Hopi Ta Bisa Cu Nan Tin Fe

“JESUS ta magnífico! E ta simplemente maraviyoso!” Asina un muher religioso na Brazil a sclama. Sí, ningun hende ta nenga cu Jesus su nomber tin poder. Atrabes di historia, hende a sufri i muri di buena gana p’e.

Apostelnan Pedro i Juan a predicá ‘riba base dje nomber di Jesus’ den Jerusalem. A arestá nan i suta nan pa esei. Tog, nan “a sali for di dilanti dje Sanedrin, alegrando pasobra a considerá nan digno di sufri desonra pa causa di su nomber.”—Echonan 5:28, 41.

Antipas tabata un otro cristian di promé siglo cu a onra Jesus su nomber. Den e último buki di Bijbel, Revelacion, Jesus a referí na dje como “mi testigo, esun fiel, cu a ser matá banda di boso, unda Satanas ta biba.” (Revelacion 2:13) Huntu cu otro cristiannan na Pérgamo, Antipas no kier a nenga su fe den Cristo. Antipas a tene duru n’e nomber di Jesus, i el a paga pa esei asta cu su mes bida!

Mas o ménos mei siglo despues, na 155 E.C., Policarpo, kende a yama su mes cristian, a enfrentá un prueba similar ora a mand’é difamá Cristo. Su contesta tabata: “Mi a sirbié pa 86 aña, i E no a hací mi nada malu. Con mi por blasfemá mi Rey cu a salbá mi?” Dor cu Policarpo a nenga di rechasá Cristo, nan a kim’é na staca.

E apostelnan, Antipas, i otronan tabata dispuesto pa seya nan testimonio tocante Cristo cu morto! Kico di hende djawe?

Jesus Su Nomber Awe

Jesus su nomber ta sigui lanta emocion fuerte. Den e último décadanan aki, na Latinoamérica, e porcentahe di aumento di iglesianan cu ta bisa cu nan ta kere den Jesus a yega su punto mas haltu. Asta e pueblonan mas chikitu tin un iglesia pentecostal. Na mésun tempu, e influencia político dje iglesianan ei ta creciendo. Por ehempel, na Brazil, miembronan dje iglesianan aki ta ocupá 31 asiento den Congreso i Senado.

Jesus ta e punto focal tambe di un movementu religioso nobo na Merca. Su siguidónan ta yama nan mes Cumplidó di Promesa. Revista Time a informá na 1997 cu asistencia na nan reunionnan a aumentá for di 4.200 na 1991 pa 1,1 miyon na 1996. Un di su canticanan di alabansa ta bisa: “O victoria den Jesus, mi Salbador eterno.”

Sin embargo, no ta tur sintimentu cu Jesus su nomber a inspirá tabata noble. Hopi bes hende a bringa guera den nomber di Jesus. A masacrá hudiu, a mata pagano, a torturá, mutilá i kima disidente na staca—tur esei den nomber di Jesus. I mas recien, e comercialisacion di evangelismo a bira notorio. Tur esaki ta un maluso perverso i repugnante di Jesus su nomber i loke berdaderamente e ta para p’e!

Ademas, e ta lanta algun pregunta relevante: Kico fe den Jesus su nomber ta encerá? I kico ta e punto di bista di Testigonan di Jehova riba e tema aki? E siguiente artículo lo contestá e preguntanan aki.