Sirbiendo Jehova Como un Famia Uní

MANERA ANTONIO SANTOLERI A RELAT’E

Mi tata tabatin 17 aña di edad ora el a bandoná Italia na 1919. El a muda pa Brazil en busca di un mihó bida. Cu tempu, el bin poseé un barberia den un pueblo chikitu den e interior dje estado di São Paulo.

UN DIA na 1938, ora mi tabatin shete aña di edad, Tata a obtené e version Brasileira dje Bijbel for di un homber cu a bishitá su barberia. Dos aña despues Mama a bira gravemente malu i a keda inválido te na su morto. Tata tambe a bira malu, di manera cu nos tur—ami cu Mama, Tata i mi ruman muher Ana—a bai biba cerca famianan den e stad di São Paulo.

Durante mi añanan escolar na São Paulo, mi a bira un lesador ferviente, specialmente di obranan histórico. Mi a keda impresioná cu de bes en cuando nan tabata haci mencion di Bijbel. Un buki di ficcion, cu mi a fia for dje biblioteca público di São Paulo, a mencioná e Sermon Riba Ceru diferente biaha. N’e momento ei mi a dicidí di obtené un Bijbel pa lesa e sermon ei pa mi mes. Mi a busca e Bijbel cu Tata a haña añanan pasá i finalmente a hañ’é den e bom di un valis, unda e tabata pa shete aña.

Nos famia tabata católico, pues nunca mi a ser animá pa lesa Bijbel. Awor, riba mi mes, mi a siña busca e capítulonan i versículonan. Mi tabata lesa cu hopi placer no solamente e Sermon Riba Ceru sino henter e buki di Mateo i tambe otro bukinan di Bijbel. Loke a impresioná mi mas tantu tabata e tono dje berdad cu cua e siñansanan i milagernan di Jesus a ser presentá.

Realisando ki diferente religion católico tabata for di loke mi a lesa den Bijbel, mi a cuminsá asistí n’e Iglesia Presbiteriano, i Ana a djoin mi. Sin embargo, tog mi tabata sinti un bashí den mi curason. Pa 17 aña mi tabata busca Dios ansiosamente. (Echonan 17:27) Riba un anochi yen di strea, ora mi tabata den un estado pensativo, mi a puntra mi mes, ‘Pakico mi ta aki? Kico ta e propósito di bida?’ Mi a busca un lugá isolá patras den curá, a cai na rudia, i resa, ‘Señor Dios! Ken bo ta? Con mi por yega na conocé bo?’ Un contesta a bini djis despues di esei.

Siñando e Berdad di Bijbel

Un dia na 1949, un señora yong a acercá Tata ora el a baha for di un tram. El a ofrecé Tata e revistanan Toren di Vigilancia i Spierta! Tata a aboná riba e Toren di Vigilancia i a pidi e señora pa bishitá nos cas, splicando cu e tabatin dos yu cu tabata bai Iglesia Presbiteriano. Durante e bishita dje señora, el a laga e buki Children (Yunan) cerca Ana i a cuminsá un studio di Bijbel cuné. Despues mi a djoin e studio.

Na november 1950 nos a asistí na nos promé congreso di Testigonan di Jehova. Ei e buki “Laga Dios ser hañá berdadero” a ser presentá, i nos a continuá nos studio di Bijbel usando e buki ei como nos guia. Pronto despues nos a dicerní cu nos a haña e berdad, i na april 1951 nos a ser bautisá como símbolo di nos dedicacion na Jehova. Tata a haci su dedicacion algun aña despues i a muri fiel na Dios na 1982.

Felis den Sirbishi di Tempu Completo

Na januari 1954, ora mi tabatin solamente 22 aña di edad, mi a ser aceptá pa sirbi n’e oficina di sucursal di Testigonan di Jehova, cu ta ser yamá Betel. Ora mi a yega aya, mi a keda sorprendí pa descubrí cu un homber solamente dos aña mas bieu cu mi, Richard Mucha, tabata e superintendente di sucursal. Na 1955, ora un necesidad a presentá pa sirbidor di circuito, manera superintendentenan biahero tabata ser yamá e tempu ei, mi tabata entre e cincu hombernan cu a ser invitá pa participá den e sirbishi aki.

Mi asignacion tabata e estado di Rio Grande do Sul. Ei tabatin solamente 8 congregacion di Testigo di Jehova ora mi a cuminsá, pero dentro di 18 luna, 2 congregacion nobo i 20 grupo isolá a ser establecí. Den e área aki tin actualmente 15 circuito di Testigo di Jehova, cada un cu mas o ménos 20 congregacion! Na fin di 1956, mi a ser avisá cu mi circuito a ser dividí den cuater grupo mas chikitu cu lo a ser sirbí dor di cuater sirbidor di circuito. N’e tempu ei mi a haña e instruccion pa regresá Betel pa un asignacion nobo.

