Dedicacion dje Centro Educativo di Watchtower​—Un Fiesta pa Jehova

DESDE tempu antiguo, fiestanan gososo tabata forma parti di adoracion berdadero. Algun dje fiestanan cu tabata tene den Israel di antigwedad a dura dianan largu i hopi miles di adoradó di Jehova tabata asistí na nan. E inauguracion dje tempel di Sálomon a dura shete dia i despues di dje a sigui e Fiesta di Cabaña di un siman largu. Esaki a duna e israelitanan un oportunidad pa refleccioná riba e manera maraviyoso cu Jehova a trata cu nan. Nan a regresá cas “alegrando i sintiendo nan mes contentu di curason pa tur e bondad cu Jehova a efectuá.”—1 Reynan 8:66.

Loke a tuma lugá n’e Centro Educativo di Watchtower na Patterson, New York, Merca, di 17 pa 22 di mei 1999, a pone e bishitantenan corda riba e antiguo fiestanan gososo ei. Esaki tabata un siman di actividad special cu a concentrá riba e dedicacion di un compleho di 28 edificio diseñá pa promové educacion bíblico rond mundu. A soru pa tur e 5.400 miembronan di personal dje sede mundial na Brooklyn, Wallkill i Patterson haña un tour extenso n’e facilidadnan di Patterson durante e siman memorabel ei. Entre e huéspednan tabatin mas cu 500 ex-miembro di personal cu a participá den e trabou durante construccion dje centro educativo, representante di 23 sucursal di Sociedad Watch Tower i otronan for di congregacionnan den cercania—un total di por lo ménos 8.100 persona.

Exhibicionnan Educativo Durante e Tournan

A prepará exhibicionnan special, presentacionnan educativo di video i tournan indicá cu borchi pa bishitantenan por a conocé e centro educativo. Den e sala principal di recepcion, un makèt dje tempel cu a existí den Jerusalem durante e tempu di Jesus su ministerio terenal, a atraé bishitantenan mesora. Otro exhibicionnan a resaltá e promé añanan dje Scol Bíblico di Galad di Watchtower, congresonan histórico, reunionnan di congregacion, e desaroyo moderno di studio di Bijbel na cas—di cua awor miyones ta ser conducí tur siman—i e trabou cu e Departamento di Asuntunan Hurídico ta haci pa tene e caminda habrí p’e actividad ei cu ta den obedencia n’e mandamentu di Jesus.—Mateo 28:19, 20.

A ofrecé esnan cu a bishitá e festividadnan di dedicacion un presentacion di video di 33 minuut, titulá “No pa Medio di Poder, Sino pa Medio di Mi Spiritu!” Esei a tuma lugá den e aula cu ta forma parti dje compleho i cu por acomodá 1.700 persona. E video aki a mustra con e Centro Educativo di Watchtower a bira un realidad. Entrevistanan a revelá incidentenan cu ta indicá bon cla e guia di Jehova den asuntunan i su bendicion riba esfuersonan pa trece e proyecto di 15 aña aki na un conclusion exitoso. Miles di persona a participá den e trabou di construccion mes. Na un dado momento na 1994, tabatin 526 trahadó n’e sitio, incluso 350 boluntario di tempu completo, 113 trahadó temporal i 63 cu tabata bai i bini tur dia pa duna un man. Hopi mas a apoyá e trabou cu donacion. Nan tur ta realisá cu hamas esaki lo tabata posibel sin e spiritu di Jehova.—Zacarías 4:6.

Esnan cu a tuma e tournan por a mira cu e enfoke dje trabou cu ta haci n’e centro educativo ta di promové siñansa divino. E exhibicion n’e entrada cu ta hiba na Scol di Galad riba promé piso dje edificio dje scol, a resaltá e herencia spiritual ricu i historia dje scol. Desde su promé klas na 1943 n’e campus original na South Lansing, New York, Scol di Galad a entrená mas cu 7.000 studiante pa sirbishi di misionero. Exhibicionnan riba di dos piso dje edificio dje scol a duna un bista dje Scol pa Miembronan di Comité di Sucursal i e Scol pa Superintendentenan Biahero. Aki tur e dos klasnan ta situá. For di su cuminsamentu na november 1995, e scol di sucursal a percurá instruccion avansá pa 360 miembro di Comité di Sucursal for di 106 pais.

