“E Dios di Pas” Ta Interesá den Esnan Afligí

BIJBEL ta haci cla cu David di antigwedad tabata sa kico ta afliccion. Pa vários aña el a biba como fugitivo, siendo persiguí implacablemente dor di un rey malbado i cabesura, kende tabata dicididu pa mat’é. Durante e periodo aki di afliccion, David a sconde den lugánan isolá. Pero el a haci algu mas. Cu empeño el a haci oracion na Jehova tocante su adversidad. “Cu mi bos, na Jehova mi a procedé na sclama pa yudansa,” el a skirbi despues relacioná cu su prueba difícil. “Dilanti dje mi a sigui drama mi preocupacion; dilanti dje mi a sigui conta tocante mi propio angustia.”—Salmo 142:1, 2.

Awe, algun hende lo haci bofon di David su dependencia riba Dios. Nan lo bisa cu oracion ta simplemente un krùk sicológico i cu den términonan práctico oracion ta perdementu di tempu. Sin embargo, David su confiansa den Dios no tabata fuera di lugá, pasobra cu tempu su enemigunan a ser derotá. Mirando bek na su experencia, David a skirbi: “Esun afligí aki a yama, i Jehova mes a tende. I for di tur su angustianan El a salb’é.” (Salmo 34:6) Na otro caminda e Dios berdadero na ken David a acudí ta ser yamá “e Dios di pas.” (Filipensenan 4:9; Hebreonan 13:20) Lo e trece alivio for di afliccion, resultando den pas pa nos?

Jehova Ta Interesá den Bo

Jehova no ta distanciá su mes relacioná cu e adversidadnan di su pueblo. (Salmo 34:15) E ta atento na e necesidadnan no solamente di su sirbidornan como grupo sino tambe di cada persona individual cu ta tem’é. Ora di dedicá e tempel den antiguo Jerusalem, Sálomon a roga Jehova pa scucha na “sea cual sea e oracion, sea cual sea e peticion pa fabor cu lo por ser hací di parti di cualkier hende of di henter bo pueblo Israel, pasobra nan cada un conocé su propio plaga i su propio dolor.” (2 Crónicanan 6:29) Manera Sálomon a reconocé, cada persona individual tin su propio afliccion único pa wanta. Pa un persona lo e por ta enfermedad físico. Pa un otro, angustia emocional. Algun por ta afligí dor cu un ser kerí a muri. Desempleo, dificultad económico i problemanan di famia tambe ta afliccionnan comun den e tempu trabahoso aki.

Pensa un ratu riba ‘bo propio plaga i bo propio dolor.’ Tin biaha kisas bo a sinti manera e salmista David, cu a skirbi: “Mi a sigui spera pa un persona mustra compasion, pero no tabatin ningun; i pa consoladornan, pero mi no a haña ningun.” Tog, bo por ta sigur cu Dios ta interesá den bo situacion, pasobra despues den e mésun salmo, David a skirbi: “Jehova ta scuchando esnan pober, i realmente lo e no despreciá su propio prezunan.”—Salmo 69:20, 33.

Aplicando David su palabranan den un sentido amplio, nos por keda sigur cu e Creador di humanidad ta scucha e oracionnan di esnan cu ta encarcelá, na moda di papia, den nan afliccionnan. Mas cu esei, e ta reaccioná na nan situacion penoso. Considerá e siguiente declaracionnan cu ta revelá Jehova su compasion pa esnan afligí.

“Boso no mester afligí ningun biuda ni mucha homber sin tata. Si boso mester afligié di algun manera, anto si e di algun manera sclama na mi, sin falta lo mi tende su sclamacion; i mi rabia lo cende berdaderamente.”—Exodo 22:22-24.

“Dios lo no causa pa husticia ser hací pa su scogínan cu ta sclama na dje di dia i anochi, aunke e ta tene gran pacenshi pa cu nan?”—Lucas 18:7.

“Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba. For di opresion i for di violencia lo e rescatá nan alma, i nan sanger lo ta precioso den su bista.”—Salmo 72:12-14.

“Esun cu ta mishi cu boso [Dios su pueblo riba tera] ta mishi cu mi popch’i wowo.”—Zacarías 2:8.

E par di ehempelnan aki ta ilustrá e interes profundo di nos Creador den e bienestar di su pueblo. P’esei, nos tin bon motibu pa sigui e amonestacion di apostel Pedro: “Tira tur boso ansiedad riba dje, pasobra e ta interesá den boso.” (1 Pedro 5:7) Pero con Dios lo yuda nos durante tempu di afliccion?

