BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • w01 1/2 pág. 24-29
  • Sirbiendo Unda cu Tabatin Mester di Mi

No tin vidio disponibel pa esaki.

Despensa, tin un problema pa habri e vidio.

  • Sirbiendo Unda cu Tabatin Mester di Mi
  • E Toren di Vigilansia Anunsiando e Reino di Yehova Dios—2001
  • Suptema
  • Informashon Similar
  • Nos Ta Haci e Berdad di Bijbel di Nos Mes
  • Enfrentando Violencia di Multitud Desordená
  • Sirbishi di Misionero
  • Lantando un Famia
  • Resultadonan Insigur di Bida di Famia
  • Manteniendo Bista i Curason Fiha Riba e Premio
    E Toren di Vigilansia Anunsiando e Reino di Yehova Dios—1996
E Toren di Vigilansia Anunsiando e Reino di Yehova Dios—2001
w01 1/2 pág. 24-29

Historia di Bida

Sirbiendo Unda cu Tabatin Mester di Mi

SEGUN E RELATO DI JAMES B. BERRY

Tabata aña 1939. E Gran Depresion tabata haciendo bida na Merca pisá, i guera tabata menasá rond Europa. Ami cu mi ruman homber mas chikitu Bennett, a biaha for di nos cas na Mississippi bai Houston, Texas, en busca di trabou.

UN DIA cerca di fin di zomer, nos a tende un anuncio dramático na radio: E ehércitonan di Hitler a marcha drenta Polonia. “Armagedon a cuminsá!” mi ruman homber a sclama. Mesora nos a kita for di trabou. Nos a bai na e Salon di Reino mas cercano i a asistí na nos promé reunion. Di con un Salon di Reino? Laga mi cuminsá for di principio.

Mi a nace na Hebron, Mississippi, na 1915. Nos a biba den un área di cunucu. Studiantenan di Bijbel, manera Testigonan di Jehova tabata yama e tempu ei, tabata pasa dor dje área mas o ménos un biaha pa aña i tabata haci areglo pa tene un discurso na un hende su cas. Como resultado, mi mayornan tabatin hopi publicacion bíblico. Ami cu Bennett a bin aceptá loke e bukinan aki a siña: Fiernu no ta cayente, alma ta muri i e hustunan lo biba riba tera pa semper. Tog ainda nos mester a siña hopi cos mas. Poco despues di a caba scol, ami cu mi ruman homber a coge rumbo pa Texas en busca di trabou.

Ora cu nos finalmente a haña contacto cu e Testigonan na e Salon di Reino, nan a puntra nos si nos tabata pionero. Nos no tabatin idea cu un pionero tabata un minister di tempu completo di Testigonan di Jehova. Despues nan a puntra nos si nos lo kier predicá. “Sigur no!” nos a respondé. Nos a asumí cu nan lo a manda un hende cu nos pa mustra nos con pa predicá. En bes di esei, nan a djis duna nos un mapa i a bisa nos: “Traha einan!” Wel, ami cu Bennett no tabata sa nada-nada tocante con pa predicá, i nos no kier a pasa bergwensa. Finalmente, nos a djis pone e karchi di teritorio den un brievenbus i a bai Mississippi bek!

Nos Ta Haci e Berdad di Bijbel di Nos Mes

Despues di a regresá cas, nos a lesa e publicacionnan dje Testigonan tur dia pa casi un aña. Nos cas no tabatin coriente, pues anochi nos tabata lesa den claridad di candela. Den e dianan ei sirbidónan di zona, esta superintendentenan biahero, tabata bishitá congregacionnan di Testigonan di Jehova i tambe Testigonan isolá pa fortalecé nan spiritualmente. Un dje sirbidónan aki, Ted Klein, a bishitá nos congregacion i a compañá ami cu Bennett den e trabou di predicá di cas pa cas, i hopi biaha e tabata traha cu nos tur dos pareu. El a splica nos kico e trabou di pionero a encerá.

