Un Mundu Sin Violensia Ta Posibel?

ABUSU SEKSUAL I VIOLENSIA DOMÉSTIKO: Nashonnan Uní a raportá ku “ún di kada tres hende muhé a yega di bira víktima di maltrato físiko òf abusu seksual na man di un partner na dado momento den su bida.” Lamentablemente, “segun kálkulo, rònt mundu, ún di kada sinku hende muhé lo bira víktima di violashon òf intento di violashon.”

KRIMINALIDAT DI KAYA: Segun informe, tin mas ku 30.000 gang violento aktivo na Merka. Na Latinoamérika, mas o ménos ún di kada tres persona a bira víktima di krímen violento.

ASESINATO: Segun kálkulo, kasi mei mion hende a ser asesiná durante 2012, mas hende ku a ser matá den guera. Suráfrika i Sentroamérika tin e promedio di asesinato di mas haltu; e ta mas ku kuater biaha e promedio di rònt mundu. Den ún aña so, mas ku 100.000 hende a ser asesiná na Latinoamérika, i mas o ménos 50.000 hende a ser asesiná na Brazil so. Tin un solushon duradero pa violensia?

HENDE POR KABA KU VIOLENSIA?

Dikon tin asina tantu violensia? Tin hopi motibu, entre otro, desigualdat sosial i ekonómiko ku ta kousa tenshon, despresio pa bida di hende, mal uso di alkohòl i droga, mucha ku for di chikitu ta ser eksponé na komportashon violento di adultonan i e echo ku kriminalnan violento aparentemente no ta haña kastigu pa nan mal echonan.

Nos mester atmití sí ku na algun parti di mundu hende a logra redusí violensia. Den e último dékada, e kantidat di asesinato den e stat brazilero São Paulo ku tin miónes di habitante a baha ku 80 porshento. Tòg, tur tipo di krímen violento ta na òrdu di dia den e siudat, i e kantidat di asesinato ta mas o ménos dies di kada 100.000 habitante. Kiko anto lo kaba ku violensia una bes pa semper?

E solushon duradero pa violensia ta enserá e aktitut i komportashon di hende. Pa hende violento kambia, nan mester kita karakterístikanan manera orguyo, golosidat i egoismo i remplasá nan ku amor, rèspèt i interes den otro hende.

Kiko por motivá un hende pa hasi kambionan drástiko asina? Pensa riba loke Beibel ta siña:

• “Amor pa Dios ta nifiká ku nos ta kumpli ku su mandamentunan.”—1 Huan 5:3.

• “E temor di SEÑOR ta pa odia maldat.”—Proverbionan 8:13.

Amor pa Dios i e temor di desagrad’é ta asina fuerte ku nan por motivá asta un persona violento pa kambia su bida, no djis superfisialmente, ma te na e punto di kambia henter su personalidat. Di bèrdat esaki ta sosodé?

Tuma por ehèmpel Alex,a kende a pasa 19 aña den prizòn na Brazil pa vários akto di violensia. Na aña 2000, el a bira un Testigu di Yehova despues ku el a tuma un kurso di Beibel serka e Testigunan. Di bèrdat el kambia su komportashon violento? Sí, i ta duel e pa tur e mal kosnan ku el a hasi. El a bisa: “M’a bin stima Dios komo ku el a laga mi sinti ku di bèrdat el a pordoná mi. Gratitut i amor pa Yehova a yuda mi kambia mi komportashon.”

César, ku tambe ta di Brazil, tabata enbolbí den ladronisia i atrako armá. Esei tabata su estilo di bida pa 15 aña largu. Kiko a pon’é kambia? Tempu ku e tabata den prizòn, Testigunan di Yehova a tuma kontakto kuné, i e tambe a tuma un kurso di Beibel. César a bisa: “Pa promé biaha mi a haña un propósito den bida. M’a siña stima Dios. Tambe m’a siña pa mi tin temor p’e, esta, un temor saludabel pa no bolbe hasi loke ta malu i hasi Yehova tristu. Mi n’ kier tabata malagradisí pa e bondat ku el a mustra na mi. E amor i temor ei a motivá mi pa kambia.”

Kiko e eksperensianan akí ta mustra nos? Ku Beibel tin e poder pa transformá bida di hende por kompleto i kambia nan manera di pensa. (Efesionan 4:23) Alex, menshoná anteriormente, a agregá: “Loke m’a siña for di Beibel tabata manera un baño ku awa limpi ku pokopoko a purifiká mi i laba tur mal pensamentu bai kuné. Nunka mi a imaginá mi ku lo mi por a logra esei.” Sí, ora nos yena nos mente ku e mensahe puru di Beibel, nos por kita tur mancha di maldat. E Palabra di Dios tin e poder pa purifiká nos di e manera ei. (Efesionan 5:26) Komo resultado, hende kruel i egoista por kambia i bira hende amabel i pasífiko. (Romanonan 12:18) Ora nan apliká prinsipionan bíbliko, nan lo tin pas den nan bida.—Isaías 48:18.

Mas ku ocho mion Testigu di Yehova den 240 pais a haña sa kiko ta e sekreto pa kaba ku violensia. Hende di tur rasa, nivel sosial i background a siña pa stima i teme Dios, i tambe pa stima otro hende i biba na pas ku otro manera un famia mundial. (1 Pedro 4:8) Nan ta prueba palpabel ku un mundu sin violensia ta posibel.

UN MUNDU SIN VIOLENSIA TA SERKA!

Beibel ta primintí ku denter di poko Dios lo limpia e tera i kaba ku violensia. E mundu violento djawe lo hañ’é ku Dios su “dia di huisio i di destrukshon di hende malbado.” (2 Pedro 3:5-7) Hende violento lo no pone otro hende sufri mas. Kon nos por ta sigur ku Dios ke intervení i kaba ku violensia?

Beibel ta bisa ku Dios “ta odia hende ku ta gusta violensia.” (Salmo 11:5) E Kreador stima pas i hustisia. (Salmo 33:5; 37:28) P’esei lo e no tolerá hende violento pa semper.

Sí, un mundu nobo kaminda lo reina pas ta tras di porta. (Salmo 37:11; 72:14) Lo bo ke siña kiko bo mester hasi pa por biba den e mundu sin violensia ei?