Bo Ta Anhela pa Sirbi Mas Plenamente?

“MI TABATA rabiá cu Jehova,” Laura ta bisa. “Mi tabata pidié constantemente den oracion p’e yuda nos resolvé nos problemanan financiero pa mi por a sigui traha pionero—pero sin resultado. Finalmente mi tabatin cu baha for dje lista di pionero. Mi tin cu admití tambe cu mi tabata envidiá esnan cu por a continuá.”

Considerá, tambe, e caso di Michael, sirbidor ministerial den un congregacion di Testigonan di Jehova. E tabata trahando pa alcansá e puesto di superintendente. (1 Timoteo 3:1) Ora su anhelo a keda sin ser realisá pa vários aña, el a bira asina amargá cu e no tabata deseá mas pa ser considerá p’e privilegio. “Mi simplemente no por a soportá e dolor di decepcion atrobe,” e ta bisa.

Bo tabatin un experencia similar? Bo a hañá bo ta renunciá un privilegio teocrático kerí? Por ehempel, bo a hañá bo ta stop di sirbi como pionero, un proclamador di Reino di tempu completo? Of bo ta anhelá pa cierto responsabilidadnan di congregacion confiá na otronan? Asta kisas bo tin un deseo intenso pa sirbi na Betel of como misionero, pero bo circunstancianan no ta permití esei.

“Expectativa posponé ta haci e curason enfermo,” e buki di Proverbionan ta reconocé. (Proverbionan 13:12) Esaki por ta specialmente e caso ora otronan ta ricibí net e privilegionan cu abo ta spera riba. E Palabra di Dios ta duna perspicacia, consuelo i speransa pa cualkier persona cu ta experenciá decepcionnan asina? Sí, e ta duna esei. De facto, Salmo 84 ta expresá e sintimentunan di un sirbidor di Jehova cu tambe tabatin deseonan relacioná cu Jehova su sirbishi cu a keda sin ser realisá.

Un Levita Su Aprecio

E compositornan di Salmo 84 tabata e yunan di Core, levitanan cu a sirbi n’e tempel di Jehova i cu a considerá nan privilegionan di sirbishi di hopi balor. “Ki dushi bo magnífico tabernáculo ta, O Jehova di ehércitonan!” un di nan ta sclama. “Mi alma a anhelá i tambe a caba di pena, den su deseo intenso p’e pationan di Jehova. Mi propio curason i mi mes carni ta sclama gososamente n’e Dios bibu.”—Salmo 84:1, 2.

E levita aki tabatin asina un anhelo pa sirbi n’e tempel di Jehova cu asta e panorama comun cantu dje caminda cu ta hiba na Jerusalem a parce atractivo p’e. “Pasando dor dje sabana abou di e matanan di baka,” e ta bisa, “nan ta combirtié den un fuente di awa mes.” (Salmo 84:6) Sí, un área normalmente secu tabata p’e manera un region caminda yen di coriente di awa ta pasa.

Debí cu e salmista tabata un levita cu no tabata dje clase di sacerdote, e por a sirbi n’e tempel pa solamente un siman cada seis luna. (1 Crónicanan 24:1-19; 2 Crónicanan 23:8; Lucas 1:5, 8, 9) El a pasa e resto di su tempu na cas den un dje stadnan levita. P’esei el a canta: “Asta e para mes a haña un cas, i e souchi un neshi pa su mes, unda el a pone su puitunan—bo magnífico altar, O Jehova di ehércitonan, mi Rey i mi Dios!” (Salmo 84:3) Ki felis e levita lo tabata si e tabata manera e paranan cu tabatin un lugá di biba mas permanente n’e tempel!

Lo tabata fácil p’e levita bira amargá debí cu e no por a sirbi n’e tempel mas tantu biaha. Sin embargo, e tabata contentu di sirbi manera e tabata por, i siguramente el a realisá cu debocion di henter curason na Jehova ta bal e esfuerso. Kico a yuda e levita fiel aki keda contentu cu su privilegionan di sirbishi?