Trahando den su compania a stimulá nos pa pensa riba haci mas pa sirbi Dios. Di manera cu dia 18 di april 1940, ruman Klein a bautisá ami, Bennett i nos ruman muher Velva. Nos mayornan tabata presente na nos bautismo, i nan tabata contentu cu nos decision. Rond di dos aña despues, nan tambe a bautisá. Nan tur dos a keda fiel na Dios te na nan morto; Tata a muri na 1956 i Mama na 1975.

Ora ruman Klein a puntra mi si lo mi por a traha pionero, mi a bis’é cu lo mi tin gana di hacié, pero cu mi no tabatin placa, ni paña, nada. E di: “No wori. Lo mi soru p’esei.” I esei el a haci. Promé el a manda mi solicitud aden pa traha pionero. Despues el a hiba mi New Orleans huntu cuné, mas o ménos 300 kilometer leu, i a mustra mi algun bunita apartamento riba un Salon di Reino. Nan tabata pa pionero. No a tarda hopi cu mi a muda bai einan i a cuminsá mi carera como pionero. E Testigonan na New Orleans a yuda dor di duna e pioneronan paña, placa i cuminda. Den dia, e rumannan tabata trece cuminda i lagu’é na porta of tabata asta pon’é den frishider pa nos. Un ruman homber cu tabata doño di un restaurant eibanda a invitá nos pa pasa regularmente na ora di cera pa haña cuminda frescu—manera carni, pan, chili con carne i tert—cu a sobra dje dia.

Enfrentando Violencia di Multitud Desordená

Despues di un tempu, mi a ser asigná pa traha pionero na Jackson, Mississippi. Ami cu mi partner hóben, a confrontá algun violencia di multitudnan desordená einan, i a parce cu e polisnan local tabata apoyá nan. Tabata mescos na nos siguiente asignacion: Columbus, Mississippi. Como cu nos tabata predicá na hende di tur rasa i nacionalidad, tabatin cierto hende blancu cu a odia nos. Hopi hende a kere cu nos tabata culpabel di instigá rebelion. E comandante local di Legion Americano, un organisacion sumamente patriótico di veteranonan di guera, a pensa asina. Diferente biaha el a instigá multitudnan desordená rabiá pa atacá nos.

E promé biaha cu nan a atacá nos na Columbus, un multitud desordená a bini riba nos miéntras nos tabata ofrecé revista riba caya. Nan a pusha nos contra un bentana di glas di un pacus. Un grupo grandi di hende a bin para pa wak kico ta pasando. Polis a yega unbes i a hiba nos stadhuis. E multitud desordená cu a sigui nos te stadhuis, a anunciá dilanti tur e oficialnan einan cu si nos bandoná e stad pa un cierto fecha, nos lo por bai cu nos cueru. Si nos a sali despues dje fecha ei, nos lo bai sin nos cueru! Nos a haña cu ta mihó nos bai for dje stad pa un tempu. Pero un par di siman despues, nos a regresá i a bolbe cuminsá predicá.

No hopi tempu despues, un gèng di ocho homber a atacá nos i a obligá nos drenta den dos auto cu nan tabatin. Nan a hiba nos den mondi, kita nos paña, i a duna nos cada un 30 golpi cu mi faha! Nan tabatin scopet i asta cabuya, i mi tin cu bisa cu nos tabata morto spantá. Ami a kere cu nan lo a mara nos i benta nos den riu. Nan a sker nos literatura i a plama nan i asta nan a bati nos tocadisco kibra na werki riba un pida troncon.

Despues di a suta nos, nan a bisa nos pa bisti nos paña i cana bai den un hanchi den e mondi sin wak patras. Segun nos tabata cana, mi a ègt pensa cu si nos a tribi bira wak, nan lo a tira nos mata, i keda sin haña castigu! Pero despues di un par di minuut, nos a tende e autonan core bai.

