Expansion cu e Bendicion di Jehova

UN PROGRAMA di dedicacion riba e anochi di 18 di september, 1995, a enfatisá cu Jehova Dios berdaderamente a bendicioná e expansion di su Testigonan n’e sitio di nan sede mundial na Brooklyn, New York.

Mas cu 6.000 persona a scucha e programa di dedicacion. Nan a reuní na Brooklyn, unda e programa a tuma lugá, i tambe na otro sitionan, incluyendo e facilidadnan grandi di Testigonan di Jehova banda di Patterson i Wallkill, New York, i na nan sucursal banda di Toronto, Cánada. Esnan n’e sitionan pafó di Brooklyn a tende e transcurso dje programa via comunicacion telefónico.

Un Programa Animador

E betelitanan, manera e trahadornan boluntario ta ser yamá, cu tabata scuchando e programa, ta forma un parti grandi dje famia mundial di Betel di mas cu 16.400 miembro. E miembronan ei ta sirbi den mas o ménos un shen pais, unda nan ta imprimí literatura bíblico i ta percurá pa servicionan relacioná cu esei pa mas cu 78.600 congregacion di Testigonan di Jehova na mundu.

Tabatin gran expectativa ora e programa di dedicacion a cuminsá 6:30 p.m. cu cantica, siguí pa oracion dor di Karl Klein. E presidente dje programa, Lloyd Barry, a yama tur persona calurosamente bon biní cu comentarionan breve riba e nificacion dje ocasion. Albert Schroeder a repasá e les dje Toren di Vigilancia p’e siman ei, i despues Daniel Sydlik a papia riba e tema “Nos Sirbishi Sagrado na Betel.” E proménan aki den e programa tur ta miembro dje Cuerpo Gobernante di Testigonan di Jehova.

E siguiente dos partinan dje programa—“Satisfaciendo Nos Necesidadnan Aumentante pa Acomodacion, 1974-1995,” i “Puntonan Sobresaliente di Renobacion i Construccion di Betel na Brooklyn”—a presentá puntonan sobresaliente dje construccion of e cumpramentu i renobacion dje edificionan cu a ser dedicá. E comentarionan a enfocá atencion riba e edificio di residencia recientemente finalisá cu rond di mil betelita ta ocupá awor. E cas aki di 115 meter haltu na Sands Street 90 ta conectá cu e compleho di imprenta.

E programa a presentá e discurso di dedicacion dor di Milton Henschel, presidente di Watch Tower Bible and Tract Society. El a enfatisá precedentenan bíblico pa dedicacion di edificionan cu lo ser usá den Jehova su sirbishi. Despues di un cantica, Carey Barber, un miembro tambe dje Cuerpo Gobernante, a concluí e programa cu un oracion. Pero cua tabata algun dje puntonan sobresaliente dje programa?

E Edificionan cu A Ser Dedicá

E superintendente di Cas di Betel, George Couch, a splica cu 17 edificio di residencia a bini acerca desde e último dedicacion di un edificio di residencia di Betel na Brooklyn dia 2 di mei, 1969.a Esakinan tabata sea casnan nobo construí of edificionan cu a ser cumprá i renobá. Esaki en realidad tabata e dedicacion dje 17 edificionan di residencia aki, di dos edificio chikitu—cumprá den añanan 40 pero modificá como residencia di Betel—i tambe dje facilidadnan di fábrica i oficina cu a ser construí of cumprá desde e dedicacion dje oficinanan ehecutivo di Testigonan di Jehova dia 15 di mart, 1982.b

E edificio di mas grandi cu a ser dedicá ta esun na Furman Street 360. Construí originalmente na 1928, Testigonan di Jehova a cumpr’é dia 15 di mart, 1983, i a renob’é totalmente. E tin un superficie di 93.000 meter cuadrá, of casi 9 hectare. Otro edificionan cu a ser incluí den e dedicacion tabata e fábrica na Pearl Street 175 i garashinan grandi cu a ser construí den añanan recien.

Pakico Mas Acomodacion Tabata Necesario

Na 1969, ora e último edificio di residencia di Betel di Brooklyn a ser dedicá, tabatin un máximo di 1.336.112 Testigo predicando e bon nobo dje Reino di Dios rond mundu. Pero na 1995 tabatin 5.199.895 persona haciendo esei, mas cu tres biaha i mei mas tantu! Pues, pa cumpli cu e demanda creciente pa literatura bíblico, e famia di Betel di Brooklyn a aumentá for di 1.042 miembro regular na 1969 na mas cu 3.360, cu awor ta biba den 22 residencia!

George Couch a considerá con a satisfacé e necesidad pa mas acomodacion for di 1974 pa 1995. Den cuminsamentu di añanan ’70, Testigonan di Jehova a huur vários piso den Hotel Towers ei cerca pa acomodá e famia creciente di Betel. Na december 1973, Nathan Knorr, e tempu ei presidente dje Sociedad Watch Tower, a skirbi tantu e Oficina di Betel como e gerencia di Towers, bisando cu e Sociedad a planea pa ‘muda sali for di Hotel Towers pa 1 di october, 1974.’

Ruman Couch a bisa cu el a keda sorprendí pasobra no tabatin ningun caminda pa pone e betelitanan cu tabata biba den Towers. Gerencia di Towers tambe a keda sorprendí, ya cu nan tabata dependé dje placa di huur dje Sociedad pa sigui drei. E resultado final tabata cu e gerencia di Towers a urgi Testigonan di Jehova pa cumpra e hotel. “Boso ta creciendo for di tempu cu nos ta den e becindario,” nan a bisa, “i boso mester dje edificio.”

