PREGUNTA KU BEIBEL TA KONTESTÁ

Dios ta skucha tur orashon?

Dios ta skucha orashon di hende di tur nashon. (Salmo 145:18, 19) Su Palabra, Beibel, ta animá nos pa papia kuné tokante kualke kos ku ta preokupá nos. (Filipensenan 4:6, 7) Pero, tin sierto orashonnan ku Dios no ta gusta. Por ehèmpel, e no ta gusta pa hende ripití orashon ku nan a siña for di kabes.—Lesa Mateo 6:7.

Tampoko Yehova ta gusta orashon di hende ku deliberadamente ta desobedes’é su lei. (Proverbionan 28:9) Por ehèmpel, den tempu bíbliko Dios a nenga di skucha orashon di e israelitanan ku a kometé asesinato. Pues, nos mester kumpli ku sierto rekisito si nos ke pa Dios skucha nos orashon.—Lesa Isaías 1:15.

Kiko nos tin ku hasi pa Dios skucha nos orashon?

Si nos no tin fe, Dios no ta skucha nos orashon. (Santiago 1:5, 6) Nos mester ta konvensí ku Dios ta eksistí i ku e ta interesá den nos. Pa fortalesé nos fe, nos tin ku studia Beibel pasobra berdadero fe ta basá riba prueba konvinsente ku nos ta haña den su Palabra.—Lesa Hebreonan 11:1, 6.

Ademas, nos tin ku hasi orashon ku sinseridat i humildat. Asta Hesus, e Yu di Dios, a hasi orashon ku humildat. (Lukas 22:41, 42) P’esei, en bes di bisa Dios kiko e tin ku hasi, nos mester lesa Beibel pa nos haña sa kiko ta su rekisitonan. Di e manera ei, nos por hasi orashon na Dios di akuerdo ku su boluntat.—Lesa 1 Huan 5:14.