Na un otro ocasion, un multitud desordená rabiá a core nos tras, i nos tabatin cu mara nos pañanan rond di nos garganta i landa crusa un riu pa por a scapa. No muchu tempu despues di esei, nan a arestá nos bou di acusacion di ta instigá rebelion. Nos a pasa tres siman den prizon promé cu e huicio a tuma lugá. E caso a ricibí publicidad amplio den Columbus. Nan a asta permití e studiantenan di un universidad den cercania sali trempan pa nan por a asistí. Ora e dia a yega, e sala di corte tabata yen-yen, tabatin solamente lugá pa para! Entre esnan cu a testificá pa Estado tabatin dos pastor, e alcalde i polis.

E rumannan a manda un abogado Testigo yamá G. C. Clarke i su compañero pa representá nos. Nan a pidi pa debí na falta di evidencia anulá e cargonan contra nos di a instigá rebelion. E abogado cu tabata traha huntu cu ruman Clarke, aunke e no tabata un Testigo di Jehova, a haci declaracionnan poderoso na nos fabor. Na dado momento el a bisa e hues: “Hende ta bisa cu Testigonan di Jehova ta loco. Loco? Nan di cu Thomas Edison tabata loco!” Anto el a mustra riba un lus i a bisa: “Pero wak e pera di lus ei!” Por tabatin hende cu a considerá cu Edison—e persona cu a inventá pera di lus—tabata loco, pero niun hende por a nenga su logronan.

Despues di a tende e testimonio, e hues cu a presidí a anunciá n’e fiscal: “Bo no tin niun tiki evidencia cu nan a instigá rebelion, i nan tin derecho di haci e trabou aki. No trece nan bek den e sala di corte aki i malgastá tempu i placa di gobiernu i tambe mi tempu, sino te ora bo tin evidencia!” Victoria pa nos!

Sin embargo, despues e hues a yama nos den su oficina. E tabata sa cu henter e stad tabata contra su decision. P’esei el a spierta nos: “Loke mi a bisa tabata di acuerdo cu ley, pero mi conseho personal na boso tur dos ta: Sali for di aki, of nan ta mata boso!” Nos tabata sa cu e tin rason, pues nos a bai for dje stad.

Di einan mi a djoin Bennett cu Velva, kendenan tabata sirbi na Clarksville, Tennessee, como pionero special. Despues di un par di luna, nos a ser asigná na Paris, Kentucky. Un aña i mei despues, nos tabata a punto di forma un congregacion einan ora ami cu Bennett a ricibí un invitacion masha special.

Sirbishi di Misionero

Ora nos a mira e invitacion pa asistí na e di dos klas di Scol Bíblico di Galad di Watchtower, nos a pensa: ‘Nan a haci un fout! Pakico nan lo invitá dos mucha homber simpel di Mississippi pa e scol ei?’ Nos a pensa cu nan lo tabata kier hende educá, pero di tur manera nos a bai. Tabatin 100 studiante den e klas, i e curso a dura cincu luna. Graduacion a tuma lugá dia 31 di januari 1944, i nos tabata ansioso pa sirbi den exterior. Pero e tempu ei, a tarda hopi pa haña pasport i visa, di manera cu tabata asigná e studiantenan temporalmente pa traha na Merca mes. Despues di a sirbi pa un tempu como pionero na Alabama i Georgia, ami cu Bennett a ricibí por fin nos asignacion: Barbádos, un isla den Caribe.

Segundo Guera Mundial tabata ainda den progreso, i e trabou i literatura di Testigonan di Jehova tabata prohibí na hopi lugá, incluso na Barbádos. Ora nos a yega einan, e duaneronan a habri i inspeccioná nos ekipahe i a haña e literatura cu nos a sconde. Nos a pensa: ‘Nos a coge awa.’ En bes di esei, un duanero a djis bisa nos: “Despensa cu nos mester a pasa dor di boso ekipahe; algun dje literatura aki ta prohibí na Barbádos.” Tog, el a laga nos pasa cu delaster un literatura cu nos a paketá! Despues, ora nos tabata duna testimonio na funcionarionan di gobiernu, nan tabata bisa cu nan no sa di con a prohibí e literatura. Despues di algun luna, nan a kita e prohibicion.

