Sperando den “Expectativa Anheloso”

“E expectativa anheloso dje creacion ta spera e revelacion dje yunan di Dios.”—ROMANONAN 8:19.

1. Ki similaridad ta existí entre e situacion di cristiannan awe i esun dje cristiannan di promé siglo?

E SITUACION di cristiannan berdadero awe ta parce esun dje cristiannan di promé siglo. Un profecia a yuda Jehova su sirbidónan dje tempu ei identificá ki ora e Mesías mester a aparecé. (Daniel 9:24-26) E mésun profecia a predicí e destruccion di Jerusalem pero no a contené elementonan cu a permití cristiannan sa di antemano ki ora e stad lo a ser destruí. (Daniel 9:26b, 27) Di manera similar, un profecia providencialmente a pone studiantenan sincero di Bijbel di siglo 19 keda den expectativa. Dor di conectá e “shete tempu” di Daniel 4:25 cu “e tempu dje gentilnan,” nan a anticipá cu Cristo lo a ricibí poder di Reino na 1914. (Lucas 21:24, King James Version; Ezekiel 21:25-27) Aunke e buki di Daniel ta contené hopi profecia, ningun di esakinan ta yuda studiantenan di Bijbel djawe calculá cu exactitud ki ora henter Satanas su sistema di cosnan lo ser destruí. (Daniel 2:31-44; 8:23-25; 11:36, 44, 45) Sin embargo, esaki lo sosodé pronto, pasobra nos ta bibando den “e tempu di fin.”—Daniel 12:4.a

Vigilancia Durante e Presencia di Cristo

2, 3. (a) Kico ta forma e prueba principal cu nos ta bibando durante e presencia di Cristo den poder di Reino? (b) Kico ta mustra cu cristiannan mester a sigui vigilá durante e presencia di Jesucristo?

² Ta cierto cu un profecia a hinca cristiannan den un estado di expectativa promé cu Cristo a ricibí poder di Reino na 1914. Pero e “señal” cu Cristo a duna di su presencia i dje conclusion dje sistema di cosnan a presentá sucesonan. I mayoria di esakinan lo a ser mirá despues cu su presencia a cuminsá. Sucesonan asina—esta guera, scarcedad di cuminda, temblor, pestilencia, aumento di maldad, persecucion di cristiannan i e predicacion mundial dje bon nobo di Reino—ta sirbi como e prueba principal cu nos ta bibando awor durante e presencia di Cristo den poder di Reino.—Mateo 24:3-14; Lucas 21:10, 11.

³ Sin embargo, henter e sentido di Jesus su conseho di despedida na su disipelnan tabata: “Sigui mira, keda lantá, . . . sigui vigilá.” (Marco 13:33, 37; Lucas 21:36) Si bo lesa e contexto dje spiertamentunan aki pa vigilá bon, bo ta ripará cu Cristo no tabata papiando principalmente tocante vigilá cuidadosamente p’e señal dje cuminsamentu di su presencia. Mas bien, e tabata mandando su disipelnan berdadero pa sigui vigilá durante su presencia. Pa ki motibu cristiannan berdadero mester a sigui vigilá?

4. Ki propósito e señal cu Jesus a duna lo a sirbi?

⁴ Jesus a duna su gran profecia como contesta riba e pregunta: “Na ki tempu e cosnan aki [sucesonan cu ta hiba n’e destruccion dje sistema di cosnan hudiu] lo ta, i kico lo ta e señal di bo presencia i dje conclusion dje sistema di cosnan?” (Mateo 24:3) E señal profetisá lo a sirbi pa identificá no solamente e presencia di Cristo sino tambe sucesonan cu ta hiba na fin dje mal sistema di cosnan actual.

5. Con Jesus a mustra cu aunke lo e ta spiritualmente presente, lo e “bini” ainda?

⁵ Jesus a mustra cu durante su “presencia” (na griego, pa·rou·sí·a) lo el a bini cu poder i gloria. En coneccion cu e ‘binimentu’ ei (denotá dor di formanan dje palabra griego ér·kho·mai), el a declará: “E ora ei e señal dje Yu di hende lo aparecé den shelu, i e ora ei tur e tribunan dje tera lo bati nan mes den lamentacion, i nan lo mira e Yu di hende biniendo riba nubia di shelu cu poder i gran gloria. . . . Siña awor for dje mata di figu como ilustracion e punto aki: Asina cu su taki yong bira moli i saca blachi, boso sa cu zomer ta cerca. Di igual manera tambe boso, ora boso mira tur e cosnan aki, sa cu e [Cristo] ta cerca, den porta. . . . P’esei, sigui vigilá, pasobra boso no sa riba ki dia boso Señor ta bini. . . . Demostrá cu boso ta cla, pasobra na un ora cu boso no ta pensa cu e ta, e Yu di hende ta bini.”—Mateo 24:30, 32, 33, 42, 44.

