Di Berdad Bida Eterno Ta Posibel?

“Maestro, ki bon mi mester haci pa mi haña bida eterno?” —MATEO 19:16.

1. Kico nos por bisa tocante largura di hende su bida?

REY Hérhes I di Persia, conocí den Bijbel como Asuero, tabata inspeccionando su trupanan promé cu un bataya na aña 480 P.E.C. (Ester 1:1, 2) Segun e historiadó griego Herodoto, e rey a yora ora e tabata wak su soldánan. Di con? Hérhes di: “Ta duel mi ora mi pensa con corticu hende su bida ta. Pasobra, di tur e hombernan aki, ni un lo no ta na bida aki shen aña.” Posiblemente abo tambe a yega di nota cu bida ta miserablemente corticu, i cu niun hende no kier bira bieu ni bira malu i muri. Ai, mare nos por a gosa di bida den vigor hubenil i felicidad!—Job 14:1, 2.

2. Ki speransa hopi hende tin, i di con?

² Ta interesante cu The New York Times Magazine di 28 di September 1997 a saca un artículo titulá “Nan Kier Biba.” El a cita un científico cu a bisa cu entusiasmo: “Di berdad mi ta kere cu nos lo por ta e promé generacion cu ta biba pa semper”! Kisas abo tambe ta pensa cu bida eterno ta posibel. Por ta bo ta pensa asina dor cu Bijbel ta primintí cu nos por biba pa semper aki riba tera. (Salmo 37:29; Revelacion 21:3, 4) Tog tin otro hende cu ta bisa cu bida eterno ta posibel, pero no pa motibu cu Bijbel ta bisa asina. Si nos considerá algun dje otro motibunan aki, nan lo yuda nos mira cu di berdad bida eterno ta posibel.

Diseñá pa Biba pa Semper

3, 4. (a) Di con tin hende ta kere cu nos mester por biba pa semper? (b) Kico David a bisa tocante e manera cu el a ser formá?

³ Un motibu pakico hopi hende ta kere cu ser humano mester por biba pa semper tin di haber cu e manera maraviyoso den cua nos ta trahá. Por ehempel, e manera cu nos ta forma den barica di nos mama ta simplemente milagroso. Un autoridad prominente riba tereno di biramentu bieu a skirbi: “Despues di efectuá e milagernan cu ta hiba nos di concepcion pa nacementu, i despues na madures sexual i bida adulto, naturalesa a dicidí di keda sin pensa un sistema—aparentemente mas simpel—pa permití e milagernan ei dura pa semper.” Sí, ora nos considerá e manera maraviyoso cu nos ta hincá den otro, e pregunta aki ta keda den laira: Di con nos tin cu muri?

⁴ Miles di aña pasá, David, un escritor di Bijbel, a meditá riba e mésun milagernan ei, apesar cu e mes no por a wak den matris manera científiconan djawe. David a meditá cu asombro riba su propio formacion cu a sosodé, manera e mes a skirbi, ora e tabata ‘protehá den barica di su mama.’ El a skirbi cu na e tempu ei ‘su nirnan a ser producí.’ Ademas el a skirbi di formacion di su “wesunan” tempu cu, manera el a bisa: “Mi tabata trahá den secreto.” Despues David a sigui papia di “mi embrion.” I tocante e embrion den barica di su mama el a bisa: “Den bo buki tur su partinan a ser skirbí.”—Salmo 139:13-16.

5. Ki milagernan ta enbolbí den nos formacion den matris?

⁵ Ta obvio cu no tabatin un plan di construccion skirbí na man den matris dje mama di David tocante con lo e mester a ser formá. Pero, segun cu David a meditá riba formacion di su “nirnan,” su “wesunan,” i otro partinan di su curpa, el a sinti cu nan formacion mester tabata di acuerdo cu un plan—cu tur cos tabata, como si fuera “skirbí.” Ta manera cos cu e cel fertilisá den su mama su curpa tabatin un sala grandi yen di buki cu instruccion detayá tocante con pa forma un baby humano, i cu el a pasa tur e instruccionnan complicá aki pa cada cel nobo cu a bini. P’esei, e revista Science World ta usa e metáfora di cu ‘cada cel di un embrion den formacion tin un file completo di plan di construccion.’

