Kon Bo Por Trata ku Morto di Bo Kasá?

BEIBEL ta bisa masha kla ku un esposo mester “stima su esposa manera e ta stima su mes.” I un esposa, na su turno, “mester tin rèspèt profundo pa su esposo.” Huntu nan ta “ún karni,” i kada un mester hasi su parti. (Efe. 5:33; Gén. 2:23, 24) Ku tempu, nan relashon ku otro ta bira mas será i nan amor pa otro tambe ta bira mas fuerte. Meskos ku rais di dos palu banda di otro ku tempu ta mara den otro, asina tambe e bida di un pareha felismente kasá, ku tempu, ta mara kompletamente den otro.

Pero kiko si un di nan fayesé? E ora ei e banchi fuerte ku nan tabatin ku otro durante nan bida ta kibra. E kasá ku keda na bida ta keda atras ku un meskla di doló di kurason, soledat i kisas asta sintimentu di rabia òf kulpa. Daniellaa tabatin 58 aña kasá i durante e periodo ei e tabata konosé hopi hende ku a pèrdè nan kasá. Pero despues ku su kasá a fayesé, el a bisa: “Ta ora bo mes pasa den e eksperensia ei, bo por komprondé kiko esei ta nifiká.”

UN DOLÓ KU NO KE BAI

Algun eksperto ta bisa ku no tin doló mas fuerte ku ora bo kasá stimá muri. Hopi hende ku a pèrdè nan kasá ta di akuerdo ku esei. Millie su kasá a muri hopi aña pasá. El a deskribí su bida komo biuda asin’akí: “Mi ta sinti manera kos ku mi a bira mankaron.” Asina el a purba di splika kon su estado emoshonal tabata despues ku el a pèrdè su esposo ku ken e tabatin 25 aña kasá.

Ántes Susan tabata pensa ku biudanan ku pa añanan largu tabata yora morto di nan kasá tabata hasi di mas. Anto e mes a bira biuda despues ku e tabatin 38 aña kasá. Apesar ku a pasa mas ku 20 aña, e ta bisa: “Tur dia mi ta pensa riba mi kasá.” Hopi biaha awa ta basha for di su wowo pasobra e ta sinti masha falta di su kasá.

Beibel ta konfirmá ku morto di un kasá ta un sla duru i ta kousa un doló pa hopi tempu. Por ehèmpel, ora Sara a muri, su kasá, Abraham, “a bini pa tene rou pa Sara i pa yor’é.” (Gén. 23:1, 2) Aunke Abraham tabatin fe den e resurekshon, el a sinti un tristesa profundo ora su kasá stimá a muri. (Heb. 11:17-19) Yakòb tampoko no a lubidá su kasá stimá, Rakel, despues ku esaki a muri. Ku masha sintimentu Yakòb a papia di dje ku su yunan.—Gén. 44:27; 48:7.

Ki lès nos por saka for di e ehèmpelnan akí di Beibel? Wèl, hopi biaha personanan ku pèrdè nan kasá ta keda sinti e pèrdida ei pa años. Nos no mester mira nan lágrima i periodonan di tristesa komo un debilidat. Mas bien, e emoshonnan ei ta un reakshon natural debí na e pèrdida grandi ku nan a sufri. Nan lo por tin mester di nos kompashon i sosten pa hopi tempu.

PURBA DI MIRA KADA DIA KOMO UN DIA NOBO

Ora un persona pèrdè su kasá, su bida no ta djis bira manera e tabata promé ku el a kasa. Despues di hopi aña kasá, un esposo por lo general sa kon pa konsolá su esposa i anim’é ora e ta sinti su mes tristu òf frustrá. Si e esposo no t’ei mas, e konsuelo i amor ku e esposa tabata haña serka dje tampoko no t’ei mas. Di e mesun manera, un esposa ta siña kon e por laga su esposo sinti su mes sigur i felis. Pa e esposo, no tin nada ku por kompará ku e esposa su karisia i su palabranan trankilisante. Tambe e atenshon ku e ta duna na e interesnan i nesesidatnan di su esposo ta algu úniko. Si e esposa muri, e esposo lo por sinti un bashí den su bida. P’esei algun persona ku a pèrdè nan kasá ta kuminsá preokupá pa futuro i asta tin miedu di loke ta warda nan. Ki prinsipio bíbliko por yuda nan haña pas i duna nan un sintimentu di siguridat?