Segun cu bishitantenan tabata tuma e tournan, nan a bin realisá masha lihé cu den mayoria área, nan por a mira mas cu exhibicion di potret so. Nan por a drenta den e vários departamentonan mes, bishitá e oficinanan i otro lugánan di trabou, i haña un bista a fondo dje trabou cu ta ser hací. Un punto sobresaliente dje tour tabata e edificio di Departamento di Audio/Video. Ei ta usa tremendo facilidadnan pa promové educacion di Bijbel! Mediante un seri di exhibicion i plachi informativo i tambe videonan corticu, a yuda bishitantenan comprendé con ta haci grabacion di bos i con ta traha video. Nan a siña algu tocante e investigacion extenso cu tin tras di trahamentu di acesorio i trahenan di ántes. Nan a mira con ta arma obhetonan pa pone riba plataforma cu un mínimo di gastu pero tog cu atencion remarcabel pa detaye. Nan a mira con ta usa música pa laga hende sinti cu nan ta manera den e esena cu nan ta mirando. Desde 1990 Sociedad a producí dies video na 41 idioma, resaltando un variedad di tema bíblico, ademas di otro videonan pa esnan cu ta usa idioma di seña mericano.

Hopi persona cu a tuma tour a bai n’e Laboratorio di Potret, e Departamento di Arte-Gráfico, Servicio di Informacion, cu ta duna servicio i entrenamentu di computer, e Departamento di Sirbishi cu ta supervisá e actividad di 11.242 congregacion i 572 superintendente biahero i Corespondencia di Redaccion, caminda tur aña nan ta contestá rond di 14.000 pregunta riba vários tema. E bishitantenan a keda impresioná cu e investigacion tras dje cartanan cu ta ser mandá i e interes genuino cu ta mustra den esnan kende nan cartanan cu pregunta ta duna evidencia cu nan ta purba vence problema serio.

Un fluho constante di esnan den e tour a bishitá e Departamento di Traduccion. Nan a keda sorprendí pa haña sa cu durante e último cincu añanan a agregá 102 idioma mas n’e cantidad den cua Sociedad ta percurá literatura bíblico. Rond mundu, mas o ménos 80 porciento di Testigo di Jehova ta lesa publicacionnan di Sociedad den idiomanan cu no ta ingles. Pa cumpli cu nan necesidadnan, tin mas cu 1.700 boluntario ta traha riba e tereno di traduccion den 100 pais. Exhibicionnan a mustra E Toren di Vigilancia den e idiomanan di América, Europa, Asia i Africa. Bishitantenan por a mira e Traduccion di Mundu Nobo di Bijbel na e 31 idiomanan cu a publik’é. Nan a haña sa cu awor publicacionnan di Watch Tower ta disponibel na 332 idioma i cu a publicá e foyeto Kico Dios Ta Rekerí di Nos? den 219 di esakinan.

A mustra bishitantenan n’e Departamento di Asuntunan Hurídico e vários camponan di actividad cu ta rekerí atencion hurídico rond mundu. Den un video, nan a mira grabacion di un sesion di corte caminda un abogado Testigo tabata pleita un caso tocante transfusion di sanger. Tambe nan a haña sa loke Sociedad ta haciendo pa tene e caminda habrí pa predicacion público dje bon nobo. (Filipensenan 1:7) A hala atencion n’e decision na mart dje aña aki di un corte di distrito federal cu a manda e municipio di Oradell, New Jersey, Merca, cambia su leynan pa asina eliminá e rekisitonan di pidi permit i di cana cu badge ora Testigonan di Jehova kier participá den nan ministerio público di cas pa cas den e comunidad ei.

Esaki sigur no ta tur loke e bishitantenan a mira. Entre otro, nan a examiná exhibicionnan di construccion den e Shop di Panel prefabricá i a pasa n’e planta di Purificá Awa Sushi, e Planta di Coriente, e Planta di Traha Awa Potabel, i e hopi shopnan di mantencion. Tabata un oportunidad único.