6. Ki evidencia tin di cu, manera David a skirbi, nos ta “trahá maraviyosamente”?

⁶ Bo a yega di pensa riba e manera milagroso cu nos curpa ta funcioná? Jared Diamond, biólogo, a bisa: “Nos ta reemplasá e celnan rond di nos tripa cada un par di dia, esnan rond di nos ‘urineblaas’ cada dos luna, i cel corá di nos sanger cada cuater luna.” E conclusion cu el a yega na dje ta: “Naturalesa ta desarmá nos i arma nos bek cada dia cu pasa.” Kico esaki ta laga nos comprendé? Cu sin importá cuantu aña nos biba—8, 80 of asta 800—nos curpa físico ta keda basta hóben. Un científico a yega di calculá cu “den un aña, aproximadamente 98 porciento di atom cu ta parti di nos curpa awe lo keda reemplasá dor di otro atom cu nos ta ingerí dor di hala rosea, come i bebe.” Berdad, ta manera David a bisa cu elogio: Nos ta “trahá maraviyosamente.”—Salmo 139:14.

7. Na ki conclusion algun hende a yega mirando e diseño di nos curpa físico?

⁷ A base dje diseño di nos curpa físico, un autoridad riba e tema di biramentu bieu a bisa: “E motibu pakico nos ta bira bieu no ta muchu cla.” Egt ta parce cu nos lo mester por biba pa semper. I ta p’esei mes hende ta purba alcansá e meta aki pa medio di nan tecnologia. No muchu tempu pasá, Dr. Alvin Silverstein a skirbi cu confiansa den su buki Conquest of Death (Conkista di Morto): “Nos ta bai decifrá e esencia di bida. Nos ta bai comprendé . . . con un hende ta bira bieu.” Cu ki resultado? El a pronosticá: “Lo no tin hende ‘bieu’ mas, pasobra e conocimentu cu lo permití nos vence morto lo haci hubentud eterno tambe posibel.” Ora nos mira con ciencia moderno ta studia composicion di ser humano, di berdad e idea di bida eterno ta zona asina imposibel? Tin un otro motibu, unu asta mas fuerte ainda, pa kere cu bida eterno ta posibel.

E Deseo di Biba pa Semper

8, 9. Ki deseo natural hende tabatin atrabes di historia?

⁸ Bo no a yega di nota cu biba pa semper ta un deseo natural den hende? Un dokter a skirbi den un korant aleman: “Posiblemente e soño di bida eterno ta mes bieu cu humanidad.” Den su descripcion dje creencianan di algun pueblo europeo di antigwedad, The New Encyclopædia Britannica ta bisa: “Hende digno lo biba pa semper den un sala briyante, cubrí cu oro.” I esta hopi hende a yega di lucha den nan esfuerso pa satisfacé e deseo básico di bida eterno!

⁹ The Encyclopedia Americana ta observá cu na China, mas cu 2.000 aña pasá, “tantu emperadornan como e pueblo [comun], bou di guia dje sacerdotenan taoista, tabata neglishá nan trabou pa busca e cura-lo-todo di bida”—un asina yamá fontein di hubentud. Berdad, atrabes di historia hende a pensa cu dor di bebe vários mescla, of asta dor di bebe un cierto awa, nan lo keda hóben.