[Plachi na página 28] — Dios por yuda bo trata ku bo pèrdida kada dia di nobo

Hesus a bisa: “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.” (Mat. 6:34) E palabranan ei ta apliká prinsipalmente na nos nesesidatnan material, pero nan a yuda hopi hende soportá e doló di pèrdè nan kasá. Algun luna despues ku e kasá di Charles a muri, el a skirbi: “Te ainda mi ta sinti masha falta di Monique, i tin biaha ta parse ku esei ta bira pió. Pero mi ta komprondé ku esaki ta normal i ku ta ku tempu e doló lo fria un poko.”

Sí, Charles ainda mester a laga tempu pasa pa su doló fria. Kon el a logra esei? El a bisa: “Ku Yehova su yudansa, mi a purba di mira kada dia komo un dia nobo.” Charles no a laga tristesa vens’é. Su doló no a disparsé di un dia pa otro, ma e no a laga e doló kaba kuné tampoko. Si abo a pèrdè bo kasá, purba di trata ku bo pèrdida kada dia di nobo, sin preokupá muchu kon lo bo sinti bo e dia despues. Bo no sa nunka ki benefisio òf animashon ta warda bo mañan.

Morto no tabata parti di e propósito original di Yehova. Al kontrario, morto ta parti di “e obranan di Diabel.” (1 Huan 3:8; Rom. 6:23) Satanas ta usa morto i e miedu ku hende tin di muri pa hasi nan su katibu i pa kita tur nan speransa. (Heb. 2:14, 15) E ta gosa mashá ora un hende kai den desesperashon i pèrdè tur speransa di haña felisidat i satisfakshon awor òf asta den Dios su mundu nobo. Pues, e doló profundo ku e kasá ku keda na bida ta sinti pa e pèrdida di su partner ta debí na e piká di Adam i e trampanan di Diabel. (Rom. 5:12) Yehova lo drecha e daño ku Satanas a kousa i kaba ku su arma kruel, esta, morto. Entre e hendenan ku a ser librá for di e miedu ku Satanas ta hinka den nan tin hopi persona ku, kisas meskos ku bo, a pèrdè nan kasá.

Pa e personanan ku Dios resusitá, bida riba tera lo trese hopi kambio. Ta klaru ku relashonnan humano lo kambia. Por ehèmpel, mayornan, welanan i otro antepasadonan ku resusitá lo bira perfekto gradualmente huntu ku nan yunan i nietunan. E efektonan di behes lo no t’ei mas. Kisas e generashon mas yòn lo tin ku siña mira nan antepasadonan kompletamente otro for di e manera ku nan ta mira nan awor. E kambionan akí sin duda lo ta na benefisio di e famia humano.

Kisas nos tin hopi pregunta tokante resurekshon. Por ehèmpel, kiko lo pasa ku e personanan ku a pèrdè dos òf mas kasá? E saduseonan a puntra Hesus tokante un muhé kende su promé kasá a muri, despues su di dos i asina a sigui te ku na tur shete kasá di dje a muri. (Luk. 20:27-33) Ki relashon e personanan ei lo tin ku otro despues di resurekshon? Nos no sa, i nos no tin nodi di sinta spekulá òf preokupá tokante e preguntanan akí; esei lo no yuda ku nada. Pa aworakí, e úniko kos ku nos por hasi ta simplemente konfia den Dios. Un kos ta sigur, sea loke sea Yehova hasi den futuro lo ta bon. Lo e ta algu ku nos por anhelá, i no algu ku nos tin ku tene miedu di dje.

E SPERANSA DI RESUREKSHON TA UN FUENTE DI KONSUELO

Un di e siñansanan mas fásil pa komprondé den e Palabra di Dios ta ku nos sernan kerí ku a muri lo biba bèk. Relatonan di Beibel tokante e resurekshonnan ku a yega di tuma lugá ta duna nos e garantia ku “tur esnan ku ta den graf lo tende [Hesus] su stèm i lo sali afó.” (Huan 5:28, 29) E hendenan ku lo ta na bida e tempu ei lo keda superkontentu ora nan topa nan sernan kerí ku a keda librá for di e gara di morto, pa no papia mes di e felisidat di esnan resusitá!

