Gradicidu pa un Herencia Cristian Solido

MANERA GWEN GOOCH A RELAT’E

Na scol mi tabata canta un alabansa cu e palabranan, ‘e Gran Jehova entronisá den su gloria.’ Hopi biaha mi a puntra mi mes: ‘Ken e Jehova aki ta?’

MI WELONAN tabata hende temeroso di Dios. Na cuminsamentu dje siglo aki, nan tabata asociá cu e Studiantenan di Bijbel, manera Testigonan di Jehova tabata yama e tempu ei. Mi tata tabata un comerciante exitoso pero, na promé instante, e no a pasa over na su tres yunan e herencia cristian cu el a haña.

Tabata te ora mi Tata a duna mi ruman homber, Douglas, mi ruman muher, Anne, i ami e foyetonan titulá His Works (Su Obranan) i Who Is God? (Ken Ta Dios?) cu mi a haña sa cu Jehova ta nomber dje Dios berdadero. (Salmo 83:18) Mi a keda conmoví! Pero kico a bolbe lanta Tata su interes?

Na 1938, ora Tata a mira e nacionnan cla prepará pa bai guera, el a realisá cu esfuersonan humano so no por a remediá problemanan di mundu. Wela a dun’é e buki Enemies (Enemigunan), cu Testigonan di Jehova a publicá. Dor di les’é, el a haña sa cu e berdadero enemigu di humanidad ta Satanas e Diabel i cu ta e Reino di Dios so por trece pas mundial.a—Daniel 2:44; 2 Corintionan 4:4.

Guera tabata acercando i nos famia a cuminsá asistí na reunionnan n’e Salon di Reino di Testigonan di Jehova na Wood Green, Nort di Londen. Na juni 1939 nos a bai na Alexandra Palace ei cerca pa tende e discurso público, “Gobiernu i Pas,” cu Joseph F. Rutherford, e tempu ei presidente di Sociedad Watch Tower, a duna. E discurso di Rutherford na Madison Square Garden di New York City a ser transmití via radio pa Londen i otro stadnan principal. Nos por a tende e discurso asina cla cu ora un multitud bochinchero na New York a causa un disturbio, mi a wak rond pa mira si esei tabata sosodiendo den nos auditorio!

Tata Su Celo p’e Berdad Bíblico

Tata a para riba pa tur diasabra anochi henter nos famia participá huntu den un studio di Bijbel. Nos studio a enfocá riba e tema bíblico den E Toren di Vigilancia programá pa considerá e dia siguiente. Cu te n’e dia djawe e relato tocante Hosué i e atake riba e stad di Ai cu a ser considerá den E Toren di Vigilancia di 1 di mei, 1939, ainda ta frescu den mi mente, ta ilustrá e impacto cu e studionan aki tabatin. E relato ei a intrigá mi asina tantu cu mi a lesa tur e textonan mencioná den mi mes Bijbel. Mi a haña e investigacion ei fasinante—i te ainda mi ta hañ’é asina.

Compartiendo cu otro loke nos a siña a inculcá siñansanan bíblico den mi curason. Un dia Tata a duná mi un tocadisco cu un sermon di Bijbel grabá, un foyeto cu nos tabata usa pa studia Bijbel, i e adres di un señora di edad. Anto el a pidí mi pa bishit’é.

“Kico mi tin cu bisa, i kico mi mester haci?” mi a puntra.

“Bo tin tur cos ei,” Tata a contestá. “Djis toca e disco, lesa e preguntanan, laga e doño di cas lesa e contestanan i despues lesa e textonan.”

Mi a haci manera el a bisá mi, i den e manera aki mi a siña conducí un studio di Bijbel. Dor di usa e Scritura asina den mi ministerio, mi a bin comprend’é mihó.

Desafio di Añanan di Guera

Guera Mundial II a estayá na 1939, i e siguiente aña mi a ser bautisá como símbolo di mi dedicacion pa sirbi Jehova. Mi tabatin 13 aña so. E ora ei mi a dicidí di bira pionero, manera ministernan di tempu completo ta ser yamá. Mi a bandoná scol na 1941 i n’e congreso di Leicester mi a djoin Douglas den e actividad di predicá tempu completo.

E siguiente aña, nan a encarcelá Tata debí na su obhecion contra guera pa motibu di concenshi. Nos, e muchanan, a uni forsa pa yuda nos mama, yudand’e cuida nos cas den e tempu di guera difícil ei. Anto, direct despues cu nan a libra Tata for di prizon, nan a yama Douglas pa servicio militar. Un korant local tabatin como titular: “Pakico Yu Mescos cu Tata A Scoge Prizon.” Esei a resultá den un bon testimonio, ya cu el a duna oportunidad pa splica pakico cristiannan no ta participá den mata nan próhimo.—Juan 13:35; 1 Juan 3:10-12.

Durante e añanan di guera ei, hopi Testigo den e ministerio di tempu completo tabata bishitá nos cas regularmente, i nan combersacionnan edificante basá riba Bijbel a laga un impresion duradero atras. Entre e rumannan cristian fiel aki tabatin John Barr i Albert Schroeder, kendenan awor ta miembro dje Cuerpo Gobernante di Testigonan di Jehova. Mi mayornan tabata berdaderamente hospitalario, i nan a siña nos pa ta mescos.—Hebreonan 13:2.

