Bo Tabata Sa?
Dikon Hesus a konsiderá ku e kontribushon di e biuda tabata bal mas?
Den e promé siglo di nos era, tur aña e hudiunan tabatin ku paga “e belasting di tèmpel [esta, “dos drakma,” NW],” loke tabata e suèldo pa mas o ménos dos dia di trabou. (Mateo 17:24) Na kontraste, Hesus a bisa ku dos mòfi a wòrdu bendí “pa ún sèn,” loke ta ekivalente na mas o ménos 45 minüt di trabou. En realidat, un hende por a haña sinku mòfi pa dòbel di e preis ei, òf loke ta e suèldo pa mas o ménos 90 minüt di trabou.—Mateo 10:29; Lukas 12:6.
E kontribushon pa e tèmpel ku Hesus a mira e biuda pober duna tabata bal hopi ménos ku esei. E dos sènnan ei, òf dos lepton, tabata e monedanan di koper di mas chikí ku hende tabata usa na Israel na e tempu ei. Nan tabata bal apénas 1⁄64 parti di e suèldo di un dia di trabou, òf ménos ku 12 minüt di trabou si kalkul’é a base di un promedio di 12 ora di trabou pa dia.
Hesukristu a konsiderá ku e regalo di e biuda tabata bal mas ku loke tur e otro personanan a duna “for di nan abundansia.” Dikon? Pasobra e relato ta menshoná ku e biuda tabatin “dos sèn di koper,” ke men, e por a duna ún i keda ku e otro. Sin embargo, el a duna “tur loke ku e tabatin, tur loke ku e tabatin pa biba di dje.”—Marko 12:41-44; Lukas 21:2-4.
Na ki tempu Saulo a bira konosí komo Pablo?
Apòstel Pablo a nase komo un hebreo ku siudadania romano. (Echonan 22:27, 28; Filipensenan 3:5) Pues probablemente for di chikí e tabatin tantu e nòmber hebreo Saulo komo e nòmber romano Pablo. Algun di Pablo su famianan tambe tabatin nòmbernan romano i griego. (Romanonan 16:7, 21) Ademas, no tabata nada straño ku hudiunan di e tempu ei tabatin dos nòmber; prinsipalmente esnan ku tabata biba pafó di Israel.—Echonan 12:12; 13:1.
Pa mas ku un dékada despues ku e apòstel aki a bira kristian, ta parse ku e tabata mas konosí pa su nòmber hebreo, Saulo. (Echonan 13:1, 2) Sin embargo, durante su promé biahe komo misionero, alrededor di aña 47/48 di nos era, ta parse ku el a preferá di usa su nòmber romano, Pablo. El a haña e enkargo pa deklará e bon nobo na e hendenan ku no tabata hudiu, i podisé el a pensa ku hende lo a aseptá su nòmber romano mas lihé. (Echonan 9:15; 13:9; Galationan 2:7, 8) Ademas, kisas el a usa e nòmber Pablo pasobra e pronunsiashon na griego di su nòmber hebreo, Saulo, tabata zona kasi meskos ku un palabra griego ku tabata ser konsiderá ofensivo. Sin importá kiko tabata e motibu pa e kambio, Pablo a mustra ku e tabata dispuesto pa “bira tur kos pa tur hende, pa di tur manera [e] por salba algun.”—1 Korintionan 9:22.
[Plachi na página 10]
Un lepton (tamaño real)