Historia di Bida

Nos A Usa Nos Sirkunstansia Ku Tabata Kambia pa Prediká den Lugánan Leu

SEGUN E RELATO DI RICARDO MALICSI

Ora mi a pèrdè trabou debí na mi posishon di neutralidat kristian, ami ku mi famia a pidi Yehova yuda nos plania nos futuro. Den nos orashon, nos a ekspresá nos deseo di ekspandé nos sirbishi. Poko despues di esei, nos a kuminsá un rekorido ku a hiba nos na ocho pais riba dos kontinente. Komo resultado, nos por a efektuá nos sirbishi den lugánan leu.

MI A nase na Filipina na aña 1933 den un famia ku tabata afiliá ku e Iglesia Filipino Independiente. Tur 14 miembro di nos famia tabata pertenesé na e iglesia ei. Ora mi tabatin rònt di 12 aña, mi a pidi Dios den orashon pa dirigí mi na e religion berdadero. Un di mi maestronan a inskribí mi pa un lès di religion, i mi a bira un katóliko deboto. Nunka mi no tabata falta konfeshon riba djasabra ni santu sakrifisio di misa riba djadumingu. Sin embargo, pokopoko mi a bira malkontentu ku e religion i tabata yen di duda. Preguntanan tokante kiko ta pasa ku hende ora nan muri i tokante fièrnu di kandela i Trinidat tabata molestiá mi. E kontestanan duná dor di lidernan religioso tabata bashí i no a satisfasé mi.

Mi Ta Haña Kontesta Satisfaktorio

Tempu mi tabata studia na universidat, mi a djòin un klup pa studiantenan maskulino ku a hinka mi den bringamentu, hungamentu di wega di plaka, humamentu i otro aktividatnan inmoral. Un anochi, mi a sera konosí ku mama di un di mi kompañeronan di klas. E señora tabata un Testigu di Yehova. Mi a hasié e mesun preguntanan ku mi a hasi mi maestronan di religion. El a kontestá tur mi preguntanan for di Beibel, i mi a keda konvensí ku loke el a bisa tabata e bèrdat.

Mi a kumpra un Beibel i kuminsá studi’é ku e Testigunan. Poko despues mi tabata asistí na tur e reunionnan di Testigunan di Yehova. Hasiendo kaso di e konseho sabí di Beibel ku “mal kompania ta daña bon kustumber,” mi a kita pia for di mi amigunan inmoral. (1 Korintionan 15:33) Esaki a yuda mi hasi progreso den mi estudio di Beibel i ku tempu mi a dediká mi mes na Yehova. Despues ku mi a batisá na aña 1951, mi a sirbi pa un tempu komo un predikadó di tempu kompletu (un pionero). Anto na desèmber 1953 mi a kasa ku Aurea Mendoza Cruz, kende a bira mi partner di bida largu i fiel kolaboradó den sirbishi.

Un Kontesta Riba Nos Orashonnan

Nos realmente kier a sirbi komo pionero. Sin embargo, nos deseo pa sirbi Yehova mas plenamente no a kristalisá mesora. Asina mes, nos no a stòp di pidi Yehova pa habri oportunidat pa nos den su sirbishi. Sin embargo, nos bida tabata duru. Pero nos a keda ku nos metanan spiritual na mente, i ora mi tabatin 25 aña mi a keda nombrá komo sirbidó di kongregashon, e superintendente presidente den un kongregashon di Testigunan di Yehova.

Segun ku mi a progresá den konosementu di Beibel i a haña un mihó komprondementu di Yehova su prinsipionan, mi a bin realisá ku mi empleo a violá e posishon ku mi a tuma komo kristian pa keda neutral a base di mi konsenshi. (Isaias 2:2-4) Mi a disidí di kita for di trabou. Esaki a resultá un berdadero tèst di nos fe. Kon lo mi a bai perkurá pa e nesesidatnan di mi famia? Atrobe nos a aserká Yehova Dios den orashon. (Salmo 65:2) Nos a kont’é nos preokupashonnan i temornan, pero tambe nos a ekspresá na dje nos deseo di sirbi kaminda tabatin mas nesesidat di predikadó di Reino. (Filipensenan 4:6, 7) Nunka nos a imaginá ku un variedat asina grandi di oportunidat lo a habri pa nos!

