu homber den su behes, i asina Jehova su promesa cu Abraham lo bira tata di un simia a ser confirmá. Pa medio di Abraham, hende a mira cu Jehova ta un Dios bibu cu ta cumpli cu su promesanan.—Génesis 12:1-3; 14:14-16; 21:1-7.

⁷ Ora el a regresá for di rescatá Lot, Abraham a contra cu Melkísedek, rey di Salem (yamá despues Jerusalem), kende a yama Abraham bon biní, bisando: “Bendicioná sea Abram di e Dios Haltísimo.” E rey di Sódoma tambe a contra cuné i kier a dun‘é regalo. Abraham a nenga. Pakico? E no tabata kier pa tin ningun duda en cuanto e Fuente di su bendicionnan. El a bisa: “Mi ta hisa mi man den un huramentu na Jehova e Dios Haltísimo, Productor di cielu i tera, cu, for di un hilu te na un feter di sandalia, no, lo mi no tuma nada for di loke ta di bo, pa bo no bisa, ‘Tabata ami cu a haci Abram ricu.’ ” (Génesis 14:17-24) Ki un excelente testigo Abraham tabata!

Un Nacion di Testigonan

8. Con Moises a mustra un fe grandi den Jehova?

⁸ Moises, un desendiente di Abraham, tambe a aparecé riba Pablo su lista di testigonan. Moises a bira lomba p’e rikesanan di Egipto i despues cu curashi a enfrentá e gobernante dje gran poder mundial ei pa por a guia e yunan di Israel na libertad. Di unda el a haña e curashi? For di su fe. Pablo ta bisa: “[Moises] a continuá constante como si el a mira Esun cu ta invisibel.” (Hebreonan 11:27) E diosnan di Egipto tabata visibel, tocabel. Asta awe, nan estatuanan ta impresioná hende. Pero Jehova, aunke e ta invisibel, tabata muchu mas real pa Moises cu tur e diosnan falsu ei. Moises no tabatin duda cu Jehova a existí i cu lo el a recompensá Su adoradornan. (Hebreonan 11:6) Moises a bira un testigo sobresaliente.

9. Con e nacion di Israel mester a sirbi Jehova?

⁹ Despues di a guia e israelitanan na libertad, Moises a bira e mediador di un pacto entre Jehova i e desendientenan di Abraham mediante Jacob. Como resultado, e nacion di Israel a cuminsá existí como Jehova su posesion special. (Exodo 19:5, 6) Pa promé biaha, un testimonio nacional mester a ser duná. Jehova su palabranan mediante Isaías, rond di 800 aña mas despues, a aplicá en principio for dje cuminsamentu dje nacion su existencia: “ ‘Boso ta mi testigonan,’ ta e expresion di Jehova, ‘asta mi sirbidor kende mi a scoge, pa boso por sa i tene fe den mi, i pa boso comprendé cu ami ta e Mésun.’ ” (Isaías 43:10) Con e nacion nobo aki lo a sirbi como Jehova su testigonan? Dor di nan fe i obedencia i mediante Jehova su accionnan na nan fabor.

10. Den ki manera Jehova su obranan poderoso na fabor di Israel a duna un testimonio, i cu ki resultado?

¹⁰ Rond di 40 aña despues di su comienso, Israel tabata cla pa tuma posesion dje Tera Primintí. Spionnan a ser mandá pa inspeccioná e stad di Jérico, i Rahab, un habitante di Jérico, a protehá nan. Pakico? El a bisa: “Nos a tende con Jehova a seca e awanan di Laman Corá for di dilanti boso ora boso a sali for di Egipto, i loke boso a haci cu e dos reynan dje amoreonan cu tabata n’e otro banda di Jordan, esta, Sehon i Og, kendenan boso a dedicá na destruccion. Ora nos a yega na tende esei, e ora ei nos curason a cuminsá dirti, i ningun spiritu a ser lantá te ainda den ningun hende pa causa di boso, pasobra Jehova boso Dios ta Dios den cielu ariba i riba tera abou.” (Hosué 2:10, 11) E informe di Jehova su obranan poderoso a impulsá Rahab i su famia pa bandoná Jérico i su diosnan falsu i pa adorá Jehova huntu cu Israel. Claramente, Jehova a duna un testimonio poderoso mediante di Israel.—Hosué 6:25.

11. Ki responsabilidad tur mayor israelita tabatin pa cu dunamentu di testimonio?

¹¹ Miéntras e israelitanan tabata ainda den Egipto, Jehova a manda Moises cerca Fárao i a bisa: “Drenta cerca Fárao, pasobra ami—ami a laga su curason i e curason di su sirbidornan bira insensibel, pa mi pone e señalnan aki di mi net dilanti dje, i pa bo declará na oido di bo yu i e yu di bo yu con severamente mi a trata cu Egipto i mi señalnan cu mi a establecé entre nan; i boso siguramente lo sa cu ami ta Jehova.” (Exodo 10:1, 2) Israelitanan obediente lo a conta nan yunan di Jehova su obranan poderoso. Nan yunan, en buelta, lo a conta nan na nan yunan, i asina lo el a ser hací di generacion pa generacion. Asina, Jehova su actonan poderoso lo a ser recordá. Awe di igual manera, mayornan tin e responsabilidad di duna testimonio na nan yunan.—Deuteronomio 6:4-7; Proverbionan 22:6.

