E Fin Permanente na Violencia—Con?

PA FRENA e ola di violencia, un cantidad di stad na Merca a haci un experimento cu un idea nobo—duna un recompensa den forma di cen of mercancia pa scopetnan cu ser entregá, sin haci ningun pregunta. E resultado? Por ehempel, e stad di St. Louis a colectá 8.500 scopet na un costo di US$341.000. Un programa similar na e stad di New York a producí mas cu mil arma.

Ki efecto tur esaki tabatin riba criminalidad? Lamentablemente, masha poco. E aña siguiente homicidionan cometí cu scopet a alcansá un máximo mas haltu cu nunca na St. Louis. Na e stad di New York, ainda tin, segun calculacion, dos miyon scopet den man di hende comun. Na Merca, tin rond di 200 miyon scopet cu ta propiedad privá, casi un pa cada homber, muher i mucha. Den otro paisnan, violencia cometí cu scopet ta aumentando cu un rapides alarmante. Na Gran Bretania “entre 1983 i 1993, e cantidad di ofensanan cu polis a registrá den cua arma di candela tabata enbolbí a bira casi dobel, yegando na 14.000,” The Economist ta bisa. Aunke e cantidad di homicidio ta relativamente abou, tin rond di un miyon arma ilegal den e pais ei.

Siguramente, cualkier reduccion den e cantidadnan spantoso ei ta un paso padilanti. Sin embargo, medidanan manera esnan describí ariba apénas ta yega na e causanan fundamental di violencia. Cua e causanan ei ta? Tin hopi factor cu a ser mencioná, pero un par di nan ta fundamental. E falta di stabilidad den famia i di instruccion moral a hiba hopi hóben na djoin ‘gangnan’ pa haña un sentido di ta pertenecé un caminda. E tentacion pa ganashinan grandi ta inducí hopi hende pa recurí na violencia. Inhusticia ta pusha otronan pa resolvé asuntunan cu medionan violento. Orguyo di nacion, rasa of posicion social ta pone hende ignorá e sufrimentu di otronan. Esakinan ta factornan cu tin raisnan profundo, pa cua no tin solucionnan fácil.

Kico Por Ser Hací?

Mas polis, castigunan di prizon mas pisá, control di arma, pena di morto—tur esakinan a ser proponé i a ser purbá como medionan pa frena crímen i violencia. A logra éxito cu nan den diferente grado, pero e echo tristu ta cu violencia ainda ta forma parti di nos bida. Pakico? Ta pasobra cu e medidanan aki simplemente ta trata e síntomanan.

Na otro banda, hopi experto ta di opinion cu e clave pa pone un fin na violencia ta educacion. Aunke esaki ta un idea sano, nos mester remarcá cu violencia no ta limitá na nacionnan unda oportunidadnan pa haña educacion ta limitá. En realidad, ta parce cu algun dje nacionnan mas violento ta tambe esnan cu tin e nivelnan mas haltu di educacion. No ta difícil pa mira cu loke ta necesario no ta solamente educacion, sino e clase corecto di educacion. Cua clase di educacion esei lo ta? Tin un persona cu ta capas pa siña hende pa ta stimadornan di pas i individuonan recto?

“Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda unda bo mester cana. O, si bo realmente presta atencion na mi mandamentunan! E ora ei bo pas lo yega di ta hustamente manera un riu, i bo husticia manera e olanan di laman.” (Isaías 48:17, 18) Con Jehova Dios ta siña hende pa ta stimadornan di pas i pa ta hustu? Principalmente mediante su Palabra, e Bijbel.

E Poder di Dios Su Palabra

Bijbel ta leu di ta simplemente un coleccion di fábula i dichonan bieu cu ta anticuá i irelevante. E ta contené principionan i ideanan dje Creador di humanidad, kende, for di su punto di bentaha supremo, conocé a naturalesa humano mihó cu cualkier otro persona. “Mescos cu cielu ta mas haltu cu e tera, asina mi camindanan ta mas haltu cu boso camindanan, i mi pensamentunan mas haltu cu boso pensamentunan,” Jehova Dios ta bisa.—Isaías 55:9.

P’e motibu aki apostel Pablo a duna testimonio cu “e palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta pa separá alma i spiritu, i djoint i nan tuti, i por distinguí pensamentunan i intencionnan dje curason.” (Hebreonan 4:12) Sí, e Palabra di Dios tin e poder pa penetrá i toca un persona su curason i cambia su manera di pensa i di comportá su mes. No ta esaki ta loke ta necesario pa cambia e manera violento di hende awe?

Testigonan di Jehova, awor rond di cincu miyon na cantidad den mas cu 230 pais, ta un prueba bibu di cu e Palabra di Dios, en berdad, tin poder pa transformá bida di hende pa mihó. Entre nan tin hendenan di tur nacionalidad, idioma i rasa. Tambe nan ta bini di tur nivel i antecedente social. Algun di nan un tempu a hiba un bida violento i yen di problema. Pero en bes di permití factornan asina fomentá enemistad, rivalidad, discriminacion i odio meimei di nan, nan a siña vence e bareranan aki i a bira un pueblo cu ta stima pas i cu ta uní mundialmente. Kico a haci esaki posibel?

