Uní den Sirbishi di Dios den Tempu Bon i Malu

Manera Michel i Babette Muller a relatá

“MI TIN mal noticia pa boso,” e dokter a bisa. “Boso por bien lubidá boso bida di misionero na Africa.” Mirando mi esposa, Babette, el a bisa, “Bo tin cancer na pechu.”

No tin palabra pa describí con pasmá nos a keda. Hopi cos a pasa lihé dor di nos mente. Nos a pensa cu e bishita aki n’e dokter lo tabata solamente un último chekeo. Nos a cumpra nos pasashinan di regreso pa Benin, West Africa. Nos a spera di por tabata aya dentro di un siman. Durante nos 23 añanan casá, nos a experenciá tempu bon i malu. Confundí i yen di temor, awor nos a prepará nos mes pa un lucha contra cancer.

Laga nos cuminsá na cuminsamentu. Michel a nace na september 1947, Babette na augustus 1945. Nos a lanta na Francia i a casa na 1967. Nos tabata biba na Paris. Un mainta na principio di 1968, Babette tabata lat pa trabou. Un señora a bini na porta i a ofrec’é un foyeto religioso; el a acept’é. E ora ei e señora a bisa: “Mi por bolbe bek cu mi esposo pa papia cu abo i bo casá?”

Babette tabata pensando riba su trabou. E tabata kier p’e muher a bai, pues el a bisa, “Ta bon, ta bon.”

Michel ta conta: “Mi no tabatin ningun interes den religion, pero e foyeto a capta mi atencion, i mi a les’é. Un par di dia despues, e señora, Joceline Lemoine, a bolbe bek cu su casá, Claude. Claude tabata masha ábil den su uso di Bijbel. E tabatin contesta riba tur mi preguntanan. Mi a keda impresioná.

“Babette tabata un bon católico pero e no tabatin un Bijbel, loke no tabata algu straño pa católiconan. E tabata masha emocioná pa mira i lesa e Palabra di Dios. For di nos estudio nos a haña sa cu hopi dje ideanan religioso cu nan a siña nos tabata falsu. Nos a cuminsá papia cu nos parientenan i amigunan tocante e cosnan cu nos tabata siñando. Na januari 1969 nos a ser bautisá como Testigonan di Jehova. Nuebe di nos parientenan i amigunan a ser bautisá pronto despues di esei.”

Sirbiendo Caminda Tabatin Necesidad di Predicadornan

Pronto despues di nos bautismo, nos a pensa: ‘Nos no tin yu. Pakico no cuminsá den e ministerio di tempu completo?’ Pues na 1970 nos a laga nos trabou, a inscribí como pionero regular i a muda pa e pueblo chikitu di Magny-Lormes, cerca di Nevers, den e centro di Francia.

Esei tabata un asignacion difícil. Tabata duru pa haña hende cu kier a studia Bijbel. Nos no por a haña trabou seglar, di manera cu nos tabatin tiki placa. Tin biaha nos tabatin solamente batata pa come. Durante winter e temperaturanan tabata baha bastante bou di cero grado Celsio. Nos a yama e tempu cu nos a pasa ei e tempu dje siete baca flacunan.—Génesis 41:3.

Pero Jehova a sostené nos. Un dia ora nos casi no tabatin cuminda mas, e partidó di carta a entregá un caha grandi di keshi cu a bini for di Babette su ruman muher. Un otro dia nos a yega cas despues di predicá i a haña algun amigu cu a core 500 kilometer pa bin bishitá nos. Tendiendo con difícil cosnan tabata, e rumannan aki a yena nan dos autonan cu cuminda pa nos.

Despues di un aña i mei, e Sociedad a nombra nos como pionero special. Den transcurso dje siguiente cuater añanan, nos a sirbi na Nevers, despues na Troyes i finalmente na Montigny-lès-Metz. Na 1976, Michel a ser nombrá pa sirbi como superintendente di circuito den e parti zuidwest di Francia.

Dos aña despues, durante un scol pa superintendente di circuito, nos a haña un carta for dje Sociedad Watch Tower invitando nos pa bai afó como misionero; e carta a bisa cu nos por a scoge entre Chad i Burkina Faso (e tempu ei Volta Ariba). Nos a scoge Chad. Pronto despues nos a ricibí un otro carta, asignando nos pa traha bou dje sucursal di Tahiti. Nos a pidi pa bai Africa, un continente inmenso, pero pronto a haña nos mes riba un isla chikitu!

