Nos Tin Mester di Jehova Su Organisacion

BO A yega di tende hende bisa: “Mi ta kere den Dios, pero no den religion organisá”? Hopi bes hendenan cu na un tempu tabata ferviente baidó di misa, pero cu a keda desilusioná debí cu nan iglesia no por a satisfacé nan necesidad spiritual, ta expresá un punto di bista asina. Aunke religion organisá en general a desapuntá nan, hopi hende ta insistí cu ainda nan kier adorá Dios. Sin embargo, nan ta kere cu ta mihó nan ador’é na nan manera en bes di haci esei den asociacion cu un iglesia of otro organisacion.

Kico Bijbel ta bisa? Dios kier pa cristiannan asociá cu un organisacion?

Cristiannan di Promé A Saca Beneficio dor cu Nan Tabata Organisá

Na Pentecoste di aña 33 E.C., Jehova no a basha su spiritu santu riba un par di creyente isolá, sino riba un grupo di homber i muher cu a bini huntu “na e mésun lugá,” esta, den un kamber ariba den e stad Jerusalem. (Echonan 2:1) N’e tempu ei, e congregacion cristian, cu a bira un organisacion internacional, a ser formá. Esaki a resultá di ta un berdadero bendicion p’e cristiannan di promé ei. Di con? Un motibu ta cu nan a haña un asignacion importante—esun di predicá e bon nobo di Dios su Reino “den tur e tera habitá.” (Mateo 24:14) Den e congregacion cristian, esnan recien combertí por a siña for dje compañeronan creyente experenciá con pa cumpli cu e trabou di predicá.

No a dura mashá, cu e mensahe di Reino a plama hopi mas leu cu e murayanan di Jerusalem. Entre aña 62 i 64 E.C., apostel Pedro a skirbi su promé carta n’e cristiannan cu tabata “plamá den Ponto, Galacia, Capadocia, Asia, i Bitinia,” tur situá den Turkia moderno. (1 Pedro 1:1) Tabatin creyente tambe na Palestina, Líbanon, Siria, Chipre, Grecia, Creta i Italia. Pa tempu cu Pablo a skirbi e Colosensenan rond di 60 pa 61 E.C., e bon nobo a ser “predicá den tur creacion cu ta bou di shelu.”—Colosensenan 1:23.

Un di dos beneficio di asociá cu un organisacion tabata e animacion cu cristiannan por a duna otro. Den asociacion cu e congregacion, cristiannan por a tende discursonan inspirador, studia e Santu Scritura huntu, compartí experencianan cu ta fortalecé fe i uni huntu cu nan compañeronan den oracion. (1 Corintionan, capítulo 14) I hombernan maduro por a “pastoreá e tou di Dios.”—1 Pedro 5:2.

Como miembronan dje congregacion, tambe cristiannan ta siña conocé otro i stima otro. Leu di experenciá e asociacion aki cu e congregacion como un peso, cristiannan di promé a ser edificá i fortalecé dor di dje.—Echonan 2:42; 14:27; 1 Corintionan 14:26; Colosensenan 4:15, 16.

Un otro motibu pakico e organisacion of congregacion uní mundialmente tabata necesario ta pa promové unidad. Cristiannan a siña “papia di acuerdo.” (1 Corintionan 1:10) Esaki tabata vital. Miembronan dje congregacion a bini for di un variedad di antecedente educacional i social. Nan tabata papia idiomanan diferente, i ta obvio cu nan personalidadnan no tabata mescos. (Echonan 2:1-11) Algun bes a surgi un berdadero diferencia di opinion. Sin embargo, cristiannan a haña yudansa pa resolvé e diferencianan ei denter dje congregacion.—Echonan 15:1, 2; Filipensenan 4:2, 3.

Pa cuestionnan serio cu ancianonan local no por a atendé, nan tabata acudí na superintendentenan biahero maduro, manera Pablo. Pa asuntunan importante di doctrina nan tabata acudí na un cuerpo gobernante central, situá na Jerusalem. Originalmente, e apostelnan di Jesucristo tabata esnan cu a forma e cuerpo gobernante. Pero despues el a incluí tambe ancianonan dje congregacion na Jerusalem. Tur congregacion tabata reconocé e autoridad cu Dios a duna e cuerpo gobernante i tambe su representantenan pa organisá e ministerio, nombra hombernan pa puestonan di sirbishi i tuma decision tocante asuntunan di doctrina. Ora e cuerpo gobernante a establecé un cuestion, e congregacionnan tabata aceptá e decision i nan “a alegrá debí n’e animacion.”—Echonan 15:1, 2, 28, 30, 31.

Sí, Jehova a usa un organisacion den promé siglo. Pero kico di awe?

Nos Tin Mester di un Organisacion Awe

Mescos cu nan paralelonan di promé siglo, Testigonan di Jehova djawe tambe ta tuma nan comision di predicá e bon nobo dje Reino mashá na serio. Un manera cu nan ta cumpli cu e trabou aki ta dor di distribuí Bijbel i yudansanan pa studia Bijbel. I esaki ta rekerí organisacion.

Mester prepará publicacionnan cristian cuidadosamente, controlá nan riba exactitud, druk nan i manda nan p’e congregacionnan. Na nan turno, cristiannan individual tin cu ofrecé nan mes boluntario pa hiba e literatura pa esnan cu kier lesa nan. Asina e mensahe di Reino a alcansá miyones di hende. Publicadónan dje bon nobo ta haci esfuerso pa cumpli cu nan actividad di predicá den un manera ordená, haciendo sigur cu nan no ta traha niun parti di nan teritorio di mas, i neglishá otronan. Tur esaki ta rekerí organisacion.

Ya cu “Dios no ta parcial,” mester traducí Bijbel i literatura bíblico. (Echonan 10:34) Actualmente, e revista aki ta disponibel den 132 idioma, i su compañero, Spierta!, ta ser publicá den 83 idioma. Esaki ta rekerí timnan bon organisá di traductornan rond mundu.

Ora miembronan di congregacion ta asistí na reunionnan cristian i asamblea, nan ta ricibí animacion. Ei, nan ta tende discursonan bíblico stimulante, nan ta studia e Scritura huntu, compartí experencianan edificante i nan ta djoin nan compañeronan di adoracion den oracion. I mescos cu nan rumannan den promé siglo, nan ta disfrutá di bishitanan fortalecedor di fe di superintendentenan biahero amoroso. Pues, awe cristiannan ta forma ‘un tou, un wardador.’—Juan 10:16.

Naturalmente, Testigonan di Jehova no ta perfecto, mescos cu nan paralelonan di promé no tabata. Tog, nan ta traha huntu den unidad. Como resultado, e trabou di predicá e Reino ta ser hací rond e tera.—Echonan 15:36-40; Efesionan 4:13.

[Plachi na página 31]

Awe cristiannan ta forma ‘un tou, un wardador’