Un Rito Sin Nificacion?
E SACRAMENTO di confesion a ser practicá dor di católiconan pa siglonan. Sin embargo, pa hopi hende e ta un rutina bano. Refleccionando riba su hubentud, Bob, cabes di un scol secundario, ta bisa: “Mi tabata un tiener, i asta n’e tempu ei mi no a tuma confesion na serio.” Pakico no? Pa Bob, confesion a bira un rito sin nificacion. E ta splica: “Confesion tabata manera trece tur bo ekipahe yen di picá pa e duanero na aeropuerto. E ta hací bo preguntanan tocante bo picánan anto ta lagá bo pasa bai despues di a paga algu pa e artículonan di luho cu bo a cumpra ora bo tabata den extranheria.”
Di igual manera, Frank Wessling, skirbiendo den U.S. Catholic, ta describí e práctica di confesion como “un guia paso-a-paso extremadamente simplificá, extendiendo for di eliminacion di picánan comun pa medio di oracion memorisá di repentimentu te na e acto ritual di penitencia simbólico.” Wessling su conclusion? “Mi ta convencí cu Confesion ta bon pa un persona su bienestar spiritual,” e ta bisa. “Pero e manera cu católiconan ta efectu’é ta un problema.”
Bijbel ta presentá confesion den un manera completamente diferente. Di mayor importancia ta confesion na Dios. (Salmo 32:1-5) I e disipel cristian Santiago a skirbi: “Tin un hende enfermo entre boso? Lagu’e yama e ancianonan dje congregacion cerca dje i laga nan haci oracion riba dje, huntand’e cu zeta den e nomber di Jehova. P’esei, confesá abiertamente boso picánan un na otro i haci oracion un pa otro, pa boso por ser saná.”—Santiago 5:14, 16.
Un cristian cargá dor di picá por yama e superintendentenan di congregacion, kendenan por duna conseho personal i práctico for di Bijbel pa yuda e malechor bandoná su curso pecaminoso. E superintendentenan por duna animacion apropiado segun cu nan ta vigilá e progreso di esun cu ta enfermo spiritualmente. Ki un contraste cu e rito ceremonial di confesion cu e iglesianan djawendia ta practicá! Fortificá dor dje yudansa personal di ancianonan di congregacion, malechornan arepentí por haña e alivio cu David a sinti, manera el a expresá den un salmo: “Mi picá finalmente mi a confesá na bo, i mi eror mi no a sconde. Mi a bisa: ‘Lo mi haci confesion di mi delitunan na Jehova.’ I bo mes a pordoná e eror di mi picánan.”—Salmo 32:5.