Con Lo Bo Ta Pará Dilanti E Asiento di Huicio?

“Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso.”—MATEO 25:31.

1-3. Ki motibu pa optimismo nos tin relacioná cu husticia?

‘CULPABEL OF INOCENTE?’ Hopi hende ta puntra nan mes esaki ora nan tende informe di un of otro caso di corte. Huesnan i miembronan di hurado por purba ser onrado, pero generalmente husticia ta prevalecé? Bo no a tende di inhusticia den e proceso hudicial? Tal inhusticia no ta nobo, manera nos ta mira den Jesus su ilustracion hañá na Lucas 18:1-8.

² Sea cual sea bo experencia cu husticia humano, ripará Jesus su conclusion: “Dios lo no causa pa husticia ser hací pa su scogínan cu ta sclama na dje di dia i anochi . . . ? Mi ta bisa boso, Lo E causa pa husticia ser hací pa nan rápidamente. No obstante, ora e Yu di hende yega, lo e realmente haña fe riba tera?”

³ Sí, Jehova lo percurá pa su sirbidornan finalmente ricibí husticia. Jesus tambe ta enbolbí, specialmente awor pasobra nos ta bibando den “e último dianan” dje mal sistema actual. Pronto Jehova lo usa su poderoso Yu pa eliminá maldad completamente for dje tera. (2 Timoteo 3:1; 2 Tesalonicensenan 1:7, 8; Revelacion 19:11-16) Nos por haña perspicacia den Jesus su papel for di un dje último ilustracionnan cu el a duna, hopi biaha yamá e comparacion di carné i cabritu.

4. Con nos a comprendé e tempu di cumplimentu dje comparacion di carné i cabritu, pero pakico nos lo duna atencion n’e comparacion awor? (Proverbionan 4:18)

⁴ Pa hopi tempu nos a comprendé cu e comparacion a describí Jesus sintando como Rey na 1914 i for dje tempu ei husgando—bida eterno pa hende cu ta resultá di ta manera carné, morto permanente p’e cabritunan. Pero un reconsideracion dje comparacion ta hiba na un comprendimentu reahustá di su tempu di cumplimentu i loke e ta ilustrá. E refinamentu aki ta reforsá e importancia di nos trabou di predicá i e nificacion di reaccion di hende. Pa mira e base p’e comprendimentu mas profundo aki dje comparacion, laga nos considerá loke Bijbel ta mustra tocante Jehova i Jesus, tantu como Rey i como Hues.

Jehova Como e Hues Supremo

5, 6. Pakico ta apropiado pa mira Jehova tantu como Rey i Hues?

⁵ Jehova ta goberná e universo cu poder riba tur creacion. Sin un principio ni fin, e ta “Rey di eternidad.” (1 Timoteo 1:17; Salmo 90:2, 4; Revelacion 15:3) E tin autoridad pa traha statutonan, of leynan, i pa pone esakinan na vigor. Pero su autoridad ta incluí ser un Hues. Isaías 33:22 ta bisa: “Jehova ta nos Hues, Jehova ta nos Dunador di statuto, Jehova ta nos Rey; e mes lo salba nos.”

⁶ Pa hopi tempu Dios su sirbidornan a reconocé Jehova como e Hues di casonan i cuestionnan. Por ehempel, despues cu “e Hues di tur e tera” a evaluá e evidencia tocante e maldad di Sódoma i Gomora, el a husga cu e habitantenan a merecé destruccion i tambe a imponé e huicio hustu ei. (Génesis 18:20-33; Job 34:10-12) E echo cu Jehova ta un Hues hustu kende semper por cumpli cu su huicionan, definitivamente mester trankilisá nos!

7. Con Jehova a actua como Hues den tratamentu cu Israel?

⁷ Den Israel di antigwedad, algun biaha Jehova a administrá huicio directamente. Abo lo no a ser consolá e tempu ei sabiendo cu un Hues perfecto tabata dicidiendo asuntunan? (Levítico 24:10-16; Númeronan 15:32-36; 27:1-11) Tambe Dios a percurá “decisionnan hudicial” cu tabata completamente bon como norma pa husgamentu. (Levítico 25:18, 19; Nehemías 9:13; Salmo 19:9, 10; 119:7, 75, 164; 147:19, 20) E ta “Hues di tur e tera,” pues nos tur ta ser afectá.—Hebreonan 12:23.

