Con Dios Ta Mira Adoracion di Cristiandad?

“NO TA tur hende cu bisá mi, ‘Señor, Señor,’ lo drenta den e reino di shelu,” Jesucristo a bisa, “sino esun cu ta haci e boluntad di mi Tata cu ta den shelu. Hopi lo bisá mi den e dia ei, ‘Señor, Señor, nos no . . . a ehecutá hopi obra poderoso den bo nomber?’ I sin embargo, e ora ei lo mi confesá na nan: Nunca mi a conocé boso! Bai for di mi, boso, hacidornan di maldad.”—Mateo 7:21-23.

Mediante su Palabra sagrado, Bijbel Santu, Dios a haci cla kico su boluntad ta. E iglesianan di cristiandad ta haciendo e boluntad di Dios? Of nan ta loke Jesus a yama “hacidornan di maldad”?

Dramamentu di Sanger

Riba e anochi promé cu e morto di su Señor, Pedro casi a iniciá un conflicto armá cu e banda di soldat mandá pa arestá Jesus. (Juan 18:3, 10) Pero Jesus a reestablecé e trankilidad i a spierta Pedro: “Tur esnan cu ta tuma spada lo perecé pa spada.” (Mateo 26:52) Revelacion 13:10 ta ripití e spiertamentu cla aki. E iglesianan di cristiandad a haci caso di dje? Of nan tambe ta carga e responsabilidad pa gueranan continuo den vários parti dje tera?

Durante Guera Mundial II, cientos di miles di serbio i croata a ser matá den nomber di religion. The New Encyclopædia Britannica ta informá: “Na Croacia e régimen facista nativo a cuminsá ehecutá un política di ‘purificacion racial’ cu a bai mas ayá di asta e prácticanan nazi. . . . A ser declará cu un tercer parti dje poblacion serbio lo a ser deportá, un tercer parti combertí na catolicismo romano i un tercer parti lo a ser likidá. . . . E colaboracion parcial dje clero católico den e prácticanan aki a daña seriamente e relacionnan di iglesia cu estado despues dje guera.” Un cantidad incontabel di hende a ser forsá pa sea combertí na catolicismo of muri; miles di otronan no por a ni scoge. Pueblonan henter—homber, muher i mucha—a ser forsá pa drenta nan misanan ortodox i a ser matá. Kico dje ehércitonan dje partido di oposicion comunista? Nan tambe tabatin apoyo religioso?

E buki History of Yugoslavia ta informá: “Algun dje pastornan a participá den e guera n’e banda dje forsanan revolucionario.” E buki Yugoslavia and the New Communism ta bisa: “E trupanan partidista asta a yega na tin pastornan di iglesianan serbio ortodox como tambe di católico romano.” Diferencianan religioso a sigui waya e candela di guera den e paisnan Balkan.

I kico di Ruanda? E secretario general dje Institucion Católico pa Relacionnan Internacional, Ian Linden, a admití lo siguiente den e revista The Month: “Investigacionnan conducí dor di e movementu pa derechonan humano African Rights na Londen ta duna un of dos ehempel di lidernan local católico, anglicano i baptista kendenan, sea dor di descuido of mandato, tabata implicá den matamentunan ehecutá dor dje guardia nacional. . . . No tin absolutamente ningun duda cu un cantidad basta grandi di cristiannan prominente di parokianan tabata enbolbí den matamentunan.” Ta tristu pa bisa cu bringamentu entre asina yamá cristiannan ta sigui plaga Africa central.

Fornicacion i Adulterio

Segun e Palabra di Dios, tin solamente un lugá onorabel pa sex, i esei ta den e banchi di matrimonio. “Laga matrimonio sea onorabel entre tur,” Bijbel ta bisa, “i e cama di matrimonio sea sin contaminacion, pasobra Dios lo husga fornicadornan i adúlteronan.” (Hebreonan 13:4) E lidernan di iglesia ta mantené e siñansa aki di Dios na haltu?

Na 1989 e Iglesia Anglicano na Australia a publicá un documento oficial riba sexualidad cu a duna di comprendé cu sex promé cu matrimonio no ta malu si e pareha ta totalmente comprometí na otro. Mas recientemente, e lider dje Iglesia Anglicano na Escocia a declará: “E Iglesia no mester condená aventura romántico como un picá of algu malu. E Iglesia mester aceptá cu hende ta cometé adulterio pa motibu di a heredá picá.”

