Siña di ‘e Rasgonan Básiko di e Bèrdat’

“[Boso] tin komprondementu di e rasgonan básiko di e konosementu i di e bèrdat hañá den Lei.”—ROM. 2:20.

1. Dikon ta importante pa nos komprondé e balor di e Lei di Moises?

SI NO tabata pa e kartanan inspirá di apòstel Pablo, lo tabata difísil pa nos komprondé e importansia di hopi aspekto di e Lei di Moises. Por ehèmpel, den e karta ku Pablo a skirbi na e Hebreonan, el a splika ku Hesus komo ‘sumo saserdote fiel’ a ofresé un bes pa semper “un sakrifisio di rekonsiliashon” i asina a hasi posibel pa tur ku pone fe den e sakrifisio ei por haña “liberashon eterno.” (Heb. 2:17; 9:11, 12) Pablo a splika tambe ku e tabernakel tabata djis “un sombra di kosnan selestial” i ku Hesus a bira e Mediador di ‘un pakto mihó’ ku e pakto di Lei. (Heb. 7:22; 8:1-5) Pablo su splikashon enkuanto e aspektonan di Lei tabata di gran balor pa e kristiannan di su tempu. I esei ta konta pa nos awe tambe, ya ku e splikashon akí ta yuda nos komprondé i mustra mas apresio pa e provishonnan ku Dios a hasi disponibel pa nos.

2. Ki bentaha e hudiunan ku a bira kristian tabatin riba e otro kristiannan?

² Ora Pablo a skirbi e kristiannan na Roma, el a dirigí algun palabra na e rumannan ku tabata di desendensia hudiu i ku a ser eduká den e Lei di Moises. Pablo a rekonosé ku e rumannan ei tabatin un bentaha riba e otronan. Sí, debí ku nan tabata konosé e Lei divino, nan tabata komprondé “e rasgonan básiko di e konosementu i di e bèrdat” enkuanto Yehova i su prinsipionan hustu. Pues, komo ku nan a komprondé e Lei i tabatin un rèspèt profundo p’e, nan por a guia, siña i yuda esnan ku no tabata konosé e Lei, meskos ku e hudiunan fiel a yega di hasi den pasado.—Lesa Romanonan 2:17-20.

UN SOMBRA DI E SAKRIFISIO DI HESUS

3. Kon un análisis di e sakrifisionan ku hudiunan a hasi den pasado por benefisiá nos awe?

³ E bèrdat básiko di e Lei di Moises ku apòstel Pablo a referí na dje ta yuda nos tambe komprondé Yehova su propósito mihó. Dikon? Pasobra e prinsipionan tras di e Lei di Moises nunka a pèrdè nan balor. Pues, ku esei na mente, laga nos analisá djis ún aspekto di e Lei, esta, e diferente sakrifisio- i ofrendanan ku e Lei a stipulá. Nos lo mira kon esakinan a guia hudiunan humilde na Kristu i yuda nan komprondé kiko Dios a spera di nan. Anto komo ku Yehova su rekisitonan básiko no ta kambia, nos lo mira tambe kon e leinan enkuanto sakrifisio i ofrenda ku el a duna e israelitanan por yuda nos evaluá e kalidat di nos sirbishi sagrado.—Mal. 3:6.

4, 5. (a) Kiko e Lei di Moises a rekordá e pueblo di Dios? (b) E sakrifisionan preskribí den e Lei di Dios tabata un sombra di kiko?

⁴ Hopi aspekto di e Lei di Moises a rekordá e hudiunan ku nan tabata pekadó. Por ehèmpel, ken ku a mishi ku un kadaver humano mester a purifiká su mes. Kon? Wèl, e mester a ofresé un bisé embra kòrá sin defekto komo ofrenda. E saserdote enkargá mester a mata i kima e bestia i usa e shinishi pa traha e “awa di purifikashon.” Mester a sprengu esaki riba e persona impuru riba e di tres i e di shete dia despues ku el a ser kontaminá. (Num. 19:1-13) At’akí un otro ehèmpel: Komo rekordatorio ku tur hende ta nase imperfekto i ku piká, un hende muhé ku a kaba di duna lus mester a tene su mes na un periodo di impuresa i despues duna un ofrenda pa e por tabata puru atrobe.—Lev. 12:1-8.