10. Con hende a purba haci bida mas largu posibel den tempu moderno?

¹⁰ Esfuersonan moderno pa purba satisfacé hende su deseo inherente pa bida eterno no ta ménos peculiar. Un ehempel prominente ta e custumber di vris hende cu muri dor di enfermedad. Nan ta haci esaki sperando cu nan lo por restorá bida un dia den futuro ora cu nan desaroyá un cura pa e enfermedad. Un di esnan cu ta na fabor dje práctica aki, cu nan ta yama criogenia, a skirbi: “Si nos optimismo resultá di tin base i di berdad hende siña con pa cura of drecha tur sorto di daño—incluyendo problema físico dor di behes—anto esnan cu ‘muri’ awor lo tin un bida den futuro cu ta extendé pa tempu indefiní.”

11. Di con hende ta deseá di biba pa semper?

¹¹ Kisas bo ta puntra bo mes ta di con e deseo aki di biba pa semper ta asina fuerte den nos mente. Lo por ta dor cu “[Dios] a pone eternidad den hende su mente”? (Eclesiástes 3:11, Revised Standard Version) Ta algu pa meditá seriamente ariba! Pensa un ratu: Pakico nos lo tin un deseo inherente di biba eternamente, esta, pa semper, si nos Creador no tabatin e propósito di satisfacé e deseo aki? Ademas, lo ta amoroso di su parti di crea nos cu e deseo pa bida eterno, anto frustra nos dor di no laga nos cumpli cu e deseo ei nunca?—Salmo 145:16.

Ken Nos Mester Confia?

12. Riba kico algun hende ta confia? Pero abo ta pensa cu nan confiansa ta fundá?

¹² Unda, of den ken, nos mester pone confiansa pa obtené bida eterno? Den tecnologia humano di siglo 20 of siglo 21? E artículo den The New York Times Magazine titulá “Nan Kier Biba” a papia dje “dios: tecnologia” i dje “entusiasmo pa tecnologia su potencial.” Segun informe, un cierto científico tabata asta “ciegamente convencí . . . di cu un dia, técnicanan di manipulacion genético lo bira disponibel, cu lo salba [nos] dor di stop biramentu bieu, i por ta asta haci hende hóben bek.” Pero den realidad, esfuersonan humano a resultá di ta totalmente ineficas pa stop biramentu bieu, of vence morto.

13. Con structura di nos celebro ta mustra cu e intencion tabata pa nos biba pa semper?

¹³ Esei kier men cu no tin manera pa alcansá bida eterno? Absolutamente! Tin un manera! Structura di nos celebro maraviyoso, cu su capacidad casi ilimitá pa siña, mester por convencé nos di esaki. James Watson, biólogo molecular, a yama nos celebro “e cos mas compleho cu nos a descubrí te awor den nos universo.” I Richard Restak, neurólogo, a bisa: “No tin nada den henter universo conocí cu parc’é ni sikiera un tiki.” Pakico nos lo tin un celebro cu capacidad pa warda i procesá un cantidad casi ilimitá di informacion, i un curpa diseñá pa funcioná pa semper, si e intencion no tabata pa nos gosa di bida eterno?

14. (a) Na ki conclusion tocante bida humano escritornan di Bijbel ta señalá? (b) Di con nos mester pone confiansa den Dios i no den hende?

¹⁴ Pues anto, cua ta e único conclusion razonabel cu nos por yega na dje a base di e datonan aki? Bo no ta di acuerdo cu nos mester tabata diseñá i creá dor di un Creador todopoderoso i inteligente, pa nos por biba pa semper? (Job 10:8; Salmo 36:9; 100:3; Malakías 2:10; Echonan 17:24, 25) Wel, no ta sabí anto pa nos sigui e mandamentu inspirá aki dje salmista bíblico: “No pone bo confiansa den e noblenan, ni den e yu di hende terenal, na ken ningun salbacion ta pertenecé”? Di con nos no mester pone confiansa den hende? Pasobra, manera e salmista a skirbi: “Su spiritu ta sali, e ta bolbe na su suela; den e dia ei su pensamentunan en berdad ta perecé.” Berdad, apesar cu hende tin e potencial di biba pa semper, nan no por haci nada pa evitá morto. E salmista ta concluí bisando: “Felis ta esun . . . kende su speransa ta den Jehova su Dios.”—Salmo 146:3-5.

