Pa Yehova, Tur Kos Ta Posibel

TRABOU DI MAINTA TREMPAN TE ANOCHI LAT

Mi a nase na 1937 den un kolkhoz, òf un kunuku kolektivo, den serkania di Tokmok, Kirgizstan. Nos famia ta forma parti di e grupo kirghiz, i nos ta papia e idioma kirghiz. Mi mayornan tabata kunukero, i nan a traha den kolkhoz di mainta trempan te anochi lat. E kunukeronan tabata haña kuminda regularmente, pero nan tabata haña nan salario kèsh solamente un biaha pa aña. Mi mama tabata lucha pa kuida ami ku mi ruman muhé chikitu. Despues di a bai skol pa solamente sinku aña, mi tambe a kuminsá traha fultaim den kolkhoz.

Kaminda mi tabata biba tabatin hopi pobresa, i nos mester a traha masha duru pa por a gana nos pan di kada dia. Tempu mi tabata hóben, mi no a pensa mashá riba e propósito di bida òf riba futuro. Nunka mi a imaginá ku bèrdatnan presioso tokante Yehova Dios i su propósito lo a kambia mi bida. E manera ku e mensahe di Reino a yega i plama rònt Kirgizstan ta un relato masha emoshonante. Tur kos a kuminsá na e region nort di Kirgizstan, kaminda mi tabata biba.

KON E BÈRDAT A YEGA KIRGIZSTAN?

Den dékada di 1950, e bèrdat tokante Yehova Dios a yega Kirgizstan. Pero, esei no tabata fásil. Dikon nò? Den e tempu ei, Kirgizstan tabata parti di Union Soviétiko, i tur Testigu di Yehova den e paisnan di Union a keda neutral den asuntunan polítiko. (Huan 18:36) P’esei, e Testigunan a ser konsiderá enemigu di e Estado komunista i a ser persiguí. Pero nada no por a stroba e bèrdat di e Palabra di Dios yega na hende di kurason sinsero. Sí, un di e lèsnan di mas balioso ku mi a siña den mi bida ta ku pa Yehova “tur kos ta posibel.”—Mar. 10:27.

Debí na persekushon di e Testigunan, e bèrdat a yega Kirgizstan. Di ki manera? Nan tabata manda tur enemigu di Estado den eksilio na Siberia, ku tambe tabata parti di Union Soviétiko. Ora e eksiliadonan a ser librá, hopi di nan a bini Kirgizstan, i algun di nan a trese e bèrdat. Un di e eksiliadonan akí tabata Emil Yantzen, kende a nase na Kirgizstan na 1919. Emil a ser mandá na un kampo di trabou fòrsá, i einan el a konosé e Testigunan. El a aseptá e bèrdat i a regresá su pais natal na 1956. El a bai biba serka di Sokuluk, den e área kaminda mi tabata biba. Ta na Sokuluk, e promé kongregashon na Kirgizstan a ser formá na 1958.

Mas o ménos un aña despues, Victor Vinter, un ruman hòmber fiel ku a pasa den hopi prueba, a muda bini Sokuluk. Dos biaha el a ser sentensiá na tres aña di prizòn pasobra el a keda neutral. Despues el a pasa dies aña mas den prizòn i sinku aña den eksilio. Sinembargo, apesar di tur e persekushon ei, nada no por a stòp adorashon berdadero di plama.

E BÈRDAT A YEGA MAS SERKA DI KAS

Na 1963, tabatin mas o ménos 160 Testigu na Kirgizstan. Hopi di nan tabata originalmente di Alemania, Ukrania i Rusia. Entre nan tabatin Eduard Varter, un eksiliado ku a batisá na 1924 na Alemania. Den e dékada di 1940, e nazinan a mand’é un kampo di konsentrashon, i algun aña despues, e komunistanan na Union Soviétiko a mand’é den eksilio. Na 1961, e ruman hòmber fiel akí a muda bai na e pueblo di Kant ku ta keda hopi serka di mi pueblo natal.

Elizabeth Fot, un fiel sirbidó di Yehova, tambe tabata biba na Kant. E tabata un kosedó. Komo ku e tabata bon den su trabou, profeshonalnan manera dòkter i maestronan di skol tabata kose paña serka dje. Un di su klientenan tabata un hende muhé ku yama Aksamai Sultanalieva, i e tabata kasá ku un funshonario ku tabata traha na ministerio públiko. Aksamai a bai kumpra algun paña serka Elizabeth, pero el a hasi yen di pregunta tokante e propósito di bida i e kondishon di e mortonan. Elizabeth a usa Beibel pa kontestá tur su preguntanan. Aksamai a bira un predikadó zeloso di e bon notisia.