Kuminsando ku Nos Rekorido

Na aprel 1965, mi a aseptá un trabou komo supervisor di trabounan di kandela i reskate na Aeropuerto Internashonal Vientiane, na Láos, i nos a muda bai einan. Den e stat di Vientiane tabatin 24 Testigu, i tabata dushi pa prediká huntu ku e misioneronan i e poko rumannan lokal ku tabatin. Despues, nan a transferí mi pa Aeropuerto Udon Thani, Tailandia. No tabatin ningun otro Testigu den e pueblo Udon Thani. Komo famia, nos so a kondusí tur e reunionnan semanal. Nos a prediká di kas pa kas, hasi rebishita i a kuminsá estudionan di Beibel.

Nos a kòrda Hesus su konseho na su disipelnan ku nan mester sigui “karga hopi fruta.” (Juan 15:8) Pues, nos disidí di imitá nan ehèmpel i a sigui proklamá e bon nobo. No a tarda hopi ku nos tabatin resultado. Un hobensita tailandes a aseptá e bèrdat i a bira nos ruman muhé spiritual. Dos norteamerikano tambe a aseptá e bèrdat i ku tempu a bira ansianonan kristian. Nos a sigui prediká e bon nobo pa mas ku dies aña den parti nort di Tailandia. Nos ta masha felis ku awor tin un kongregashon na Udon Thani! Algun di e simianan di e bèrdat ku nos a sembra ainda ta produsí resultado.

Pero lamentablemente nos tabatin ku muda atrobe, i nos a pidi den orashon pa “e Señor di kosecha” yuda nos pa nos sigui partisipá den e trabou di prediká. (Mateo 9:38) Nos a keda transferí pa Teheran, kapital di Iran. Esaki tabata durante reinado di e Shah.

Predikando den Teritorionan Difísil

Ora nos a yega Teheran, nos a lokalisá nos rumannan spiritual mesora. Nos tabata asosiá ku un grupo chikí di Testigu ku a konsistí di 13 nashonalidat. Nos tabatin ku hasi ahuste pa nos por a prediká e bon nobo na Iran. Ounke nos no a eksperensiá persekushon abierto, nos mester tabata kouteloso.

Debí na e orario di trabou di personanan interesá, tabatin biaha ku nos mester a kondusí estudionan di Beibel 12 or djanochi òf mas lat, i nan a dura te den oranan trempan di mainta. Sin embargo, nos tabata hopi felis di por a mira e fruta di e trabou duru ei! Un kantidat di famia filipino i koreano a aseptá e bèrdat kristian i a dediká nan mes na Yehova.

Mi siguiente asignashon di trabou tabata na Dhaka, Bangladesh. Nos a yega einan na desèmber 1977. Esaki tabata un otro pais kaminda no tabata fásil pa efektuá nos aktividat di prediká. Sin embargo, semper nos tabatin na mente ku nos mester keda aktivo. Bou di e guia di Yehova su spiritu, nos a logra haña hopi famia ku tabata afirmá di ta kristian. Algun di nan tabatin set pa e awanan refreskante di e bèrdat ku tin den e Santu Skritura. (Isaias 55:1) Komo resultado, nos a kuminsá hopi estudio di Beibel.

Nos tabata tene na mente ku Dios su boluntat ta pa “tur klase di hende ser salbá.” (1 Timoteo 2:4, NW) Afortunadamente, ningun hende no a purba kousa problema pa nos. Pa vense kualke prehuisio, nos a hasi sigur di usa un introdukshon masha amigabel. Meskos ku apòstel Pablo, nos a purba “bira tur kos pa tur hende.” (1 Korintionan 9:22) Ora hende tabata puntra nos e motibu di nos bishita, nos a splika nan esei bondadosamente, i nos a deskubrí ku mayoria hende tabata hopi amabel.

Na Dhaka nos a haña un Testigu lokal i nos a anim’é p’e djòin nos den nos reunionnan kristian i despues den e trabou di prediká. Mi kasá tabata studia Beibel ku un famia i a invitá nan na nos reunionnan. Mediante Yehova su bondat amoroso, henter e famia ei a bin den e bèrdat. Despues, dos yu muhé di e famia a yuda tradusí literatura bíbliko na bengali, i hopi di nan famianan tambe a bin siña konosé Yehova. Hopi otro studiante di Beibel a aseptá e bèrdat. Mayoria di nan awor ta sirbi komo ansiano òf pionero.