Sirbiendo den Sur Pacífico

Tahiti ta un bunita isla tropical den Sur Pacífico. Ora nos a yega, rond di cien ruman tabatei pa topa nos n’e aeropuerto. Nan a yama nos bon biní cu slingernan di flor, i aunke nos tabata cansá despues di nos biahe largu for di Francia, nos tabata masha contentu.

Cuater luna despues cu nos a yega na Tahiti, nos a abordá un boto di bela chikitu yená cu un cargamentu di coco secu. Cincu dia despues nos a yega na nos asignacion nobo—e isla di Nuku Hiva di Islanan Marquésas. Rond di 1.500 hende tabata biba riba e isla, pero no tabatin ningun ruman. Nos so.

E condicionnan tabata primitivo den e tempu ei. Nos tabata biba den un cas chikitu trahá di cement i bambu. No tabatin electricidad. Nos tabatin un kranchi di awa cu tabata traha tin biaha, pero e awa tabata yen di lodo. Mayoria biaha, nos tabata usa awa di yobe cu a acumulá den un renbak. No tabatin caya asfaltá, solamente camindanan smal di tera.

Pa alcansá e partinan lehano dje isla, nos tabatin cu huur cabai. E sianan tabata trahá di palu—masha incomfortabel, specialmente pa Babette, kende nunca a yega di core cabai. Nos tabata cana cu un machete pa kap i kita e palunan di bambu cu tabata cai riba e camindanan smal. Tabata un cambio grandi compará cu bida na Francia.

Nos tabata tene reunionnan diadomingo, aunke ta nos dos so a asistí. Na cuminsamentu nos no tabata tene e otro reunionnan ya cu tabata nos dos so. Na lugá di esei nos tabata lesa e material dje reunion huntu.

Despues di un par di luna, nos a dicidí cu no tabata bon pa sigui asina. Michel ta conta: “Mi a bisa Babette, ‘Nos tin cu bisti na un manera apropiado. Abo ta sinta ei, i ami lo sinta aki. Lo mi cuminsá cu un oracion, i e ora ei nos lo tene e Scol di Ministerio Teocrático i e Reunion di Sirbishi. Mi ta haci e preguntanan, i abo ta contestá, asta si abo ta e único otro persona den e sala.’ Tabata bon cu nos a haci esei pasobra ta masha fácil pa bira spiritualmente negligente ora no tin congregacion.”

A tuma tempu pa haña hende bini na nos reunionnan cristian. Nos tabata e único dosnan p’e promé ocho lunanan. Mas despues un, dos of tin biaha tres persona mas a bini acerca. Un aña, solamente nos dos a cuminsá e celebracion anual dje Cena di Señor. Despues di dies minuut, algun hende a bini, pues mi a stop i cuminsá e discurso di nobo.

Awe, tin 42 publicador i 3 congregacion riba e Islanan Marquésas. Aunke nos sucesornan a haci mayor parti dje trabou, algun hende cu nos a papia cuné e tempu ei awor ta rumannan bautisá.

Nos Rumannan Ta Precioso

Nos a siña haña pacenshi na Nuku Hiva. Nos tabatin cu spera pa tur cos fuera dje necesidadnan di mas básico. Si bo tabata kier un buki, por ehempel, bo tabatin cu skirbi pidi p’e, despues warda dos of tres luna promé cu el a yega.

Un otro les cu nos a siña tabata cu nos rumannan ta precioso. Ora nos a bishitá Tahiti i a asistí na un reunion i a tende e rumannan canta, nos wowo a yena cu awa. Kisas ta cierto cu algun ruman ta difícil pa anda cuné, pero ora bo ta so, bo ta realisá ki bon ta pa ser parti dje hermandad. Na 1980 e Sociedad a dicidí cu nos mester regresá Tahiti i sirbi den e trabou di circuito. Ei e hospitalidad caluroso dje rumannan i nan amor p’e trabou di predicacion a animá nos masha tantu. Nos a pasa tres aña den e trabou di circuito na Tahiti.

