Con Largu Nos Por Biba?

En general hende ta biba mas i mas largu awendia. Dor di esei, hopi hende ta puntra nan mes: ‘Con largu nos por biba?’

SEGUN The New Encyclopædia Britannica (1995), ántes mayoria hende tabata kere cu Pierre Joubert tabata esun cu a yega di biba mas largu. Na 1814 el a muri cu 113 aña di edad. Tabatin otronan sí cu, segun informe, a biba mas largu. Pero no tin suficiente documentacion aceptá pa proba nan edad. Sin embargo, pa awor, documentacion exacto a verificá cu tin vários hende cu a biba mas largu cu Pierre Joubert.

Jeanne Louise Calment a nace na Arles, den zuidoost di Francia, dia 21 di februari 1875. Su morto dia 4 di augustus 1997—mas cu 122 aña despues—a ricibí hopi publicidad. Na 1986, Shigechiyo Izumi di Hapon, a muri na edad di 120 aña. Guinness Book of Records 1999 ta mencioná Sarah Knauss di 118 aña como e persona di mas edad na momento cu a publicá e buki. El a nace dia 24 di september 1880, na Pennsylvania, Merca. Dia Marie-Louise Febronie Meilleur di Quebec, Cánada, a muri na 1998 cu 118 aña di edad, e tabata 26 dia mas bieu cu Sarah.

Berdad, e cantidad di hende cu edad hopi haltu a subi dramáticamente. Segun cálculo, e cantidad di hende riba shen aña lo bira mas cu 2.2 miyon durante promé mitar dje siguiente siglo! Mescos, e cantidad di hende di 80 aña of mas a subi di 26.7 miyon na 1970, te 66 miyon na 1998. Esei ta 147 porciento mas tantu, compará cu e aumento di 60 porciento so dje poblacion total di mundu.

I no ta mas largu so hende ta biba. Hopi di nan ta logrando cos cu hopi hende di 20 aña no por. Na 1990, John Kelley, di 82 aña, a core un máraton—un careda di 42 kilometer—den cincu ora i cincu minuut. Na 1991, Mavis Lindgren, un bisawela di 84 aña a cubri e mésun distancia den shete ora i nuebe minuut. I mas recientemente un homber di 91 aña a core e Máraton di New York te caba!

No cu den pasado hende di edad no a logra haci cos asombroso. Cu 99 aña di edad, Abraham, e patriarca di den Bijbel, “a cuminsá core bai topa” su invitadonan. Cu 85 aña, Caleb a proclamá: “Manera mi poder tabata e tempu ei [45 aña promé], asina mi poder ta awor, tantu pa sali como pa drenta.” I di Moises Bijbel ta bisa cu ora e tabatin 120 aña di edad, “su wowo no a bira scur, i su forsa vital no a hui.”—Génesis 18:2; Hosué 14:10, 11; Deuteronomio 34:7.

Jesucristo a papia di e promé homber, Adam, i e trahadó di arca, Noe, como personahenan histórico. (Mateo 19:4-6; 24:37-39) Génesis ta bisa cu Adam a biba 930 aña, i Noe 950. (Génesis 5:5; 9:29) Di berdad hende a yega di biba asina largu? Nos lo por biba asta hopi mas cu esei, por ta pa semper? Por fabor examiná e evidencia den e siguiente artículo.