Recompensanan Ricu pa Sirbishi Sagrado

Manera Harry Bloor A Relat’é

Rond di shen aña pasá, mi tawela tabata un miembro ferviente dje Iglesia Metodista. Tambe e tabata un pastor laico respetá, kende a duna generosamente pa sostené hopi kapel den Stoke-on-Trent, e área di industria di cerámica di Inglatera. Anto el a hañ’é den pertá financiero. Pa yuda Tawela, mi tata a haci areglo p’e manehá un tienda chikitu den e pueblito. E tienda tabatin permit pa bende cerbes, i ora e metodistanan a haña sa esaki, nan a excomunicá Tawela mesora.

TATA tabata furioso i a hura cu nunca mas lo e tin nada di haci cu religion—i el a cumpli cu su palabra. Promé e tabata polis, pero despues el a bira doño di un bar. Pues mi a lanta meimei dje holó di alcohol i tabaco dje lugá ei. Religion no a hunga ningun papel den mi bida, pero sí mi a bira experto den hunga mayoria ‘bordspel’! Sin embargo, debí na Tawela su influencia riba mi for di chikitu, mi a keda cu basta respet pa Bijbel, aunke mi tabata sa poco di dje.

Mi A Siña Berdad di Bijbel

Na 1923, ora mi tabatin 24 aña, mi a muda bai oost, na Nottingham i a cuminsá namorá Mary, kende a biba un 40 kilometer leu den e pueblito Whetstone, zuidwest di Leicester. Su tata, Arthur Rest, tabata ántes e organista n’e kapel local, pero awor e tabata un ferviente Studiante di Bijbel, manera Testigonan di Jehova tabata yama e tempu ei. Semper Arthur tabata papia cu mi tocante su religion nobo—cu poco éxito. Sin embargo, mi interes a lanta ora mi a compañ’é bai n’e kapel local di bautista riba diadomingo atardi, 13 di juli, 1924, pa tende un discurso di un parlamentario cu tabata un bautista prominente. Su tema: “E Siñansanan di Pastor Russell Investigá den Lus dje Scritura,” a intrigá mi. Ainda mi tin e notanan cu mi a skirbi e dia ei.

E bautistanan a rechasá un peticion dje Studiantenan di Bijbel pa contestá e atakenan contra nan creencianan. Mi a rabia mashá pa esaki i a dicidí di busca un otro lugá pa tene un reunion asina. Un mangasina ei cerca a resultá di ta ideal. Nos a barié, kita e casnan di araña, a pusha tur e mashinnan di bienta un banda, anto nos tabata cla prepará. Nos e colectá 70 stul, i nos a druk pamfletanan.

Ora Frank Freer a yega for di Leicester pa duna e discurso, tur stul tabata yen, i un 70 persona mas a keda pará! Mi a gusta Frank su razonamentu cla for dje Scritura, i hopi otro hende presente tambe a gusta esei. Desde e tempu ei padilanti, e congregacion chikitu di Studiantenan di Bijbel na Blaby cerca di Leicester a expandé rápidamente. Esei tabata tambe un punto crucial den mi bida—i tambe den bida di Mary. Na 1925 nos tur dos a haci nos dedicacion na Jehova, a bautisá i casa.

Bendicionnan Spiritual

E siguiente aña, mi a ser nombrá director di sirbishi dje Congregacion Blaby. Ami cu mi esposa kier a sigui den e pasonan dje colporteurnan i bira evangelisadónan di tempu completo, pero pronto a bira bisto cu Mary su salú lo no a permitié mantené un programa asina vigoroso. Aunke el a sufri di kebranto di salú te na su morto na 1987, e tabata un excelente compañera i un minister cu tabata ábil den testificá informalmente i cuminsá studionan di Bijbel. Mayoria di nos anochinan nos a pasa sea na reunion of compartiendo berdad bíblico cu nos próhimo.

Mi tabata ingeniero i a traha cu un empresa cu a producí mashinnan pa fábrica cu ta zag palu. Mi trabou a enbolbé hopi biahamentu rond Gran Bretania, i tambe na Francia, i generalmente Mary a compañá mi. E biahenan aki a duna nos chens di testificá extensamente.

