E Palabra di Dios Ta Haci “Milager”

MANERA THÉRÈSE HÉON A RELATA

Riba un dia na 1965, mi a drenta un establecimentu di negoshi i a ofrecé copianan dje revistanan Toren di Vigilancia i Spierta! na e comerciantenan. Ora mi a bira lomba pa bai, mi a tende un ‘pang.’ Un bala di scopet a dal den e flur pegá cu mi pia. “Esei ta e manera pa trata cu Testigonan di Jehova,” un dje comerciantenan a desafiá na un manera di mofa.

E EXPERENCIA ei a spantá mi—pero no lo suficiente pa poné mi stop cu e ministerio di tempu completo. E berdadnan bíblico cu mi a siña tabata demasiado precioso pa permití cualkier cos poné mi bandoná mi ministerio. Lagá mi splica pakico mi ta bisa esaki.

Despues cu mi a nace na juli 1918, mi mayornan a establecé nan mes den Cap-de-la-Madeleine, un pueblecito den Quebec, Cánada, conocí como E Lugá di Milager. Bishitantenan tabata bin en masa n’e lugá aki pa rindi homenahe n’e santuario di Bírgen Maria. Aunke no por proba cu e presuntu milagernan di Maria a sosodé, e Palabra di Dios a efectuá loke ta prácticamente milagroso den e bida di un cantidad di hende segun cu e pueblito a crece bira un stad di mas cu 30.000 habitante.

Ora mi tabatin rond di 20 aña di edad, mi tata a mira mi interes den asuntunan religioso i a duná mi su Bijbel. Ora mi a cuminsá les’é, mi a spanta di haña sa for di Exodo capítulo 20 cu adoracion di imágen ta algu cu ta ser condená claramente. Unbes mi a perde confiansa den e siñansanan dje Iglesia Católico i a stop di bai misa. Mi no kier a adorá estatua. Ainda mi por tende Tata bisa, “Thérèse, bo’n ta bai misa?” “No,” mi a contestá, “mi ta lesando e Bijbel.”

Lesamentu di Bijbel a sigui ta un parti di mi bida, asta despues cu mi a casa na september di 1938. Ya cu mi casá, Rosaire, hopi bes tabata traha anochi, mi a hacié un custumber pa lesa Bijbel ora e tabata na trabou. Pronto mi a yega n’e conclusion cu Dios mester tin un pueblo, i mi a cuminsá busk’é.

Mi Búskeda pa Haña e Pueblo di Dios

Debí na loke mi a siña na misa, ora mi tabata mucha, mi tabatin miedu di bai drumi pa temor di lanta for di soño i hañá mi den fiernu. Pa combatí e miedu aki, mi tabatin custumber di bisa mi mes cu un Dios di amor lo no laga un cos horibel asina pasa. Yen di confiansa, mi a sigui lesa e Bijbel, buscando e berdad. Mi tabata manera e eunuco etiopio cu a lesa pero no a comprendé.—Echonan 8:26-39.

Mi ruman homber André i su casá, kendenan tabata biba den un apartamento un piso bou di nos, a cuminsá studia Bijbel cu Testigonan di Jehova rond di aña 1957. Mi a bisa mi cuñá pa avisá mi dor di klop den plafon ora e Testigonan a bin pa predicá den e edificio. Asina ei mi tabata sa pa mi no habri porta. Un dia el a lubidá di avisá mi.

E dia ei mi a habri porta i a topa cu Kay Munday, un pionero, manera ministernan di tempu completo di Testigonan di Jehova ta ser yamá. El a papia cu mi tocante e nomber di Dios, splicando cu Dios tin un nomber personal, Jehova. Despues cu el a bai, mi a chek den mi Bijbel pa confirmá cu loke el a bisa en berdad tin apoyo di textonan bíblico. Mi investigacion a hací mi hopi felis, pasobra mi Bijbel a mustra cu e nomber di Dios ta Jehova.—Exodo 6:3, Douay Version, nota; Mateo 6:9, 10; Juan 17:6.