Den e tempu ei, Nikolai Chimpoesh, di Moldavia (Moldova), a ser nombrá superintendente di sirkuito i a sirbi pa kasi 30 aña. Nikolai no solamente tabata bishitá diferente kongregashon pero tambe e tabata sòru pa kopia i distribuí nos publikashonnan. E outoridatnan a tuma nota di loke e tabata hasi. P’esei, Eduard Varter a konseh’é: “Ora e outoridatnan interogá bo, bisa nan onestamente ku nos ta haña nos publikashonnan for di nos sede mundial na Brooklyn. Wak e agente di KGB stret den su wowo. Bo no mester tin miedu di nada.”—Mat. 10:19.

Poko despues di e kòmbersashon akí, e agentenan a manda yama Nikolai na e ofisina prinsipal di KGB na Kant. Nikolai a konta loke a pasa: “E agente a puntra mi di unda nos ta haña nos publikashonnan. Mi a bis’é ku nos ta haña nan for di Brooklyn. E no tabata sa kiko e bisa mi. El a gewon laga mi bai i no a manda yama mi nunka mas.” E Testigunan yen di kurashi ei a sigui plama e bon notisia ku koutela den e region kaminda mi tabata biba, e parti nort di Kirgizstan. Ora ku por fin mi famia a tende e bèrdatnan presioso tokante Yehova na 1981, mi kasá, Mairambubu, a tend’é promé.

E BÈRDAT A YEGA NA MI FAMIA

Mairambubu ta bini di Naryn, un region di Kirgizstan. Un dia, den ougùstùs 1974, el a bishitá mi ruman muhé. Einan nos a topa pa promé biaha. Mi a gusta Mairambubu mesora, i nos a kasa e dia ei mes.

Na yanüari 1981, ora Mairambubu tabata den bùs pa bai un marshe lokal, el a tende e palabranan ku nos a menshoná na komienso di e artíkulo akí. Mi kasá kier a sa mas, pues el a pidi e señora su nòmber i adrès. E señora a bisa ku e yama Apun. Pero komo ku e trabou di Testigunan tabata prohibí den e dékada di 1980, e tabata kouteloso. Pues, en bes di duna su adrès, el a pidi Mairambubu nos adrès. Mi kasá a yega kas masha emoshoná.

Mairambubu a bisa: “Mi a tende algun kos maravioso. Un señora a bisa mi ku pronto hende lo no muri mas. Asta bestianan salbahe lo bira mansu.” Pa ami, loke el a bisa a zona manera un fantasia. Mi a kontest’é: “Laga nos warda te dia e bishitá nos pa e duna nos e detayenan.”

Apun a bishitá nos tres luna despues. Mas despues, el a bishitá nos huntu ku algun di e promé Testigunan ku tabata kirghiz. E ruman muhénan akí a siña nos e bèrdatnan asombroso tokante Yehova i su propósito pa humanidat. Pa siña nos tokante Beibel, nan a usa e buki For di paradijs perdí te na paradijs recobrá.a I komo ku ta ún ehemplar so tabatin na Tokmok, nos a kopi’é na man pa nos mes.

Un di e promé kosnan ku nos a siña tabata e profesia na Génesis 3:15, ku lo kumpli mediante Hesus, e Rei Mesiániko di Dios. Esei ta un mensahe importante ku tur hende mester tende! Esaki ta duna nos mas motibu ainda pa bai prediká. (Mat. 24:14) No a tarda muchu ku bèrdatnan di Beibel a kuminsá kambia nos bida.

REUNION I BOUTISMO DURANTE PROHIBISHON

Un ruman hòmber na Tokmok a invitá nos na un kasamentu. Ami ku mi kasá a ripará mesora ku e Testigunan tabata diferente. No tabatin alkohòl na e kasamentu i tur kos a kana nèchi. Esaki tabata totalmente diferente for di otro kasamentu ku nos a yega di bai. Einan, hopi biaha e invitadonan tabata bira fuma, komportá nan mes malu i papia palabra malu.

Nos a asistí tambe na algun reunion di e kongregashon na Tokmok. E reunionnan akí tabata den mondi, si wer tabata bon. E rumannan tabata sa ku polis tabata opservá nos, p’esei nan a pone un ruman hòmber pa vigilá. Den wenter, nos tabata reuní den un kas. Algun biaha, polis a bini na e kas i tabata ke sa kiko nos tabata hasi. Tempu ami ku Mairambubu a batisá na yüli 1982 den e Riu Chüy, nos mester tabata kouteloso. (Mat. 10:16) E rumannan tabata bini den gruponan chikitu pa reuní den mondi. Despues nos tabata kanta un kantika di Reino i skucha e diskurso di boutismo.

NOS A PROBECHÁ DI E OPORTUNIDAT PA AMPLIA NOS SIRBISHI

Na 1987, un ruman hòmber a pidi mi pa bishitá un persona interesá ku tabata biba den e pueblo di Balykchy. Pa mi yega aya, mi mester biaha kuater ora den trein. Despues ku nos a bai Balykchy vários biaha, nos a haña sa ku tabatin hopi hende interesá einan. Tabata bisto ku esaki tabata un oportunidat pa amplia mi sirbishi.

