TÓPIKO PRINSIPAL | DIKON HESUS MESTER A SUFRI I MURI?
E Kosnan Ei A Sosodé di Bèrdat?
Den lènte di aña 33 di promé siglo, nan a mata Hesus e nazareno. Kon asina? Nan a akus’é falsamente di a lanta kontra gobièrnu, nan a batié mal batí i a klab’é na staka. Sí, Hesus a muri un morto masha doloroso. Pero Dios a lant’é for di morto, i 40 dia despues, Hesus a bai shelu.
Nos ta haña e relato ekstraordinario akí den e kuater Evangelionan di e Skritura Griego Kristian ku hende sa yama Tèstamènt Nobo. Pero e kosnan ei a sosodé di bèrdat? Esei ta un pregunta importante i na su lugá. Pasobra si no ta asina, e fe kristian no tin balor i e speransa di biba pa semper den Paradeis lo ta un soño ku nunka lo ser realisá. (1 Korintionan 15:14) Di otro banda, si nan a sosodé di bèrdat, tin un futuro maravioso ta spera humanidat; un futuro ku bo tambe por disfrutá di dje. Awor, e relatonan den e Evangelionan ta fantasia òf ta kosnan ku a sosodé di bèrdat?
LOKE ECHONAN TA MUSTRA
Distinto for di leyendanan yen di fantasia, e Evangelionan ta kontené detayenan eksakto i spesífiko. Por ehèmpel, nan ta menshoná nòmber di hendenan ku historiadónan ta papia di dje i tambe nòmber di lugánan ku te awe hende por bishitá.—Lukas 3:1, 2, 23.
Tuma Hesus komo ehèmpel. Eskritornan ku a biba den promé i di dos siglo a menshoná su nòmber.a Loke e Evangelionan ta bisa tokante e manera ku nan a mata Hesus ta kuadra ku e métodonan ku e romanonan tabata usa pa ehekutá hende e tempu ei. Es mas, e Evangelionan ta konta e susesonan na un manera realístiko i franko; nan ta asta menshoná algun kos negativo di algun di Hesus su disipelnan. (Mateo 26:56; Lukas 22:24-26; Huan 18:10, 11) Tur e faktornan akí ta mustra bon kla ku e eskritornan di e Evangelionan tabata franko i onesto ora nan a skirbi tokante Hesus.
KIKO DI E RESUREKSHON DI HESUS?
Aunke mayoria di hende ta kere ku Hesus a biba riba tera i a muri, algun hende ta duda ku el a ser resusitá. Ni su apòstelnan no a kere esei mesora. (Lukas 24:11) Pero nan no tabatin niun duda mas ora ku nan, i e otro disipelnan, na diferente okashon, a mira Hesus despues ku el a resusitá. De echo, na un okashon, Hesus a aparesé na mas ku 500 persona pareu.—1 Korintionan 15:6.
Aunke e disipelnan a kore riesgo di ser arestá i matá, ku kurashi nan a konta tur hende—asta esnan ku a laga mata Hesus—ku Hesus a ser resusitá. (Echonan 4:1-3, 10, 19, 20; 5:27-32) Bo ta kere ku tur e disipelnan ei lo tabatin asina tantu kurashi si nan no tabata konvensí ku Hesus a ser resusitá? Es mas, e echo ku Hesus di bèrdat a ser resusitá a pone ku kristianismo por a hasi un gran impakto riba mundu tantu e tempu ei komo awe.
Pues, no tin duda, e relatonan tokante Hesus su morto i resurekshon den e Evangelionan tin tur indikashon ku nan ta registro di historia konfiabel. Si bo lesa nan bon, lo bo keda konvensí ku e susesonan ei realmente a tuma lugá. Pero lo bo ta mas konvensí ainda ora bo komprondé dikon e susesonan ei a tuma lugá. E siguiente artíkulo lo splika esei.
a Tásito, kende a nase rònt di aña 55 despues di Kristu, a skirbi ku “Kristu, for di kende e nòmber [kristian] a ser derivá, a ser ehekutá na man di un di nos prokuradónan, esta, Ponsio Pilato, durante e reinado di Tiberio.” Otro personanan ku a referí na Hesus tabata Suetonio (promé siglo); e historiadó hudiu Hosefo (promé siglo) i Plinio e Menor, gobernador di Bitinia (na komienso di siglo 2).