Pakico Jesucristo Ta Bini?

6. Con e destruccion di “Babilonia e Grandi” lo ser efectuá?

⁶ Aunke Jesucristo ta presente como Rey desde 1914, ainda e tin cu husga sistemanan i individuonan promé cu e ehecutá huicio riba esnan cu e ta considerá malbado. (Compará cu 2 Corintionan 5:10.) Pronto Jehova lo hinca den mente di gobernantenan político pa destruí “Babilonia e Grandi,” e imperio mundial di religion falsu. (Revelacion 17:4, 5, 16, 17) Apostel Pablo a declará specíficamente cu Jesucristo lo destruí “e homber di maldad”—clero apóstata di cristiandad, un parti prominente di “Babilonia e Grandi.” Pablo a skirbi: “E malbado lo ser revelá, esun cu Señor Jesus lo eliminá cu e spiritu di su boca i reducí na nada cu e manifestacion di su presencia.”—2 Tesalonicensenan 2:3, 8.

7. Ora e Yu di hende yega den su gloria, ki huicio lo e dicta?

⁷ Den futuro cercano, Cristo lo husga hende dje nacionnan a base dje manera cu nan a actua pa cu su rumannan cu ta riba tera ainda. Nos ta lesa: “Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso. I tur e nacionnan lo ser reuní dilanti dje, i lo e separá hende for di otro, mescos cu un wardadó ta separá carné for di cabritu. I lo e pone e carnénan na su man drechi, pero e cabritunan na su man robes. . . . E rey lo bisa [e carnénan]: ‘Di berdad mi ta bisa boso, te n’e grado cu boso a hacié na un dje mas chikitunan aki di mi rumannan, boso a hacié na mi.’ . . . I [e cabritunan] lo bai pa cortamentu eterno, pero esnan hustu pa bida eterno.”—Mateo 25:31-46.

8. Con Pablo ta describí e binida di Cristo pa ehecutá huicio riba e malbadonan?

⁸ Manera e comparacion dje carné i cabritunan ta mustra, Jesus ta ehecutá huicio final riba tur e malbadonan. Pablo a sigurá compañeronan creyente cu tabata sufri cu nan lo haña “alivio huntu cu nos n’e revelacion di e Señor Jesus for di shelu cu su angelnan poderoso den un vlam di candela, ora e trece vengansa riba esnan cu no conocé Dios i esnan cu no ta obedecé e bon nobo tocante nos Señor Jesus. Esakinan mes lo sufri e castigu hudicial di destruccion eterno di dilanti Señor i dje gloria di su poder, n’e tempu cu e ta bini pa ser glorificá en coneccion cu su santunan.” (2 Tesalonicensenan 1:7-10) Cu tur e sucesonan excitante aki nos dilanti, nos no mester ehercé fe i vigilá cu anhelo intenso p’e binida di Cristo?

Sperando cu Anhelo Intenso e Revelacion di Cristo

9, 10. Pakico e ungínan cu ta riba tera ainda ta spera cu anhelo intenso e revelacion di Jesucristo?

⁹ “E revelacion di e Señor Jesus for di shelu” lo no ta solamente pa trece destruccion riba e malbadonan, sino tambe pa recompensá e hustunan. E resto dje rumannan ungí di Cristo cu ta riba tera lo por sufri ainda promé cu e revelacion di Cristo, pero nan ta alegrá den nan speransa celestial glorioso. Apostel Pedro a skirbi n’e cristiannan ungí: “Sigui alegrá ya cu boso ta participante den e sufrimentunan di Cristo, pa boso por alegrá i abundá cu goso tambe durante e revelacion di su gloria.”—1 Pedro 4:13.

¹⁰ Esnan ungí ta determiná pa permanecé fiel te ora Cristo ‘reuní nan huntu cuné’ pa asina “e calidad probá” di nan fe “sea hañá un causa pa alabansa i gloria i onor n’e revelacion di Jesucristo.” (2 Tesalonicensenan 2:1; 1 Pedro 1:7) Nos por bisa di cristiannan fiel ungí cu spiritu: “E testimonio tocante Cristo a ser hací firme entre boso, di manera cu boso no ta keda atras den ningun don, miéntras cu boso ta spera cu anhelo intenso e revelacion di nos Señor Jesucristo.”—1 Corintionan 1:6, 7.

