Imitá e Spiritu di Sakrifisio Propio di e Profetanan

BO TIN algu en komun ku e profetanan? E “Lista di Aklarashon di Palabra” den e Edishon Revisá di e Tradukshon di Mundu Nobo ta duna e siguiente definishon di un profeta: “Un persona ku Dios ta usa pa revelá su propósito. Profetanan tabata bosero di Dios. Nan no solamente tabata bisa loke ta bai pasa, sino tambe nan a transmití Yehova su siñansa-, mandamentu- i huisionan.” Den nos kaso, nos no ta profetisá, pero sí nos ta papia pa Dios i ta proklamá loke tin pará skirbí den su Palabra.—Mat. 24:14.

Ta un gran privilegio pa nos por konta otronan tokante nos Dios, Yehova, i siña nan tokante su propósito pa humanidat. Nos ta hasi e trabou akí huntu ku e “angel [ku] ta bula meimei di shelu.” (Rev. 14:6) Ma kisas nos por enfrentá retonan ku por pone nos pèrdè e gran privilegio akí for di bista. Kua ta algun di e retonan akí? Algun di nan ta kansansio, desanimashon i e sintimentu di no ta bal nada. E profetanan fiel tambe a haña nan ku e retonan akí, pero nan no a entregá. I Yehova a yuda nan kumpli ku nan asignashon. Ban konsiderá ehèmpel di algun profeta i kon nos por imitá nan.

NAN A HASI TUR NAN ESFUERSO

Tin biaha nos por sinti nos mes kansá debí na nos keasernan di tur dia i nos no tin gana di bai sirbishi. Klaru ku nos mester sosegá; asta Hesus i su apòstelnan a hasi esei. (Mar. 6:31) Pero pensa riba Ezekiel i su mishon ora é i e israelitanan tabata den koutiverio na Babilonia. Un biaha Dios a bisa Ezekiel pa kue un klenku i graba e stat di Herúsalèm riba dje. Despues e mester a rondoná e stat miniatura akí figurativamente dor di drumi riba su banda robes pa 390 dia i despues riba su banda drechi pa 40 dia. Yehova a bis’é: “Mira, lo mi pasa kabuya rònt di bo, asina ku bo no por bira di un banda pa otro, te ora ku bo a kaba di kompletá e dianan ku bo a rondoná Herúsalèm.” (Eze. 4:1-8) Esei lo mester a hala atenshon di e israelitanan den koutiverio. Pa mas ku un aña, Ezekiel mester a kumpli ku e rekisito akí, loke lo mester a lag’é bastante kansá. Kon e profeta por a kumpli ku e asignashon akí?

Ezekiel a komprondé pakiko Dios a mand’é komo profeta. Ora Dios a nombr’é, El a bis’é: “Sea ku nan skucha òf laga di skucha . . .  nan lo sa ku tabatin un profeta meimei di nan.” (Eze. 2:5) El a tene na mente e propósito di su mishon. P’esei di buena gana el a kumpli ku su mishon relashoná ku e sitiamentu figurativo di Herúsalèm. Asina el a demostrá di ta un berdadero profeta. Ezekiel i e otro eksiliadonan a haña notisia: “E stat a wòrdu konkistá.” Sí, e israelitanan a realisá ku tabatin un profeta meimei di nan.—Eze. 33:21, 33.

Awe, nos ta spièrta hende tokante e binidero destrukshon di e mundu malbado di Satanas. Maske nos por ta físikamente kansá, nos ta usa nos energia pa prediká e Palabra di Dios, hasi rebishita i dirigí estudio di Beibel. Segun ku e profesianan tokante e konklushon di e sistema akí ta kumpli, nos tin e satisfakshon di ta “un persona pa medio di ken Dios ta duna di konosé su propósito.”

NAN A DIL KU DESANIMASHON

Nos ta hasi tur nos esfuerso ku yudansa di Yehova su spiritu, pero tin bes nos por sinti nos desanimá p’e manera ku hende sa reakshoná na nos mensahe. Si ta asina, pensa riba e ehèmpel di profeta Yeremías. E israelitanan a ridikulis’é, insult’é i hasi chèrchi di dje pasobra el a proklamá e mensahe di Dios na nan. Na un dado momento Yeremías a sintié asina malu ku el a bisa: “Lo mi no kòrda riba dje, ni papia mas den su nòmber.” Yeremías tabatin mesun sintimentunan ku nos. Tòg, el a sigui hiba e mensahe di Dios. Dikon? E profeta a agregá tokante e mensahe: “E ora ei esei ta bira manera kandela den mi kurason, será den mi wesunan; mi ta kansá di ten’é paden, i mi no por mas.”—Yer. 20:7-9.