Komo ku Dhaka ta un stat ku tin un poblashon hopi grandi, nos a invitá algun di nos famianan pa bin yuda nos den e trabou di prediká. Vários di nan a reakshoná faborablemente i a djòin nos na Bangladesh. Nos ta masha kontentu i gradisidu na Yehova ku nos tabatin e oportunidat di prediká e bon nobo den e pais ei! Ku un komienso masha chikí di solamente un persona, Bangladesh tin awor dos kongregashon.

Na yüli 1982, nos tabatin ku muda for di Bangladesh. Ku awa na wowo nos a bai laga e rumannan. No muchu tempu despues, mi a haña empleo na Aeropuerto Internashonal di Entebbe, na Uganda, kaminda nos lo a keda kuater aña i shete luna. Kiko nos lo por hasi pa onra Yehova su gran nòmber den e pais aki?

Sirbiendo Yehova na Ost Afrika

Ora nos a yega Aeropuerto Internashonal di Entebbe, un shofùr a bin buska ami ku mi kasá pa hiba nos na nos alohamentu. Segun ku nos tabata saliendo for di aeropuerto, mi a kuminsá prediká na e shofùr tokante e Reino di Dios. El a puntra mi: “Ta Testigu di Yehova bo ta?” Ora mi a kontestá ku sí, e shofùr di: “Un di bo rumannan ta traha den e toren di kontròl.” Mesora mi a pidié hiba mi einan. Nos a sera konosí ku e ruman, ku tabata hopi kontentu di mira nos, i nos a hasi areglo pa reunion i sirbishi di vèlt.

Tabatin solamente 228 publikadó di Reino na Uganda e tempu ei. Huntu ku un par di ruman na Entebbe, nos a dediká nos promé aña na sembra simia di e bèrdat. Ya ku e hendenan einan tabata gusta lesa, nos por a laga hopi literatura, inkluso sientos di revista. Nos a invitá rumannan di Kampala, e kapital, pa bin yuda nos prediká e teritorio di Entebbe den finnan di siman. Na mi promé diskurso públiko, e asistensia tabata sinku, ku ami aden.

Durante e siguiente tres añanan, nos a eksperensiá algun di e momentunan mas felis di nos bida, mirando kon e hendenan ku nos a siña tabata reakshoná bon i hasi progreso rápido. (3 Juan 4) Na un asamblea di sirkuito, seis di nos studiantenan di Beibel a batisá. Hopi di nan a bisa ku nan a ser animá pa drenta e sirbishi di tempu kompletu debí ku nan a mira nos sirbi komo pionero, maske nos tabatin trabou fultaim.

Nos a realisá ku nos lugá di empleo tambe por ta un teritorio fruktífero. Na un okashon, mi a aserká un funshonario di departamentu di kandela di aeropuerto i a kompartí kuné e speransa bíbliko di bida den un paradeis riba tera. Mi a mustr’é for di su propio Beibel ku humanidat obediente lo biba den pas i union, i lo no sufri mas di pobresa, falta di bibienda, guera, malesa ni morto. (Salmo 46:9; Isaias 33:24; 65:21, 22; Revelashon 21:3, 4) Lesando esaki den su propio Beibel a lanta su interes. Nos a kuminsá un estudio di Beibel mesora. E tabata asistí na tur reunion, i poko despues el a dediká su mes na Yehova i a batisá. Mas despues el a djòin nos den e sirbishi di tempu kompletu.

Dos biaha disturbionan sivil a lanta kabes na Uganda miéntras ku nos tabata einan, pero esei no a trese un paro na nos aktividatnan spiritual. E miembronan di famia di personanan ku tabata traha pa agensianan internashonal a keda transferí pa Nairobi, Kenia, pa seis luna. Nos ku a keda atras na Uganda a sigui ku nos reunionnan kristian i ku e trabou di prediká, ounke nos mester tabata prudente i kouteloso.

Na aprel 1988, mi a terminá mi asignashon di trabou i nos a bolbe muda. Nos a bai laga Kongregashon Entebbe ku un satisfakshon profundo debí na e desaroyonan spiritual ku a tuma lugá einan. Na yüli 1997, nos a haña chèns di bolbe bishitá Entebbe. Pa e tempu ei, algun di nos eks-studiantenan di Beibel tabata sirbi komo ansiano. Nos a keda hopi emoshoná ora nos a mira ku tabatin 106 persona presente na e Reunion Públiko!