8. Ki vision relevante Daniel a haña?

⁸ Nos tin testimonio di “testigonan ocular” relacioná cu e asuntu aki. Profeta Daniel a ricibí un vision di bestianan feros cu a representá gobiernunan of imperionan. (Daniel 7:1-8, 17) El a agregá: “Trononan a ser poné i e Anciano di Dianan a sinta. Su paña tabata blancu net manera sneu.” (Daniel 7:9) Ripará cu Daniel a mira trononan “i e Anciano di Dianan [Jehova] a sinta.” Puntra bo mes, ‘Daniel tabata presenciando aki con Dios a bira Rey?’

9. Kico ta un nificacion di ‘sintamentu’ riba un trono? Duna ehempel.

⁹ Wel, ora nos lesa cu un persona “a sinta” riba un trono, nos por pensa cu el a bira un rey, pasobra avéces Bijbel ta usa e lenguahe ei. Por ehempel: “Ora [Zimri] a cuminsá reina, tan pronto cu el a sinta riba su trono, e . . .” (1 Reynan 16:11; 2 Reynan 10:30; 15:12; Jeremías 33:17) Un profecia Mesiánico a bisa: “E mester sinta i goberná riba su trono.” P’esei, ‘sinta riba un trono’ por nificá bira rey. (Zacarías 6:12, 13) Jehova ta ser describí como un Rey cu ta sinta riba un trono. (1 Reynan 22:19; Isaías 6:1; Revelacion 4:1-3) E ta “Rey di eternidad.” Sin embargo, ya cu el a afirmá un aspecto nobo di soberania, por bisa di dje cu el a bira Rey, como si fuera el a sinta di nobo riba su trono.—1 Crónicanan 16:1, 31; Isaías 52:7; Revelacion 11:15-17; 15:3; 19:1, 2, 6.

10. Kico tabata un funcion primordial di reynan israelita? Ilustrá.

¹⁰ Pero aki tin un punto clave: Un funcion primordial di reynan di antigwedad tabata di tende casonan i administrá huicio. (Proverbionan 29:14) Corda Sálomon su huicio sabí ora dos hende muher a afirmá di ta mama dje mésun baby. (1 Reynan 3:16-28; 2 Crónicanan 9:8) Un di su edificionan gubernamental tabata “e Sala dje Trono unda lo e mester a husga,” yamá tambe “e sala di huicio.” (1 Reynan 7:7) Jerusalem a ser describí como e lugá caminda “e trononan pa huicio tabata sinta.” (Salmo 122:5) Claramente, ‘sintando riba un trono’ por nificá tambe ehercé autoridad hudicial.—Exodo 18:13; Proverbionan 20:8.

11, 12. (a) Kico tabata e nificacion di Jehova su sintamentu, mencioná na Daniel capítulo 7? (b) Con otro textonan ta confirmá cu Jehova ta sinta pa husga?

¹¹ Awor laga nos bolbe n’e esena unda Daniel a mira ‘e Anciano di Dianan sinta.’ Daniel 7:10 ta agregá: “E Tribunal a tuma su asiento, i tabatin bukinan cu a ser habrí.” Sí, e Anciano di Dianan tabata sintá pa administrá huicio tocante dominacion di mundu i pa husga e Yu di hende como digno pa goberná. (Daniel 7:13, 14) Despues nos ta lesa cu “e Anciano di Dianan a bini i huicio mes a ser duná na fabor dje santunan,” esnan husgá como apropiado pa goberná cu e Yu di hende. (Daniel 7:22) Finalmente “e Tribunal mes a sinta” i administrá huicio adverso riba e último poder mundial.—Daniel 7:26.a

¹² Consecuentemente, e echo cu Daniel a mira Dios ‘sinta riba un trono’ a nificá Su binimentu pa administrá huicio. Anteriormente David a canta: “Bo [Jehova] a ehecutá mi huicio i mi causa; bo a sinta riba e trono husgando cu husticia.” (Salmo 9:4, 7) I Joël a skirbi: “Laga e nacionnan sea lantá i subi na e yanura abou di Jehósafat; pasobra ei lo mi [Jehova] sinta pa husga tur e nacionnan.” (Joël 3:12; compará cu Isaías 16:5.) Tantu Jesus como Pablo tabata den situacionnan hudicial den cua un hende a sinta pa tende un caso i administrá huicio.b—Juan 19:12-16; Echonan 23:3; 25:6.