Ami ku Mairambubu tabata bai Balykchy hopi biaha. Kasi tur wikènt nos tabata keda einan, bai sirbishi i tene reunionnan kristian. Mas i mas hende tabata pidi pa nos publikashonnan. Nos tabata karga nos publikashonnan for di Tokmok den un mishok, un saku pa transportá batata. Tur luna nos tabata hiba dos saku yenyen di publikashon, i esei no tabata sufisiente. Nos por a asta prediká den trein durante nos biahe ida i buèlta pa Balykchy.

Na 1995, un kongregashon a ser formá na Balykchy, apénas ocho aña despues ku nos a bishitá e pueblo ei pa promé biaha. E  añanan ku nos a biaha entre Tokmok i Balykchy a kosta hopi plaka. Kon nos a logra bai aunke ku nos no tabatin hopi rekurso? Un ruman hòmber regularmente tabata duna nos sèn pa kubri loke tabata falta. Yehova a mira ku nos tabatin e deseo di hasi mas den nos sirbishi, i el a habri “bentananan di shelu” pa nos. (Mal. 3:10) Pues, no tin duda, tur kos ta posibel pa Yehova!

OKUPÁ KU FAMIA I SIRBISHI

Na 1992, mi a ser nombrá ansiano, e promé ansiano kirghiz den e pais. Den nos kongregashon na Tokmok a presentá oportunidat pa hasi mas den Yehova su sirbishi. Por ehèmpel, nos tabata studia Beibel ku hopi hóben kirghiz na diferente skol tékniko. Awe, un di nan ta sirbi den e Komité di Sukursal i dos otro ta pionero spesial. Ademas, nos a hasi esfuerso pa yuda otro hende na nos reunionnan. Na kuminsamentu di dékada di 1990, tantu nos publikashonnan komo nos reunionnan tabata na ruso. Pero komo ku hopi ruman tabata papia kirghiz, mi tabata tradusí e reunionnan pa nan. Esei a yuda nan komprondé e bèrdat mihó.

Ami ku Mairambubu tabata okupá tambe ku lantamentu di nos yunan. Nos tabata bai reunion ku nos yunan i sali den sirbishi ku nan. Tempu nos yu muhé, Gulsayra, tabatin apénas 12 aña, e tabata gusta papia tokante Beibel ku hende ku e tabata topa riba kaya. Ademas, nos yunan tabata gusta memorisá tekstonan di Beibel. Nos yunan, i despues nos ñetunan, tabata semper okupá ku aktividatnan di kongregashon. For di 9 yu i 11 ñetu ku ainda ta na bida, 16 di nan ta sirbi Yehova òf ta bai reunion ku nan mayornan.

KAMBIONAN REMARKABEL

Nos kerido rumannan ku a kuminsá ku e trabou di prediká den nos área den dékada di 1950 lo keda asombrá si nan por a mira kuantu kambio nos a eksperensiá. Por ehèmpel, desde dékada di 1990, nos a haña mas libertat pa prediká e bon notisia i pa reuní den gruponan grandi.

Na 1991, ami ku mi kasá a asistí na nos promé kongreso. Esei tabata na Alma-Ata, awor konosí komo Almaty, na Kazakstan. I na 1993, e rumannan na Kirgizstan a tene un kongreso na e Stadion Spartak, na e stat di Bishkek, pa promé biaha. E rumannan a tuma un siman pa limpia e stadion promé ku e kongreso. E direktor a keda asina impreshoná ku el a laga nos usa e stadion grátis.

Na 1994, nos tabatin un otro logro históriko ora nos a haña nos promé publikashon imprimí na e idioma kirghiz. Awor regularmente un tim di tradukshon na e sukursal na Bishkek ta tradusí nos publikashonnan na kirghiz. Na 1998, Testigunan di Yehova a haña rekonosementu legal na Kirgizstan. E pueblo di Yehova a sigui krese, i awor nos ta mas ku 5.000 publikadó. Awor tin un total di 83 kongregashon i 25 grupo na idioma chines, idioma di seña ruso, ingles, kirghiz, ruso, turko, uigur i uzbeko. Tur e rumannan stimá akí di diferente pais ta sirbi Yehova huntu den union. Ta Yehova a hasi tur e kambionan remarkabel akí posibel.

Ademas, Yehova a kambia mi bida. Mi a lanta den un famia di kunukero pober i a bai skol sinku aña so. Sinembargo, Yehova a usa mi pa sirbi komo ansiano i pa siña e bèrdatnan presioso di Beibel na hende ku tabata mas studiá ku mi. Sí, Yehova ta hasi kosnan ekstraordinario. Mi propio eksperensia ta animá mi pa sigui prediká lealmente tokante Yehova, pasobra p’e “tur kos ta posibel.”—Mat. 19:26.