Siña Keda Contentu

“Un dia den bo pationan ta mihó cu mil den otro lugá,” e levita ta bisa. “Mi a scoge pa para n’e drempel den e cas di mi Dios mas bien cu pasa p’aki i p’aya den e tentnan di maldad.” (Salmo 84:10) E tabata conciente cu pasando asta un dia n’e cas di Jehova ta un privilegio incalculabel. I e levita tabatin hopi mas cu un dia pa sirbi n’e tempel. E echo cu e tabata contentu cu su privilegionan a hacié canta di goso.

Kico di nos? Nos ta gradicidu pa loke nos tin, of nos tin tendencia di lubidá ki privilegionan nos tin caba den Jehova su sirbishi? Pa motibu di nan debocion na dje, Jehova a confia su pueblo cu un variedad amplio di privilegio i tareanan. Esakinan ta incluí e responsabilidadnan mas pisá di supervisá, pastoreá, siña otronan i vários rasgo di sirbishi di tempu completo. Pero tambe nan ta enbolbé otro cosnan precioso cu tin di haber cu e adoracion di Jehova.

Tuma por ehempel e ministerio cristian. Apostel Pablo ta compará nos privilegio di predicá e bon nobo cu un “tesoro . . . den weanan di klei” cu nos ta poseé. (2 Corintionan 4:7) Bo ta considerá e sirbishi ei manera un tesoro preciosísimo? Jesucristo, kende a encabesá e actividad di predicacion di Reino, a mir’é asina, estableciendo e patronchi. (Mateo 4:17) “Ya cu nos tin e ministerio aki . . . , nos no ta entregá,” Pablo a bisa.—2 Corintionan 4:1.

Reunionnan cristian tambe ta un provision sagrado cu nos no mag considerá di poco balor. Na nos reunionnan, nos ta ricibí instruccion vital i ta disfrutá di compañerismo necesario. Na reunionnan tambe nos por haci expresion público di nos fe i speransa dor di comentá regularmente i dor di participá den e programa den otro maneranan. (Hebreonan 10:23-25) Nos reunionnan en berdad ta un provision cu nos tin cu atesorá!

Michael, mencioná anteriormente, a duna hopi balor n’e bendicionnan aki i a apreciá nan profundamente. Pero su decepcion di no por a sirbi como anciano a mengua su aprecio p’e bendicionnan ei pa un tempu. Dor di enfocá riba nan atrobe, e por a recobrá su ekilibrio i spera cu pacenshi riba Jehova.

En bes di sinti nos malcontentu pa motibu cu nos no a haña cierto privilegio, nos ta haci bon di examiná di nobo e maneranan cu Jehova ta bendicionando nos, mescos cu e salmista a haci.a Si nos no ta mira masha bendicion, nos tin cu wak atrobe, pidiendo Jehova pa habri nos wowonan pa mira nos privilegionan i e maneranan cu e ta bendicionando nos i usando nos pa su alabansa.—Proverbionan 10:22.

Ta importante tambe pa realisá cu privilegionan special, manera e puesto di superintendente, ta exigí cualificacionnan specífico. (1 Timoteo 3:1-7; Tito 1:5-9) Pues nos tin cu examiná nos mes, buscando cualkier área den cua nos tin cu mehorá anto haci esfuerso cu empeño pa mehorá.—1 Timoteo 4:12-15.

No Bira Desanimá

Si nos no ricibí un cierto privilegio di sirbishi, nos no tin nodi concluí cu Jehova tin mas amor pa esnan cu sí ta disfrutá di dje of cu e ta reteniendo algu bon for di nos. Siguramente, nos no mester asumí, motivá pa envidia, cu e otro rumannan aki a obtené nan privilegionan inmerecidamente mediante faboritismo humano en bes di nombramentu teocrático. Dor di keda pensa cu resentimentu riba ideanan asina por haci nos bira yalurs, pleitista i asta entregá completamente.—1 Corintionan 3:3; Santiago 3:14-16.