Con Dios Ta Yuda Esnan Afligí

Manera nos a mira, ora David a sufri afliccion, cu empeño el a pidi Dios pa guia. Na mésun tempu, el a tuma e iniciativa pa aliviá e situacion, usando ingeniosidad pa scapa di su persiguidornan. Dje manera ei, dependiendo riba Jehova combiná cu esfuerso personal a haci posibel pa David wanta su adversidad. Kico nos por siña for di esaki?

Ora nos ta confrontá cu afliccion, siguramente no ta robes pa nos tuma iniciativa razonabel pa solucioná e problema. Por ehempel, si un cristian perde su trabou, lo e no haci esfuerso pa haña trabou? Of si e ta sufriendo di un malesa físico, lo e no busca atencion médico? Realmente, asta Jesus, cu tabatin e poder pa cura tur tipo di enfermedad, a reconocé cu ‘hende enfermo tin mester di dokter.’ (Mateo 9:12; compará cu 1 Timoteo 5:23.) Naturalmente, algun adversidad no por ser eliminá; mester djis wanta nan. No obstante, un cristian berdadero no ta mira sufrimentu riba su mes como un birtud, manera algun persona ta mir’é. (Compará cu 1 Reynan 18:28.) Mas bien, e ta dal e pasonan cu e por pa trata cu su afliccion.

Sin embargo, na mésun tempu ta razonabel pa presentá e asuntu na Jehova den oracion. Pakico? Pa cuminsá, dor di lèn riba nos Creador, nos ta ser yudá pa “haci sigur dje cosnan mas importante.” (Filipensenan 1:10) Por ehempel, ora di busca trabou, dependiendo riba Dios cu oracion lo yuda nos pa no aceptá trabou cu ta na conflicto cu principionan bíblico. Tambe nos lo evitá di ser “desviá for dje fe” dor di amor pa placa. (1 Timoteo 6:10) Realmente, ora di tuma decisionnan pisá—relacioná cu empleo of cualkier otro faceta di bida—nos tin cu sigui David su amonestacion: “Tira bo carga riba Jehova mes, i e mes lo sostené bo. Nunca lo e permití e hustu tambaleá.”—Salmo 55:22.

Tambe oracion ta yuda nos mantené nos balansa mental, di manera cu nos afliccion no ta aplastá nos. Apostel Pablo a skirbi: “Den tur cos mediante oracion i súplica huntu cu gradicimentu, laga boso peticionnan bira conocí na Dios.” Cu ki resultado? “E pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) Sí, pas, e pas di Dios. E pas ei “ta surpasá tur pensamentu,” di manera cu e por stabilisá nos ora nos ta cargá cu emocionnan angustioso. Lo e ‘warda nos curason i facultad mental,’ yudando nos asina pa evitá di actua descabeyá i imprudentemente, locual lo por aumentá nos afliccion.—Eclesiástes 7:7.

Oracion por haci mas ainda. E por haci un diferencia den con un situacion ta desaroyá. Considerá un ehempel bíblico. Ora apostel Pablo tabata encarcelá na Roma, el a animá compañeronan creyente pa haci oracion na su fabor. Pakico? “Mi ta exhortá boso mas specialmente pa haci esaki,” el a skirbi nan, “pa mi por ser restorá na boso mas pronto.” (Hebreonan 13:19) Pablo tabata sa cu oracion persistente di su compañeronan creyente lo por a afectá na ki tempu lo el a ser librá.—Filemon 22.

Oracion lo cambia e resultado di bo afliccion? E por. Sin embargo, nos mester realisá cu Jehova no semper ta contestá nos oracionnan den e manera cu nos tal bes ta spera. Por ehempel, bes tras bes Pablo a pidi den oracion relacioná cu su “sumpiña den carni”—kisas un problema físico relacioná cu su bista. En bes di eliminá e afliccion, Dios a bisa Pablo: “Mi bondad inmerecí ta suficiente pa bo; pasobra mi poder ta ser hací perfecto den debilidad.”—2 Corintionan 12:7-9.