Segun ku míles di miónes di hende ta lanta for di morto, tera lo yena ku un alegria nunka bisto. (Mar. 5:39-42; Rev. 20:13) Ta bon pa meditá riba e milager akí ku lo tuma lugá, ya ku esaki por ta un konsuelo pa tur ku a pèrdè un ser kerí.

Hende lo tin un motibu pa ta tristu ora e resurekshon ei tuma lugá? Beibel ta bisa ku nò. Segun Isaías 25:8, Yehova “lo traga morto pa semper.” Esei ta enserá ku lo e eliminá morto i tur su efektonan doloroso, pasobra e profesia ta sigui bisa: “Señor DIOS lo seka awa di wowo for di tur kara.” Si bo ta sinti bo tristu aworakí pasobra bo kasá stimá a muri, e resurekshon sigur lo duna bo motibu pa ta felis.

No tin un hende ku ta komprondé kompletamente tur loke Dios lo hasi den e mundu nobo. Yehova a bisa: “Meskos ku e shelunan ta mas haltu ku tera, asina mi kamindanan ta mas haltu ku boso kamindanan, i mi pensamentunan mas haltu ku boso pensamentunan.” (Isa. 55:9) Si nos ta kere e promesa ku Hesus a hasi tokante e binidero resurekshon, esei ta mustra ku nos ta konfia den Yehova, meskos ku Abraham a konfia den dje. Loke ta importante aworakí pa tur kristian ta di hasi loke Dios ta pidi di nan. Si nos hasi esei, nos lo ser konsiderá “digno di gana bida den e mundu ku ta bini” huntu ku esnan ku lo ser resusitá.—Luk. 20:35.

TIN MOTIBU PA TENE SPERANSA

Si bo tene bo maravioso speransa bon kla na mente, esei lo yuda bo pa bo no bira anshá tokante futuro. For di un punto di bista humano, futuro ta pinta skur. Pero Yehova ta duna nos e speransa di algu mihó. Aunke nos no sa presis kon Yehova lo bai satisfasé tur nos nesesidat- i deseonan, nos no tin duda ku lo e hasié. Apòstel Pablo a skirbi: “Ora un hende ta mira un kos ku e ta spera, esei no ta speransa. Pasobra lo e keda spera un kos ku e ta mira? Ma si nos ta spera riba loke nos no ta mira, nos ta sigui warda ansiosamente riba dje ku perseveransia.” (Rom. 8:24, 25) Un speransa firme den e promesanan di Dios lo yuda bo karga e pèrdida di bo kasá. Si bo perseverá, lo bo eksperensiá e tempu maravioso den futuro ora ku Yehova “lo duna bo e deseonan di bo kurason.” Lo e “satisfasé e deseo di tur ser bibu.”—Sal. 37:4; 145:16; Luk. 21:19.

[Plachi na página 31] — Konfia den e promesa di Yehova ku lo bini un futuro yená ku alegria

Ora Hesus tabata serka di muri, su apòstelnan a bira masha ferdrit i konfundí, i nan a haña miedu. El a konsolá nan ku e palabranan akí: “No laga boso kurason bira intrankil. Pone fe den Dios; pone fe den mi tambe.” Ademas, el a bisa nan: “Lo mi no laga boso manera huérfano. Mi ta bini serka boso sigur.” (Huan 14:1-4, 18, 27) Atraves di siglonan, e palabranan ei di Hesus a duna su siguidónan ungí un motibu pa karga speransa i pa perseverá. E hendenan ku ta anhelá di mira nan sernan kerí den e resurekshon tampoko no tin nodi di bira desesperá. Yehova ku su Yu lo no laga nan bandoná. Bo por ta sigur di esei!

a A kambia e nòmbernan.

Kon Nos Por Animá un Persona Ku A Pèrdè un Ser Kerí?

