Pregunta di Lector
Isaías capítulo 53 ta contené un profecia Mesiánico famoso. Versículo 10 ta bisa: “Jehova mes tabatin deleite den aplast’é; el a hacié malu.” Kico esaki ta nificá?
Ta fácil pa mira pakico un pregunta tocante Isaías 53:10 lo por lanta. Cristiannan berdadero no ta pensa cu nos Dios compasivo i tierno lo tin deleite den aplastá of haci cualkier hende malu. Bijbel ta duna nos e base pa confia cu Dios no tin gustu den tormentá hende inocente. (Deuteronomio 32:4; Jeremías 7:30, 31) Atrabes di siglonan, tal bes Jehova a permití sufrimentu tuma lugá de bes en cuando pa motibunan consistente cu su sabiduria i amor. Pero siguramente e no a pone su Yu stimá, Jesus, sufri. Kico anto, e pasashi aki ta bisa realmente?
Wel, loke por yuda nos capta e nificacion ta lesa e versículo completo, tumando nota dje dos biahanan cu e palabra “deleite” ta aparecé. Isaías 53:10 ta bisa: “Jehova mes tabatin deleite den aplast’é; el a hacié malu. Si bo pone su alma como un ofrenda di culpa, lo e mira su desendencia, lo e prolongá su dianan, i den su man loke ta e deleite di Jehova lo tin éxito.”
E mensahe general di Bijbel ta indicá cu “e deleite di Jehova,” mencioná na fin dje versículo, ta enfocá riba cumpli cu su propósito mediante e Reino. Dor di haci esei Jehova lo vindicá su soberania i lo permití pa picá heredá ser eliminá for di hende obediente, esta, nos picánan. (1 Crónicanan 29:11; Salmo 83:18; Echonan 4:24; Hebreonan 2:14, 15; 1 Juan 3:8) E clave pa tur esaki ta, cu e Yu di Dios tabatin cu bira hende i percurá e sacrificio di rescate. Manera nos sa, Jesus a sufri den e proceso. Bijbel ta bisa nos cu el “a siña obedencia for dje cosnan cu el a sufri.” Pues, Jesus a ricibí beneficio for di e sufrimentu ei.—Hebreonan 5:7-9.
Jesus tabata sa di antemano cu e curso noble cu e kier a sigui lo a enbolbé poco agonia. Esei ta bisto for di su palabranan registrá na Juan 12:23 i 24, caminda nos ta lesa: “E ora a yega p’e Yu di hende ser glorificá. Di berdad mes mi ta bisa boso: A ménos cu un pipita di trigu ta cai na suela i muri, e ta keda un solo pipita; pero si e muri, e ora ei e ta producí hopi fruta.” Sí, Jesus tabata sa cu lo e tabatin cu mantené su integridad asta te na morto mes. E relato ta sigui: “‘Awor mi alma ta perturbá, i kico lo mi bisa? Tata, salbá mi for dje ora aki. No obstante, ta p’esaki mes mi a yega n’e ora aki. Tata, glorificá bo nomber.’ Anto a bini un bos for di shelu: ‘Mi a glorifik’é i tambe lo glorifik’é atrobe.’”—Juan 12:27, 28; Mateo 26:38, 39.
Ta den e contexto aki nos por comprendé Isaías 53:10. Jehova tabata sa bon cu e experencia di su Yu lo a encerá cu den un sentido e ta ser aplastá. Sin embargo, teniendo na mente e resultado glorioso i extenso cu esei lo a trece cuné, Jehova tabatin deleite den loke Jesus lo tabatin cu experenciá. Den e sentido ei Jehova ‘tabatin deleite den aplastá’ e Mesías, of den e aplastamentu di e Mesías cu lo a tuma lugá. I Jesus tambe tabatin deleite den loke e por a haci, i a logra haci. Berdaderamente, manera Isaías 53:10 ta concluí, ‘den su man loke ta e deleite di Jehova tabatin éxito.’