Ora Kay a bolbe bishitá mi, nos a considerá e doctrina católico di Trinidad, cu ta afirmá cu Dios ta tres persona den un Dios. Despues mi a examiná mi mes Bijbel cuidadosamente pa satisfacé mi mes cu e no ta siña Trinidad. (Echonan 17:11) Mi examinacion a confirmá cu Jesus no ta igual cu Dios. El a ser creá. E tabatin un principio, miéntras cu Jehova no. (Salmo 90:1, 2; Juan 14:28; Colosensenan 1:15-17; Revelacion 3:14) Satisfecho cu loke mi tabata siñando, mi tabata contentu pa sigui cu e consideracionnan di Bijbel.

Riba un dia na 1958, durante un tormenta di sneu den november, Kay a invitá mi pa asistí na un asamblea di circuito cu lo a ser tené e mésun anochi den un sala di huur. Mi a aceptá e invitacion i a disfrutá dje programa. Despues di esei, den un combersacion cu un Testigo cu a acercá mi, mi a puntr’é, “Un cristian berdadero mester predicá di cas pa cas?”

El a bisa, “Sí, e bon nobo mester ser declará, i Bijbel ta revelá cu bishitá hende na nan cas ta un método importante di predicacion.”—Echonan 20:20.

Ki contentu mi a keda cu su contesta! Esei a convencé mi cu mi a haña e pueblo di Dios. Si el a bisa, “No, e no ta necesario,” lo mi a duda cu mi a haña e berdad, pasobra mi tabata sa loke Bijbel ta bisa tocante predicá di cas pa cas. For dje punto ei padilanti, mi a progresá lihé spiritualmente.

Despues dje asamblea di circuito ei, mi a cuminsá asistí n’e reunionnan di Testigonan di Jehova cu nan tabata tene den e pueblo bisiña di Trois-Rivières. Kay i su compañera pionero, Florence Bowman, tabata e único Testigonan cu tabata biba na Cap-de-la-Madeleine e tempu ei. Riba un dia mi a bisa, “Lo mi bai predicá cu boso mañan.” Nan a keda contentu cu mi a compañá nan.

Predicando den Mi Pueblo Natal

Ami a kere cu tur hende lo aceptá e mensahe di Bijbel, pero masha lihé mi a haña sa cu esaki no tabata e caso. Ora Kay cu Florence a ser asigná pa otro parti, mi tabata e único den Cap-de-la-Madeleine cu tabata predicá berdadnan di Bijbel di cas pa cas. Sin hala atras, mi a sigui predicá mi so pa rond di dos aña te na mi bautismo dia 8 di juni, 1963. E mésun dia ei mi a inscribí pa loke e tempu ei tabata yama sirbishi di pionero di vacansi.

Mi a sigui traha como pionero di vacansi pa un aña. Despues, Delvina Saint-Laurent a primintí cu lo e bin Cap-de-la-Madeleine i traha cu mi un biaha pa siman si mi bira un pionero regular. Pues mi a yena mi aplicacion pa pionero. Pero, lamentablemente, djis dos siman promé cu mi mester a cuminsá den e ministerio di tempu completo, Delvina a fayecé. Kico lo mi haci? Wel, ya mi a yena e aplicacion i no tabata kier a hala atras. Pues, na october 1964, mi a cuminsá mi carera den e ministerio di tempu completo. P’e siguiente cuater añanan, mi a bai di cas pa cas mi so.

E católiconan deboto di Cap-de-la-Madeleine hopi bes tabata hostil. Algun tabata yama polis tratando di prevení mi di predicá. Un dia, manera mi a mencioná na principio, un comerciante a purba intimidá mi dor di tira na mi pia. Wel, esaki a causa bastante conmocion den e pueblo. E stacion local di television a yam’é un campaña contra Testigonan di Jehova. Henter e incidente a resultá den un testimonio faborabel. Por cierto, dies aña despues cu e comerciante a tira riba mi, un famia di dje mes a bira un Testigo.

“Milagernan” cu e Palabra di Dios A Efectuá

Cu tempu mi a mira e muraya di oposicion contra berdadnan bíblico basha abou poco-poco den Cap-de-la-Madeleine. Rond di 1968, otro Testigonan a muda bin aki, i e residentenan local a cuminsá reaccioná faborabel na berdadnan di Bijbel. Pa cuminsamentu di añanan ’70, tabatin, eigenlijk, un gran aumento den e cantidad di studionan di Bijbel. El a yega na un punto caminda mi mester a pidi otro Testigonan tuma vários studio di Bijbel over cu mi tabata conduciendo pa asina mi por a sigui tin un participacion den e ministerio di cas-pa-cas.

Riba un dia un señora hóben a aceptá e buki pa studio di Bijbel E berdad cu ta hiba na bida eterna for di mi. E tempu ei e tabata biba compañá cu un hóben yamá André, un criminal di aparencia brutu, cu a uni den e combersacion. Un consideracion cu André a lanta su interes, i a cuminsá un studio di Bijbel. Pronto despues el a cuminsá papia cu su amigunan tocante loke e tabata siña.

Na un dado momento, mi tabata studia cu cuater ‘gangster,’ di ken un no tabata bisa mashá pero tabata scucha hopi. Su nomber tabata Pierre. Un biaha rond di dos’or di mardugá, ami cu mi casá a tende batimentu na porta. Purba imaginá bo esaki: Cuater ‘gangster’ pará ei cu kier a hací mi pregunta. Ta bon mes cu Rosaire nunca a keha tocante bishitanan inoportuno asina.

Na principio e cuater hombernan tabata asistí n’e reunionnan. Sin embargo, solamente André i Pierre a perseverá. Nan a pone nan bida na armonia cu e normanan di Dios i a ser bautisá. Pa mas cu 20 aña awor, ámbos a sirbi Jehova fielmente. Ora nan a cuminsá studia, nan tabata bon conocí pa nan actividad criminal i tabata bou di vigilancia policial. Tin biaha polis tabata bin busca nan despues di un di nos studionan di Bijbel of durante un reunion di congregacion. Mi ta contentu cu mi a predicá na “tur clase di hende,” i asina a mira personalmente con e Palabra di Dios ta efectuá cambionan cu ta parce berdaderamente milagroso.—1 Timoteo 2:4.

Si na cuminsamentu di mi ministerio nan a bisá mi cu lo bai tin un Salon di Reino den Cap-de-la-Madeleine i cu lo e ta yená cu e pueblo di Jehova, lo mi no a kere. Pa mi deleite esun congregacion chikitu den e stad bisiña di Trois-Rivières a crece bira seis congregacion floreciente cu ta reuní den tres Salon di Reino, incluyendo e congregacion den Cap-de-la-Madeleine.

Personalmente mi tabatin e goso di a yuda rond di 30 persona yega n’e punto di dedicacion i bautismo. Awor, na edad di 78 aña, berdaderamente mi por bisa cu mi ta contentu cu mi a dedicá mi bida na Jehova. Sin embargo, mi mester admití, cu mi tabatin periodonan di desanimacion. Pa contrarestá periodonan asina exitosamente, mi semper ta habri mi Bijbel i lesa algun parti cu ta refrescá mi hopi. Ta imposibel pa mi laga un dia pasa sin lesa e Palabra di Dios. Specialmente animador ta Juan 15:7, caminda e ta bisa: “Si boso keda den union cu mi i mi dichonan keda den boso, pidi loke boso kier i lo e sosodé pa boso.”

Mi tin e speransa di mira Rosaire den e mundu nobo asina cerca. (2 Pedro 3:13; Revelacion 21:3, 4) Net promé cu su morto na 1975, e tabata progresando bon den direccion di bautismo. Pa awor, mi ta determiná pa perseverá den e ministerio di tempu completo i sigui alegrá den e trabou di Jehova.