Un Campaña cu Ta Pone Fin na Violencia

Testigonan di Jehova a comprometé nan mes pa yuda otronan gana conocimentu exacto dje propósito di Dios manera su Palabra, e Bijbel, ta revel’é. Den tur skina dje tera, nan ta buscando esnan cu kier siña di Jehova su camindanan i kier ser siñá dor di dje. Nan esfuersonan ta dunando fruta. E resultado dje campaña educacional aki ta cu un profecia maraviyoso ta hañando cumplimentu.

Un 2.700 aña pasá, profeta Isaías a ser inspirá pa skirbi: “Mester sosodé den e parti final dje dianan cu . . . hopi pueblo siguramente lo bai i bisa: ‘Ban, i laga nos subi na e ceru di Jehova, na e cas di e Dios di Jacob; i lo e instruí nos tocante su camindanan, i nos lo cana den su bereanan.’ ”—Isaías 2:2, 3.

Ser siñá dor di Jehova i cana den su bereanan por producí cambionan maraviyoso den e bida di hende. Un dje cambionan a ser profetisá den e mésun profecia: “Nan lo tin cu bati nan spadanan na ploeg i nan lansanan na chapi. Nacion lo no hisa spada contra nacion, ni nan lo no siña di guera mas.” (Isaías 2:4) Hopi hende a lesa e texto aki. De facto, e texto aki ta grabá riba un muraya na e Plasa di Nacionnan Uní den e stad di New York. E ta un recordatorio di loke ta e aspiracion di Nacionnan Uní pero cu nan a faya pa realisá. Ningun organisacion político formá dor di hende lo logra eliminá guera i violencia. Esei ta algu cu solamente Jehova Dios ta capas pa haci. Con lo e logr’é?

Obviamente no ta tur hende lo respondé na e invitacion di “subi na e ceru di Jehova” i ‘ser instruí tocante su camindanan’ i “cana den su bereanan”; ni no ta tur lo ta dispuesto pa “bati nan spadanan na ploeg i nan lansanan na chapi.” Kico Jehova lo haci tocante hendenan asina? Lo e no tene e porta di oportunidad habrí pa semper of warda riba nan pa nan cambia. Pa trece un fin na violencia, Jehova lo trece tambe un fin na esnan cu ta insistí di sigui den nan camindanan violento.

Un Les Esencial

Loke Dios a haci den e dianan di Noe ta duna nos un les spiertador awe. E registro bíblico ta mustra ki clase di mundu tabata existí den e tempu ei: “E tera a yega di ta ruiná den bista di e Dios berdadero i e tera a yena cu violencia.” P’e motibu aki, Dios a informá Noe: “E fin di tur carni a yega dilanti mi, pasobra e tera ta yen di violencia como resultado di nan; i mira, mi ta bai ruiná nan huntu cu e tera.”—Génesis 6:11, 13.

Nos mester tuma nota di un punto importante. Ora Dios a trece e Diluvio riba e generacion ei, Dios a conserbá Noe i su famia. Pakico? E Bijbel ta contestá: “Noe tabata un homber hustu. El a resultá di ta sin culpa entre su contemporáneonan. Noe a cana cu e Dios berdadero.” (Génesis 6:9; 7:1) Aunke no ta tur hende bibando den e tempu ei necesariamente tabata un persona violento, solamente Noe i su famia “a cana cu e Dios berdadero.” Pa motibu di esei nan a sobrebibí ora e mundu violento ei a yega na un fin.

Segun cu nos ta mira cu un biaha mas e tera ta birando ‘yen di violencia,’ nos por ta sigur cu e no ta pasa e atencion di Dios forbij. Mescos cu el a haci den e dianan di Noe, asina lo e tuma accion pronto i pone un fin na violencia—permanentemente. Pero tambe lo e percurá un caminda di siguridad pa esnan cu awor ta siñando pa “cana cu e Dios berdadero,” esnan cu ta respondiendo na su gran campaña educacional pa pas.

Mediante e salmista, Jehova ta duna e siguransa aki: “Solamente un poco tempu mas, i e malbado lo no t’ei mas; i abo siguramente lo duna atencion na su lugá, i lo e no t’ei. Pero e mansunan mes lo poseé e tera, i nan berdaderamente lo haña nan deleite exkisito den e abundancia di pas.”—Salmo 37:10, 11.

Testigonan di Jehova gustosamente lo studia e Bijbel cu bo di manera cu bo por uni cu esnan cu ta bisa: “Laga nos subi na e ceru di Jehova, na e cas di e Dios di Jacob; i lo e instruí nos tocante su camindanan, i nos lo cana den su bereanan.” (Isaías 2:3) Haciendo esaki, bo por ta entre esnan cu lo mira e fin di tur maldad i violencia. Bo por haña “deleite exkisito den e abundancia di pas.”

[Rekonosementu pa Potrèt na página 5]

Reuters/Bettmann