Jesus Su Posicion

13, 14. (a) Ki siguransa e pueblo di Dios tabatin cu Jesus lo bira Rey? (b) Na ki tempu Jesus a sinta riba su trono, i den ki sentido el a reina for di 33 E.C. padilanti?

¹³ Jehova ta tantu Rey como Hues. Kico di Jesus? E angel cu a anunciá su nacementu a bisa: “Jehova Dios lo dun’é e trono di David su tata, . . . i lo no tin fin di su reino.” (Lucas 1:32, 33) Jesus lo ta heredero permanente dje reinado di David. (2 Samuel 7:12-16) Lo e reina for di cielu, pasobra David a bisa: “E expresion di Jehova na mi Señor [Jesus] ta: ‘Sinta na mi man drechi te ora mi pone bo enemigunan como banki pa bo pia.’ E bara di bo poder Jehova lo manda for di Síon, bisando: ‘Bai, dominando meimei di bo enemigunan.’ ”—Salmo 110:1-4.

¹⁴ Na ki tempu esei lo ta? Jesus no a goberná como Rey ora e tabata hende. (Juan 18: 33-37) Na 33 E.C., el a muri, a ser resucitá i a subi na cielu. Hebreonan 10:12 ta bisa: “E homber aki a ofrecé un solo sacrificio pa picá perpetuamente i a sinta na man drechi di Dios.” Ki autoridad Jesus tabatin? “[Dios] a pon’é sinta na su man drechi den e lugánan celestial, hopi mas haltu cu tur gobiernu i autoridad i poder i dominio . . . i a hacié cabes riba tur cos p’e congregacion.” (Efesionan 1:20-22) Debí cu Jesus n’e tempu ei a haña autoridad real riba cristiannan, Pablo por a skirbi cu Jehova “a libra nos for dje autoridad dje scuridad i a transferí nos den e reino dje Yu di su amor.”—Colosensenan 1:13; 3:1.

15, 16. (a) Pakico nos ta bisa cu Jesus no a bira Rey dje Reino di Dios na 33 E.C.? (b) Na ki tempu Jesus a cuminsá reina den e Reino di Dios?

¹⁵ Sin embargo, n’e tempu ei, Jesus no a actua como Rey i Hues riba e nacionnan. El a sinta banda di Dios, sperando e tempu pa actua como Rey dje Reino di Dios. Pablo a skirbi di dje: “Cu referencia na cua dje angelnan el a yega di bisa: ‘Sintá bo na mi man drechi, te ora mi pone bo enemigunan como banki pa bo pia’?”—Hebreonan 1:13.

¹⁶ Testigonan di Jehova a publicá hopi evidencia cu Jesus su periodo pa spera a vence na 1914, ora el a bira gobernante dje Reino di Dios den cielunan invisibel. Revelacion 11:15, 18 ta bisa: “E reino dje mundu sí a bira e reino di nos Señor i di su Cristo, i lo e reina como rey pa semper hamas.” “Pero e nacionnan a rabia, i bo propio rabia a bini.” Sí, e nacionnan a expresá rabia un pa cu otro durante Guera Mundial I. (Lucas 21:24) E gueranan, temblornan, pestnan, scarcedadnan di cuminda i cosnan similar cu nos a mira desde 1914 ta confirmá cu Jesus ta reinando awor den e Reino di Dios, i cu e conclusion final dje mundu ta cerca.—Mateo 24:3-14.

