Soñonan Por Pronostica Futuro?

FOR di tempunan antiguo, humanidad tabatin gran interes den soñonan. E egipcionan a traha bukinan diki tocante interpretacion di soño, i e babilonionan tabatin nan interpretadornan di soño. E griegonan tabatin e custumber di laga hende enfermo drumi den e tumba sagrado di Asclepio pa ricibí instruccionnan tocante salú den nan soñonan. Den siglo dos di nos Era Comun, Artemidoro a producí un buki den cua el a duna interpretacionnan di símbolonan di soño. Hopi buki similar producí desde e tempu ei a ser basá riba su buki. Te n’e dia djawe, esfuersonan ta ser hací pa interpretá soñonan, pero nan realmente ta duna dicernimentu di futuro sucesonan?

Pa nan por tin un nificacion pa futuro, nan lo mester ser influenciá pa un poder superior. Den Bijbel nos ta haña hopi caso den cua Dios a suministrá net e poder ei. El a duna soñonan profético na su sirbidornan i tambe na algun cu no a ador’é. De facto, Job 33:14-16 ta bisa: “Dios ta papia . . . den un soño, un vision di anochi, ora soño profundo ta cai riba hende, durante soñonan leve riba cama. Ta e ora ei e ta habri e orea di hende.”

Dios a haci esaki den e caso dje Fárao di Egipto den e dianan di Josef, cu a biba mas cu 1.700 aña promé cu e Era Comun. E soño di Fárao ta ser hañá na Génesis 41:1-7, i den versículo 25 pa 32, Josef ta interpret’é como un pronóstico di shete aña “di gran abundancia den henter e tera di Egipto,” siguí pa shete aña di hamber. Josef a splica Fárao: “Loke e Dios berdadero ta bai haci, el a haci Fárao mira.” (Génesis 41:28) E soño tabata un profecia di loke en realidad a sosodé.

Un prominente rey dje babilonionan tabatin un experencia similar. Nabucodonosor a haña un soño cu a molesti’é masha, pero e no por a cord’é. Di manera cu el a yama su hacidornan di bruha pa cont’é e soño i su interpretacion. Esaki tabata un peticion imposibel pa nan cumpli cuné.—Daniel 2:1-11.

Siendo cu Dios a duna e soño n’e rey, El a capacitá e profeta Daniel pa revelá e soño i su interpretacion. Daniel 2:19 ta bisa: “Anto tabata na Daniel den un vision di anochi cu e secreto a ser revelá.” Daniel a duna mérito na Dios p’e soño aki: “E secreto cu e rey mes ta pidi, e sabínan, e tovenarnan, e sacerdotenan practicante di magia i e astrólogonan mes no por mustra n’e rey. No obstante, ta existí un Dios den shelu cu ta un Revelador di secreto i el a haci Rey Nabucodonosor sa loke tin cu sosodé den e parti final dje dianan.”—Daniel 2:27, 28.

Na algun ocasion Dios a duna instruccion na su pueblo pa medio di soñonan, i na otro ocasionnan el a duna siguransa di fabor divino of a yuda nan comprendé con e tabata yudando nan. Den e caso di Jacob, Dios a revelá su aprobacion pa medio di un soño.—Génesis 48:3, 4.

Ora José, e tata di criansa di Jesus, a haña sa cu Maria tabata na estado, el a dicidí na divorciá for di dje. E ora ei el a ricibí instruccion den un soño pa no haci esei. Mateo 1:20 ta bisa: “Despues cu el a pensa riba e cosnan aki, mira! e angel di Jehova a aparecé na dje den un soño, bisando: ‘José, yu di David, no tene miedu di hiba Maria bo esposa cas, pasobra loke a ser engendrá den dje ta pa medio di spiritu santu.’” Mas despues el a ricibí un spiertamentu den un soño: “E angel di Jehova a aparecé den un soño na José, bisando: ‘Lanta ariba, tuma e mucha chikitu i su mama i hui pa Egipto.’”—Mateo 2:13.

Soñonan cu No Ta Bini di Dios

E echo cu interpretacion di soño tabata comun entre esnan cu no tabata e pueblo di Dios ta indicá cu soñonan en general no por ser considerá como reveladornan confiabel di futuro. Den e dianan dje profeta di Dios, Jeremías, profetanan falsu tabata bisa: “Mi tabatin un soño! Mi tabatin un soño!” (Jeremías 23:25) Nan intencionnan tabata pa engañá e pueblo pa pensa cu Dios tabata papia atrabes di nan. En cuanto e soñadornan aki, Jeremías a ser inspirá pa bisa: “Esaki ta loke Jehova di ehércitonan, e Dios di Israel, a bisa: ‘No laga boso profetanan cu ta meimei di boso ni boso practicantenan di divinacion engañá boso, i no scucha na nan soñonan cu nan ta soña. Pasobra “ta den falsedad nan ta profetisando na boso den mi nomber . . . ,” ta e expresion di Jehova.’”—Jeremías 29:8, 9.

Siendo cu e profetanan falsu aki tabata “practicantenan di divinacion,” nan soñonan por a ser influenciá dor di forsanan spiritual malbado cu e propósito di engañá e pueblo. E mésun cos ta ser indicá den loke ta ser declará na Zacarías 10:2: “E terafim mes a papia loke ta mágico; i e practicantenan di divinacion, di nan parti, a contemplá falsedad den vision, i soñonan sin balor ta loke nan ta sigui papia.”

