Ta Elogio of Labiamentu?

UN HENDE ta bisá bo: “Bo estilo nobo di cabei a kedá bo bunita!” Ta elogio of labiamentu? “E flus ei a pará bo nechi!” Elogio of labiamentu? “Esaki ta e cuminda di mas dushi cu mi a yega di purba!” Ta elogio of labiamentu? Ora nos ricibí complimentnan asina, nos por puntra nos mes si nan ta realmente sincero i berdadero of si nan intencion ta djis pa plis nos sin cu esun cu a papi’é ta ègt men e.

Con nos por sa si loke un persona bisa nos ta berdadero elogio of labiamentu? E ta importá? Nos no por aceptá numa loke e persona bisa sin busca drechi kico tin su tras i disfrutá dje placer cu e ta duna nos? Kico di ora nos ta duna elogio na otronan? Nos a yega di examiná nos motibunan? Pensa riba e preguntanan aki por yuda nos dicerní i usa nos lenga den un manera cu ta trece alabansa na Jehova Dios.

Definicion di Elogio i Labiamentu

Webster’s Dictionary ta definí elogio como un expresion di aprobacion of encomendacion, i e palabra por denotá tambe adoracion of dunamentu di gloria. Ta claro cu e último dos nificacionnan ta referí solamente na elogio, of alabansa, cu ta ser dirigí na Jehova Dios. Esaki ta un parti integral di adoracion berdadero, manera e salmista inspirá ta exhortá: “Pasobra esei ta bon . . . , esei ta agradabel—alabansa ta apropiado.” “Tur cos cu ta hala rosea—alabá Jah.”—Salmo 147:1; Salmo 150:6.

Sin embargo, esaki no ta nificá cu no por duna elogio na hende. E por ser duná, den e sentido di encomendacion, aprobacion of un opinion faborabel. Den un comparacion cu Jesus a duna, un shon ta bisa su criá: “Bon hací, esclabo bon i fiel!”—Mateo 25:21.

Di otro banda, labiamentu ta ser definí como elogio falsu, insincero of excesivo, caminda e labiadó generalmente ta motivá pa interes egoista. Encomendacion mañoso of labiamentu ta ser duná pa haña fabor of beneficio material for di un otro of pa crea un sintimentu di obligacion pa cu e labiadó. Pues labiadónan ta ser motivá pa egoismo. Segun Hudas 16, nan ta “cla pa labia otro hende ora nan mira algun bentaha den dje.”—The Jerusalem Bible.

E Punto di Bista Bíblico

Kico ta e punto di bista bíblico di elogiá otro hende? Jehova ta establecé un patronchi pa nos sigui al respecto. Bijbel ta bisa nos cu nos lo ser elogiá, of alabá, si nos haci e boluntad di Jehova. Apostel Pablo ta bisa cu “cada un su alabansa lo bini na dje for di Dios.” Pedro ta bisa nos cu e calidad probá di nos fe ‘por ser hañá un causa pa alabansa.’ Pues e echo cu Jehova lo elogiá hende ta mustra nos cu dunamentu di berdadero elogio ta un acto bondadoso, amoroso i beneficioso, unu cu nos no mester pasa por haltu.—1 Corintionan 4:5; 1 Pedro 1:7.

Un otro fuente for di cua elogio por bini pa nos, segun Bijbel, ta autoridadnan gubernamental cu ta observá nos bon conducta i ta encomendá nos onestamente. Bijbel ta bisa nos: “Sigui haci bon, i lo bo haña alabansa for di dje.” (Romanonan 13:3) Tambe nos por ricibí elogio for di hende cu sinceramente ta men loke nan ta bisa i cu no tin motibu scondí pa elogiá nos. E Scritura inspirá ta bisa na Proverbionan 27:2: “Laga un hende straño, i no bo mes boca, alabá bo.” Esaki ta indicá cu nos por aceptá elogio for di hende.

Esaki no ta e caso cu duna of ricibí encomendacion fingí. Pakico labiamentu ta desagradá Jehova asina tantu? Na promé lugá, e ta insincero, i Jehova ta condená insinceridad. (Compará cu Proverbionan 23:6, 7.) Ademas, e no ta onesto. Describiendo hende cu ta merecé Dios su desaprobacion, e salmista ta bisa: “Tur loke nan ta haci ta gaña otro, lipnan labioso, papiamentu for di un curason dòbel. Laga Yahweh corta tur lip labioso.”—Salmo 12:2, 3, JB.

Riba tur cos, labiamentu ta un falta di amor. E ta ser motivá pa egoismo. Despues di a papia dje labiadónan, salmista David ta cita nan bisando: “Cu nos lenga nos lo prevalecé. Nos lipnan ta cu nos. Ken lo ta doño riba nos?” Jehova ta describí hende egoista asina como ‘sakeadónan di esnan afligí.’ Nan a usa nan lenga labioso, no pa edificá otronan, sino pa sakea nan i afligí nan.—Salmo 12:4, 5.

Labiamentu—Un Trampa

“Un homber físicamente capacitá cu ta labia su compañero simplemente ta span un net pa su pasonan.” Asina sabí Rey Sálomon ta bisa, i ki cierto esei ta! (Proverbionan 29:5) E fariseonan a purba pone un trampa pa Jesus cu labiamentu. Nan a bisa: “Maestro, nos sa cu bo ta papia e berdad i ta siña e caminda di Dios den berdad, i cu ningun hende ta importá bo, pasobra bo no ta wak aparencia exterior di hende.” Cuantu esei a parce di suavisá nan posicion crítico di Jesus! Pero Jesus no a bai tras di nan palabranan dushi. E tabata sa cu nan no a kere su siñansanan verídico sino solamente tabata purba cog’é den trampa ora el a papia riba e asuntu di paga belasting na César.—Mateo 22:15-22.

