Un Les for di e Nabegante

NABEGÁ bo so riba laman ganchu por ta agotador. Cansancio por doof un nabegante, i fácilmente esaki por hink’é den un situacion peligroso cu ta pon’é cometé eror i tuma decisionnan robes. Pa e motibu aki, e ta apreciá e balor di un anker pa laman ganchu. E anker ta permití un nabegante agotá, sosegá i recuperá sin drif bai den peliger. Na mésun tempu, e anker ta forsa e cabes dje boto den direccion di bientu i ola, i ta mantené e boto den su posicion di mas stabil.

Mescos cu nabegantenan ta confrontá hopi peliger riba laman, cristiannan ta confrontá e preshonnan constant dje mundu aki, i nan tin mester di sosiegu. De facto, un biaha Jesus a recomendá su disipelnan: “Boso, ban den privá, na un lugá solitario i sosegá un poco.” (Marco 6:31) Awendia, algun kisas ta tuma un par di siman pa bai di biahe of un fin di siman liber pa relahá huntu cu nan famia. Ocasionnan asina por refrescá i yena hende cu vigor atrobe. Pero, con nos por haci sigur cu nos ta safe spiritualmente durante e periodonan ei? Kico por sirbi como nos anker spiritual pa yuda nos mantené stabilidad i no drif bai?

Generosamente, Jehova a haci un percuracion disponibel pa nos. Esaki no ta nada otro sino su Palabra Santu, Bijbel. Dor di les’é tur dia, nos por keda den un relacion estrecho cu Jehova i nunca drif bai for di dje. Bijbel su conseho por stabilisá nos i yuda nos resistí tentacion di Satanas i su mundu. Si nos mantené un programa di lesa Bijbel riba un base regular, asta ora nos no ta den e rutina di tur dia, esaki por sirbi pa ankra nos spiritualmente.—Hosué 1:7, 8; Colosensenan 2:7.

E salmista ta recordá nos cu “felis ta e homber” kende su “deleite ta den e ley di Jehova, i den su ley e ta lesa na bos abou di dia i anochi.” (Salmo 1:1, 2) Lesa e Palabra di Dios tur dia lo duna nos e resultado “felis” di ta realmente refrescá i cu vigor atrobe, prepará pa sigui cu nos bida cristian.