E Diabel ta e gañador principal cu pa miles di aña a usa lidernan religioso pa pretendé falsamente cu Dios a papia cu nan mediante visionnan i soñonan, mescos cu e profetanan falsu den e dianan di Jeremías i Zacarías. Relacioná cu esakinan, e escritor bíblico inspirá, Hudas, a skirbi n’e cristiannan dje promé siglo: “Cierto hendenan a drenta na scondí, cu hopi tempu pasá a ser señalá p’e Scritura n’e huicio aki, hendenan malbado, cu ta cambia e bondad inmerecí di nos Dios den un excuus pa conducta inmoral i resultando di ser falsu na nos único Doño i Señor, Jesucristo.” El a bisa cu e hendenan aki tabata “entregando nan mes na soñonan,” na moda di papia.—Hudas 4, 8.

Pone e Pretensionnan na Prueba

Un persona por pretendé cu Dios a papia cuné den un soño of cu su soñonan di futuro sucesonan a resultá berdad, tog esei no ta suficiente motibu pa ker’é i siguié ciegamente. Tuma nota dje instruccionnan duná n’e israelitanan, hañá na Deuteronomio 13:1-3, 5: “Den caso cu lanta meimei di bo un profeta of un soñador di un soño i di berdad duná bo un señal of un indicacion profético, i e señal of e indicacion profético di cua el a papia cu bo ser realisá, bisando, ‘Laga nos cana tras di otro diosnan, cu bo no a conocé, i laga nos sirbi nan,’ bo no mester scucha n’e palabranan dje profeta ei of n’e soñador dje soño ei . . . I e profeta ei of e soñador dje soño mester ser matá.” Dios a permití hende asina papia falsamente pa pone e lealtad di su pueblo na prueba.

En bes di kere ciegamente e pretensionnan di soñadornan carismático, e proceder sabí ta pa nos pone nan pretensionnan na prueba pa evitá di ser engañá dor dje gañador principal invisibel, kende ta “gañando henter e tera habitá.” (Revelacion 12:9) Pero con nan por ser poné na prueba den un manera confiabel?

E Palabra skirbí di Dios ta e guia cu el a duna nos pa yega n’e berdad. Tocante dje, Jesucristo a bisa: “Bo palabra ta e berdad.” (Juan 17:17) Pues 1 Juan 4:1 ta spierta nos: “Stimánan, no kere tur expresion inspirá, sino pone expresionnan inspirá na prueba pa mira si nan ta originá cu Dios, pasobra hopi profeta falsu a sali den e mundu.” Ora nan pretensionnan, filosofianan i accionnan ta ser compará cuidadosamente cu Bijbel, nan lo ta na conflicto cuné. E Palabra di Dios ta e autoridad en cuanto kico ta e berdad.

E soñador cu ta pretendé di tin conocimentu special, en realidad ta usando divinacion of otro prácticanan spiritista? Si ta asina, e Palabra di Dios ta conden’é. “No mester ta hañá den bo ningun hende . . . cu ta usa divinacion, ni ningun practicante di magia ni ningun cu ta busca señal ni ningun hacidor di bruha, of un persona cu ta mara otronan cu un maldicion ni ningun cu ta consultá un medium spiritista of un pronosticador profesional di sucesonan ni ningun cu ta puntra e mortonan. Pasobra tur hende cu ta haci e cosnan aki ta algu detestabel pa Jehova.”—Deuteronomio 18:10-12.

Si e soñador ta pretendé cu e tin un alma den dje cu no ta muri, e ta contradiciendo e Palabra di Dios cu ta declará claramente: “E alma cu ta pecando—e mes lo muri.” (Ezekiel 18:4) E ta halsa su mes i ta pone hende sigui su tras? Mateo 23:12 ta spierta: “Ken cu ta halsa su mes lo ser humiyá.” I Echonan 20:30 ta spierta cristiannan: “For di den boso mes lo lanta hombernan i papia cosnan trocí pa lastra e disipelnan tras di nan mes.”

E ta boga pa accionnan violento? Santiago 3:17, 18 ta conden’é: “E sabiduria djariba ta primeramente decente, despues pacífico, razonabel, cla pa obedecé, yen di misericordia i bon fruta, sin haci distincion dor di parcialidad, sin ta hipócrita. Ademas, e fruta di husticia tin su simia sembrá bou di condicionnan pacífico pa esnan cu ta haci pas.” E ta busca autoridad of influencia político den e mundu? E Palabra di Dios ta denunci’é enfáticamente, bisando: “Ken . . . cu ta deseá di ser amigu di mundu ta haci su mes enemigu di Dios.” Asina Bijbel ta desenmascará loke ta falsu.—Santiago 4:4.

Si un persona haña un soño tocante e morto di un miembro di famia of un amigu, esei ta tal bes pasobra e tabata preocupá p’e persona aki. Cu e persona kisas a muri precisamente e anochi dje soño, riba su mes no ta proba cu e soño tabata profético. Pa cada soño dje clase aki cu ta parce di bira un realidad, tin cientos cu no ta.

Aunke Dios en berdad a usa soñonan den pasado pa revelá sucesonan profético i pa duna instruccion miéntras cu su Palabra skirbí tabata ser producí, e no tin necesidad pa haci esei awe. E Palabra skirbí ei ta contené tur e instruccionnan di Dios cu humanidad tin mester n’e tempu aki, i su profecianan tin di haber cu sucesonan mas cu mil aña den futuro. (2 Timoteo 3:16, 17) Pues nos por tin confiansa cu nos soñonan no ta indicacionnan di parti di Dios di futuro sucesonan sino funcionnan esencial dje celebro pa mantené nos bienestar mental.

[Plachi na página 7]

Mescos cu e soño di Fárao a mustra loke mester a tuma lugá, e Palabra di Dios ta tira lus riba nos futuro