Nos tabatin hopi éxito den e ministerio na Barbádos. Nos cada un a conducí por lo ménos 15 studio bíblico, i mayoria dje studiantenan a progresá spiritualmente. Nos a keda contentu di mira algun asistí n’e reunionnan di congregacion. Sin embargo, debí cu pa basta tempu e literatura tabata prohibí, e rumannan tabata falta comprendimentu actual en cuanto con pa conducí e reunionnan. No a tarda hopi cu nos por a entrená vários ruman homber capas. Nos tabatin e placer di yuda hopi di nos studiantenan cuminsá den e ministerio cristian i di mira e congregacion crece.

Lantando un Famia

Despues di mas o ménos 18 luna na Barbádos, mi mester a operá i tabatin cu regresá Merca. Miéntras mi tabata einan, mi a casa cu Dorothy, un Testigo cu mi tabata tene contacto cuné via carta. Ami cu mi casá e ora ei a bai traha pionero na Tallahassee, Flórida, pero despues di seis luna nos a muda pa Louisville, Kentucky, caminda un Testigo a ofrecé mi un trabou. Mi ruman homber Bennett a sigui cu su sirbishi na Barbádos pa hopi aña. Despues el a casa cu un otro misionera i a sirbi como superintendente biahero riba e islanan. Cu tempu, nan tabatin cu regresá Merca pa motibu di salú. Nan a sigui sirbi congregacionnan di abla spañó como superintendente biahero te na Bennett su morto na 1990 na edad di 73 aña.

Na 1950, Dorothy a duna lus na nos promé yu, un yu muher cu nos a yama Daryl. Cu tempu nos a haña cincu yu. Nos di dos yu, Derrick, a muri cu dos aña i mei so di meningítis di wes’i lomba. Pero Leslie a nace na 1956 i Everett a sigui na 1958. Ami cu Dorothy a haci esfuerso pa lanta nos yunan den e caminda dje berdad bíblico. Semper nos a trata di tene un programa di studio di Bijbel di famia semanalmente i hacié interesante pa tur e muchanan. Ora Daryl, Leslie i Everett tabata yong ainda, nos tabata duna nan pregunta tur siman pa nan investigá i contestá e siguiente siman. Tambe nan a tene actuacion dje predicamentu di cas pa cas. Un di nan a bai den kashi i a pretendé di ta e doño di cas. E otro a para pafó i a bati na porta. Nan tabata usa frasenan pret pa intimidá otro, pero esaki a yuda nan desaroyá un amor pa e trabou di predicá. Tambe nos a predicá huntu cu nan regularmente.

Ora nos yu homber mas chikitu, Elton, a nace na 1973, Dorothy tabatin casi 50 aña i ami tabata cerca di haci 60. Den e congregacion, nan a yama nos Abraham cu Sara! (Génesis 17:15-17) E mucha hombernan mas grandi tabata bai cu Elton den e ministerio. Nos a sinti cu tabata un testimonio poderoso pa hende mira famia—ruman homber, ruman muher, mayornan, yunan—traha huntu, compartiendo berdad bíblico cu otro hende. Elton su ruman hombernan tabata tuma turno pa cargu’é riba nan scouder i pone un tratado den su man. Casi semper hende tabata scucha ora nan habri porta i mira e dushi mucha aki riba scouder di su ruman homber grandi. E mucha hombernan a siña Elton duna e persona e tratado ora e combersacion a caba i pa bisa un par di palabra. Asina el a cuminsá predicá.

Den transcurso di añanan, nos a logra yuda hende siña conocé Jehova. Na fin di añanan ’70, nos a muda di Louisville bai Shelbyville, Kentucky, pa sirbi den un congregacion caminda tabatin necesidad. Tempu nos tabata einan, nos a mira no solamente crecementu den e congregacion sino tambe nos a yuda pa haña un tereno i construí un Salon di Reino. Despues nan a pidi nos sirbi den un otro congregacion no muchu leu.