11. Miéntras cristiannan ungí ta spera e revelacion di Jesucristo, kico nan ta haci?

¹¹ E resto ungí ta compartí e sintimentunan di Pablo, kende a skirbi: “Mi ta pensa cu e sufrimentunan dje tempu actual no ta di ningun importancia na comparacion cu e gloria cu lo ser revelá den nos.” (Romanonan 8:18) Nan fe no ta dependé di calculacionnan di tempu. Nan ta keda ocupá den Jehova su sirbishi, dunando un ehempel maraviyoso pa nan compañeronan, e “otro carnénan.” (Juan 10:16) E ungínan aki sa cu e fin dje mal sistema di cosnan aki ta cerca, i nan ta tuma e spiertamentu di Pedro na pechu: “Fortificá boso mente pa actividad, mantené boso sano huicio completamente; pone boso speransa riba e bondad inmerecí cu lo ser duná na boso n’e revelacion di Jesucristo.”—1 Pedro 1:13.

“E Expectativa Anheloso dje Creacion”

12, 13. Con creacion humano a ser “sometí na banidad,” i kico e otro carnénan ta anhelá p’e?

¹² E otro carnénan tambe tin algu pa cua nan ta biba den expectativa anheloso? Sigur cu sí. Despues cu Pablo a papia dje glorioso speransa di esnan cu Jehova a adoptá como su ‘yunan’ ungí cu spiritu i “co-herederonan cu Cristo” den e Reino celestial, el a bisa: “E expectativa anheloso dje creacion ta spera e revelacion dje yunan di Dios. Pasobra e creacion a ser sometí na banidad, no dor di su mes boluntad sino dor di esun cu a somet’é, riba base dje speransa di cu e creacion mes tambe lo ser librá for di sclabitud na corupcion i lo tin e glorioso libertad dje yunan di Dios.”—Romanonan 8:14-21; 2 Timoteo 2:10-12.

¹³ Dor dje picá di Adam, tur su desendientenan a ser “sometí na banidad,” nací den sclabitud na picá i morto. Nan no por a libra nan mes for dje sclabitud ei. (Salmo 49:7; Romanonan 5:12, 21) O, cuantu e otro carnénan ta anhelá pa ser “librá for di sclabitud na corupcion”! Pero promé cu esei sosodé, cierto cosnan tin cu pasa segun Jehova su tempu i temporadanan.

14. Kico “e revelacion dje yunan di Dios” lo encerá, i con esaki lo resultá den e liberacion di ‘humanidad for di sclabitud na corupcion’?

¹⁴ E resto dje ‘yunan di Dios’ ungí tin cu ser ‘revelá’ promé. Kico esaki lo encerá? N’e debido tempu di Dios, lo bira evidente n’e otro carnénan cu finalmente e ungínan a ser “seyá” i glorificá pa reina cu Cristo. (Revelacion 7:2-4) E ‘yunan di Dios’ resucitá lo ser ‘revelá’ tambe ora nan participá cu Cristo den destruí Satanas su sistema di cosnan malbado. (Revelacion 2:26, 27; 19:14, 15) Anto, durante Cristo su Reinado di Mil Aña, nan lo ser ‘revelá’ mas aleu como canalnan sacerdotal pa repartí e beneficionan dje sacrificio di rescate di Jesus n’e “creacion” humano. Esaki lo pone cu humanidad lo ser “librá for di sclabitud na corupcion” i cu tempu drenta den “e glorioso libertad dje yunan di Dios.” (Romanonan 8:21; Revelacion 20:5; 22:1, 2) Cu e prospectonan magnífico ei, ta algu straño cu e otro carnénan ta “spera e revelacion dje yunan di Dios” cu “expectativa anheloso”?—Romanonan 8:19.

E Pacenshi di Jehova Ta Nificá Salbacion

15. Kico nos no mester lubidá nunca relacioná cu e momento cu Jehova lo laga su sucesonan tuma lugá?

¹⁵ Jehova ta e Gran Observador di Tempu. Lo e soru pa sucesonan tuma lugá precis na tempu. Kisas no semper cosnan ta parce di tuma lugá manera nos a spera personalmente. Sin embargo, nos por tin fe absoluto cu tur e promesanan di Dios lo ser cumplí. (Hosué 23:14) Kisas e ta permitiendo cosnan dura mas largu cu hopi hende a spera. Pero laga nos trata na comprendé su camindanan i admirá su sabiduria. Pablo a skirbi: “O e profundidad dje rikesa i sabiduria i conocimentu di Dios! Ki ininvestigabel su huicionan ta i ki fuera di averiguacion su camindanan ta! Pasobra ‘ken a yega di conocé e mente di Jehova, of ken a bira su consehero?’”—Romanonan 11:33, 34.