Pa mi sorpresa i deleite, mi a ser asigná n’e parti nort di Brazil como sirbidor di districto, un minister biahero cu ta sirbi un cantidad di circuito. E tempu ei Brazil tabatin 12.000 minister di Testigonan di Jehova, i e pais tabatin dos districto. Richard Wuttke a sirbi den sur, i ami tabatin e districto den nort. Na Betel nos a ser entrená pa manehá un proyector pa pasa e filmnan cu Testigonan di Jehova a producí, The New World Society in Action i The Happiness of the New World Society.

Den e dianan ei biahamentu tabata bastante diferente. Ningun dje Testigonan tabatin auto, pues mi tabata biaha den canoa, cu boto di rema, garoshi di bue, cabai, wagen, truck i un biaha cu avion. Tabata emocionante pa bula riba e selva di Amazónas pa aterisá na Santarém, un stad na mitar caminda entre Belém n’e boca di Amazónas i Manaus, capital di Estado Amazónas. E tempu ei sirbidornan di districto tabatin poco asamblea di circuito pa sirbi, p’esei mi a dedicá hopi di mi tempu pa pasa e filmnan di Sociedad. Den e stadnan mas grandi, cientos di persona tabata asistí.

Loke a impresioná mi mas tantu den nort di Brazil tabata e region di Amazónas. Miéntras mi tabata sirbi ei na april 1957, Riu Amazónas i e riunan cu a bin caba den dje a desbordá. Mi tabatin e privilegio di pasa un dje filmnan den e selva, extendiendo un pantaya improvisá entre dos palu. E coriente p’e proyector a bini for di un boto di motor ancrá den e riu cercano. Pa mayoria dje auditorio esaki tabata e promé film cu nan a yega di mira.

Pronto despues mi a bolbe bek na sirbishi di Betel, i e siguiente aña, na 1958, mi tabatin e privilegio di asistí n’e histórico Asamblea Internacional di Testigonan di Jehova “Boluntad Divino,” na New York City. Delegadonan for di 123 pais tabata entre e 253.922 personanan cu a yena Yankee Stadium i Polo Grounds ei cerca riba e último dia dje congreso ei di ocho dia.

Disfrutando di Cambionan den Mi Bida

Djis despues cu mi a regresá Betel, mi a conocé Clara Berndt, i na mart 1959 nos a casa. Nos a ser asigná n’e trabou di circuito den e estado di Bahia, unda nos a sirbi pa mas o ménos un aña. Ami cu Clara ainda ta corda cu goso e humildad, hospitalidad, celo, i amor dje rumannan einan; nan tabata pober den sentido material pero ricu den fruta di Reino. Despues nos a ser transferí na Estado São Paulo. Tabata ei, na 1960, cu mi esposa a sali na estado, i nos tabatin cu bandoná e ministerio di tempu completo.

Nos a dicidí di muda pa un lugá den e estado di Santa Catarina, unda mi esposa a nace. Nos yu homber, Gerson, tabata e promé di nos cincu yunan. Despues di dje a sigui Gilson na 1962, Talita na 1965, Tárcio na 1969 i Janice na 1974. Gracias na Jehova i e conseho excelente cu e ta percurá, nos tabata capas pa enfrentá e desafio di cria nan den “e disiplina i reglamentu mental di Jehova.”—Efesionan 6:4.

Nos ta considerá cada un di nos yunan precioso. E salmista a expresá nos sintimentunan hopi bon: “Mira! Yunan ta un herencia for di Jehova.” (Salmo 127:3) Apesar di problemanan, nos a percurá pa nos yunan manera nos lo a haci cu cualkier “herencia for di Jehova,” teniendo na mente e instruccionnan cu nos ta haña den su Palabra. E recompensanan tabata hopi. Nos a ricibí un goso indescriptibel ora tur cincu, un tras di otro, pero separadamente, i di nan propio boluntad a expresá nan deseo pa ser bautisá como símbolo di nan dedicacion na Jehova.—Eclesiástes 12:1.

Loke Nos Yunan A Scoge P’e

Nos tabata sumamente contentu ora Gerson, djis despues di a completá un curso di computer, a bisa cu e kier a sirbi na Betel, scogiendo asina e ministerio di tempu completo en bes di un carera profesional. Sin embargo, na promé instante bida di Betel no tabata fácil pa Gerson. Despues di a bishit’é ora e tabata den Betel pa solamente cuater luna, e tristesa cu su cara a reflehá ora nos tabata bai a dal mi duru. Den e spiel di wak patras den nos auto, mi a mir’é ta wak nos te ora nos a pasa e promé bogt riba e caminda. Mi wowonan a yena cu asina tantu lágrima cu mi tabatin cu para cantu di caminda promé cu nos por a sigui nos biahe di 700 kilometer rumbo pa cas.

Gerson realmente a bin gusta Betel. Despues di tabata ei pa casi seis aña, el a casa cu Heidi Besser, i nan a sirbi huntu den Betel pa dos aña mas. E ora ei Heidi a sali na estado, i nan tabatin cu sali for di Betel. Nan yu muher, Cintia, awor cu seis aña di edad, ta compañá nan den nan actividadnan di Reino.