Mudando pa Teritorio Bírgen

Akaso nos lo a haña oportunidatnan nobo? Sí, mi siguiente asignashon di trabou tabata na Aeropuerto Internashonal di Mogadishu, na Somalia. Nos tabata desididu pa hasi bon uso di e oportunidat nobo aki pa sirbi den un teritorio bírgen.

Nos aktividat di prediká tabata limitá prinsipalmente na personal di embahada, trahadónan filipino i otro hende stranhero. Hopi bes nos tabata topa nan na merkado. Tambe nos tabata hasi bishitanan amistoso na nan kas. Dor di kombiná ingeniosidat, kreatividat, prudensia i pleno konfiansa den Yehova, nos a logra kompartí e bèrdat bíbliko ku otro hende, i esaki a produsí fruta entre hendenan di diferente nashonalidat. Despues di dos aña, nos a bai for di Mogadishu, djis promé ku guera a kuminsá einan.

E Organisashon Internashonal di Aviashon Sivil siguientemente a asigná mi na Yangon, Myanmar. Atrobe, nos tabatin ekselente oportunidat pa yuda personanan di kurason onrado siña tokante Dios su propósito. Despues di Myanmar, nan a asigná nos na Dar es Salaam, Tanzania. Na Dar es Salaam tabata hopi mas fásil pa prediká e bon nobo di kas pa kas pasobra tabatin un komunidat di abla ingles.

Den tur e paisnan ku nos a traha, nos tabatin masha tiki problema pa efektuá nos ministerio, ounke den hopi kaso, tabatin restrikshon riba e trabou di Testigunan di Yehova. Debí na e status di mi trabou, ku por lo general tabata konektá ku agensianan gubernamental òf internashonal, hende no tabata kuestioná nos aktividatnan.

Mi empleo a eksigí di mi ku mi kasá pa nos biba den un pais tras di otro durante tres dékada. Sin embargo, nos a konsiderá mi trabou simplemente komo un medio pa alkansá nos meta prinsipal. I e meta ei tabata semper pa promové interesnan di e Reino di Dios. Nos ta gradisí Yehova ku el a yuda nos hasi bon uso di nos sirkunstansia ku tabata kambia i disfrutá di e privilegio maravioso di plama e bon nobo den lugánan leu.

Bèk Kaminda Tur Kos A Kuminsá

Na edat di 58 aña, mi a disidí di baha ku penshon prematuro i regresá Filipina. Ora nos a yega bèk, nos a pidi Yehova pa dirigí nos pasonan. Nos a kuminsá sirbi den un kongregashon na Siudat Trece Martires, den e provinsia di Cavite. Na prinsipio ora nos a yega, tabatin solamente 19 proklamadó di e Reino di Dios. Areglonan a ser hasí pa aktividatnan di prediká diariamente, i nos a kuminsá hopi estudio di Beibel. E kongregashon a kuminsá krese. Na dado momentu, mi esposa tabatin 19 estudio di Beibel i ami tabatin 14.

No a tarda hopi ku e Salòn di Reino a bira muchu chikí. Nos a resa na Yehova tokante esaki. Un ruman hòmber spiritual ku su kasá a disidí di duna un pida tereno, i sukursal a aprobá un fiansa pa konstruí un Salòn di Reino nobo. E edifisio nobo tabatin un gran impakto riba e trabou di prediká, i e asistensia tabata subi tur siman. Aktualmente, nos ta biaha mas ku un ora ida i buèlta pa yuda un otro kongregashon ku tin 17 publikadó.

Ami ku mi esposa ta apresiá e privilegio ku nos tabatin di sirbi den asina tantu pais. Mirando bèk riba nos bida di muda di un lugá pa otro, nos ta sinti un profundo satisfakshon sabiendo ku nos a usa nos bida den e mihó manera posibel: pa yuda otro hende siña tokante Yehova!

[Mapa na página 24, 25]

(Pa e teksto den su formato kompleto, wak e publikashon)

TANZANIA

UGANDA

SOMALIA

IRAN

BANGLADESH

MYANMAR

LÁOS

TAILANDIA

FILIPINA

[Plachi na página 23]

Ami huntu ku mi kasá, Aurea