12. Con Jehova su bendicion riba Sálomon i Israel a sirbi como un testimonio?

¹² Jehova su bendicion ricu riba Israel ora e tabata fiel a sirbi como un testimonio p’e nacionnan rond di nan. Manera Moises a bisa despues cu el a relatá Jehova su bendicionnan primintí: “Tur e pueblonan dje tera lo tin cu mira cu Jehova su nomber a ser yamá riba bo, i nan en berdad lo tin miedu di bo.” (Deuteronomio 28:10) Sálomon a ser duná sabiduria i rikesa debí na su fe. Bou di su gobernacion e nacion a prosperá i a disfrutá di un periodo largu di pas. Relacioná cu e tempu ei nos ta lesa: “Nan a sigui bini for di tur pueblo pa tende e sabiduria di Sálomon, asta for di tur e reynan dje tera cu a tende di su sabiduria.” (1 Reynan 4:25, 29, 30, 34) Notabel entre Sálomon su bishitantenan tabata e reina di Saba. Despues cu el a mira pa su mes Jehova su bendicion riba e nacion i su rey, el a bisa: “Laga Jehova bo Dios ser bendicioná, kende tabatin deleite den bo di manera cu el a poné bo riba su trono como rey pa Jehova bo Dios; pasobra bo Dios a stima Israel.”—2 Crónicanan 9:8.

13. Kico tabata probablemente Israel su testimonio mas eficas, i con nos ta beneficiá for di dje ainda?

¹³ Apostel Pablo a mencioná loke tal bes tabata Israel su testimonio mas eficas. Ora el a papia tocante Israel carnal cu e congregacion cristian den Roma, el a bisa: “Nan a ser confiá cu e pronunciacionnan sagrado di Dios.” (Romanonan 3:1, 2) Cuminsando cu Moises, cierto israelitanan fiel a ser inspirá pa traha un registro skirbí di Jehova su tratonan cu Israel, i tambe su conseho, su leynan i su profecianan. Mediante e skirbimentunan aki e escribanan antiguo ei a duna testimonio na tur futuro generacion—incluyendo esun di nos awe—cu tin solamente un Dios, i cu su nomber ta Jehova.—Daniel 12:9; 1 Pedro 1:10-12.

14. Pakico algun cu a duna testimonio pa Jehova a sufri di persecucion?

¹⁴ Desafortunadamente, Israel frecuentemente a faya den ehercé fe, i e ora ei Jehova tabatin cu manda testigonan na su mes nacion. Hopi di esakinan a ser persiguí. Pablo a bisa cu algun a “ricibí nan prueba dor di mofa i sota, en berdad, mas cu esei, cu cadena i prizon.” (Hebreonan 11:36) Fiel testigonan en berdad! Ki tristu cu nan persecucionnan hopi biaha a bini for di co-miembronan di Jehova su nacion scogí! (Mateo 23:31, 37) Realmente, e picá dje nacion a bira asina grandi cu na 607 P.E.C., Jehova a trece e babilonionan pa destruí Jerusalem cu su tempel i hiba e mayoria dje israelitanan sobrebibiente den exilio. (Jeremías 20:4; 21:10) Esei tabata e fin dje testimonio nacional na fabor di Jehova su nomber? No.

Un Huicio di Diosnan

15. Con un testimonio a ser duná asta den exilio na Babilonia?

¹⁵ Asta den exilio na Babilonia, e miembronan fiel dje nacion no a vacilá pa duna testimonio tocante Jehova su Divinidad i poder. Por ehempel, cu curashi Daniel a interpretá e soñonan di Nabucodonosor, a splica e skirbimentu riba muraya pa Bélsasar, i a nenga di haci compromiso dilanti Dario den e asuntu di oracion. E tres hebreonan tambe, ora nan a nenga di buig dilanti un imágen, a duna Nabucodonosor un testimonio maraviyoso.—Daniel 3:13-18; 5:13-29; 6:4-27.

16. Con Jehova a profetisá dje regreso di Israel na nan pais, i kico lo tabata e propósito dje regreso aki?

¹⁶ No obstante, Jehova a proponé pa un testimonio nacional ser duná atrobe riba e suela di Israel. Ezekiel, kende a profetisá entre e hudiunan exiliá na Babilonia, a skirbi di Jehova su determinacion relacioná cu e tera desolá: “Lo mi multiplicá riba boso e género humano, henter e cas di Israel, den su totalidad, i e stadnan mester bira habitá, i e lugánan desolá mes lo ser reedificá.” (Ezekiel 36:10) Pakico Jehova lo kier a haci esaki? Principalmente como un testimonio pa su propio nomber. Mediante Ezekiel el a bisa: “No pa causa di boso mi ta hacié, o cas di Israel, sino pa mi nomber santu, cua boso a profaná entre e nacionnan.”—Ezekiel 36:22; Jeremías 50:28.

