Iglesianan Ta Confesá

“Papa Ta Hiba Iglesia Dilanti.” “Inkisicion i Antisemitismo —Iglesia Ta Preparando Su Mea Culpa.”a “Mea Culpa p’e Holocausto.” “Metodistanan Ta Pidi Despensa n’e Indjannan di West.”

BO A yega di lesa titularnan manera esakinan? Aparentemente, cu mas i mas frecuencia iglesianan ta aceptando culpa i ta pidiendo despensa pa loke nan a haci atrabes di siglonan. Medionan di comunicacion ta resaltando constantemente mea culpanan nobo di parti di papa.

Ora Papa Ta Pidi Pordon

Segun comentarista vaticano Luigi Accattoli den su buki Quando il papa chiede perdono (Ora Papa Ta Pidi Pordon), di 1980 pa 1996, Juan Pablo II ‘a reconocé e fayonan histórico di Iglesia of a pidi pordon’ na por lo ménos 94 ocasion. “Den Iglesia Católico, solamente papa tin mag di expresá un mea culpa,” segun Accattoli. I en berdad el a haci esaki, refiriendo n’e páginanan mas controversial di historia católico—crusadanan, gueranan, apoyo na dictaduranan, division den misanan, antisemitismo, Inkisicionnan, Mafia i racismo. Den un memorandum cu Juan Pablo II a manda na 1994 p’e cardinalnan (cu algun ta considerá e documento mas importante dje pontífice), el a proponé “un confesion general di picánan cometí durante e milenio.”

Vários prelado a sigui e ehempel di papa. Na december 1994 e korant italiano Il Giornale a informá: “Hopi obispu mericano a presentá na television i a pidi pordon públicamente.” Pa kico asina? Pa motibu cu nan a subestimá e problema di pastornan pedofil, perhudicando asina hopi víctima yong. Na januari 1995 e korant La Repubblica a informá di “un gesto sin precedente den historia di catolicismo contemporáneo”: a trata Papa Pio XII su silencio en coneccion cu e Holocausto. Na januari 1995, e mésun korant a informá cu e obispado aleman a pidi pordon pa e “hopi fayonan” di católiconan romano cu a apoyá crímennan dje nazinan. Vários iglesia protestant tambe a mustra riba nan mes erornan.

Pakico Pidi Pordon?

Bijbel ta animá nos pa pidi pordon ora nos faya, i hopi hende ta aplaudí e iglesianan ora nan ta mustra riba nan mes erornan. (Santiago 5:16) Pero pakico iglesianan ta haciendo esaki? Ki efecto e mester tin riba e manera cu nos ta mira nan?

[Nota]