⁵ Den hopi otro situashon, e hudiunan mester a ofresé sakrifisio di bestia pa haña pordon di piká. Sea ku nan tabata sa òf nò, e sakrifisionan akí—i tambe esnan ku nan a ofresé despues den e tèmpel di Yehova—tabata djis “un sombra” di Hesus su sakrifisio perfekto.—Heb. 10:1-10.

E AKTITUT KOREKTO PA HASI SAKRIFISIO

6, 7. (a) Kiko e israelitanan mester a kòrda ora di ofresé sakrifisio, i kiko un sakrifisio aseptabel pa Yehova a prefigurá? (b) Ki preguntanan nos tin ku hasi nos mes?

⁶ Yehova a rekerí pa e israelitanan ofresé solamente animal “perfekto,” es desir, sin defekto. Nan no tabatin mag di ofresé bestia siegu, heridá, mankaron ni malu. (Lev. 22:20-22) Ademas, e frutanan òf grano ku nan tabatin ku ofresé na Yehova mester tabata “e promé frutanan” di nan kosecha, esnan “di mas mihó.” (Num. 18:12, 29) Ofrendanan mediokre no tabata aseptabel pa Yehova. E echo ku tabata importante pa e israelitanan ofresé nan mihó animalnan komo sakrifisio a indiká ku Hesus su sakrifisio lo tabata sin mancha i sin defekto. Sí, Yehova lo a duna lo mihó, e kos di mas balioso p’e, komo sakrifisio pa libra humanidat di piká i morto.—1 Ped. 1:18, 19.

⁷ Awor si un persona den e tempu ei tabata realmente gradisidu pa tur loke Yehova a hasi p’e, lo el a keda kontentu di por duna Yehova lo mihó, no ta bèrdat? Klaru ku ta e mes mester a disidí si e ta duna lo mihó òf nò. Sinembargo, e tabata sa sí ku Dios lo no a keda kontentu ku un sakrifisio mediokre. Pasobra esei lo a indiká ku el a hasi e sakrifisio djis pa formalidat òf ku esei lo tabata asta un karga p’e. (Lesa Malakías 1:6-8 i 13.) E análisis akí mester impulsá nos pa pensa seriamente riba nos sirbishi na Dios. Nos por puntra nos mes: ‘Ku ki aktitut mi ta sirbi Yehova? Mi tin ku hasi kambio den e manera ku mi ta sirbié? Mi ta duna Yehova lo mihó?’

8, 9. Kiko nos por siña for di e aktitut ku e israelitanan mester a desplegá ora di ofresé sakrifisio?

⁸ Si un israelita kier a ofresé un sakrifisio boluntario komo muestra di su gratitut na Yehova òf un ofrenda kimá pa haña aprobashon di Yehova, lo e no tabatin problema pa skohe su mihó bestia. Al kontrario, lo el a keda kontentu di por duna Yehova lo mihó. Awe, kristiannan tambe ta ofresé sakrifisio na Yehova. Ta klaru ku nos no tin nodi di ofresé e sakrifisionan ku e Lei di Moises a stipulá. Mas bien, nos ta hasi sakrifisio den e sentido ku nos ta usa nos tempu, energia i rekursonan pa sirbi Yehova. Apòstel Pablo a mustra bon kla ku loke nos ta hasi—esta, ‘deklará públikamente’ e speransa kristian i ‘hasi bon i kompartí loke nos tin ku otro hende’—ta sakrifisio ku ta agradá Dios. (Heb. 13:15, 16) I e aktitut ku kua Yehova su pueblo ta hasi e kosnan ei ta revelá nan gratitut i apresio pa tur loke Dios a duna nan. Pues, tin un paralelo entre e sakrifisionan ku kristiannan djawe ta hasi i e sakrifisionan boluntario ku e israelitanan di antigwedat tabata ofresé. P’esei ta bon pa nos saminá nos mes i wak ta ku ki motivashon i ku ki aktitut nos ta sirbi Yehova awe.

⁹ Awor kiko di un israelita ku segun e Lei mester a hasi un ofrenda di piká òf di kulpa pasobra el a kometé un piká? Siendo ku e sakrifisio ei tabata obligatorio, bo ta kere ku lo tabata difísil pa el a ofres’é di buena gana? (Lev. 4:27, 28) Wèl, si e persona realmente kier a mantené un bon relashon ku Yehova, lo el a ofresé su sakrifisio ku smak.