Cla pa Duna un Contesta

Pronto despues cu mi a cuminsá traha pionero, mi a topa Hilda den e ministerio di cas-pa-cas. El a bisa rabiá: “Mi casá ta bringando den guera pa hendenan manera boso! Pakico boso no ta haci algu p’e causa dje guera?”

“Cuantu bo sa di loke mi ta haciendo?” mi a puntr’é. “Bo sa pakico mi a bin cerca bo?”

“Wel,” el a contestá, “mihó bo drenta i contá mi.”

Mi por a splik’é cu nos tabata dunando berdadero speransa na hende cu tabata sufri pa motibu dje echonan horibel cu hende tabata haci—hopi bes den nomber di Dios. Hilda a scucha cu aprecio, i el a bira mi promé studiante regular di Bijbel. E ta un Testigo activo awor pa mas cu 55 aña caba.

Na fin dje guera, mi a ricibí un otro asignacion di pionero na Dorchester, un pueblo den zuidwest di Inglatera. Esaki tabata e promé biaha cu mi a biba leu for di cas. Nos congregacion chikitu tabata reuní den un restaurant, un edificio di siglo 16 cu yama “The Old Tea House.” Nos tabatin cu drecha e mesa i stulnan pa cada un di nos reunionnan. E tabata masha diferente for dje Salon di Reino cu mi tabatin custumber di bai. No obstante, tabatin e mésun alimento spiritual i asociacion amoroso di rumannan cristian.

Miéntras tantu mi mayornan a muda pa Tunbridge Wells, sur di Londen. Mi a regresá cas pa asina ami cu Tata i Anne por a traha pionero huntu. Pronto nos congregacion a crece for di 12 pa 70 Testigo, p’esei nan a pidi nos famia muda pa Brighton n’e costa sur, unda e necesidad pa proclamadónan di Reino tabata mas grandi. Hopi ruman a djoin nos famia pionero celosamente den e trabou di predicá, i nos a mira Jehova bendicioná nos trabou ricamente. Pronto e único congregacion a bira tres!

Un Invitacion Inesperá

Den e zomer di 1950, nos famia tabata entre e 850 delegadonan for di Gran Bretania cu a asistí n’e Asamblea Internacional Aumento di Teocracia den Yankee Stadium di New York City. Hopi pionero cu lo a bini n’e congreso ei for di otro paisnan a ricibí un aplicacion pa asistí n’e Scol Bíblico di Galad di Watchtower, situá cerca di South Lansing, New York. Ami cu Douglas i Anne tabata entre nan! Mi ta corda cu ora mi a tira e aplicacion yená den post, mi a pensa: ‘Awor aki sí ta definitivo! Ki rumbo mi bida lo coge?’ Pero mi determinacion tabata: “Ata mi aki! Mandá mi.” (Isaías 6:8) Mi a keda emocioná ora mi a ricibí un invitacion pa keda despues dje congreso pa asistí n’e di 16 klas di Galad, huntu cu Douglas i Anne. Nos tur tabata bon conciente cu Sociedad por a manda nos como misionero na cualkier parti di mundu.

Despues cu nos a disfrutá dje congreso huntu como famia, e tempu a yega pa nos mayornan regresá Inglatera—nan so. Nos tres, nan yunan, a zwai man yama ayó segun cu nan a cuminsá nabegá pa cas riba Mauritania. Ki un despedida emocional esei tabata!

Asignacion di Misionero

E di 16 klas di Galad tabata consistí di 120 studiante for di tur parti di mundu, incluyendo algun cu a sufri den camponan di concentracion nazi. Ya cu nan a siña nos klas spañó, nos a verwagt cu nos lo a ser asigná na algun pais di abla spañó na Sur América. Imaginá bo nos sorpresa ora riba dia di graduacion nos a haña sa cu Douglas a ser asigná na Hapon i ami cu Anne pa Siria. Pues ami cu Anne tabatin cu siña arabir, i esaki a keda asina asta ora Sociedad a cambia nos asignacion pa Líbanon. Miéntras nos tabata warda riba nos visa, nos tabata ricibí les di arabir dos bes pa siman di George Shakashiri, e compositor dje Toren di Vigilancia arabir di Sociedad Watch Tower.

Tabata ki excitante pa bai un tera bíblico cu nos a studia tocante dje den klas! Keith i Joyce Chew, Edna Stackhouse, Olive Turner, Doreen Warburton, i Doris Wood a compañá nos ei. Ki un famia di misionero felis nos a bira! Un Testigo local tabata bishitá nos cas di misionero pa yuda nos mas aleu cu e idioma. Durante nos periodo di instruccion diario, nos tabata practicá un presentacion corticu, despues di cua nos tabata sali i us’é den nos trabou di predicá.