17. Ki puntonan clave nos a establecé te asina leu?

¹⁷ Ata aki un repaso breve: Por bisa di Dios cu e ta sinta riba un trono como Rey, pero den un otro sentido e por sinta riba su trono pa husga. Na 33 E.C., Jesus a sinta n’e man drechi di Dios, i awor e ta Rey dje Reino. Pero Jesus, reinando awor como Rey, tambe ta sirbi como Hues? I pakico esaki mester interesá nos, specialmente n’e tempu aki?

18. Ki evidencia tin cu Jesus lo ta Hues tambe?

¹⁸ Jehova, kende tin e derecho pa nombra huesnan, a scoge Jesus como un Hues cu ta cumpli cu Su normanan. Jesus a mustra esaki ora el a papia tocante hende cu ta bira spiritualmente bibu: “E Tata no ta husga ningun hende, sino el a confia tur e husgamentu n’e Yu.” (Juan 5:22) Sin embargo, Jesus su papel hudicial ta bai mas ayá cu tal clase di husgamentu, pasobra e ta hues di bibu i di morto. (Echonan 10:42; 2 Timoteo 4:1) Pablo a yega di declará: “[Dios] a fiha un dia den cua e ta proponé pa husga e tera habitá den husticia dor di un homber [Jesus] ken el a nombra, i el a duna un garantia na tur hende dor di a resucit’é.”—Echonan 17:31; Salmo 72:2-7.

19. Pakico ta corecto pa papia di Jesus sintando como Hues?

¹⁹ Pues ta corecto pa nos concluí cu Jesus ta sinta riba un trono glorioso den e papel specífico di Hues? Sí. Jesus a bisa e apostelnan: “Den e re-creacion, ora e Yu di hende sinta riba su trono glorioso, boso cu a siguí mi tambe lo sinta riba diesdos trono, husgando e diesdos tribunan di Israel.” (Mateo 19:28) Aunke Jesus awor ta Rey dje Reino, su otro actividad mencioná na Mateo 19:28 lo incluí sintamentu riba un trono pa husga durante e Milenio. N’e tempu ei lo e husga tur humanidad, e hustunan i e inhustunan. (Echonan 24:15) Ta bon pa tene esaki na mente segun cu nos ta dirigí nos atencion na un di Jesus su comparacionnan cu ta relacioná cu nos tempu i cu nos bida.

Kico e Comparacion Ta Bisa?

20, 21. Kico Jesus su apostelnan a puntra cu ta relacioná cu nos tempu, hibando na ki pregunta?

²⁰ Djis promé cu Jesus a muri, su apostelnan a puntr’é: “Na ki tempu e cosnan aki lo ta, i kico lo ta e señal di bo presencia i dje conclusion dje sistema di cosnan?” (Mateo 24:3) Jesus a pronosticá desaroyonan significativo riba tera promé cu ‘e fin yega.’ Djis promé cu e fin ei, e nacionnan lo “mira e Yu di hende biniendo riba e nubianan di cielu cu poder i gran gloria.”—Mateo 24:14, 29, 30.

²¹ Pero, con lo para cu hende den e nacionnan ei ora e Yu di hende yega den su gloria? Laga nos haña sa for dje comparacion di carné i cabritu, cu ta cuminsá cu e palabranan: “Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso. I tur e nacionnan lo ser reuní dilanti dje.”—Mateo 25:31, 32.

22, 23. Ki puntonan ta indicá cu e comparacion di carné i cabritu no a cuminsá su cumplimentu na 1914?

²² E comparacion aki ta aplicá ora Jesus a sinta den poder real na 1914, manera nos a comprendé pa hopi tempu? Wel, Mateo 25:34 ta papia di dje como Rey, pues e comparacion lógicamente ta haña aplicacion desde cu Jesus a bira Rey na 1914. Pero ki husgamentu el a haci pronto despues di esei? Esei no tabata un husgamentu di “tur e nacionnan.” Mas bien, el a dirigí su atencion na esnan cu ta afirmá di forma “e cas di Dios.” (1 Pedro 4:17) Na armonia cu Malakías 3:1-3, Jesus, como mensahero di Jehova, hudicialmente a inspeccioná e cristiannan ungí cu a sobra riba tera. Tabata tempu tambe pa sentencia hudicial riba cristiandad, cu falsamente a afirmá di ta “e cas di Dios.”c (Revelacion 17:1, 2; 18:4-8) Sin embargo, no tin nada cu ta indicá cu n’e tempu ei, of desde 1914, Jesus a sinta pa husga hende di tur e nacionnan finalmente como carné of cabritu.

