E Desafio pa Ta Humilde

PA HOPI hende por parse ku humildat no ta pas den e mundu djawe. Hende ku ta haña hopi atenshon i ku ta parse di tin mas éksito ta hende orguyoso, hende ku kueste loke kueste ta hasi esfuerso pa nan ta promé ku otronan den tur kos i ku ta insistí pa haña loke nan ke. Mayoria di hende ta envidiá e estilo di bida di personanan riku i famoso i no e bida di esnan mansu i humilde. Hende eksitoso generalmente ta broma ku ta riba nan propio forsa nan a logra. Leu di ta humilde, ku orguyo nan ta tuma pa nan mes tur krédito pa nan éksito.

Un investigadó kanades a papia di un fenómeno ku a surgi na su pais, esta, ‘e aktitut di ami promé.’ Otronan ta haña ku nos ta biba den un sosiedat ku ta kere ku satisfakshon personal ta mas importante ku kumpli ku kualke responsabilidat, i ta nota ku awendia hende ta mas i mas preokupá ku nan mes. Den un mundu asina, humildat no ta parse di ta un kualidat masha deseabel.

Klaru ku mayoria hende lo ta di akuerdo ku humildat ta un kualidat ekselente pa otro hende, ya ku ta fásil pa anda ku hende humilde. Sin embargo, den nos mundu kompetitivo, algun hende tin miedu ku si nan personalmente mustra humildat, otronan lo mira esaki komo un señal di debilidat.

Beibel, e Palabra di Dios, a profetisá ku den nos tempu hende lo ta “gabadó, arogante.” (2 Timoteo 3:1, 2) Bo no ta di akuerdo ku e profesia aki ta hañando su kumplimentu awe? Abo ta mira e benefisio di ser humilde? Òf bo ta pensa ku otronan lo mira un hende humilde komo un persona débil, fásil pa probechá di dje?

Echo ta ku Beibel ta duna motibunan válido pa balorá i kultivá humildat. E ta duna un punto di bista balansá i positivo di e kualidat aki i ta mustra ku berdadero humildat ta un señal di fortalesa i no di debilidat. E siguiente artíkulo lo splika dikon.

[Plachi na página 3]

Kon nos mester sinti tokante nos logronan?