Di mes manera, si nos ta desanimá pa motibu di e manera ku hende ta reakshoná na nos mensahe, nos por lucha kontra e sintimentu ei ora nos meditá riba e mensahe ku nos ta proklamá. E por ta manera un ‘kandela será den nos wesunan.’ Un bon kustumber di lesa Beibel tur dia por tene e kandela ei sendé den nos.

NAN A SUPERÁ SINTIMENTU NEGATIVO

Algun kristian ku a haña un asignashon a keda preokupá debí ku nan no tabata sa kon nan mester a kumpli kuné òf ta dikon nan a hañ’é. Profeta Oséas lo a sintié asina. Yehova a bis’é: “Bai, tuma pa bo mes un esposa prostituta i haña yunan di prostitushon.” (Osé. 1:2) Imaginá kon lo bo sinti bo si bo ta bai kasa pero Dios ta bisa bo ku bo brùit lo bira un prostituta. Oséas a aseptá e asignashon. El a tuma Gomer komo su esposa, i nan a haña un yu hòmber. Despues Gomer a haña un yu muhé i un yu hòmber mas. Ta parse ku e último dos yunan akí tabata fruta di su adulterio. Yehova a bisa Oséas ku su futuro esposa lo a “kore tras di su amantenan.” Tuma nota ku Beibel ta usa e forma plural, “amantenan.” Despues lo el a purba di bai bèk serka Oséas. Awor, si abo tabata e profeta, lo bo a tuma bo kasá bèk? Esei ta netamente loke Yehova a bisa Oséas pa hasi! E profeta a asta paga un suma basta haltu pa hañ’é bèk.—Osé. 2:7; 3:1-5.

Kisas Oséas lo a puntra su mes si tabatin sentido pa kumpli ku su asignashon. Sinembargo, el a kumpli kuné fielmente, i su ehèmpel ta yuda nos komprondé e doló ku e Todopoderoso a sinti ora Israel a traishon’é. I echo ta ku algun israelita di kurason onrado a bolbe na Dios.

Awe Dios no ta bisa niun hende pa kasa ku un “esposa prostituta.” Pero ki lès nos por saka for di e disposishon di Oséas pa kumpli ku un asignashon asina? Un lès ta pa nos ta dispuesto pa prediká e bon notisia di e Reino “públikamente i di kas pa kas,” asta si nos ta haña ku esei no ta nada fásil. (Echo. 20:20) Podisé algun rasgo di e trabou di prediká ta un poko difísil pa bo. Hopi hende ku ta studia Beibel ku Testigunan di Yehova a bisa ku nan ta gusta e estudio pero ku nan sí lo no bai di kas pa kas. Pero despues, hopi di nan a kuminsá hasi loke un tempu nan a pensa ku tabata imposibel pa nan. Ki un lès balioso!

Nos por siña un otro lès di Oséas ora el a aseptá un asignashon difísil. E por a bula pipa p’e asignashon ei. Al fin i al kabo, si e no a skirbi tokante dje, niun hende lo no a haña sa. Nos tambe por haña nos den un situashon kaminda nos ta haña chèns pa konta hende tokante Yehova i niun otro hende lo no haña sa di e oportunidat ei. Esei ta loke ku a pasa ku Anna, un studiante di skol sekundario na Merka. Su dosente a pidi e klas pa skirbi un verslag di un tema ku nan ta konvensí di dje i despues purba di konvensé e klas di e tema. Anna por a keda sin duna testimonio, pero el a sinti ku ta Dios mes a dun’é e chèns ei. E por a imagin’é kon e klas lo a reakshoná, i p’esei el a pidi Yehova yud’é, i un deseo pa probechá di e oportunidat ei a lanta den dje. El a skirbi su verslag i a dun’é e título: “Evolushon: Kiko e Echonan Ta Mustra?”

Ora Anna a presentá su verslag, un mucha muhé ku ta kere den evolushon a bombardi’é ku pregunta. Anna a defendé su mes bon, i su dosente a keda asina impreshoná ku el a dun’é un premio pasobra su verslag tabata esun di mas konvinsente. For di e dia ei, Anna a sigui papia ku e mucha muhé ei tokante kreashon. Pues e tabata dispuesto pa aseptá un “asignashon” di Yehova. Komo resultado, Anna a bisa: “Awor mi por prediká e bon notisia ku konfiansa.”

Aunke nos no ta profeta den tur sentido di e palabra, ora nos imitá e spiritu di sakrifisio propio di profetanan manera Ezekiel, Yeremías i Oséas, nos tambe por kumpli ku Yehova su boluntat pa nos awe ku éksito. Durante bo Adorashon Komo Famia òf estudio personal, pakiko no lesa tokante otro profetanan i meditá riba kon bo por imitá nan ehèmpel?