Na Sur Africa un cantidad di miembronan di clero a sali padilanti na fabor di homosexualidad. Por ehempel, na 1990 e revista surafricano You a cita un pastor anglicano prominente cu a bisa: “E Scritura no ta obligatorio pa semper. . . . Ami ta kere cu lo bin cambionan den e iglesia su actitud i política pa cu hende homosexual.”—Mira e contraste cu Romanonan 1:26, 27.

Segun e 1994 Britannica Book of the Year, sexualidad a bira un cuestion dominante den iglesianan mericano, specialmente cuestionnan manera “e ordenacion como pastor di personanan di ken ta conocí cu nan ta homosexual of lesbi, e comprendimentu religioso di derechonan di homosexualnan, e bendicionamentu di ‘matrimonionan homosexual,’ i e legitimacion of condenacion di estilonan di bida asociá cu homosexualidad.” Mayoria dje denominacionnan religioso di mas grandi ta tolerá clero cu ta haci campaña pa mayor libertad sexual. Segun e 1995 Britannica Book of the Year, 55 obispu episcopal a firma un declaracion “afirmando cu ordenacion i prácticanan di homosexualnan ta aceptabel.”

Algun miembro di clero ta papia na fabor di homosexualidad, bisando cu Jesus nunca a papia contra esei. Pero esei realmente ta asina? Jesucristo a declará cu e Palabra di Dios ta e berdad. (Juan 17:17) Esei ta nificá cu el a apoyá Dios su punto di bista di homosexualidad describí na Levítico 18:22, cu ta bisa: “Bo no mag drumi cu un homber mescos cu bo ta drumi cu un muher. Esei ta un cos detestabel.” Ademas, Jesus a mencioná fornicacion i adulterio entre e “mal cosnan [cu] ta sali di paden i ta contaminá un hende.” (Marco 7:21-23) E palabra griego pa fornicacion ta un término cu ta encerá mas cu esun pa adulterio. E ta describí tur forma di relacion sexual pafó di matrimonio legal, incluyendo homosexualidad. (Hudas 7) Tambe Jesucristo a spierta su siguidornan pa no tolerá ningun persona cu ta profesá di ta un maestro cristian, pero cu ta minimisá e seriedad di fornicacion.—Revelacion 1:1; 2:14, 20.

Ora guianan religioso ta haci campaña pa e ordenacion di personanan homosexual i lesbi, ki efecto esaki tin riba e miembronan di nan iglesia, specialmente e hóbennan? E no ta un empuhe pa experimentá cu sex pafó di matrimonio? Na contraste, e Palabra di Dios ta urgi cristiannan pa “hui di fornicacion.” (1 Corintionan 6:18) Si un compañero creyente cai den un picá asina, lo dun’é yudansa amoroso cu e meta pa restorá e persona n’e fabor di Dios. (Santiago 5:16, 19, 20) Kico si e rechasá e yudansa aki? Bijbel ta declará cu si hendenan asina no repentí, nan “lo no heredá e reino di Dios.”—1 Corintionan 6:9, 10.

“Prohibiendo pa Casa”

Pa motibu cu ‘fornicacion ta na tur parti,’ Bijbel ta bisa cu “ta mihó pa casa cu keda cendí cu pasion.” (1 Corintionan 7:2, 9) Apesar dje conseho sabí aki, ta ser rekerí di hopi clero pa nan keda celibato, esta, sin casa. Nino Lo Bello ta splica den su buki The Vatican Papers: “E voto di celibato no ta ser kibrá si un pastor, mónik of soeur tene relacion sexual. . . . E por haña pordon pa relacion sexual dor di haci un declaracion sincero den e confesionario, miéntras cu matrimonio di cualkier pastor simplemente lo no ser reconocé dor di Iglesia.” E siñansa aki a producí bon of mal fruta?—Mateo 7:15-19.