Nos a pasa nos promé par di añanan na Trípoli, caminda tabatin un congregacion establecí. Ami cu Joyce, Edna, Olive, Doreen, Doris i Anne a yuda esposanan i yu muhernan dje Testigonan local participá den reunionnan i tambe den e ministerio público. Te cu e tempu ei, nos rumannan homber i ruman muhernan cristian, siguiendo e custumber local, no tabata sinta banda di otro na reunion, i rara bes e ruman muhernan cristian aki tabata participá den e ministerio di cas pa cas. Nos tabatin mester di nan pa yuda nos cu e idioma den e predicacion público, i nos a animá nan pa nan mes participá den e trabou aki.

Siguientemente ami cu Anne a ser asigná pa yuda e grupo chikitu di Testigonan den e stad antiguo di Sidon. No hopi tempu despues, a pidi nos pa regresá n’e capital, Beirut. Simianan dje berdad bíblico a ser sembrá entre e comunidad einan cu tabata papia armenio, di manera cu nos a siña e idioma ei pa yuda nan.

Cambionan di Asignacion

Mi a topa Wilfred Gooch promé cu mi a bandoná Inglatera. E tabata un ruman celoso i compasivo cu a sirbi n’e Betel di Londen. Wilf tabata un miembro di e di 15 klas di Galad, cu a gradua durante e congreso di 1950 den Yankee Stadium. Su asignacion di misionero tabata e oficina di sucursal di Sociedad Watch Tower na Nigeria, i pa algun tempu nos a corespondé cu otro. Na 1955 nos tur dos a asistí n’e congreso “Reino Triunfal” na Londen, i djis despues di esei nos a comprometé. E siguiente aña nos a casa na Ghana, i mi a djoin Wilf den su asignacion di misionero na Lágos, Nigeria.

Despues cu mi a laga Anne atras na Líbanon, el a casa cu un bon ruman cristian kende a haña e berdad di Bijbel na Jerusalem. Mi mayornan no por a asistí na nos casamentunan, ya cu ami, Douglas i Anne a casa na diferente parti di mundu. Tog, nan tabata contentu pa sa cu nos tur tabata sirbi nos Dios, Jehova, felismente.

E Trabou na Nigeria

N’e oficina di sucursal na Lágos, nan a asigná mi pa limpia kamber dje ocho miembronan di nos famia di sucursal i tambe pa prepará nan cuminda i laba nan paña. A parcé mi cu mi a gana no solamente un esposo sino tambe un famia instantáneo!

Ami cu Wilf a siña presentacionnan bíblico corticu n’e idioma yoruba, i nos esfuersonan a ser recompensá. Un studiante yong cu nos tabata bishitá e tempu ei awor tin un yu homber i un yu muher den e famia grandi di Betel di rond di 400 miembro na Nigeria.

Na 1963, Wilf a ricibí un invitacion pa asistí na un curso di dies luna di instruccion special na Brooklyn, New York. Despues di a termin’é, inesperadamente el a ser asigná bek na Inglatera. Ami a keda Nigeria i mi a haña notificacion pa den 14 dia mi topa Wilf na Londen. Cu sintimentunan mixto, mi a bandoná Nigeria, ya cu e tabata un asignacion masha placentero. Despues di a sirbi 14 aña afó, a tuma tempu pa nos ahustá n’e bida di Inglatera atrobe. Sin embargo, nos tabata gradicidu pa ta cerca nos mayornan di edad un biaha mas i pa por yuda cuida nan.

Sostené pa Nos Speransa

For di 1980, mi tabatin e privilegio di compañá Wilf riba su biahenan pa hopi pais como superintendente di zona. Mi tabata anhelá specialmente pa bolbe bishitá Nigeria. Despues tambe nos a bai Scandinavia, islanan di Antiyas i Medio Oriente—incluyendo Líbanon. Tabata un emocion special pa rebibá recuerdonan felis i mira esnan cu mi a conocé como tiener yong sirbi como anciano cristian.

Lamentablemente, mi kerido esposo a muri den primavera di 1992. E tabatin 69 aña so. Esei tabata un golpi hopi duru ya cu el a muri di ripiente. Despues di 35 aña di matrimonio, a tuma tempu pa mi ahustá. Pero mi a ricibí hopi yudansa i amor for di mi famia mundial di cristiannan. Mi tin masha hopi experencia felis pa meditá ariba.

Tur mi dos mayornan a pone un ehempel espléndido di integridad cristian. Mama a muri na 1981 i Tata na 1986. Ainda Douglas i Anne ta sirbiendo Jehova fielmente. Douglas i su casá Kam ta bek na Londen, unda nan a keda despues di a soru pa Tata. Anne i su famia ta na Merca. Nos tur ta apreciá profundamente e speransa i herencia cu Dios a duna nos. Nos ta sigui “mustra un actitud di spera,” anhelando e tempu ora e bibunan, huntu cu nan stimánan resucitá, lo sirbi huntu pa semper como miembro di Jehova su famia terenal.—Lamentacionnan 3:24.

[Nota]

[Plachinan na página 23]

Di robes pa drechi bin abou:

Gwen cu 13 aña aki demostrando un studio modelo den e Salon di Reino na Enfield

E famia di misionero na Trípoli, Líbanon, 1951

Gwen cu su casá defuntu Wilf