²³ Si nos analisá Jesus su actividad den e comparacion, nos ta observ’é finalmente husgando tur e nacionnan. E comparacion no ta mustra cu tal husgamentu lo continuá durante un periodo extenso di hopi aña, como si fuera tur persona cu a muri durante e último décadanan aki a ser husgá digno di morto eterno of bida eterno. Ta parce cu e mayoria cu a muri den décadanan recien a bai n’e graf comun di humanidad. (Revelacion 6:8; 20:13) Sin embargo, e comparacion ta describí e tempu ora Jesus ta husga hende di “tur e nacionnan” cu e ora ei ta bibu i ta enfrentá e ehecucion di su sentencia hudicial.

24. Na ki tempu e comparacion di carné i cabritu lo ser cumplí?

²⁴ Cu otro palabra, e comparacion ta señalá na futuro ora e Yu di hende lo yega den su gloria. Lo e sinta pa husga hende cu ta na bida e tempu ei. Su huicio lo ta basá riba loke nan a manifestá di ser. N’e tempu ei “e distincion entre un hustu i un malbado” lo a keda claramente establecí. (Malakías 3:18) E pronunciacion i ehecucion mes di huicio lo ser efectuá den un tempu limitá. Jesus lo administrá decisionnan hustu basá riba loke a bira bisto tocante individuonan.—Mira tambe 2 Corintionan 5:10.

25. Kico Mateo 25:31 ta describiendo ora e ta papia dje Yu di hende sintando riba un trono glorioso?

²⁵ Esaki ta nificá anto, cu Jesus su ‘sintamentu riba su trono glorioso’ pa husgamentu, mencioná na Mateo 25:31, ta aplicá n’e tempu di futuro ora e poderoso Rey aki lo sinta pa pronunciá i ehecutá huicio riba e nacionnan. Sí, e esena di huicio cu ta enbolbé Jesus na Mateo 25:31-33, 46 ta comparabel cu e esena den Daniel capítulo 7, unda e Rey reinando, e Anciano di Dianan, a sinta pa cumpli cu su papel como Hues.

26. Ki splicacion nobo dje comparacion ta bira evidente?

²⁶ Comprendiendo e comparacion di carné i cabritu den e manera aki ta indicá cu e administracion di huicio riba e carné i e cabritunan ta den futuro. Lo e tuma lugá despues cu “e tribulacion” mencioná na Mateo 24:29, 30 cuminsá i e Yu di hende ‘yega den su gloria.’ (Compará cu Marco 13:24-26.) E ora ei, na fin di henter e sistema malbado, Jesus lo areglá un corte i lo administrá i ehecutá huicio.—Juan 5:30; 2 Tesalonicensenan 1:7-10.

27. Kico nos mester ta interesá pa sa tocante e comparacion final di Jesus?

²⁷ Esaki ta clarificá nos comprendimentu dje tempu di cumplimentu di Jesus su comparacion, cu ta mustra na ki tempu e carnénan i e cabritunan lo ser husgá. Pero con e ta afectá nos cu ta predicando e bon nobo di Reino celosamente? (Mateo 24:14) Esei ta haci nos trabou ménos significante, of e ta trece un mayor peso di responsabilidad? Laga nos mira den e siguiente artículo con nos ta ser afectá.

[Notanan]

Bo Ta Corda?

◻ Con Jehova ta sirbi como Rey i Hues?

◻ Ki dos nificacion ‘sintamentu riba un trono’ por tin?

◻ Kico nos tabata bisa anteriormente pa cu e tempu di cumplimentu di Mateo 25:31, pero ki base tin pa un punto di bista reahustá?

◻ Na ki tempu e Yu di hende ta sinta riba su trono, manera Mateo 25:31 ta indicá?