Ora ‘Bientu Ta Contra Nos’

Describiendo e experencia di bida real dje disipelnan di Jesus segun cu nan tabata lucha pa crusa e laman di Galilea den un boto, e Evangelio di Marco ta bisa cu nan tabata “pasa trabou ora nan tabata rema, pasobra bientu tabata contra nan.” Miéntras e tabata na costa ainda, Jesus a mira cu nan ta den problema, i milagrosamente el a cana riba awa bai cerca nan. Ora el a subi den boto huntu cu nan, bientu a calma.—Marco 6:48-51.

E mésun escritor bíblico a informá cu na un ocasion anterior, un ‘tempestad di bientu violento a cuminsá,’ i cu Jesus “a reprendé bientu . . . , i bientu a baha, i un gran calma a cuminsá reina.”—Marco 4:37-39.

Aunke awendia nos no tin e privilegio di experenciá sucesonan milagroso asina, nos por siña hopi for di nan. Ya cu nos ta hende imperfecto, i ta biba den tempunan peligroso, nos no ta inmuno pa bientunan di adversidad. (2 Timoteo 3:1-5) De facto, tin bes nos por sinti cu afliccion relacioná cu pruebanan personal ta alcansá e intensidad di tempestad. Pero tin alivio! Jesus ta extendé e invitacion: “Bini cerca mi, boso tur cu ta afaná i cargá, i lo mi refrescá boso.”—Mateo 11:28.

Ora ta parce cu ‘e bientunan ta contra nos,’ nos por experenciá “un gran calma” di curason. Con asina? Dor di confia den Jehova Dios su promesanan infalibel.—Compará cu Isaías 55:9-11; Filipensenan 4:5-7.