10. Ki ‘sakrifisio’ un kristian mester ‘ofresé’ pa drecha asuntu si el a hasi algu malu?

¹⁰ Nos tambe ta kometé piká awe. Kisas, sin ku bo sa òf sin ku tabata bo intenshon, bo a ofendé un ruman. Òf kisas bo konsenshi ta bisa bo ku bo a hasi algu ku no ta bon. Kiko lo bo hasi den un kaso asina? Wèl, un persona ku realmente ta tuma su sirbishi na Yehova na serio lo hasi tur loke ta posibel pa korigí su fayo, no ta bèrdat? Lo e pidi e persona ku el a ofendé despensa òf si ta trata di un piká serio, lo e buska yudansa serka e ansianonan. (Mat. 5:23, 24; Sant. 5:14, 15) Pues, pa rektifiká un piká ku nos a kometé kontra nos próhimo òf kontra Dios, ta kosta nos algu; nos tin ku dal sierto pasonan. Ta komo si fuera nos ta ofresé un sakrifisio pa drecha nos relashon ku Yehova i ku nos ruman. Komo resultado di esei, nos lo tin un bon konsenshi, i esaki ta duna nos e siguransa ku Yehova su manera di hasi kosnan ta mihó.

11, 12. (a) Kiko un ofrenda di komunion a enserá? (b) Kiko nos por siña for di e ofrendanan di komunion?

¹¹ Sierto sakrifisionan ku e Lei di Moises a stipulá tabata ofrendanan di komunion. Esakinan a indiká ku e persona ku a duna e ofrenda tabata na pas ku Yehova. Tantu é komo su famia por a kome karni di e bestia sakrifiká, kisas den un di e komedornan di e tèmpel. E saserdote ku a hasi e sakrifisio i e otro saserdotenan ku tabata sirbi na e tèmpel tambe por a kome di e karni. (Lev. 3:1; 7:31-33) E úniko motibu pakiko un sirbidó di Yehova tabata duna ofrenda di komunion tabata pa e mantené un bon relashon ku Dios. Ta komo si fuera e ku su famia, e saserdotenan i Yehova tabata kome huntu den un ambiente di pas i goso.

¹² Pues, ora un israelita a hasi un ofrenda di komunion, ta komo si fuera el a invitá Yehova na un komementu. I pa e israelita ei tabata un gran onor ora ku Yehova a aseptá esei. Ta klaru ku e anfitrion lo a ofresé lo mihó ku e tabatin na un invitado asina spesial. Ofrenda di komunion tabata un di rasgonan básiko di e bèrdat hañá den e Lei di Moises. E sakrifisionan akí a indiká ku tur hende ku ke ta na pas ku nan Kreador por logra esei pa medio di un sakrifisio muchu mas grandi, esun di Hesus. Pues, nos tambe por disfrutá di un amistat íntimo ku Yehova si nos usa nos rekursonan i energia di buena gana den su sirbishi.

SAKRIFISIO KU DIOS NO A ASEPTÁ

13, 14. Dikon loke Rei Saul kier a sakrifiká no tabata aseptabel pa Yehova?

¹³ Ta bisto anto ku pa Yehova a aseptá un sakrifisio ku Lei di Moises a stipulá, e mester a ser ofresé ku e aktitut i motivashon korekto. Beibel ta menshoná algun sakrifisio ku no tabata aseptabel pa Dios. Dikon Yehova no a aseptá e sakrifisionan ei? Laga nos ban wak dos ehèmpel.

¹⁴ E promé ta trata di Rei Saul. Ora Yehova su tempu a yega pa destruí e amalekitanan, profeta Samuel a informá Saul di esei. Saul a haña e mandato pa kaba ku henter e nashon enemigu ei, tantu e hendenan komo nan tou di bestia. Sinembargo, despues di a logra viktoria, Saul a permití su sòldánan laga Agag, rei di e amalekitanan, na bida. Ademas, el a apartá e mihó bestianan pa duna esakinan komo sakrifisio na Yehova. (1 Sam. 15:2, 3, 21) Kon Yehova a reakshoná? Wèl, el a rechasá Saul pa motibu di su desobedensia. (Lesa 1 Samuel 15:22 i 23.) Kiko nos por siña for di esaki? Ku Dios ta aseptá solamente sakrifisio di hende ku ta obedesé su mandamentunan.