Di Isla pa Isla

Siguientemente nos a ser asigná na un cas di misionero na Raïatéa, un otro isla pacífico, i nos a keda ei pa mas o ménos dos aña. Despues di Raïatéa, nos a ser asigná p’e trabou di circuito den e grupo di islanan Tuamotu. Nos a bishitá 25 dje 80 islanan cu boto. Pa Babette esei tabata difícil. Tur biaha cu el a biaha cu boto, el a marea.

Babette ta bisa: “Esei tabata teribel! Mi tabata malu tur e tempu cu nos a pasa riba e boto. Si nos tabata riba laman cincu dia, mi tabata malu cincu dia largu. Ningun remedi a yudá mi. Tog, apesar di mi mareamentu, mi tabata haña cu e océano tabata bunita. Tabata un bista maraviyoso. Dolfijnnan tabata pusta cu e boto. Hopi biaha nan tabata bula sali for di awa ora bo a klap bo mannan!”

Despues di cincu aña den e trabou di circuito, nos a ser asigná atrobe na Tahiti pa dos aña i atrobe nos a pasa bon den e trabou di predicacion. Nos congregacion a aumentá dobel na cantidad for di 35 pa 70 publicador den un aña i mei. Diesdos di esnan cu nos a studia cuné a ser bautisá djis promé cu nos a bai fo’i djei. Algun di nan awor ta anciano den e congregacion.

Na tur nos a pasa 12 aña den Sur Pacífico. Anto nos a ricibí un carta for dje Sociedad bisando cu nan no tabatin mester di misionero mas riba e islanan ya cu e congregacionnan tabata fuerte awor. Tabatin rond di 450 publicador ora nos a yega Tahiti i mas cu 1.000 ora nos a bai fo’i djei.

Por Fin, Africa!

Nos a regresá Francia, i despues di un luna i mei, e Sociedad a duna nos un asignacion nobo—Benin, West Africa. Nos kier a bai Africa 13 aña pasá, pues nos tabata masha contentu.

Nos a yega Benin dia 3 di november, 1990, i tabata entre e promé misioneronan cu a yega despues cu e prohibicion di 14 aña largu riba e actividad di predicacion di Reino a ser kitá. Esei tabata masha excitante. Nos no tabatin ningun problema pa establecé nos mes pasobra bida ta similar cu esun riba e islanan pacífico. E hendenan tabata masha amigabel i hospitalario. Bo por para i papia cu cualkier hende riba caya.

Solamente algun siman despues cu nos a yega Benin, Babette a ripará un pipita na su pechu. Pues nos a bai un clínica chikitu cerca dje oficina di sucursal recien establecí. E dokter a control’é i a bis’é cu e mester ser operá masha pronto. E siguiente dia nos a bai un otro clínica unda nos a bishitá un dokter europeo, un ginecólogo for di Francia. E tambe a bisa cu nos tabatin cu bai Francia rápidamente pa Babette por a ser operá. Dos dia despues nos tabata riba avion pa Francia.

Nos tabata tristu di mester a bandoná Benin. Cu e libertad religioso obtené di nobo den e pais, e rumannan tabata encantá pa tin misioneronan nobo, i nos tabata encantá pa ta ei. Di manera cu nos a lamentá cu nos tabatin cu bai despues di tabata den e pais pa solamente un par di siman.

Ora nos a yega Francia, e ciruhano a examiná Babette i a confirmá cu e mester a operá. E dokternan a actua rápidamente, i a haci un operacion chikitu i a laga Babette sali for di hospital e siguiente dia. Nos a kere cu esaki tabata e fin dje asuntu.

Ocho dia despues, nos a bai cerca e ciruhano. Tabata e ora ei cu el a notificá nos cu Babette tabatin cancer na pechu.

Reflehando riba con el a sinti su mes e ora ei, Babette ta bisa: “Na promé instante, mi tabata ménos preocupá cu Michel. Pero e dia despues dje mal noticia, mi no a sinti ningun sensacion. Mi no por a yora. Mi no por a sonreí. Mi a pensa cu mi ta bai muri. Pa mi, cancer tabata igual cu morto. Mi actitud tabata, Nos tin cu haci loke nos tin cu haci.”

E Lucha Contra Cancer

Nos a tende e mal noticia riba un diabierne, i Babette tabata programá pa un di dos operacion riba su diamars. Nos tabata keda cerca Babette su ruman muher, pero e tambe tabata malu, di manera cu nos no por a keda mas den su apartamento chikitu.

Nos a puntra nos mes unda nos lo por a bai. E ora ei nos a corda riba Yves i Brigitte Merda, un pareha cerca ken nos a keda anteriormente. E pareha aki tabata masha hospitalario cu nos. Pues nos a yama Yves na telefon i bis’é cu Babette mester a operá i cu nos no tabata sa unda pa keda. Tambe nos a bis’é cu Michel tabatin mester di un trabou.

Yves a duna Michel trabou rond di cas. E rumannan a apoyá i a animá nos cu hopi acto di bondad. Tambe nan a yuda nos financieramente. E Sociedad a paga Babette su gastunan médico.

E operacion tabata grandi. E dokternan tabatin cu kita e henter e pechu afó. Nan a cuminsá cu kimoterapia inmediatamente. Despues di un siman, Babette por a sali for di hospital, pero e tabatin cu regresá cada tres siman pa terapia continuo.

Durante e tempu cu Babette tabata ricibí tratamentu, e rumannan den e congregacion a yuda nos masha tantu. Un ruman muher cu tambe tabatin cancer na pechu tabata un gran animacion. El a bisa Babette kico pa spera i a dun’é hopi consuelo.

No obstante, nos tabata anshá tocante nos futuro. Dicerniendo esaki, Michel i Jeannet Cellerier a hiba nos restaurant pa un cuminda.

Nos a bisa nan cu nos tabatin cu stop cu sirbishi di misionero i cu nos nunca mas lo por a regresá Africa. Sin embargo, Ruman Cellerier a bisa: “Kico? Ken ta bisa cu boso tin cu stop? E Cuerpo Gobernante? E rumannan na Francia? Ken a bisa esei?”

“Ningun hende a bisa esei,” mi a contestá, “Ami ta bisa esei.”

“No, no!” ruman Cellerier a bisa. “Boso lo bolbe bek!”

Despues di kimoterapia a sigui tratamentu di radiacion, cu a terminá pa fin di augustus 1991. E dokternan a bisa cu nan no a mira ningun problema pa nos regresá Africa, basta cu Babette bai bek Francia pa chekeo regular.

Bek pa Benin

Di manera cu nos a skirbi e sede na Brooklyn, pidiendo permit pa regresá den e sirbishi di misionero. Nos tabata ansioso pa tende nan contesta. Dianan no tabatin fin di pasa. Finalmente, Michel no por a warda mas, pues el a yama Brooklyn na telefon i puntra si nan a ricibí nos carta. Nan a bisa cu nan a tum’é na consideracion—nos por a regresá Benin! Ki gradicidu nos tabata na Jehoval

Famia Merda a organisá un reunion social masha dushi pa celebrá e noticia. Na november 1991 nos a regresá Benin, i e rumannan a yama nos bon biní cu un tremendo bankete!

Babette ta mustra bon awor. Nos a bolbe bek Francia periódicamente pa chekeo médico completo, i e dokternan no a haña ningun rastro di cancer. Nos ta contentu di ta bek den nos asignacion di misionero. Nos ta sinti cu Benin mester di nos, i Jehova a bendicioná nos trabou. Desde cu nos a regresá nos a yuda 14 persona yega na bautismo. Cincu di nan awor ta pionero regular, i un a ser nombrá como sirbidor ministerial. Tambe nos a mira nos congregacion chikitu crece i despues parti den dos congregacion.

Den transcurso di añanan, nos a sirbi Jehova como esposo i esposa i a disfrutá di hopi bendicion i a yega na conocé hopi hende maraviyoso. Pero tambe nos a ser entrená i fortalecí dor di Jehova pa wanta contratempunan cu éxito. Mescos cu Job, no semper nos tabata comprendé pakico cosnan a bai manera nan a bai, pero nos tabata sa sí cu Jehova semper tabatei pa yuda nos. Ta manera e Palabra di Dios ta bisa: “Mira! E man di Jehova no a bira demasiado corticu di manera cu e no por salba, tampoco su orea a bira demasiado pisá cu e no por tende.”—Isaías 59:1.

[Plachi na página 23]

Michel i Babette Muller bistí cu paña tradicional na Benin

[Plachi na página 25]

Trabou di misionero entre e polinesionan n’e isla tropical di Tahiti