Gradicidu pa un Bida Largu den e Sirbishi di Jehova

MANERA OTTILIE MYDLAND A RELAT’E

Na cabamentu di siglo 19, barcunan di bela tabata para banda di otro den e haf di Kopervik, parti west di Norwega. Den e tempu ei hende homber i cabai tabata hala garoshi den e cayanan. Hende tabata usa lampi di kerosin pa lus, i casnan di palu di verf blancu tabata ser keintá cu palu i carbon. Mi a nace ei na juni 1898, e di dos di cincu yu.

NA 1905, Tata no tabatin trabou, p’esei el a bai Merca. El a regresá tres aña despues cu un maleta yen di regalo excitante p’e yunan i tela di seda i otro artículonan pa Mama. Pero e cosnan di mas precioso cu el a bini cuné tabata volúmennan di Charles Taze Russell titulá Studies in the Scriptures.

Tata a cuminsá conta amigu i famianan cosnan cu el a siña for dje bukinan aki. Na reunionnan n’e capiya local, e tabata usa Bijbel pa mustra cu no tin un fiernu di candela. (Eclesiástes 9:5, 10) Na 1909, e aña despues cu Tata a regresá for di Merca, Ruman Russell a bishitá Norwega i a duna discurso na Bergen i Kristiania, awor Oslo. Tata a bai Bergen pa scuch’é.

Mayoria hende a acusá Tata di ta promové siñansa falsu. Mi tabatin duele di dje i tabata yud’é entregá tratado di Bijbel na bisiñanan. Na 1912, mi a entregá un tratado tocante fiernu n’e yu muher di un pastor. El a zundra ami cu Tata. Mi a keda asombrá con yu muher di un pastor por a usa lenguahe asina obseno!

De bes en cuando otro Studiantenan di Bijbel, manera Testigonan di Jehova tabata yama e tempu ei, tabata bishitá nos na Kopervik, incluyendo Theodor Simonsen, un orador capas. Mi tabata invitá hende pa bin tende discursonan cu e tabata duna na nos cas. Promé cu su discurso e tabata toca cítara i canta, i despues di su discurso e tabata canta un cantica di conclusion. Nos tabatin respet profundo p’e.

Un otro cu tabata bishitá nos cas regularmente tabata Anna Andersen, un colporteur, of minister di tempu completo. E tabata biaha di un stad pa otro rond parti di Norwega, principalmente cu baiskel, lagando literatura bíblico cu hende. Un tempu e tabata un oficial den Leger des Heils i tabata conocé algun oficial di Leger des Heils na Kopervik. Nan a permitié duna un discurso bíblico den nan cas di reunion, i mi a invitá hende pa bin scuch’é.

Un otro colporteur cu tabata bishitá nos na Kopervik tabata Karl Gunberg. E homber modesto i ketu, pero humorístico aki a sirbi tambe periódicamente como traductor na e oficina di sucursal na Oslo. Vários aña despues nos a traha huntu ei.

Influenciá pa Opinionnan Religioso

N’e tempu ei mayoria hende tabatin no solamente fe firme den Dios i den Bijbel, sino tambe creencianan cu rais profundo, manera den candela di fiernu i Trinidad. P’esei ora e Studiantenan di Bijbel tabata siña cu e doctrinanan aki no tabata na armonia cu Bijbel, esei a causa basta conmocion. E acusacionnan fuerte di parti di nos bisiñanan cu Tata tabata un apóstata a influenciá mi. Un biaha mi a asta bis’é: “Loke Tata ta siña no ta berdad. Esei ta apostasia!”

“Bin aki, Ottilie,” el a animá mi, “i wak loke Bijbel ta bisa.” Anto el a lesa pa mi for dje Scritura. Como resultado, mi confiansa den dje i den loke el a siña a aumentá. El a animá mi pa lesa e Studies in the Scriptures, p’esei durante e zomer di 1914, hopi biaha mi tabata sinta lesa riba un ceritu cu bista riba e pueblo.

Na augustus 1914 hende a bosha para pafó dje edificio dje korant local pa lesa tocante e cuminsamentu di Guera Mundial I. Tata a bini i mira loke tabata pasando. “Danki Dios!” el a sclama. El a reconocé den e guera cu a cuminsá e cumplimentu di profecianan di Bijbel tocante cua e tabata predicá. (Mateo 24:7) Hopi Studiante di Bijbel a kere e tempu ei cu pronto nan lo a ser hibá shelu. Ora esaki no a sosodé, algun a keda desapuntá.

Mi Posicion na Fabor dje Berdad di Bijbel

Na 1915, cu 17 aña di edad, mi a caba scol secundario i a haña trabou seglar den un oficina. E tempu ei mi a cuminsá lesa E Toren di Vigilancia regularmente. Pero tabata te na 1918 cu e rumannan a cuminsá tene reunionnan regular na Kopervik. Den cuminsamentu, nos tabata cincu cu a asistí. Nos tabata lesa publicacionnan di Sociedad Watch Tower, manera Studies in the Scriptures, i tabata considerá e material pa medio di pregunta i contesta. Aunke Mama tabata papia bon di Studiantenan di Bijbel cu otro hende, nunca el a bira un di nos.

Den e oficina caminda mi tabata traha, na cuminsamentu di 1918, mi a cera cu Anton Saltnes, kende mi por a yuda bira un Studiante di Bijbel. N’e tempu aki mi a bira un publicadó regular i a ser bautisá na un asamblea na Bergen na 1921.

Na mei 1925 tabatin un asamblea pa henter Scandinavia na Örebro, Suecia. Tabatin un asistencia di mas cu 500 persona, incluyendo Joseph F. Rutherford, presidente di Sociedad Watch Tower. Nos tabata mas o ménos 30 cu a biaha for di Oslo cu trein den un wagon reservá pa Studiantenan di Bijbel.

N’e asamblea aki nan a anunciá cu Sociedad lo bai establecé un Oficina pa Nort Europa na Kopenhagen, Dinamarca, pa percurá p’e trabou di predicá den henter Scandinavia i e paisnan báltico. William Dey di Escocia a ser asigná pa supervisá e trabou di predicá. E tabata masha gustá, i pronto el a haña e bijnaam di e Gran Escoses. Den cuminsamentu Ruman Dey no tabata conocé ningun idioma scandinavo, p’esei e tabata sinta te patras durante reunionnan i asambleanan i tabata wak e yunan di manera cu nan mayornan por a concentrá riba loke tabata ser bisá for di plataforma.

E Toren di Vigilancia [na ingles] di 1 di mart, 1925, a trata Revelacion capítulo 12 i a splica cu e capítulo aki ta relacioná cu e nacementu dje Reino di Dios i cu e nacementu aki a tuma lugá den shelu na 1914. Mi a haña esei difícil pa comprendé, p’esei mi a lesa e artículo bes tras bes. Ora cu finalmente mi a comprendé, mi a sintí mi masha contentu.

Ora ahustenan a ser hací den nos comprendimentu di temanan bíblico, algun a trompecá i a hala atras for dje pueblo di Dios. Pero ora un ahuste asina tabata duru pa comprendé, semper mi tabata lesa e material bes tras bes pa purba comprendé e razonamentu. Si tog mi no a comprendé e splicacion nobo, mi ta spera riba un clarificacion. Bes tras bes mi a ser recompensá p’e pacenshi aki.

Sirbishi na Betel

Pa algun aña mi a traha como administradó, secretaria i controladó di cuenta dje provincia. Na 1928 e persona cu tabata encargá cu e cuentanan financiero di Sociedad a bira enfermo i tabatin cu bandoná Betel. Siendo cu mi tabatin experencia den e trabou ei, nan a puntrá mi pa tuma over. Mi a cuminsá traha na Betel na juni 1928. De bes en cuando, Ruman Dey tabata bishitá nos i controlá mi cuentanan. Tambe nos famia di Betel tabata hiba delantera den e trabou público di predicá na Oslo, unda e tempu ei nos tabatin un congregacion so.

Algun di nos tabata yuda e sirbidó di envio na Betel, Ruman Sakshammer, cu paketá i despachá The Golden Age (awor Spierta!). Ruman Simonsen i Gunberg tabata entre esnan cu tabata duna un man. Nos a pasa un dushi tempu huntu, hopi biaha cantando canticanan segun cu nos tabata traha.

Sigur dje Speransa di Reino

Na 1935 nos a bin comprendé cu e “multitud grandi” no tabata un clase celestial secundario. Nos a siña cu en bes di esei e ta representá un clase cu ta sobrebibí e tribulacion grandi i cu tin e oportunidad di biba pa semper den Paradijs riba tera. (Revelacion 7:9-14) Cu e comprendimentu nobo aki, algun cu tabata participá dje emblemanan di Memorial a realisá cu nan speransa tabata unu terenal, i nan a stop di participá.

Aunke nunca mi tabatin duda en cuanto mi speransa celestial, hopi biaha mi tabata pensa: ‘Pakico Dios kier net ami?’ Mi tabata sintí mi indigno di un gran privilegio asina. Como un muher chikitu i tímido, mi a haña ta straño pa pensa di mi mes como un rey gobernando huntu cu Cristo den shelu. (2 Timoteo 2:11, 12; Revelacion 5:10) Sin embargo, mi tabata meditá riba e palabranan di apostel Pablo cu “no hopi hende poderoso” a ser yamá, sino cu “Dios a scoge e cosnan débil di mundu, p’e brongosá e cosnan fuerte.”—1 Corintionan 1:26, 27.

Actividad Durante Guera Mundial II

Dia 9 di april, 1940, trupanan aleman a invadí Norwega, i pronto nan a ocupá e pais. Como resultado dje guera, hopi a cuminsá reaccioná faborablemente riba e mensahe di Reino. Di october 1940 pa juni 1941, nos a laga mas cu 272.000 buki i foyeto. Esei ta nificá cu cada un dje mas cu 470 Testigonan e tempu ei na Norwega a laga, como promedio, mas cu 570 buki i foyeto durante e nuebe lunanan ei!

Dia 8 di juli, 1941, agentenan di Gestapo a bishitá tur superintendente presidente i a bisa nan cu si e trabou di predicá no stop, nan lo ser mandá na camponan di concentracion. Cincu funcionario policial aleman a bini Betel i a confiscá hopi dje propiedadnan di Sociedad Watch Tower. Nan a bai cu e famia di Betel i a interogá nan, pero ningun di nos a ser encarcelá. Finalmente, dia 21 di juni, 1941, e edificio di Sociedad, Inkognitogaten 28 B, a ser confiscá, i nos trabou di predicá a ser prohibí. Mi a muda bek pa Kopervik i a haña trabou seglar pa sostené mi mes.

N’e tempu ei, Tata tabata traha como pionero. Un dia agentenan Nazi a bini i a listra cas di Tata. Nan a bai cu tur su literatura, incluyendo su Bijbelnan i concordancianan di Bijbel. Durante e periodo aki nos a ricibí solamente un suministro scars di alimento spiritual. Pa keda spiritualmente fuerte, nos tabata studia bukinan bieu manera e buki Government, bes tras bes i nos a sigui predicá.

Lamentablemente, den hopi lugá e rumannan tabata dividí. Algun tabata di opinion cu nos mester a predicá abiertamente i bai di cas pa cas, miéntras otronan a haña cu nos mester a traha mas den secreto, haciendo contacto cu hende den otro maneranan. Di manera cu rumannan prominente, cu ántes tabata cooperá masha bon cu otro i cu nos a stima asina tantu, no tabata papia cu otro. E division entre nan a causá mi mas dolor di curason cu cualkier otro situacion den mi bida como Testigo.

Actividad Renobá Despues dje Guera

Despues dje guera, den e zomer di 1945, Ruman Dey a bishitá Norwega i a tene reunionnan na Oslo, Skien i Bergen. El a apelá n’e rumannan pa dera e hacha i a pidi tur cu a deseá esei pa lanta para. Henter e auditorio a lanta para! E disputa a ser resolvé permanentemente na december 1945, despues di un bishita di Nathan H. Knorr, e tempu ei presidente di Sociedad Watch Tower.

Miéntras tantu, dia 17 di juli, 1945, mi a ricibí un telegram di parti dje sirbidó di sucursal, Ruman Enok Öman, bisando: ‘Ki dia bo por bolbe bin Betel?’ Algun Testigo a bisa cu mi mester a keda cas i cuida mi tata, kende e tempu ei tabatin mas cu 70 aña. Pero Tata a animá mi pa reanudá sirbishi di Betel, loke mi a haci. Na 1946, Marvin F. Anderson, un ruman cu a bini di Merca, a bira nos superintendente di sucursal, i e trabou di predicá a ser reorganisá.

Durante vakansinan di zomer mi tabata regresá Kopervik pa mira mi famia. Mi dos ruman hombernan i dos ruman muhernan no a bira Testigo, pero semper nan tabata amabel cu mi i cu Tata. Un di mi ruman hombernan a bira capitan di haf i hefe di loods, i e otro tabata maestro di scol. Aunke mi tabatin poco recurso material, Tata tabata bisa nan: “Ottilie ta mas ricu cu boso.” I esei tabata berdad! Loke nan a adkerí no por a compará cu e rikesanan spiritual cu ami tabatin! Tata a muri cu 78 aña na 1951. Mama a fayecé na 1928.

Un punto sobresaliente den mi bida tabata di asistí n’e congreso internacional dje pueblo di Jehova na New York City na 1953. E aña ei e campo mundial a pasa e marca di 500.000 publicadó, i mas cu 165.000 a asistí n’e congreso! Promé cu e congreso di 1953, mi a traha un siman largu na Brooklyn Betel, e sede mundial dje organisacion di Jehova riba tera.

Haciendo Loke Mi Por

Den añanan recien mi bista a bai atras debí na catarata. Cu un bril diki i un lup, ainda mi por lesa letter grandi un poco. I ruman muhernan cristian ta bishitá mi i ta lesa dos bes pa siman pa mi, pa cua mi ta masha gradicidu.

Mi actividad di predicá tambe ta limitá. Durante zomer, de bes en cuando ruman muhernan cristian sa hibá mi den mi rolstoel un lugá caminda mi por predicá un tiki. Tambe mi ta manda revista i foyeto regularmente cu post pa scolnan na Kopervik, manera e scol básico caminda mi tabata un alumno casi 100 aña pasá. Mi ta contentu cu ainda ta posibel pa mi ta un publicadó regular.

Afortunadamente e comedor i e Salon di Reino ta riba e mésun piso cu mi cuarto na Betel, cu desde 1983 ta situá na Ytre Enebakk pafó di Oslo. Di manera cu mi por asistí n’e adoracion di mainta, e cumindanan i nos reunionnan cu yudansa di un looprek. I mi ta contentu cu ainda mi por bai congreso i asambleanan. Mi ta gusta topa rumannan cu mi conocé pa hopi aña, i tambe rumannan nobo i hopi mucha dushi.

Manteniendo Fe te na Fin

Ta un bendicion pa ta rondoná pa hendenan spiritual activo i simpático aki na Betel. Ora mi a cuminsá mi sirbishi di Betel, henter e famia tabata consistí di personanan cu tabatin e speransa celestial. (Filipensenan 3:14) Awor tur ruman na Betel cu excepcion di mi ta spera di biba pa semper riba tera.

Berdad, nos a spera cu Jehova lo a tuma accion mas promé. Sin embargo, mi ta alegrá ora mi mira e multitud grandi bira mas i mas grandi. Mi a mira hopi aumento! Ora mi a cuminsá participá den e ministerio, tabatin rond di 5.000 publicadó rond mundu. Awor tin mas cu 5.400.000! En berdad, mi a mira “e chikitu . . . bira mil, i esun menor un nacion poderoso.” (Isaías 60:22) Nos tin cu keda den expectativa di Jehova, manera profeta Habacuc a skirbi: “Asta si e tarda, keda den expectativa di dje; pasobra lo e ser realisá sin falta.”—Habacuc 2:3.