Ora un kristian kasá muri, hopi hende, pa un periodo, ta bini na kas serka esun ku a keda atras pa dun’é konsuelo i pa yud’é ku vários kos. Un biuda sigur lo keda masha gradisidu pa e atenshon ku e ta haña di famia- i amigunan. Pero kisas e doló di su pèrdida ta tuma tempu pa fria, i p’esei lo e tin mester di konsuelo i sosten pa mas tantu tempu. Beibel ta bisa: “Un amigu ta stima tur ora bai, i un ruman ta nasí pa tempu di atversidat.”—Pro. 17:17.

Kiko bo por bisa un hende ku a pèrdè un ser kerí? Beibel ta duna nos e konseho akí: “Boso tur pensa di akuerdo ku otro, mustra sintimentu pa otro, kariño pa e rumannan, tierno kompashon.” (1 Ped. 3:8) Kisas pa un tempu un biuda òf biudo no ta sinti su mes dje bon ei despues di morto di su kasá. Pues, aunke nos ta men e bon, ta mihó pa evitá di puntra: “Bo ta bon?” òf “Kontá ku bo bida?” E persona por pensa: ‘Bo no por imaginá bo kon mi ta sinti mi!’ òf ‘Kon mi por ta bon den e situashon akí?’ Pues, lo ta mihó pa nos djis bisa algu positivo, manera, “Mi ta kontentu di mira bo,” òf “Bo ta animá mi ora mi mira bo na salòn.”

Lo bo por invitá e persona ku a pèrdè su ser kerí pa bin kome serka bo òf pa bai kana ku bo. Marcos, un biudo, a haña hopi konsuelo serka amigunan ku a bishit’é. Tokante kiko nan a papia? El a bisa: “Nos no a papia mashá tokante mi problemanan, sino tokante tur sorto di kos animante.” Un biuda ku yama Nina a bisa: “Hopi biaha, mi bon amiganan ta bisa e palabranan korekto na e momento korekto. Tin biaha nan no ta bisa nada; gewon nan ta sinta serka mi.”

Si e biuda òf biudo ke papia tokante morto di su kasá, skuch’é ku atenshon i pasenshi. No puntra kos djis pa kuriosidat. No husga. Bo no tin nodi di konseh’é tokante kon e mester demostrá su tristesa ni pa kuantu tempu. No sinti bo ofendí si e persona ke ta su so. Bo por bini bèk un otro ora. Sigui mustra amor.—Huan 13:34, 35.

Bo Tin Pregunta Tokante Futuro?

Komo hende, ta natural ku nos ta puntra nos mes kon Yehova lo kumpli ku su promesanan. Abraham a pensa hopi biaha riba e promesa di Dios ku lo e haña un yu hòmber. Yehova a anim’é pa tene pasenshi, i Abraham no a keda desapuntá.—Gén. 15:2-5; Heb. 6:10-15.

Yakòb a sinti hopi falta di su yu, Yosef, despues ku nan a laga Yakòb kere ku el a muri. Añanan despues, ainda Yakòb tabata yora Yosef, ku el a kere tabata morto. Pero Yehova tabatin un bendishon spesial pa Yakòb, algu ku hamas Yakòb por a imaginá: El a kontra ku Yosef atrobe, i asta e tabatin e goso di topa su nietunan. Yakòb a bisa: “Nunka mi no a spera di mira bo kara, i ata, Dios a laga mi mira asta bo yunan.”—Gén. 37:33-35; 48:11.

Kiko ta e lèsnan ku nos por saka for di e relatonan akí? Di promé, nos por tin sigur ku nada no por stroba Dios Todopoderoso di kumpli ku su boluntat. Di dos, si nos ta hasi orashon—i tambe aktua—di akuerdo ku e boluntat di Yehova, lo e perkurá pa nos awor i satisfasé e nesesidat- i deseonan ku nos lo tin den futuro kompletamente. Pablo a skirbi: “Na esun ku, segun su poder ku ta obra den nos, por hasi infinitamente mas di tur loke nos ta pidi òf por imaginá, na dje sea gloria pa medio di e kongregashon i pa medio di Kristu Hesus durante tur generashon pa tur eternidat. Amèn.”—Efe. 3:20, 21.