No hopi despues cu nos a bishitá Gerson pa promé bes na Betel, Gilson, cu a caba di completá su promé aña den maneho di negoshi, a bisa cu e tambe kier a sirbi aya. Su plannan tabata pa reanudá su curso di maneho di negoshi despues di sirbi pa un aña na Betel. Pero su plannan a cambia, i el a permanecé den sirbishi di Betel. Na 1988 el a casa cu Vivian Gonçalves, un pionero, manera ministernan di tempu completo ta ser yamá. Desde e tempu ei nan ta sirbiendo huntu na Betel.

Nos goso a continuá ora nos di tres yu, Talita, a scoge pa drenta e sirbishi di pionero na 1986 despues di a sigui un curso di traha ‘tekening.’ Tres aña despues e tambe a ser invitá na Betel. Na 1991 el a casa cu José Cozzi, kende tabata sirbiendo na Betel pa dies aña. Nan ta sirbi ei ainda como pareha casá.

Ami cu mi esposa a alegrá mashá atrobe ora Tárcio, e siguiente yu, a ripití e mésun frase cu nos a tende tres bes caba, “Tata, mi kier bai Betel.” Su aplicacion a ser aceptá, i na 1991 e tambe a cuminsá sirbishi di Betel, unda el a keda te na 1995. Nos ta contentu cu el a usa su vigor hubenil pa promové interesnan di Jehova su Reino den e manera aki pa mas cu tres aña.

Nos yu mas yong, Janice, a tuma su decision pa sirbi Jehova i a ser bautisá cu 13 aña di edad. Durante su añanan escolar, el a sirbi pa un aña como pionero auxiliar. Anto, dia 1 di september, 1993, el a cuminsá como pionero regular den nos congregacion aki den e stad di Gaspar.

E Caminda di Exito

Kico ta e secreto pa mantené un famia uní den e adoracion di Jehova? Mi no ta kere cu tin un of otro fórmula mágico. Jehova a duna conseho den su Palabra pa mayornan cristian sigui, pues tur mérito mester bai na dje p’e resultadonan excelente cu nos a disfrutá di dje. Nos a simplemente trata na sigui su instruccionnan. (Proverbionan 22:6) Tur nos yunan a heredá un disposicion sentimental latino for di mi i un spiritu práctico germano for di nan mama. Pero e cos di mas importante cu nan a ricibí for di nos tabata un herencia spiritual.

Nos bida na cas a drei rond di interesnan di Reino. Manteniendo e interesnan aki como e cos di mas principal no tabata fácil. Por ehempel, semper tabata difícil pa nos mantené un studio regular di Bijbel como famia, pero nos nunca a entregá. For dje promé dianan di nan bida, nos a hiba cada yu na reunionnan cristiannan i tambe na asamblea i congresonan. Solamente malesa of algun otro caso di emergencia a stroba nos di asistí. Ademas, na un edad yong, e yunan a compañá nos den e ministerio cristian.

Ora nan tabatin rond di dies aña, e yunan a cuminsá duna parti den e Scol di Ministerio Teocrático. Nos a yuda nan prepará nan promé partinan, animando nan pa usa un boskeho en bes di un manuscrito. Mas despues, nan cada un tabata prepará nan mes parti. Tambe, ora nan tabatin entre 10 pa 12 aña di edad, nan cada un a cuminsá participá regularmente den e ministerio. Esaki tabata e único manera di biba cu nan a conocé.

Mi esposa, Clara, a hunga un papel vital den e criansa di nos yunan. Tur anochi, ora nan tabata masha yong—e tempu cu un mucha ta absorbá manera un spons tur loke e ser siñá—Clara tabata lesa un relato di Bijbel pa nan i tabata haci oracion cu cada un. E tabata haci bon uso dje bukinan For di paradijs perdí te na paradijs recobrá, Scuchando e Gran Maestro i Mi buki di relato bíblico.a Ora nan a bira disponibel, tambe nos tabata usa e audiocasetnan i videocasetnan cu Testigonan di Jehova ta producí.

Nos experencia como mayornan cristian ta confirmá cu yunan tin mester di atencion diario. Amor intenso, interes personal i tempu abundante ta entre e necesidadnan básico di esnan yong. Nos no a solamente considerá cu tabata nos responsabilidad di mayor pa satisfacé e necesidadnan aki haciendo nos máximo esfuerso sino tambe a cosechá hopi deleite haciendo esei.

Berdaderamente, ta un satisfaccion pa mayornan realisá e cumplimentu dje palabranan na Salmo 127:3-5; “Mira! Yunan ta un herencia for di Jehova; e fruta di barica ta un recompensa. Manera flechanan den man di un homber poderoso, asina ta e yunan di hubentud. Felis ta e homber físicamente capacitá cu a yena su baliña di flecha cu nan.” Sirbiendo Jehova como un famia uní en berdad a haci nos alegrá!

[Nota]

[Plachi na página 26]

Antonio Santoleri cu su famia cercano