Pues tin biaha nos afliccionnan lo no ser eliminá. Mas bien, nos lo tin oportunidad di proba nos dependencia riba nos Creador. (Echonan 14:22) Ademas, nos por ta sigur cu asta si Jehova no eliminá e afliccion, lo e “percurá . . . p’e salida pa [nos] por want’é.” (1 Corintionan 10:13) Sí, ta cu bon motibu Jehova ta ser yamá “e Dios di tur consuelo, cu ta consolá nos den tur nos tribulacion.” (2 Corintionan 1:3, 4) E ta duna nos loke nos tin mester pa wanta cu un midí considerabel di pas.

Pronto—Un Mundu Sin Afliccion!

E Creador ta primintí cu mediante su Reino, pronto lo e abolí humanidad su afliccionnan. Con lo e logra esaki? Dor di eliminá Satanas e Diabel, e mayor instigador di afliccion i e principal enemigu di pas, kende Bijbel ta identificá como “e dios dje sistema di cosnan aki.” (2 Corintionan 4:4) Pero pronto su control riba humanidad lo terminá. E eliminacion di Satanas lo habri caminda pa esnan cu ta teme Dios haña bendicionnan sin fin. Bijbel ta primintí cu Jehova lo “seca tur lágrima di nan wowo, i morto lo no t’ei mas, ni lo tin mas lamento ni sclamacion ni dolor. E cosnan anterior a pasa bai.”—Revelacion 21:1-4.

Un mundu sin afliccion ta parce increibel? Nos ta asina acustumbrá di biba cu adversidad cu ta difícil pa nos imaginá bida sin dje. Pero libertad for di miedu, ansiedad i calamidad ta net loke tabata Dios su propósito pa humanidad desde creacion, i su propósito lo logra su obhetivo.—Isaías 55:10, 11.

Esaki ta e speransa cu Sonia, Fabiana i Ana, mencioná den e promé artículo, a haña. Sonia, kende su dos yu hombernan a muri di AIDS, a haña hopi pas for dje speransa cu Bijbel ta ofrecé—resureccion dje hustu i inhustunan. (Echonan 24:15) “Un cos ta sigur,” e ta bisa, “nos speransa ta surpasá cualkier dolor.”

Bibando ainda den e weeshuis, un Testigo di Jehova a bishitá Ana. “El a mustrá mi e nomber di Jehova den Bijbel,” Ana ta bisa, “i mi a yora di goso. Mi tabatin mester di yudansa urgentemente, i mi a haña sa cu tin un Dios cu ta interesá den nos.” Despues di sali for dje weeshuis, Ana a aceptá un studio di Bijbel i a siña mas tocante e promesanan di Jehova. Despues el a dedicá su bida na Jehova i a simbolis’é mediante bautismo. “Desde e tempu ei mi a sigui dependé riba Jehova mediante oracion, i mi ta ser consolá dor dje siguransa cu lo e yudá mi.”

Fabiana tambe a haña hopi consuelo i pas mental den su afliccion dor di siña tocante e promesanan di Dios pa futuro. “Siñando e berdad for di Bijbel ta manera sali for di un lugá masha scur i tristu i drenta un cuarto cla, briyante i agradabel.”—Compará cu Salmo 118:5.

Pero con i na ki tempu pas literal rond dje globo lo ser realisá? Laga nos mira den e siguiente artículonan.

[Kuadro na página 6]

E Hopi Facetanan di Afliccion

▪ Aproximadamente un cuart dje poblacion di mundu ta biba den pobresa extremo, i miyones mas ta biba den condicionnan inhumano cu ta menasá nan sobrebibencia.

▪ Mas cu 200 miyon mucha ta desnutrí.

▪ Tur aña diarea ta mata rond di tres miyon mucha bou di cincu aña di edad.

▪ Malesanan contagioso a mata rond di 16,5 miyon hende na 1993 so. Ya cu algun pais ta categorisá enfermedadnan na diferente manera, e cantidad real por ta hopi mas haltu.

▪ Tin calculá cu 500 miyon hende ta afectá pa un of otro tipo di problema mental.

▪ Suicidio ta aumentando mas rápidamente entre hóbennan cu den cualkier otro grupo di edad.

▪ “Hamber i desempleo a bira manchanan riba e mundu,” The Unesco Courier ta declará. “Tin 35 miyon hende desempleá den e shete nacionnan mas ricu di mundu, i na Brazil so tin 20 miyon trahador pa ken e echo cu nan tin un trabou no ta nificá cu nan lo tin suficiente di come.”

[Plachinan na página 7]

Oracion por yuda nos enfocá riba Dios su promesa di un mundu sin afliccion