Laura, mencioná den e introduccion, no a entregá. Cu tempu el a bringa su sintimentunan di rabia i yaluzí. Bes tras bes Laura a pidi Dios pa yud’é vence su reaccion negativo p’e echo cu e no por traha pionero. Tambe el a busca yudansa di hombernan cualificá den e congregacion i a sintié sigur atrobe cu Dios ta stim’é. “Jehova a duná mi pas mental,” el a bisa. “Aunke ni ami ni mi casá no por traha pionero awor aki, nos tin grato recuerdo dje tempu cu nos a trah’é i ta saca fortalesa for di experencianan cu nos tabatin. Tambe nos ta yuda nos yu homber adulto den su trabou di pionero.” Kedando contentu, Laura ta capas awor pa “alegrá cu hende cu ta alegrá” den nan sirbishi di pionero.—Romanonan 12:15.

Fiha Metanan Alcansabel

E echo cu nos ta contentu cu nos privilegionan di sirbishi actual no ta implicá cu nos ta stop di fiha mas meta teocrático. Ora Pablo a trata e speransa celestial, el a papia di “forsando padilanti pa loke ta mas ayá.” Tambe el a bisa: “Te n’e grado cu nos a haci progreso, laga nos sigui cana ordenadamente den e mésun rutina aki.” (Filipensenan 3:13-16) Metanan teocrático por yuda nos forsa padilanti. Sin embargo, e desafio ta pa tene nan realístico.

Metanan realístico ta razonabel i alcansabel. (Filipensenan 4:5) Esaki no ta nificá cu un meta cu ta rekerí vários aña di trabou duru ta irealístico. Un meta asina di largu alcanse por ser alcansá gradualmente dor di fiha un seri di meta of pasonan intermedio. Esakinan por sirbi como puntonan significativo pa marca e progreso spiritual. Completando cada paso exitosamente lo duna un sentido di satisfaccion na caminda en bes di decepcion.

Un Punto di Bista Excelente

Sin embargo, ta importante pa reconocé cu pa motibu di nos circunstancia i limitacionnan, kisas nos no por obtené algun privilegio. Fihando nan como meta ta hiba solamente na decepcion i frustracion. Mester posponé metanan asina, por lo ménos p’e tempu actual. Lo no ta difícil pa haci esaki si nos resa pidi pa contentamentu piadoso i haci e cumplimentu cu e boluntad di Jehova nos interes principal. Ora nos ta haci esfuerso pa alcansá privilegionan, loke ta importá ta e gloria di Jehova i no e reconocimentu di nos logronan personal. (Salmo 16:5, 6; Mateo 6:33) Apropiadamente Bijbel ta bisa nos: “Haci bo obranan lora riba Jehova mes i bo plannan lo ta firmemente establecí.”—Proverbionan 16:3.

Den nos consideracion di Salmo 84, nos por mira cu e salmista a manifestá un actitud asina pa cu privilegionan di sirbishi, i Jehova a bendicion’é ricamente. Ademas, e salmo aki ta sigui beneficiá Jehova su pueblo te n’e dia djawe.

Cu dependencia riba Jehova huntu cu oracion bo por logra un balansa entre bo anhelo pa privilegionan adicional i keda contentu cu e privilegionan cu bo ta disfrutá di dje caba. Nunca laga e deseo pa haci mas hortá bo di aprecio pa loke bo tin awor i e goso di sirbi Jehova pa semper. Confia den Jehova, pasobra esaki ta resultá den felicidad, manera e palabranan dje levita ta mustra: “O Jehova di ehércitonan, felis ta e hende cu ta confia den bo.”—Salmo 84:12.

[Nota]

[Kuadro na página 11]

Metanan Cu Nos Lo Por Fiha

Lesa Bijbel tur dia.—Hosué 1:8; Mateo 4:4

Mehorá nos facultadnan perceptivo mediante entrenamentu for dje Scritura.—Hebreonan 5:14

Desaroyá un relacion mas íntimo cu Dios.—Salmo 73:28

Cultivá cada un dje frutanan di spiritu.—Galationan 5:22, 23

Mehorá e calidad di nos oracionnan.—Filipensenan 4:6, 7

Bira mas eficas den predicá i siña otronan.—1 Timoteo 4:15, 16

Lesa i meditá riba cada edicion dje revistanan Toren di Vigilancia i Spierta!—Salmo 49:3

[Plachinan na página 9]

Den fiha metanan personal, pone hacimentu dje boluntad di Dios na promé lugá