Fundeshinan pa Expansion

Na 1925 nos a construí un bunita edificio pa tene nos reunionnan na Blaby, i for di einan nos a organisá un programa eficas pa testificacion. Tur diadomingo mainta, nos a huur un bus cu a hiba nos na pueblo i pueblitonan plamá tur rond. Na vários punto cantu di caminda nos tabata baha publicadónan pa predicá, anto tabata recogé nan riba e caminda di regreso. Durante e lunanan calor di zomer, nos tabatin studio di Bijbel diadomingo atardi lat, usando un edicion recien di E Toren di Vigilancia. Despues di esei, ocho’or, nos tabata topa n’e plasa di Leicester pa un discurso público na aire liber. Un anochi 200 hende a scucha. E actividad aki a pone e fundeshi pa hopi congregacion cu ta existí awor den Leicester i su alrededor.

Na 1926 a tene un congreso trasedental na dos lugá pareu den Londen, Alexandra Palace i Royal Albert Hall. N’e ocasion ei Joseph F. Rutherford, e tempu ei presidente dje Sociedad Watchtower, a presentá e buki nobo Deliverance (Liberacion). E siguiente dia un korant principal a imprimí e resolucion “Un Testimonio na e Gobernantenan di Mundu” i Ruman Rutherford su poderoso discurso público “Di Con Potencianan Mundial Ta Tambaleando—E Solucion” den su totalidad. Mas cu 10.000 hende a tende e discurso público i despues a parti 50.000.000 ehemplar dje resolucion mundialmente. E congreso ei a sirbi pa acelerá e trabou di predicá na Gran Bretania.

Congreso Grandi Durante Tempu di Guera

E segundo guera mundial a cuminsá na september 1939 i pa 1941 tabata den su culminacion. Avionnan bombardero aleman tabata pasa di dia i anochi, i tabatin un blackout nacional na vigor. Cuminda tabata scars, i loke tabatin disponibel tabata estrictamente racioná. Transporte tabata masha limitá, asta cu trein. Apesar dje obstáculonan aparentemente insuperabel aki, nos a tene un congreso nacional di cincu dia, di 3 pa 7 di september, 1941.

A scoge Leicester su De Montfort Hall como e lugá di congreso debí cu Leicester tabata meimei di Inglatera. Como cu mi tabata den e negoshi di palu, mi por a yuda cu e construccion di borchinan di propaganda. Tambe mi a areglá transportacion local pa e delegadonan di congreso. Dor di cumpra karchi di antemano i paga mas cu e prijs normal, nos a pone e tramnan di Leicester core asta riba diadomingo.

Debí cu tabatin restriccionnan riba biahamentu, nos a spera cu kisas 3.000 Testigo lo por a bini. Imaginá e emocion ora mas cu 10.000 delegado a bisa cu nan lo bai t’ei! Pero unda nan lo a hospedá? Ciudadanonan di Leicester tabata asina amabel di invitá hopi ruman pa keda den nan cas. Ademas, rond di mil a ser acomodá den tentnan armá riba un veld cu tabata 3 kilometer for dje lugá di congreso. Campamentu Gídeon, manera nos a yam’é, a causa bastante conmocion den e comunidad.

A huur tentnan grandi blancu pa usa p’e departamentonan di congreso i pa acomodá e enorme multitud extra cu a bini. Ora cu a nota cu den lus briyante di luna, e tentnan aki lo por a sirbi como blanco p’e avionnan bombardero nazi, nan a ser camuflá purá. E guera, i specialmente e echo cu Testigonan no a participá den dje, tabata un asuntu cu tur hende tabata preocupá cuné. Tabatin cientos di Testigo e tempu ei den prizon pa motibu di nan posicion neutral basá riba Bijbel.—Isaías 2:4; Juan 17:16

The Leicester Mercury, di 7 di september, 1941, a informá: “Ta un cos asombroso pa haña 10.000 hende, mayoria hende hóben, pasando un siman ta papia tocante religion sin mencioná e guera, si no ta como un cuestion incidental.

Mi a puntra si e Testigonan tabatin miembronan na Alemania. Nan a bisá mi cu sí, i cu casi nan tur, rond di 6.000, tabata den camponan di concentracion.”

E reportero a agregá: “Ai sí, ta cierto cu e nazinan ta e enemigu, pero e Testigonan no ta haci mashá pa combatí nan, cu excepcion di bende tratado i scucha discurso.”