15. E echo ku sierto israelitanan tabata ofresé sakrifisio aunke nan tabata hasi malu a demostrá kiko?

¹⁵ At’akí un otro ehèmpel. Den tempu di Isaías, algun israelita tabata ofresé sakrifisio na Yehova djis komo rutina. Nan sakrifisionan no tabatin ningun balor, ya ku nan tabata hasi malu den bista di Yehova. P’esei Yehova a bisa nan: “Di kiko e multitut di boso sakrifisionan ta sirbi mi? . . . Mi ta hartá di boso ofrendanan kimá di chubatu i di e vèt di bestianan gòrdá. Mi no ta hiba gustu den e sanger di bisé machu, lamchi òf kabritu. . . . No trese ofrendanan bano mas, sensia ta un abominashon pa mi.” Dikon Yehova no a aseptá nan ofrendanan? Yehova a bisa nan: “Maske boso hasi hopi orashon, lo mi no skucha. Boso mannan ta yen di sanger. Laba boso mes, hasi boso mes limpi; kita e maldat di boso echonan for di mi bista. Stòp di hasi maldat.”—Isa. 1:11-16.

16. Kiko ta determiná si un sakrifisio ta aseptabel pa Dios òf nò?

¹⁶ Pues, Yehova no a aseptá sakrifisio di hende ku a sigui hasi maldat. Ma orashon i ofrenda di esnan ku sinseramente tabata hasi esfuerso pa biba na armonia ku su mandamentunan sí tabata aseptabel p’e. E rasgonan básiko di e Lei di Moises a siña e israelitanan ku nan tabata pekadó i ku nan tabatin mester di pordon. (Gal. 3:19) Esnan ku a komprondé esei a sinti duele ku nan a peka i tabata ke pa Yehova pordoná nan. Awe, nos tambe tin ku rekonosé ku nos mester di e sakrifisio di Kristu pa haña pordon di piká. Si nos ta komprondé esei i ta apresiá e sakrifisio di Kristu, Yehova lo tin “delisia” den tur loke nos ta hasi den su sirbishi.—Lesa Salmo 51:17 i 19.

PONE FE DEN E SAKRIFISIO DI HESUS

17-19. (a) Kon nos por mustra Yehova ku nos ta apresiá e sakrifisio di reskate di Hesus? (b) Kiko nos lo trata den e siguiente artíkulo?

¹⁷ Nos tin un bentaha riba e israelitanan: Nan a mira djis “un sombra” di Dios su propósito. En kambio, nos ta mira e realisashon. (Heb. 10:1) E leinan tokante sakrifisio a siña e israelitanan ku nan mester a kultivá e aktitut korekto pa nan por tabatin un bon relashon ku Dios. Nan mester a demostrá ku nan tabata sinseramente gradisidu na Yehova, ku nan tabatin e deseo di dun’é lo mihó i ku nan a komprondé ku nan tabatin mester di pordon. Danki na e Skritura Griego Kristian, nos a bin komprondé ku pa medio di e sakrifisio di reskate di Hesus, Yehova lo kita piká i morto pa semper i ku for di awor e ta pordoná nos nos pikánan pa asina nos por tin un bon konsenshi. Sí, e reskate ta un provishon maravioso di Dios.—Gal. 3:13; Heb. 9:9, 14.

¹⁸ Pa nos por benefisiá di e sakrifisio di reskate, nos tin ku hasi mas ku djis komprondé kiko e ta enserá. Pablo a skirbi: “Lei a bira nos tutor ku ta guia nos na Kristu, pa Dios por deklará nos hustu a base di fe.” (Gal. 3:24) Sí, nos mester demostrá nos fe pa medio di obra. (Sant. 2:26) Ku e palabranan ei, Pablo a animá e kristiannan di promé siglo, kendenan tabatin bon komprondementu di e rasgonan básiko di e Lei di Moises, pa obra di akuerdo ku e konosementu ei. Di e manera ei, nan kondukta lo tabata na armonia ku e prinsipionan divino ku nan tabata siña otro hende.—Lesa Romanonan 2:21-23.

¹⁹ Aunke kristiannan no ta bou di e Lei di Moises, tòg nos tin ku ofresé sakrifisio ku ta aseptabel pa Yehova. Den e siguiente artíkulo nos lo mira den ki maneranan nos por hasi esei.

[Komentario na página 19]

E rekisitonan básiko di Yehova pa su sirbidónan no ta kambia nunka

[Plachi na página 20]

Kua di e bestianan akí abo lo a ofresé Yehova?

[Plachi na página 21]

Hende ku ta ofresé sakrifisio aseptabel na Yehova tin su aprobashon