Un Opticiën Ta Sembra un Simia

Kico e esfuerso di un opticiën na Lviv, Ucrania, tin di haci cu e formacion di un congregacion di Testigonan di Jehova di abla ruso na Haifa, Israel, un 2.000 kilometer leu? Esaki ta un historia cu ta demostrá e valides dje declaracion bíblico na Eclesiástes 11:6: “Sembra bo simia mainta i te atardi no laga bo man sosegá; pasobra bo no sa unda esaki lo tin éxito.”

NOS historia ta cuminsá na 1990 ora cu Ella, un señora hóben di antecedente hudiu, tabata biba na Lviv. Ella cu su famia tabata preparando pa imigrá bai biba na Israel. Poco tempu promé cu nan bai, Ella tabatin un afsprak cu un opticiën cu ta un Testigo di Jehova. E tempu ei, e obra di Testigonan di Jehova tabata prohibí na Ucrania. No obstante, e opticiën a tuma e iniciativa pa compartí su creencianan basá riba Bijbel cu Ella. El a sorprendé Ella dor di bisa cu Dios tin un nomber personal. Esei a lanta Ella su curiosidad, i nan tabatin un bon combersacion bíblico.

Ella a disfrutá asina hopi dje combersacion cu el a pidi pa tene un combersacion mas e siguiente siman i un mas e siman despues di esei. Su interes tabata creciendo, pero tabatin un problema. Tempu tabata acercando rápidamente pa e famia muda bai Israel. Ella tabatin asina hopi cos di siña ainda! Pa por a saca máximo probecho dje tempu cu a resta, el a pidi pa por tin un studio bíblico tur dia te ora e tabatin cu bai. Aunke Ella no a reanudá su studio asina cu el a yega Israel, e simia di berdad a saca rais den su curason. Pa fin dje aña, e tabata studia Bijbel atrobe seriamente.

Guera a cuminsá den Golfo Pérsico, i Irak tabata bombardiá Israel cu misil. Cu frecuencia esaki tabata e tópico di combersacion. Un biaha den supermarket, Ella a tende e combersacion di un famia di imigrantenan nobo di abla ruso. Aunke ainda e mes tabata studiando Bijbel, Ella a acercá e famia i compartí cu nan e promesa bíblico di un mundu pacífico. Como resultado, e wela Galina, e mama Natasha, e yu homber Sasha (Ariel), i e yu muher Ilana, tur a djoin Ella su studio di Bijbel.

Sasha tabata e promé miembro di famia cu a yega n’e punto di bautismo, apesar di hopi prueba. Aunke su puntonan na scol tabata hopi haltu, nan a kit’é for di scol pasobra su concenshi cristian no a permitié participá den entrenamentu premilitar, cu tabata un parti obligatorio dje programa di scol. (Isaías 2:2-4) Sasha su caso a bai te Corte Supremo Israelí na Jerusalem, cu encomendablemente a manda pa tuma Sasha bek na scol pa e por a caba e aña escolar. E caso a ricibí publicidad nacional. Consecuentemente, hopi israelí a bira conciente dje creencianan di Testigonan di Jehova.a

Despues di a caba scol secundario, Sasha a drenta e ministerio di tempu completo di Testigonan di Jehova. Awe e ta sirbi como pionero special i anciano di congregacion. Sasha su ruman muher Ilana, a djoin e den e ministerio di tempu completo. Tantu nan mama como nan wela ta Testigonan bautisá. E simia cu e opticiën a sembra tabata duna fruta ainda!

Miéntras tantu, Ella a sigui haci progreso spiritual i pronto tabata predicá di cas pa cas. Na su promé porta, Ella a topa Faina, kende a caba di yega for di Ucrania. Faina tabata sufri di depresion. Despues Ella a haña sa cu djis promé cu el a bati na Faina su porta, e señora angustiá a resa na Dios: “Mi no sa ken bo ta, pero si bo ta tende mi, yuda mi.” E cu Ella tabatin un combersacion stimulante. Faina a haci hopi pregunta i a considerá cuidadosamente e contestanan cu el a haña. Cu tempu, el a bira convencí cu Testigonan di Jehova ta siña e berdad for di Bijbel. El a ahustá su programa di educacion universitario di manera cu e por a dedicá mas tempu na e congregacion i na e trabou di predicá. Na mei 1994, Faina a bautisá. E tambe a cuminsá den e sirbishi di pionero, manteniendo su mes cu trabou part-time riba tereno di computer.

Na november 1994, durante cu Ella tabata den e trabou di predicá, el a sinti su mes di ripiente masha swak mes. El a bai hospital caminda testnan a revelá cu e tabatin un úlcera ta sangra den tripa. Pa anochi, Ella su hemoglobina a baha te na 7,2. Un anciano den Ella su congregacion, e presidente dje Comité local di Contacto cu Hospital (CCH), a duna e dokternan informacion riba un cantidad di procedura médico cu no a rekerí uso di sanger.b Nan a oper’é cu éxito sin sanger, i Ella a recuperá completamente.—Echonan 15:28, 29.

Ella su ginecólogo, Karl, un hudiu cu a nace na Alemania, a keda masha impresioná. Anto el a corda cu su mayornan, kendenan a sobrebibí e Holocausto, tabata conocé Testigonan di Jehova den e camponan di concentracion. Karl a haci hopi pregunta. Aunke e tabata sumamente ocupá cu su oficina di dokter, tog Karl a traha tempu pa un studio regular di Bijbel. Pa e siguiente aña, e tabata asistí na e reunionnan cristian semanal.

Kico a resultá for dje simia cu e opticiën a sembra? Nos a mira caba kico a pasa cu Sasha cu su famia. Pa loke ta Ella, e ta un pionero special. Su yu muher Eina, cu net a caba scol secundario, a cuminsá cu su propio carera como pionero. Faina tambe ta sirbi como pionero special. Pa loke ta Karl, Ella su ginecólogo, awor e ta un Testigo bautisá i un sirbidó ministerial, compartiendo e poder curativo di berdad bíblico cu su pashentnan i cu otro hende.

E grupo chikitu di imigrante di abla ruso cu a cuminsá como parti dje Congregacion Hebreo Haifa a bira awor un congregacion ruso celoso di mas cu 120 publicadó di Reino. De echo, e aumento aki ta en parti dor cu un opticiën na Lviv a probechá di un oportunidad pa sembra un simia!

[Nota]

[Mapa na página 29]

(Pa e teksto den su formato kompleto, wak e publikashon)

UCRANIA

ISRAEL

[Rekonosementu]

Mountain High Maps® Copyright © 1997 Digital Wisdom, Inc.

[Plachinan na página 30]

Ella cu su yu muher Eina

[Plachi na página 31]

Un grupo felis di Testigonan di abla ruso na Haifa. Di robes pa drechi: Sasha, Ilana, Natasha, Galina, Faina, Ella, Eina i Karl