Pregunta di Lektor

Tin hende ta pretendé ku Pablo no a noufragá riba e isla di Malta, zùit di Sisilia, sino riba un otro isla. Unda el a noufragá?

E pregunta aki tin di haber ku un idea ku resientemente a bin dilanti, esta, ku apòstel Pablo no a noufragá riba e isla di Malta, sino riba Cefalonia (òf Kefallinía) serka di Corfu den Laman Joniano, pegá ku kosta wèst di Gresia. E registro inspirá ta konta nos ku Pablo a sali for di Cesarea bou di kustodia di e senturion romano ku yama Julio, huntu ku otro sòldánan i Pablo su kompañeronan. Manera e mapa ta mustra, nan a nabegá bai Sidon i Mira. Despues di a kambia di barku i a subi abordo di un barku grandi di grano di Alehandria, Egipto, nan a kohe rumbo wèst pa bai Snido. Nan no por a sigui ku e ruta ku nan a proponé, esta, atraves di Laman Egeo, pasa e punta di Gresia i bai Roma. Bientunan fuerte a obligá nan bai zùit den direkshon di Kreta i nabegá den e awanan trankil a lo largu di su kostanan. Nan a para na un haf ku yama Bon Hafnan. Ora nan a “nabegá sali for di Kreta,” e barku a “wòrdu gará” dor di “un bientu di orkan ku yama Euroklidón.” E barku pisá di grano a “wòrdu tirá di un banda pa otro den laman” durante 14 dia largu. Finalmente, tur e 276 personanan a noufragá riba un isla ku e teksto griego di e Santu Skritura ta yama Me·lí·te.—Echonan 27:1–28:1.

Atraves di añanan hende a sugerí vários posibilidat pa identifiká e isla Me·lí·te aki. Algun a pensa ku tabata trata di e isla Melite Ilirika, ku awor ta konosí komo Mljet, den Laman Adriátiko pegá ku kosta di Kroasia. Pero esaki no ta parse probabel, ya ku Mljet ta situá pa nort i esei no ta kuadra ku e siguiente etapanan di Pablo su biahe, esta, Sirakusa, Sisilia, i despues e kosta wèst di Italia.—Echonan 28:11-13.

Mayoria traduktor di Beibel a yega n’e konklushon ku Me·lí·te ta referí na e isla Melite Africanus ku awor ta konosí komo Malta. E último haf ku e barku ku a hiba Pablo a bishitá tabata Bon Hafnan, na Kreta. Despues un tempestat a obligá e barku bai den direkshon wèst, kaminda Klouda tabata situá. Bientu a keda hiba e barku hopi dia. Ta masha rasonabel ku e barku hibá pa bientu di tempestat lo a bai mas den direkshon wèst i yega Malta.

Teniendo kuenta ku e bientu ku tabata dominá i “e direkshon i velosidat ku e barku tabata drif,” Conybeare i Howson a remarká den nan buki The Life and Epistles of St. Paul (E Bida i Kartanan di San Pablo): “E distansia entre Klouda [òf, Cauda] i Malta ta un tiki ménos ku 770 kilometer. E koinsidensia ta asina remarkabel ku ta kasi imposibel pa kere ku e tera ku e nabegantenan [a aserká] riba e di dieskuater anochi por tabata un otro sitio ku no ta Malta. E chèns ku ta trata di Malta ta masha grandi mes.”

Ounke hende por bin ku otro sitionan komo opshon, un noufragio na Malta manera e mapa huntu ku e artíkulo aki ta mustra ta parse di kuadra ku loke Beibel ta bisa.

[Mapa/Plachi na página 31]

(Pa e teksto den su formato kompleto, wak e publikashon)

Yerusalèm

Cesarea

Sidon

Mira

Snido

KRETA

KLOUDA

MALTA

SISILIA

Sirakusa

Roma

MLJET

GRESIA

CEFALONIA