Generalmente comentarionan tocante nos den korant tabata negativo, i opositornan asta a usa violencia den intentonan sin éxito pa stroba nos congreso. Tog Daily Mail di Londen sí a admití, cu un poco mala gana: “E organisacion a cana suave, discreto i eficiente.”

Nan a acusá nos di ta responsabel p’e scarcedad di sigaria den e stad. Pero The Daily Mail a splica: “Ni Leicester ni e Controladó di Tabaco por keha cu Testigonan ta gastando e sigarianan di Leicester. Nan no ta huma.” Tambe, a core cu kehonan cu habitantenan local a ser privá di cuminda pa via dje Testigonan ora cu korantnan a splica cu e Testigonan a trece mayoria di nan mes racion di cuminda. De echo, na fin dje congreso, a haci un donacion di 1,8 kilo di pan n’e Hospital Real di Leicester—un contribucion considerabel den e tempu ei di scarcedad di cuminda.

E congreso a percurá un gran estímulo spiritual p’e rond di 11.000 Testigonan na Gran Bretania. Nan a keda emocioná cu rond di 12.000 hende tabata presente! Delegadonan, na un cantidad sin precedente, a participá gososamente den testificacion riba caya na Leicester i nan a bishitá e pueblitonan pafó di stad cu presentacionnan riba tocadisco.

E discursonan principal dje congreso tabata grabacionnan hací e luna anterior di discursonan presentá na e congreso di cincu dia cu Testigonan di Jehova a tene na St. Louis, Missouri, Merca. E grabacion di Ruman Rutherford su discurso “Yunan dje Rey” tabata un punto sobresaliente dje congreso. Como cu no tabata posibel pa importá ehemplarnan dje buki Children (Yunan) cu a ser presentá na St. Louis, un edicion special cu kaft moli a ser producí na Gran Bretania. Un ehemplar di dje a ser mandá pa tur mucha cu a asistí n’e congreso.

Leicester Su Reunion Anual Unico

Despues di guera e aumento di proclamadónan di Reino na Gran Bretania tabata maraviyoso! Pa cuminsamentu di añanan ’80, e cantidad di congregacion na Leicester a subi te na dies. Anto nos a ser informá cu e Cuerpo Gobernante di Testigonan di Jehova a dicidí di tene e reunion anual di 1983 di Watch Tower Bible and Tract Society na Leicester. Como superintendente di ciudad di Leicester, pronto mi tabata enbolbí den e preparacionnan, incluyendo huurmentu di De Montfort Hall atrobe.

P’e ocasion ei diestres miembro dje Cuerpo Gobernante a bini for dje sede di Sociedad na Brooklyn. Un total di 3.671 delegado—e biaha aki for di tur parti mundu, i mayoria di nan Testigonan di hopi tempu—a yena e auditorio. Un 1.500 persona mas a tende e programa den un Salon di Asamblea den becindario.

Albert D. Schroeder, cu ántes tabata na cabes dje oficina di sucursal di Sociedad Watch Tower durante nos congreso na Leicester den tempu di guera, a presidí e reunion anual aki. Mirando bek n’e congreso di 1941, Ruman Schroeder a puntra: “Cuantu di boso aki awe tabata presente e tempu ei?” Mas cu mitar dje auditorio a hisa man. “Wel! Ki un reencuentro pa boso tur, rumannan fiel i leal!” el a sclama. En berdad esei tabata un experencia inolvidabel.

Cu mi 98 aña di edad, ainda mi ta sirbi como secretario den nos congregacion i ta sigui duna discursonan público, maske awor mi ta hacié sintá. Despues cu Mary a muri na 1987, mi a casa cu Bettina, un biuda cu ami cu Mary tabata conocé pa hopi aña. Mi ta gradicidu di ta ser cuidá asina bon, tantu físicamente como spiritualmente. Apesar dje restriccionnan imponé dor di Mary su salú i awor dor di mi propio behes, mi a descubrí cu teniendo hopi di haci den sirbishi sagrado semper a duna recompensanan ricu.—1 Corintionan 15:58.

[Plachi na página 26]

Cla pa participá den e ministerio den añanan ’20

[Plachi na página 26]

Esenanan for dje congreso di Leicester