Programa di Dedicacion Ta Enfatisá Educacion Divino

A tene e programa mes di dedicacion diarason, 19 di mei, cuminsando 4:00 djatardi. E multitud gososo di 6.929 persona a incluí miembronan di personal dje sede mundial, invitadonan di Sociedad i 372 persona cu a reuní n’e sucursal di Cánada, cu tabata conectá electrónicamente.

Tabata en berdad un placer p’e auditorio tende palabranan caluroso di bon biní di Milton G. Henschel, presidente di Sociedad Watch Tower. Despues Theodore Jaracz, miembro dje Cuerpo Gobernante i presidente p’e ocasion, a introducí William Malenfant. Ora el a presentá “Puntonan Sobresaliente dje Programa di Construccion,” el a entrevistá tres ruman cu a hunga un papel importante den e desaroyo, diseño i construccion dje Centro Educativo di Watchtower. Den transcurso dje entrevistanan a bini dilanti cu durante e añanan dje trabounan di construccion mes, mas cu 8.700 trahadó temporal a bini riba nan propio gastu pa traha riba e proyecto. Esta un testimonio excelente dje unidad i generosidad cu a bira posibel mediante siñansa divino!

Despues a bini un simposio titulá “Educacion Divino Riba Escala Mundial,” presentá pa cuater miembro dje Cuerpo Gobernante. John E. Barr a enfatisá cu e base pa educacion divino ta e Palabra di Dios, Bijbel, cu ta animá cristiannan pa “sigui producí fruta den tur bon obra i aumentá den e conocimentu exacto di Dios.” (Colosensenan 1:10) Daniel Sydlik a splica con educacion divino ta organisá teocráticamente for dje cabes dje congregacion cristian, Jesucristo, bin abou na tur miembro dje hermandad mundial. (1 Corintionan 12:12-27) E dos partinan final dje simposio, cu Gerrit Lösch i Carey Barber a desaroyá, a mustra con educacion divino ta cualificá ministernan pa alcansá hende tur caminda i instruí nan pa nan tambe por cana den Dios su caminda.—Isaías 2:1-4; 2 Corintionan 3:5.

Pa laga e auditorio cera conocí cu e vários scolnan cu ta funcioná n’e centro educativo aki, a entrevistá i combersá cu e instructornan i tambe otronan enbolbí den nan funcionamentu. Aki a mustra e papel cu cada scol ta hunga pa yuda cumpli cu e programa di educacion divino riba escala mundial. A splica cu Scol di Galad ta enfocá riba un estudio di cada buki di Bijbel, riba e historia moderno di Jehova su pueblo, i riba preparacion pa sirbishi di misionero. E scol di sucursal ta un estudio extenso i maraviyoso dje cantidad di terenonan di actividad den cua miembronan di Comiténan di Sucursal ta enbolbí. E Scol pa Superintendentenan Biahero ta diseñá no solamente pa yena e necesidadnan di rumannan biahero sino tambe pa ekipá nan pa percurá e clase di yudansa spiritual cu lo ta specialmente beneficioso p’e congregacionnan.

Pa concluí e bunita programa, Lloyd Barry di Cuerpo Gobernante a duna e discurso di dedicacion riba e tema “Edificando cu Nos Magnífico Creador.” El a señalá cu e Creador, Jehova, tin deleite den tur su creacionnan i ta invitá nos pa alegrá huntu cuné. (Isaías 65:18) Siendo cu “esun cu a traha tur cos ta Dios,” e mérito final pa henter e construccion aki ta bai na Jehova Dios. (Hebreonan 3:4) Despues cu el a expresá e pensamentunan ei, e orador a haci un oracion yen di sintimentu, dedicando e Centro Educativo di Watchtower na Jehova, nos Magnífico Creador.a

No tin duda cu esnan cu a asistí n’e festividadnan di henter e siman ei lo corda esakinan pa hopi tempu. Pakico no organisá un bishita n’e Centro Educativo di Watchtower? Nos ta sigur cu un bishita i un tour den dje lo ta un animacion pa bo den bo esfuersonan pa siña mas tocante nos Creador amoroso i pa biba segun su normanan hustu.

[Nota]

[Plachinan na página 10]

Un aula yen-yen i sobrá hende sintá den comedor

[Plachinan na página 10]

E tournan tabata un rasgo specialmente gososo