Lès 7

Halando Cerca Dios den Oracion

Pakico ta importante pa haci oracion regularmente? (1)

Na ken nos mester haci oracion, i con? (2, 3)

Kico ta apropiado pa pidi p’e den oracion? (4)

Ki ora bo mester haci oracion? (5, 6)

Dios ta scucha tur oracion? (7)

1. Oracion ta nificá papia humildemente cu Dios. Bo mester haci oracion na Dios regularmente. Dje manera ei bo por sintí bo cerca di dje manera cerca un amigu stimá. Jehova ta asina grandi i poderoso, pero tog e ta scucha nos oracionnan! Bo ta haci oracion na Dios regularmente?—Salmo 65:2; 1 Tesalonicensenan 5:17.

2. Oracion ta parti di nos adoracion. Pues, nos mester haci oracion solamente na Dios, Jehova. Ora Jesus tabata riba tera, semper el a haci oracion na su Tata, i no na ningun otro persona. Nos mester haci mescos. (Mateo 4:10; 6:9) Sin embargo, tur nos oracionnan mester ser expresá den e nomber di Jesus. Esaki ta mustra cu nos ta respetá Jesus su posicion i cu nos tin fe den su sacrificio di rescate.—Juan 14:6; 1 Juan 2:1, 2.

3. Ora nos ta haci oracion nos mester papia cu Dios for di nos curason. Nos no mester bisa nos oracionnan for di cabes of lesa nan for di un buki di oracion. (Mateo 6:7, 8) Nos por haci oracion den cualkier posicion respetuoso, na cualkier momento i na cualkier lugá. Dios por tende asta oracionnan cu nos ta haci silenciosamente den nos curason. (1 Samuel 1:12, 13) Ta bon pa haña un lugá ketu alehá for di otro hende pa haci nos oracionnan personal.—Marco 1:35.

4. Kico ta e cosnan cu bo por pidi p’e den oracion? Cualkier cos cu lo por afectá bo amistad cuné. (Filipensenan 4:6, 7) E oracion modelo ta mustra cu nos mester haci oracion tocante Jehova su nomber i propósito. Tambe nos por pidi pa e percuracion di nos necesidadnan material, pa nos picánan ser pordoná i pa yudansa pa resistí tentacion. (Mateo 6:9-13) Nos oracionnan no mester ta egoista. Nos mester haci oracion solamente pa cosnan cu ta na armonia cu Dios su boluntad.—1 Juan 5:14.

5. Bo por haci oracion ki ora cu bo curason impulsá bo pa gradicí of alabá Dios. (1 Crónicanan 29:10-13) Bo mester haci oracion ora bo tin problema i ora bo fe ta ser poní na prueba. (Salmo 55:22; 120:1) Ta apropiado pa haci oracion promé cu bo come bo cuminda. (Mateo 14:19) Jehova ta invitá nos pa haci oracion “na tur ocasion.”—Efesionan 6:18.

6. Specialmente nos mester haci oracion si nos a cometé un picá serio. Na momentonan asina nos mester roga Jehova pa su misericordia i pordon. Si nos confesá nos picánan na dje i haci nos best pa no bolbe cometé nan, Dios ta “cla pa pordoná.”—Salmo 86:5; Proverbionan 28:13.

7. Jehova ta scucha solamente oracionnan di hende hustu. Pa Dios scucha bo oracionnan, bo mester ta haciendo bo best pa biba segun su leynan. (Proverbionan 15:29; 28:9) Bo mester ta humilde ora bo ta haci oracion. (Lucas 18:9-14) Bo mester haci un esfuerso pa actua na armonia cu loke bo ta pidi den oracion. Dje manera ei lo bo duna prueba cu bo tin fe i cu realmente bo ta men loke bo ta bisa. Solamente e ora ei Jehova lo contestá bo oracionnan.—Hebreonan 11:6.