Tur Pastor Ta Kere Loke Nan Ta Siña Otro Hende?

ESPOSO dje señora a caba di muri. Su pastor ta splik’é cu su casá no tabata ni suficiente bon pa bai derechitu shelu ni suficiente malu cu e mester a ser mandá fiernu di candela. P’esei, segun e pastor, e homber ta pasando castigu te ora e cualificá pa shelu. E señora ta paga e pastor p’e resa pa su casá por ser librá for di purgatorio mas lihé. E biuda ta conformá su mes cu esaki, pasobra e ta sinti cu e pastor ta compartí su creencianan sincero.

Bo no ta kere cu e biuda lo keda desilusioná si e haña sa cu su pastor no tabata ègt kere den castigu despues di morto? Hopi hende ta sinti nan molestiá ora nan haña sa cu un cantidad grandi di clero no ta kere den hopi di loke nan mes ta siña otro hende. Ora National Catholic Reporter a trata loke el a yama “un problema di clero mas grave cu sex,” el a declará: “Entre e miembronan di clero en general, tin asina tantu cu a stop di kere den e existencia di Dios of e doctrina di recompensa i castigu of e resureccion . . . cu e incredulidad aki a bira un parti básico dje manera di pensa di clero, algu manera neblina di huma.”

Otro iglesianan ta pará dilanti un dilema similar. Un encuesta di vicarionan dje Iglesia di Inglatera a revelá cu hopi pastor “no ta kere den rasgonan fundamental di fe cristian tradicional manera e nacementu for di un bírgen, Jesus su milagernan i e segundo binida dje mesías,” Canberra Times di Australia ta informá.

E escritor di asuntunan religioso George R. Plagenz a puntra con un pastor por recitá un credo cu e mes no ta kere aden, sin cu su concenshi molestié. Un pastor a bisa cu el a gewoon reemplasá e palabranan di apertura dje credo: “Mi ta kere.” El a bisa: “Ami ta cuminsá e credo bisando: ‘NAN ta kere den Dios e Tata Todopoderoso . . .’” Plagenz a yama tal hipocresia “e fraude di mas grandi den e pais.”

Lamentablemente, e incredulidad i insinceridad ei di parti di pastornan ta pone cu hopi hende ta decepcioná cu religion en general. Pero esei no ta e único aspecto preocupante di religion awe. Mayoria baidó di misa a siña cu Bijbel ta e Palabra di Dios. Nan lo keda sorprendí ora nan haña sa cu Bijbel no ta siña algun dje doctrinanan di iglesia cu hende a aceptá pa hopi tempu caba? E siguiente artículo lo considerá un ehempel.