“E ta yen di ocupante,” tabata e contesta dje representantenan dje Sociedad. “Si nos cumpr’é, nos lo kier pone nos mes hendenan den dje.”

“Nos lo haci e edificio bashí pa boso,” e gerencia di Towers a primintí. Wel, djis despues di esei Testigonan di Jehova a cumpra e edificio di Towers na un prijs razonabel. “Pakico Ruman Knorr a skirbi e carta ei?” Cough a puntra su auditorio fasiná. “Probablemente e mes no tabata sa, pero ta esei ta e incidente cu a bende Hotel Towers cu e Sociedad Watch Tower.”

Tambe e orador a describí con Testigonan di Jehova a cumpra Columbia Heights 97, e sitio bieu dje famoso Hotel Margaret, djis n’e otro banda di caya dje Cas di Betel original. E sitio ta ideal, ya cu e por a ser conectá fácilmente cu e compleho di Betel mediante un tunnel bou di caya. Na februari 1980, ora e edificio tabata den e proceso pa ser remodelá, el a kima completamente. E ora ei, debí cu e doño tabatin problema pa lanta un edificio nobo n’e sitio, el a bende e propiedad cu Testigonan di Jehova.

Ruman Cough a bisa: “Prácticamente cada un dje edificionan aki tin un historia interesante nan tras cu lo señalá na un solo cos—cu Jehova Dios ta esun cu a dirigí e organisacion visibel pa adkerí e edificio particular ei.”

E Historia Tras di Sands 90

E edificio di residencia di mas nobo i di mas grandi ta Sands Street 90. Ora Testigonan di Jehova a cumpra e propiedad na december 1986, e tabata acomodá un fábrica grandi na Jay Street 160.c E fábrica a ser bashá abou, i dia 30 di augustus, 1990, a participá n’e famia di Betel cu un permit a ser emití pa lanta un facilidad di residencia di 30 piso n’e sitio.

Den un entrevista cu e miembro dje Cuerpo Gobernante Theodore Jaracz a tene, e superintendente di fábrica dje Sociedad di Brooklyn, Max Larson, a describí con permit a ser otorgá pa construí e residencia na Sands Street 90. Loke a sosodé aya na 1965, Ruman Larson a splica, tabata crucial.

E tempu ei e Sociedad kier a construí un fábrica di dies piso riba un blok banda di su otro fábricanan, pero e stipulacionnan di zonificacion p’e blok ei a permití solamente construccion di dos piso. Un arkitecto a bai di acuerdo pa prepará mapanan di construccion p’e fábrica nobo proponé, pero el a bisa: “Mi no ta bai pone mi cara na bergwensa presentando nan n’e comision.” E tabata convencí cu e Comision di Norma i Apelacion nunca lo a cambia nan regulacionnan di zonificacion p’e blok. Ora e mapanan di construccion a ser aprobá, el a sclama: “Con bini boso a haña esei!”

E motibu, Larson a continuá, tabata cu ora e blok ei a ricibí un clasificacion di zonificacion nobo pa nos fábrica di dies piso, e bloknan den cercania tambe a ricibí un zonificacion nobo, incluyendo esun cu e edificio di Jay Street 160. I sorprendentemente e zonificacion nobo a permití construccion di un hotel. Pero, Larson a mencioná, esei tabata algu cu ningun hende nunca no a ripará—por lo ménos te mas o ménos 25 aña mas tardi, despues cu nos a cuminsá busca un sitio pa construí un cas di Betel nobo. E ora ei e regulacion di zonificacion a ser descubrí di nobo!

Ruman Larson a splica loke a sosodé: “Ora nos a prepará e mapanan pa nos residencia di 30 piso i a bai cu nan n’e departamentu municipal di construccion, nan a bisa nos: ‘Boso no por pone un edificio di residencia ei. Henter e blok ei ta reservá pa fábrica i e comision lo no cambia e regulacion di zonificacion pa boso.’

“‘Nan no tin nodi cambi’é,’ nos a informá e funcionarionan. ‘E ta reservá caba pa un hotel.’ Ora nan a busca e registronan, apénas nan por a kere esei! Wel, asina ei nos a haña nos edificio di 30 piso,” Larson a concluí.

E Bendicion di Jehova Ta Bisto

Un salmista bíblico a skirbi: “Aménos cu Jehova mes ta edificá e cas, di nada ta bal cu su constructornan a traha duru riba dje.” (Salmo 127:1) Claramente, e bendicion di Jehova tabata riba e actividad di construccion di Testigonan di Jehova pa facilitá e trabou mundial di predicacion i siñansa cu Jesus a manda su siguidornan haci.—Mateo 24:14; 28:19, 20.

Esnan privilegiá pa tende e programa di dia 18 di september, 1995, tabata conmoví cu e evidencia di tal bendicion riba e expansion dje sede mundial di Jehova su sirbidornan. Jehova su pueblo por ta sigur di su bendicion continuo segun cu nan ta sigui haci loke e ta manda.

[Nota]

[Plachi na página 23]

SANDS ST. 90 • 1995

[Plachi na página 24, 25]

Algun dje residencianan adicional cu a ser dedicá

COLUMBIA HTS 97. • 1986

BOSSERT HOTEL, MONTAGUE ST. 98 • 1983

ORANGE ST. 34 • 1945

HOTEL STANDISH, COLUMBIA HTS. 169 • 1981

LIVINGSTON ST. 67 • 1989

JORALEMON ST. 108 • 1988

HOTEL TOWERS, WILLOW ST. 79-99 • 1975

[Plachi na página 26]

PEARL ST. 175 • 1983

ADAMS ST. 69 • 1991

FURMAN ST. 360 • 1983