Di Berdad Esei Ta Dios Su Propósito?

15. Kico ta mustra cu Dios su propósito ta pa nos biba pa semper?

¹⁵ Pero, bo por ta puntra bo mes: Di berdad ta Jehova su propósito pa nos gosa di bida eterno? Sí, ta asina mes! Su Palabra ta primintí esei diferente bes. Bijbel ta sigurá nos: “E don cu Dios ta duna ta bida eterno.” Juan, un sirbidó di Dios, a skirbi: “Esaki ta e cos primintí cu [Dios] mes a primintí na nos, e bida eterno.” Nada straño cu un hóben a puntra Jesus: “Maestro, ki bon mi mester haci pa mi haña bida eterno?” (Romanonan 6:23; 1 Juan 2:25; Mateo 19:16) De echo, apostel Pablo a skirbi tocante “un speransa di bida eterno cu Dios, kende no por gaña, a primintí promé cu tempu di duracion largu.”—Tito 1:2.

16. Den ki sentido Dios lo por a primintí bida eterno “promé cu tempu di duracion largu”?

¹⁶ Kico e echo cu Dios a primintí bida eterno “promé cu tempu di duracion largu” kier men? Algun hende ta pensa cu apostel Pablo tabata kier men cu, promé cu Dios a crea e promé pareha, Adam cu Eva, ya e tabatin e propósito pa hende biba pa semper. Pero, si loke Pablo tabata referí na dje ta algu despues cu Jehova a crea hende i duna nan di conocé su propósito, tog ta keda bisto cu e boluntad di Dios ta encerá bida eterno pa hende.

17. Di con Dios a saca Adam cu Eva for dje hofi di Eden, i di con el a posicioná kerubin na e entrada?

¹⁷ Bijbel ta bisa cu “Jehova Dios a laga crece for dje suela . . . e palu di bida” den Eden. E motibu pakico Dios a saca Adam for dje hofi, segun Bijbel, tabata pa e no por “saca su man i berdaderamente tuma tambe dje fruta dje palu di bida i come i biba”—sí, pa semper! Despues di saca Adam cu Eva for dje hofi di Eden, Jehova a posicioná “e kerubinnan i e blet ardiente di un spada cu tabata drei continuamente pa vigilá e caminda cu ta hiba n’e palu di bida.”—Génesis 2:9; 3:22-24.

18. (a) Kico comementu for dje palu di bida lo a nificá pa Adam cu Eva? (b) Kico comementu for dje palu ei a representá?

¹⁸ Si Dios a permití Adam cu Eva come for dje palu di bida, kico esei lo a nificá pa nan? Nada ménos cu e privilegio di biba pa semper den Paradijs! Un erudito bíblico a speculá: “E palu di bida lo mester tabatin un cualidad cu por a libra curpa humano dje debilidad di behes, of e decadencia cu ta terminá den morto.” Asta el a pretendé cu “tabatin un poder den e matanan di paradijs cu por a contrarestá e efecto” di biramentu bieu. Pero Bijbel no ta bisa cu e palu di bida mes tabatin cualidadnan cu ta duna bida. Mas bien, e palu ei a djis simbolisá Dios su garantia di bida eterno na esun cu e permití come su fruta.—Revelacion 2:7.

Dios Su Propósito No A Cambia

19. Di con Adam a muri, i di con nos cu ta su desendientenan, tambe ta muri?

¹⁹ Ora Adam a peca, el a perde e derecho riba bida eterno pa su mes i pa tur su desendientenan cu no a nace ainda. (Génesis 2:17) Ora el a bira un pecadó dor di su desobedencia, el a bira defectuoso, imperfecto. For di e ora ei pa dilanti Adam su curpa a bira, en efecto, programá pa muri, manera Bijbel ta bisa: “E salario cu picá ta paga ta morto.” (Romanonan 6:23) Ademas, e desendientenan imperfecto di Adam tambe a bira programá pa muri, no pa biba pa semper. Bijbel ta splica: “Pa medio di un solo hende [Adam] picá a drenta mundu i morto pa medio di picá, i asina morto a plama na tur hende pasobra nan tur a peca.”—Romanonan 5:12.