Rey Herodes di promé siglo tabata un contraste skerpi cu Jesus. Ora el a duna un discurso público den e pueblo di Cesarea, e hendenan a respondé: “E bos di un dios, i no di hende!” En bes di reprendé e hendenan pa un elogio falsu i ofensivo asina, Herodes a aceptá e labiamentu. E angel di Jehova a trece castigu instantáneo, i Herodes a ser heridá cu un plaga di bichi cu a hiba na su morto.—Echonan 12:21-23.

Un cristian maduro lo ta alerto pa reconocé labiamentu pa loke e ta. Ancianonan di congregacion mester ta particularmente cauteloso ora un persona enbolbí den un caso hudicial, ta expresá abiertamente su admiracion pa un anciano, tal bes asta te n’e punto di compará un anciano cu un otro i bisa cuantu mas bondadoso i comprensivo esun cu e ta papia cuné ta.

Bijbel ta mustra claramente un otro trampa cu labiamentu por presentá ora e ta describí con un yoncuman ta ser tentá pa cometé inmoralidad, seducí pa un hende muher. (Proverbionan 7:5, 21) E spiertamentu aki ta pas pa e situacion djawe. Entre esnan cu ta ser expulsá for dje congregacion cristian tur aña, hopi ta ser sacá debí na conducta inmoral. Un caida asina den picá grave por a cuminsá cu labiamentu? Siendo cu hende ta asina deseoso pa haña compliment i pa otronan papia bon di nan, palabranan dushi for di lipnan labioso por baha un cristian su resistencia contra conducta inapropiado. Ora hende no ta protehá nan mes contra esei, e por hiba na consecuencianan serio.

Proteccion Contra Labiamentu

Labiamentu ta gratificá amor propio of banidad di esun cu ta ser labiá. E tin tendencia di duna un persona un punto di bista halsá di su mes, lagu’é sintié superior na otronan den un of otro manera. E filósofo François de La Rochefoucauld a compará labiamentu cu placa falsu, “cu, si no tabata pa banidad, lo e no tabatin circulacion.” Pues, e manera pa protehá bo mes ta di haci caso dje spiertamentu práctico di apostel Pablo: “Mi ta bisa cada un cu ta ei den boso pa no pensa mas di su mes cu ta necesario pa pensa; sino pensa p’e por tin sano huicio, cada un segun cu Dios a distribuí na dje un midí di fe.”—Romanonan 12:3.

Aunke nos inclinacion natural ta di kier tende loke ta agradabel pa nos oreanan, loke nos realmente tin mester mayoria biaha ta conseho i disiplina basá riba Bijbel. (Proverbionan 16:25) Rey Acab kier a tende solamente loke a agrad’é; su criánan asta a pidi profeta Micaya pa laga su palabra bira “manera e palabra di un di nan [Acab su profetanan labioso], i bo tin cu papia loke ta bon.” (1 Reynan 22:13) Si Acab tabata dispuesto pa scucha na papiá franco i cambia su camindanan rebelde, e por a prevení Israel su derotanan teribel den bataya i tambe su propio morto. Pa nos mes bienestar spiritual, nos mester ta lihé pa respondé na conseho firme i tog amoroso di ancianonan cristian nombrá, cu kier yuda nos keda riba e bon caminda dje berdad, en bes di busca hende cu tur ora ta bisa nos con maraviyoso nos ta, kishikiendo nos oreanan cu papiamentu labioso!—Compará cu 2 Timoteo 4:3.

Hamas cristiannan lo kier, pa cualkier motibu, recurí na labiamentu. Manera fiel Elihú, cu determinacion nan ta pidi den oracion: “Lagá mi no ta parcial pa cu ningun hende, ni labia ningun hende; pasobra mi no sa con pa labia, di otro manera mi Hacidor lo kitá mi mesora.” Anto, manera Pablo, nan lo por bisa: “Nos no a presentá na ningun ocasion cu palabra labioso . . . ni cu aparencia fingí pa cudishi.”—Job 32:21, 22, An American Translation; 1 Tesalonicensenan 2:5, 6.

Elogio ora Esei Ta Merecí

E proverbio inspirá ta mustra cu elogio por fungi manera un cos di midi puresa di oro i plata, bisando: “E wea pa dirti cos ta pa plata i pochi pa dirti cos pa oro, pero alabansa ta e prueba di caracter.” (Proverbionan 27:21, The New English Bible) Sí, elogio por fomentá sintimentunan di superioridad of orguyo, cu por pone un persona cai. Di otro banda, e por revelá su modestia i humildad si e reconocé cu e debe Jehova pa cualkier cos cu el a haci cu a trece elogio p’e.

Elogio sincero pa conducta of logronan digno di mérito ta edificá tantu esun cu ta dun’é como esun cu ta ricibié. E ta contribuí na aprecio caluroso i saludabel pa otro. E ta animá otronan pa haci esfuerso pa alcansá metanan digno di alabansa. Ora nos ta elogiá hóbennan cu ta merecé esei, nan por haña e ánimo pa traha mas duru. Lo e por yuda nan moldea nan personalidad segun cu nan ta haci esfuerso pa biba segun e normanan cu ta ser sperá di nan.

P’esei, laga nos evitá labiamentu—sea pa dun’é of ricibié. Laga nos ta humilde ora nos ta aceptá elogio. I laga nos ta generoso i di henter alma den duna alabansa i elogio—regularmente na Jehova den nos adoracion i sinceramente na otronan den e forma di encomendacion saludabel i aprecio, cordando cu “un palabra na su tempu apropiado, O ki bon e ta!”—Proverbionan 15:23.