17. Kico ta e contexto dje palabranan di Isaías 43:10?

¹⁷ Tabata ora cu el a profetisá tocante e regreso di Israel for di exilio na Babilonia cu profeta Isaías a ser inspirá pa skirbi e palabranan di Isaías 43:10, bisando cu Israel tabata Jehova su testigo, su sirbidor. Na Isaías 43 i 44, Jehova ta ser describí como Israel su Creador, Formador, Dios, Santu, Salbador, Recomprador, Rey i Hacidor. (Isaías 43:3, 14, 15; 44:2) E exilio di Israel a ser permití debí cu e nacion bes tras bes a keda sin glorifik’é como tal. Sin embargo, ainda nan tabata su pueblo. Jehova a bisa nan: “No tene miedu, pasobra mi a cumprá bo bek. Mi a yamá bo na bo nomber. Bo ta di mi.” (Isaías 43:1) E exilio di Israel na Babilonia lo a terminá.

18. Con e liberacion di Israel for di Babilonia a duna prueba cu Jehova ta e único Dios berdadero?

¹⁸ Efectivamente, Jehova a convertí e liberacion di Israel for di Babilonia den un huicio di diosnan. El a desafiá e diosnan falsu dje nacionnan pa producí nan testigonan, i el a nombra Israel como su testigo. (Isaías 43:9, 12) Ora el a kibra e cadenanan di exilio di Israel, el a duna prueba cu e diosnan di Babilonia no tabata dios di ningun manera i cu e ta e único Dios berdadero. (Isaías 43:14, 15) Ora el a nombra Ciro e perso rond di 200 aña promé cu e suceso como su sirbidor pa libra e hudiunan, el a duna mas prueba di su Divinidad. (Isaías 44:28) Israel lo a ser librá. Pakico? Jehova ta splica: “Pa nan [Israel] relatá mi alabansa.” (Isaías 43:21) Esei lo a duna mas oportunidad pa un testimonio.

19. Ki testimonio a ser duná dor dje invitacion cu Ciro a duna e israelitanan pa bolbe bek na Jerusalem i dor dje echonan dje fiel hudiunan despues di e regreso ei?

¹⁹ Ora e tempu a yega, Ciro e perso a conkistá Babilonia net manera a ser profetisá. Ciro, aunke un pagano, a proclamá Jehova su Divinidad ora el a emití un pronunciacion n’e hudiunan na Babilonia: “Ken cu tin entre boso di tur su pueblo, laga su Dios resultá di ta cuné. Pues lagu’e subi na Jerusalem, cu ta den Huda, i reedificá e cas di Jehova e Dios di Israel—e ta e Dios berdadero—cu tabata den Jerusalem.” (Esdras 1:3) Hopi hudiu a reaccioná faborablemente. Nan a haci e biahe largu p’e Tera Primintí i a construí un altar n’e sitio bieu dje tempel. Apesar di desanimacion i oposicion fuerte, finalmente nan por a reedificá e tempel i e stad di Jerusalem. Tur esaki a sosodé, manera Jehova mes a bisa, “no pa medio di un forsa militar, ni pa medio di poder, sino pa medio di [su] spiritu.” (Zacarías 4:6) E logronan aki a duna mas evidencia cu Jehova ta e Dios berdadero.

20. Apesar di Israel su debilidadnan, kico por ser bisá tocante nan dunamentu di un testimonio p’e nomber di Jehova den e mundu antiguo?

²⁰ Asina, Jehova a sigui usa Israel, aunke un nacion di hende imperfecto i algun biaha rebelde, como su testigo. Den e mundu pre-cristian, e nacion ei, cu su tempel i sacerdocio, a representá e centro mundial di adoracion berdadero. Ken cu ta lesa den e Scritura Hebreo di Jehova su echonan relacioná cu Israel no por tin ningun clase di duda cu tin solamente un Dios berdadero, i cu su nomber ta Jehova. (Deuteronomio 6:4; Zacarías 14:9) Sin embargo, un testimonio muchu mas grandi mester a ser duná p’e nomber di Jehova, i nos lo considerá esaki den e siguiente artículo.

Bo Ta Corda?

◻ Con Abraham a duna un testimonio cu Jehova ta e Dios berdadero?

◻ Ki cualidad sobresaliente di Moises a permitié ser un testigo fiel?

◻ Den ki maneranan Israel a duna un testimonio nacional tocante Jehova?

◻ Con e liberacion di Israel for di Babilonia tabata un demostracion cu Jehova ta e único Dios berdadero?

[Plachi na página 10]

Mediante su fe i obedencia, Abraham a duna un testimonio sobresaliente di Jehova su Divinidad