20. Kico ta mustra cu hende a ser trahá pa biba pa semper riba tera?

²⁰ Pero kico si Adam no a peca? Kico lo a pasa si e no a desobedecé Dios, anto Dios a lagu’é come for dje palu di bida? Unda e lo a gosa di Dios su don di bida eterno? Den shelu? No! Dios no a papia nada tocante hiba Adam shelu. Su asignacion di trabou tabata aki bou na tera. Bijbel ta splica cu “Jehova Dios a laga crece for dje suela tur palu deseabel na bista di hende i bon pa cuminda,” anto e ta bisa: “Jehova Dios a pasa na tuma e homber i establec’é den e hofi di Eden p’e cultiv’é i cuid’é.” (Génesis 2:9, 15) Despues cu Eva a ser creá p’e ta Adam su pareha, nan dos a haña asignacionnan adicional pa cumpli cuné riba tera. Dios a bisa nan: “Sea fructífero i bira hopi i yena e tera i domin’é, i tene dominio riba piscá di laman i riba criatura buladó di shelu i riba tur criatura bibiente cu ta move riba tera.”—Génesis 1:28.

21. Ki prospectonan maraviyoso e promé hendenan tabatin?

²¹ Djis pensa riba tur e prospectonan terenal maraviyoso cu tal instruccionnan di Dios a ofrecé Adam cu Eva! Nan mester a cria yunan homber i muher perfectamente saludabel den Paradijs riba tera. Segun cu nan yunan stimá a crece bira grandi, nan tambe lo a bira fructífero huntu cu nan mayornan i haci trabou di hardinero placentero cu nan, pa cuida e Paradijs. Humanidad lo a biba satisfecho cu tur e bestianan den sumision na nan. Pensa con gososo lo por tabata pa extendé frontera dje hofi di Eden te cu finalmente henter e tera lo a bira un paradijs! Abo lo no disfrutá di por biba cu yu perfecto den un cas terenal asina bunita, sin preocupá pa bira bieu i muri? Laga e impulsonan natural di bo curason contestá e pregunta ei.

22. Di con nos por ta sigur cu Dios no a cambia su propósito p’e tera?

²² Awor, ora Adam cu Eva a desobedecé i Dios a saca nan for dje hofi di Eden, el a cambia su propósito pa hende biba pa semper den Paradijs riba tera? Absolutamente! Esei lo a nificá cu Dios a admití derota en cuanto su abilidad pa cumpli cu su propósito original. Nos por keda sigur cu Dios ta cumpli cu loke e primintí, manera e mes ta proclamá: “Asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur den loke mi a mand’é.”—Isaías 55:11.

23. (a) Kico ta reconfirmá cu Dios su propósito ta pa hende cu inclinacion hustu biba pa semper riba tera? (b) Kico nos lo trata siguientemente?

²³ Cu Dios su propósito pa e tera no a cambia, ta algu cu Bijbel ta haci bon cla ora e ta bisa: “E hustunan mes lo poseé e tera, i nan lo biba pa semper riba dje.” Jesucristo mes a bisa den su Sermon Riba Ceru cu esnan di genio suave lo heredá e tera. (Salmo 37:29; Mateo 5:5) Pero, con nos por obtené bida eterno, i kico nos mester haci pa gosa di tal bida? Nos lo trata esaki den e siguiente artículo.

Con Lo Bo Contestá?

◻ Di con hopi hende ta kere cu bida eterno ta posibel?

◻ Kico mester convencé nos cu e intencion tabata pa nos biba pa semper?

◻ Cua tabata Dios su propósito original pa humanidad i e tera?

◻ Di con nos por ta sigur cu Dios lo cumpli cu su propósito original?