Un Les for di Para i Flor

KICO hopi bes ta preocupá hende awe mas cu tur otro cos? Pa mayoria hende, esei ta di tin suficiente placa pa mantencion di nan famia of di por mehorá nan nivel di bida.

Ganando suficiente placa pa percurá pa nan mes i pa nan famia tambe tabata un preocupacion principal tempu Jesucristo tabata riba tera. Pero el a spierta cu e preocupacion válido aki lo por bira un ansiedad principal excluyendo asuntunan spiritual. Pa ilustrá su punto, Jesus a bisa su disipelnan pa wak atentamente na e paranan i na e flornan.

Paranan mester come tur dia—hopi mas tantu na proporcion cu nos debí na nan ritmo haltu di metabolismo. Ademas, nan no por sembra simia, cosechá of warda cuminda pa futuro. Sin embargo, manera Jesus a observá, nos “Tata celestial ta alimentá nan.” (Mateo 6:26) Di igual manera, Dios ta bisti cu e bistí di mas fini e bunita “lelinan di campo.”—Mateo 6:28-30.

Jesus ta sigurá nos cu si nos mantené necesidadnan material den nan perspectiva corecto i duna cosnan spiritual prioridad, Dios lo haci sigur cu nos tambe lo tin e cuminda i paña necesario. Si Jehova Dios ta percurá pa e paranan i pa e flornan, siguramente lo e percurá pa esnan cu ta stim’é i ta ‘sigui busca promé e reino i Su husticia.’ (Mateo 6:33) Abo ta poniendo interesnan dje Reino di Dios promé den bo bida?