No tin duda cu hopi pastor ta hiba un bida moralmente puru, pero un gran cantidad no. Segun e 1992 Britannica Book of the Year, “a ser informá cu e Iglesia Católico Romano a paga US$300 miyon pa regla casonan di abusu sexual cometí dor di miembronan di clero.” Mas despues, e edicion di 1994 a bisa: “E morto di un cantidad di clero pa via di AIDS a saca na cla cu tabatin pastornan homosexual i comentarionan cu tabatin un cantidad incontabel di . . . homosexualnan introducí den e sacerdocio.” Nada straño cu Bijbel ta bisa cu “prohibiendo pa casa” ta un ‘siñansa di demoño.’ (1 Timoteo 4:1-3) Peter de Rosa ta skirbi den su buki Vicars of Christ [Vicarionan di Cristo]: “Algun historiador ta di opinion cu probablemente [celibato sacerdotal] a haci mas daño na moralidad cu cualkier otro custumber establecí den Occidente, incluyendo prostitucion. . . . Mayoria biaha [el] a mancha e nomber di cristianismo. . . . Semper celibato imponé a hiba na hipocresia den e fila di clero. . . . Un pastor por cai mil biaha, pero ta prohibí pa ley di iglesia pa e casa un solo biaha.”

Despues di a considerá Dios su punto di bista di adoracion di Baal, no ta difícil pa dicerní con e mester ta mira e iglesianan dividí di cristiandad. E último buki dje Bijbel ta combiná tur forma di adoracion falsu bou di e nomber “Babilonia e Grandi, e mama dje muhernan di mala bida i dje cosnan repugnante dje tera.” “Den dje,” Bijbel ta agregá, “a ser hañá e sanger di profetanan i di santunan i di tur esnan cu a ser matá riba tera.”—Revelacion 17:5; 18:24.

P’esei, Dios ta urgi tur cu kier ta su berdadero adorador: “Sali for di dje, mi pueblo, si boso no kier participá cuné den su picánan, i si boso no kier ricibí parti di su plaganan. . . . Den un solo dia su plaganan lo bini, morto i lamentacion i hamber, i lo e ser kimá completamente cu candela, pasobra Jehova Dios, cu a husgu’é, ta fuerte.”—Revelacion 18:4, 8.

Awor e pregunta ta lanta: Despues di sali for di religion falsu, na unda un hende mester bai? Ki forma di adoracion ta aceptabel pa Dios?

[Kuadro/Plachi na página 5]

IDOLATRIA

Adoracion di Baal a enbolbé e uso di ídolonan. E israelitanan a purba mescla e adoracion di Jehova cu esun di Baal. Nan a asta hinca ídolonan den e tempel di Jehova. Dios a haci cla cua ta su punto di bista di adoracion di ídolo ora el a trece destruccion riba Jerusalem i su tempel.

Hopi misa di cristiandad ta yen di ídolo, sea cu nan ta den forma di un crus, imágennan, of estatuanan di Maria. Ademas, hopi baidó di misa ta ser siñá pa buig, hinca rudia of pa haci señal di crus dilanti e imágennan aki. Na contraste, cristiannan berdadero ta ser mandá pa “hui di idolatria.” (1 Corintionan 10:14) Nan no ta purba adorá Dios cu e yudansa di obhetonan material.—Juan 4:24.

[Rekonosementu]

Musée du Louvre, Paris

[Kuadro na página 7]

“E Lider di Iglesia Mester Ta sin Eror”

E EXPRESION aki ta sacá for di Tito 1:7, segun e traduccion di Bijbel Today’s English Version. King James Version ta bisa: “Un obispu mester ta sin culpa.” E palabra “obispu” ta bin di un palabra griego cu ta nificá “superintendente.” Pues hombernan cu ta ser nombrá pa hiba delantera den e berdadero congregacion cristian mester cumpli cu e normanan básico dje Bijbel. Si nan no ta cumpli cu nan, nan mester ser kitá for di nan posicion di supervision, ya cu nan no ta un ‘ehempel mas p’e tou.’ (1 Pedro 5:2, 3) Con na serio iglesianan di cristiandad ta tuma e rekisito aki?

Den su buki I Care About Your Marriage [Mi Ta Interesá den Bo Matrimonio], dr. Everett Worthington ta haci referencia na un encuesta bou di 100 pastor den e estado di Virginia, Merca. Mas cu 40 porciento a admití di a enbolbé nan mes den un of otro forma di conducta cu ta excitá pasion cu un hende cu no tabata nan casá. Un gran cantidad di nan a cometé adulterio.

Christianity Today ta comentá: “Durante e último década, repetidamente e iglesia a keda pasmá dor di casonan cu a sali na cla di conducta inmoral cometí dor di algun di su lidernan mas respetá.” E artículo “Pakico Pastornan Adúltero No Mester Ser Restorá” a argumentá contra e práctica comun den cristiandad di restorá lidernan di iglesia rápidamente na nan posicion anterior despues cu nan a ser “declará culpabel di picá sexual.”