Resultadonan Insigur di Bida di Famia

Mare mi por a bisa cu tur nos yunan a keda den e caminda di Jehova, pero esei no tabata e caso. Despues cu nan a crece i a sali for di cas, tres di nos cuater yunan cu a keda na bida a bandoná e caminda di berdad. Sin embargo, nos yu homber Everett a sigui mi ehempel i a drenta e ministerio di tempu completo. Despues el a sirbi na e sede mundial di Testigonan di Jehova na New York i na 1984 el a ricibí invitacion pa asistí na e di 77 klas di Galad. Despues di a gradua, el a bai su asignacion na Sierra Leone, West África. Na 1988 el a casa cu Marianne, un pionero di Bélgica. Nan dos ta sirbi huntu como misionero for di e tempu ei.

Manera cualkier mayor por imaginá, tabata desalentador pa nos mira tres di nos yunan rechasá e caminda di bida cu ta satisfaciente awor i cu ta contené e bunita speransa di bida eterno den paradijs riba tera den futuro. Tin biaha mi tabata culpa mi mes. Pero mi a haña un consuelo den e echo cu asta algun di Jehova su propio yunan spiritual, esta e angelnan, a stop di sirbié, aunke Jehova ta disipliná cu amor i bondad i nunca ta cometé eror. (Deuteronomio 32:4; Juan 8:44; Revelacion 12:4, 9) Esaki a imprimí den mi cu pa duru cu mayornan ta traha pa purba lanta nan yunan den e caminda di Jehova, tog kisas tin algun yu cu ta nenga di aceptá e berdad.

Mescos cu un palu cu ta haña hopi bientu fuerte, nos tin cu dobla of adaptá na e diferente contratempu i problemanan cu ta bini riba nos. Den transcurso di añanan, mi a nota cu studio regular di Bijbel i asistencia na reunion a duna mi e fortalesa pa dobla i sobrebibí spiritualmente. Segun cu mi ta bira bieu i ta mira e erornan cu mi a haci den pasado, mi ta purba wak e banda positivo. Al fin i al cabo, si nos djis keda fiel, tal experencianan ta solamente mehorá nos desaroyo spiritual. Si nos siña for di nan, e aspectonan negativo di bida por tin cierto aspecto positivo.—Santiago 1:2, 3.

Awor ami cu Dorothy no tin e salú ni forsa mas pa haci loke nos lo tin gana di haci den e sirbishi di Jehova. Pero nos ta gradicidu pa e sosten di nos rumannan cristian stimá. Na casi tur reunion, e rumannan ta bisa nos cuantu nan ta apreciá cu nos t’ei presente. I nan ta haci esfuerso pa yuda nos den tur manera posibel, asta cu drechamentu di cos na cas of n’e auto.

De bes en cuando, nos por participá den e sirbishi di pionero auxiliar, i nos ta conducí studio cu personanan interesá. Un trit special cu semper nos ta disfrutá di dje ta di ricibí noticia for di nos yu homber cu ta sirbi na África. Ainda nos tin nos studio bíblico di famia, maske ta nos dos so awor. Nos ta contentu cu nos a dedicá asina hopi aña den e sirbishi di Jehova. E ta sigurá nos cu lo e no ‘lubidá nos trabou i e amor cu nos a mustra pa su nomber.’—Hebreonan 6:10.

[Plachi na página 25]

Velva, Bennett cu ami ta ser bautisá dor di Ted Klein dia 18 di april 1940

[Plachinan na página 26]

Ami cu mi casá Dorothy, na principio di añanan ’40 i na 1997

[Plachi na página 27]

E discurso público, “E Prins di Pas,” ta ser anunciá riba un bus na Barbádos

[Plachi na página 27]

Mi ruman homber Bennett dilanti dje cas di misionero

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí