Loke Criaturanan “Instintivamente Sabí” Por Siña Nos

AIR-CONDITION, anticongelante, desalinacion i sonar ta inventonan cu a bira ampliamente conocí pa humanidad den siglo 20. Sin embargo, nan a existí den e mundu di animal miles di aña promé. Sí, humanidad ta beneficiá dor di studia tal criaturanan “instintivamente sabí.” (Proverbionan 30:24-28; Job 12:7-9) Ta parce cu cierto animalnan a bira humanidad su instructornan silencioso, i nos por haña ta masha interesante pa studia e característicanan dje animalnan aki.

Nos por beneficiá di un consideracion dje característicanan di cierto animalnan? Wel, Jesucristo a compará su siguidornan cu carné, colebra, palomba i asta dalakochi. Kico e tabatin na mente ora el a compará su siguidornan cu e criaturanan aki? Laga nos wak.

“Mi Carnénan Ta Scucha Mi Bos”

Carné ta ser mencioná den Bijbel mas cu 200 biaha. Manera Smith’s Bible Dictionary ta splica, “e carné ta un símbolo di mansedumbre, pacenshi i sumision.” Den Isaías capítulo 53, Jesus mes a ser compará proféticamente cu un carné. Ki apropiado cu el a compará su siguidornan cu e mésun animal! Pero cua característicanan en particular di carné Jesus tabatin na mente?

“Mi carnénan ta scucha mi bos, i mi conocé nan, i nan ta siguí mi,” Jesus a bisa. (Juan 10:27) Asina el a resaltá cu su disipelnan ta mansu i ta anhelá pa siguié. Carné literal ta scucha na nan wardador i ta siguié di buena gana. E wardador tambe ta hopi pegá na su tou.

Un tou por ta plamá riba un sabana ora nan ta comiendo yerba, pero cada carné ta keda den contacto cu e grupo den su totalidad. Pues, ora e animalnan sinti nan mes insigur of spantá, “nan por core reuní huntu masha lihé,” segun e buki Alles für das Schaf (Tur Cos pa Carné). Si carnénan ta core bai pa scapa di peliger, nan ta haci esei como tou, parando de bes en cuando pa reevaluá e situacion. “Huyendo den etapa ta permití e lamchinan i e animalnan mas swak pa keda huntu cu e grupo. E trupa ta asta ofrecé nan proteccion special.” Kico nos por siña for dje comportacion aki?

Cristiannan berdadero awe no ta plamá entre e denominacion i sectanan di cristiandad. Mas bien, nan ta huntu den un solo tou. Cada cristian ta sinti un apego personal na e tou aki di Dios, i esaki ta contribuí n’e unidad dje organisacion di Testigonan di Jehova. Ki ora cu un crísis presentá—sea ta enfermedad serio, guera of desaster natural—na unda cada adorador ta busca guia i proteccion? Den e organisacion di Jehova, cu ta ofrecé siguridad spiritual.

Con e conseho bíblico ta ser hací disponibel? Mediante publicacionnan manera E Toren di Vigilancia i su revista compañero, Spierta! E revistanan aki i reunionnan cristian ta asta ofrecé yudansa special na esnan cu tin mester di extra cuido, mescos cu e lamchinan i e carnénan mas swak den un tou. Por ehempel, ta duna atencion na mayornan soltero i na esnan cu ta sufri di depresion. P’esei, ta ki sabí pa lesa cada revista, pa asistí na tur reunion dje congregacion i pa aplicá loke nos ta siña! Asina nos ta demostrá mansedumbre i un apego fuerte n’e tou di Dios.—1 Pedro 5:2.

“Cauteloso Manera Colebra i tog Inocente Manera Palomba”

Smith’s Bible Dictionary ta declará: “Den henter Oriente e colebra a ser usá como un símbolo dje esencia di maldad, dje spiritu di desobedencia.” Na otro un banda, “mi palomba” tabata un expresion di cariño. (Cantica di Sálomon 5:2) Kico Jesus tabatin na mente, anto, ora el a animá su siguidornan pa ta “cauteloso manera colebra i tog inocente manera palomba”?—Mateo 10:16.

Jesus tabata dunando instruccionnan pa predicacion i siñamentu. Su disipelnan lo por a spera reaccionnan mixto. Algun hende lo a mustra interes, miéntras cu otronan lo a rechasá e bon nobo. Algun hende asta lo a persiguí e siguidornan berdadero aki di Dios. (Mateo 10:17-23) Con e disipelnan lo mester a reaccioná riba persecucion?

Den Das Evangelium des Matthäus (E Evangelio di Mateo), Fritz Rienecker ta bisa relacioná cu Mateo 10:16: “Mester combiná integridad, sinceridad i frankesa cu astucia, pa no mester sosodé nada cu por duna enemigunan motibunan válido pa keha. E embahadornan di Jesus ta meimei di oponentenan sin piedad, cu no ta mustra ningun consideracion i cu ta atacá e apostelnan sin misericordia i na e mínimo oportunidad. P’esei, ta necesario—mescos cu un colebra—pa tene un bista vigilante riba oponentenan, i evaluá e situacion cu wowo i sintínan alerto; pa tin control dje situacion sin usa trampa of engaño, pa ta puru i fiel den palabra i accion i asina proba nan mes di ta manera palomba.”

Kico sirbidornan di Dios di tempu actual ta siña for dje palabranan di Jesus hañá na Mateo 10:16? Awe, hende ta reaccioná n’e bon nobo casi den e mésun manera cu nan a reaccioná den e promé siglo. Ora nan haña nan confrontá cu persecucion, cristiannan berdadero tin cu combiná e astucia dje colebra cu e puresa dje palomba. Cristiannan nunca ta usa engaño of desonrades, mas bien nan ta incorumpí, sincero i onrado declarando e mensahe di Reino na otronan.

Pa ilustrá: Coleganan na trabou, hóbennan na scol, of asta miembronan di bo mes famia tal bes ta haci remarkenan sarcástico tocante bo creencianan como un Testigo di Jehova. E reaccion inmediato por ta di respondé mescos bek dor di ser igualmente skerpi tocante nan creencianan. Pero esei ta inocente? Apénas. Si esnan cu ta criticá bo ripará cu nan comentarionan no tin ningun efecto riba bo bon comportacion, nan lo por wel stop di haci tipo di remarkenan asina. E ora ei lo bo ta tantu astuto como sin culpa—‘cauteloso manera un colebra, i tog inocente manera un palomba.’

“E Dalakochinan A Parce Cabainan Prepará pa Bataya”

E revista GEO ta informá cu na 1784, Sur Africa a ser azotá pa “e nubia mas grandi [di dalakochi] hamas registrá den historia skirbí.” E nubia aki a cubri un área di cincu mil doshen kilometer cuadrá, locual ta rond di cincu biaha e tamaño di Hong Kong. Smith’s Bible Dictionary ta bisa cu dalakochi “ta causa daño teribel na mata den e paisnan cu e ta bishitá.”

Den Jesus su revelacion cu Dios a dun’é di cosnan cu lo tuma lugá durante “e dia di Señor,” el a usa un vision di un nubia di dalakochi. Relacioná cu nan a ser bisá: “E dalakochinan a parce cabainan prepará pa bataya.” (Revelacion 1:1, 10; 9:3-7) Kico tabata e nificacion dje simbolismo aki?

Testigonan di Jehova pa hopi tempu a comprendé cu e dalakochinan di Revelacion capítulo 9 ta representá e sirbidornan ungí di Dios riba tera den e siglo aki.a E cristiannan aki a ser asigná cu un tarea particular—predicá e mensahe di Reino mundialmente i haci disipel. (Mateo 24:14; 28:19, 20) Esaki ta rekerí pa nan vence obstáculonan i pa nan perseverá den nan trabou. Kico lo por a ilustrá esaki mihó cu e dalakochi indomabel?

Aunke e dalakochi ta un poco mas largu cu 5 centimeter, generalmente e ta biaha entre 100 pa 200 kilometer pa dia. E dalakochi di desierto por asta rek esaki te na 1.000 kilometer. GEO ta splica cu “su alanan ta waya 18 biaha pa seconde i te cu 17 ora pa dia—algu cu ningun otro insecto ta capas pa haci.” Ki un tarea inmenso pa un criatura asina chikirititu!

Como grupo, Testigonan di Jehova ta firme den plamamentu dje bon nobo di Reino. Awor nan ta predicá den mas cu 230 pais. E sirbidornan aki di Dios ta superá hopi dificultad pa por tin un participacion den cumpli cu e trabou. Ki clase di problema nan ta enfrentá? Prehuicio, restriccionnan legal, enfermedad, desanimacion, i oposicion di famia ta djis un par. Pero nada a logra para nan progreso. Nan ta pega na e trabou cu Dios a duna nan.

Sigui Demostrá Cualidadnan Cristian

Sí, Jesus a compará su siguidornan cu carné, colebra, palomba i dalakochi. Esaki realmente ta pas pa nos dia. Pakico? Pasobra e fin dje sistema di cosnan aki ta cerca i problemanan ta mas urgente cu nunca promé.

Teniendo na mente e palabranan ilustrativo di Jesus, cristiannan berdadero ta keda estrechamente pegá n’e tou di Dios i na un moda mansu ta aceptá conseho for dje organisacion di Jehova. Nan ta sigui vigilá i ta alerto pa situacionnan cu lo por stroba nan actividadnan cristian, i na mésun tempu nan ta permanecé liber di reproche den tur cos. Ademas, nan ta perseverá den haci e boluntad di Dios ora nan confrontá cu obstáculo. I nan ta sigui siña for dje criaturanan “instintivamente sabí.”

[Nota]