16. Ken lo beneficiá dje pacenshi di Jehova?

¹⁶ Pedro a skirbi: “Stimánan, siendo cu boso ta spera e cosnan aki [destruccion di “shelu” i “tera” bieu, i cu lo ser reemplasá pa “shelu nobo” i “tera nobo”], haci boso sumo posibel p’e haña boso finalmente sin mancha i sin defecto i den pas. Ademas, considerá e pacenshi di nos Señor como salbacion.” Debí n’e pacenshi di Jehova, miyones di hende mas ta hañando e oportunidad pa ser salbá den e “dia di Jehova,” cu lo bini inesperá “manera ladron.” (2 Pedro 3:9-15) Su pacenshi ta permitiendo cada un di nos tambe pa ‘sigui traha pa alcansá nos mes salbacion cu temor i temblamentu.’ (Filipensenan 2:12) Jesus a bisa cu nos tin cu ‘presta atencion na nos mes’ i “keda lantá” si nos kier ser aprobá i logra “para dilanti e Yu di hende” n’e tempu cu e bini pa huicio.—Lucas 21:34-36; Mateo 25:31-33.

Sigui Spera cu Awante

17. Ki palabranan di apostel Pablo nos tin cu tuma na pechu?

¹⁷ Pablo a urgi su rumannan spiritual pa mantené nan bista “no riba e cosnan cu hende ta mira, sino riba e cosnan cu hende no ta mira.” (2 Corintionan 4:16-18) E no tabata kier pa nada tapa nan bista dje recompensa celestial poní nan dilanti. Sea nos ta cristian ungí of nos ta dje otro carnénan, laga nos tene na mente e speransa maraviyoso poní nos dilanti i no entregá. Laga nos ‘sigui spera cu awante,’ dunando prueba cu “nos no ta e sorto cu ta hala atras te na destruccion, sino e sorto cu tin fe cu ta conserbá e alma bibu.”—Romanonan 8:25; Hebreonan 10:39.

18. Pakico nos por laga tempu i temporadanan cu confiansa den man di Jehova?

¹⁸ Cu confiansa nos por laga tempu i temporadanan den man di Jehova. Cumplimentu di su promesanan ‘lo no ta lat’ segun su orario di tempu. (Habacuc 2:3) Miéntras tantu, Pablo su spiertamentu na Timoteo ta haña mas nificacion pa nos. El a bisa: “Mi ta encargá bo solemnemente dilanti Dios i Cristo Jesus, cu ta destiná pa husga bibu i morto, i pa medio di su manifestacion i su reino, predicá e palabra, ocupá bo den dje urgentemente den tempu faborabel, den tempu difícil . . . Haci e trabou di un evangelisadó, cumpli cu bo ministerio plenamente.”—2 Timoteo 4:1-5.

19. E pueblo di Jehova tin tempu ainda pa ki trabou, i pakico?

¹⁹ Tantu nos bida como esun di nos próhimo ta den wega. Pablo a skirbi: “Presta atencion constante na bo mes i na bo siñansa. Persistí den e cosnan aki, pasobra haciendo esaki lo bo salba tantu bo mes como esnan cu ta scuchá bo.” (1 Timoteo 4:16) A sobra masha poco tempu p’e mal sistema di cosnan aki. Miéntras cu nos ta spera cu expectativa anheloso e sucesonan excitante nos dilanti, laga nos ta mas conciente cu nunca cu ainda ta e tempu i temporada di Jehova pa su pueblo predicá e bon nobo dje Reino. E trabou ei tin cu ser cumplí na su satisfaccion. Manera Jesus a bisa: “E ora ei e fin lo yega.”—Mateo 24:14.

[Nota]

Como Repaso

◻ Relacioná cu calculacionnan di tempu, den ki manera nos situacion ta similar cu esun dje cristiannan di promé siglo?

◻ Pakico cristiannan tin cu “sigui vigilá,” asta durante e presencia di Cristo?

◻ Pakico creacion humano ta den expectativa anheloso di “e revelacion dje yunan di Dios”?

◻ Pakico nos por laga tempu i temporadanan cu confiansa den man di Jehova?

[Plachi na página 17]

Cristiannan tin cu keda lantá den expectativa dje binida di Cristo

[Plachi na página 18]

E resto ungí ta sigui ocupá den Jehova su sirbishi, i no ta basa nan fe riba calculacionnan di tempu